مع الخيل يا شقرا

[بومحمد 1]

السلام عليكم ورحمة الله وبركاته


من سوالف اللي مبتلين الصقارة ومشقين أنفسهم بالمقانيص
سنة من السنين خاوانا رجال أنا وربعي والله والنعم فيه وبالجميع لكنه بعد ما طلع معنا كم طلعه وشاف هدد الحبارى عزم يشرى طير وهو ما بعد شل طير على يده في حياته
قالوا له الربع يا فلان إركد .. تعلم أول وشلون تنقل الطير ومن ثم تعلم وشلون تقنص
المهم الرجال ما سمع الكلام ويروح ويشري له هاك الطير الصايد وكان الطير مدعي يعني جاهز
ومن أول طلعه عقب ما شرى الطير وفقنا الله أنا واخوياي ونعين لنا حباره ونحلف عليه بالهدد
ولله الحمد وفقه الله وصاد طيره وتنومس ، عقبها الرجال استسعر ما عاد يقعد بالديرة كل ما اتصلنا عليه ولا هو قانص ... الثمرة عقب اسبوع سير علينا في المجلس عقب صلاة العشاء
اسأله واحد من الربع علومك يا فلان وعلوم الحباري ، قال : والله علومي ولله الحمد تسر من يوم ما قنصت ما عينت جرة غير اليوم وقصيتها ولقيتها طايرة
قلت وين عينتها يا فلان ، قال بذاك المكان ، ومن نهار ثاني وأنا أطلع لها ، يوم جيت الموقع ولا هاذي جرت خوينا وهاذي جرت الحبارة لكن جرت خوينا تقص الحبارة عكس
بسم الله الرحمن الرحيم .. وشقوم خوينا يقص الحباره عكس هو يبي يشوف ميقاعها ولا وش العلم
المهم مشيت مع جرت موتره إلين وصلت الى ميقاع الحباره وعين جرته وهو نازل على مطيرها وعقبها ولا جرته وهو محرك وطالع من الموقع ، وأعود إلى مكان أول ما طاح على الجرة وامشي معها شوي ولا هذا هي جرت الحباره تحبري (تصنقل) وهذا هي تتخشش منه وهذا جرتها وهي هارب وهذا هي يوم قامت تحبري وتخشش منه وهذا مخمارها وهذا مقامها من المخمار وهذا ممشاها في الليل ولا هاذا مطيرها 0
العلم الوكاد إن صاحبنا الله يهدينا وياه كان يقص الحبارى خلف
وأعود واتصل عليه وأعلمه بالعلوم ، ويقوم الله يجزاه خير ويحلف إنه ما عاد يشل الطير على يده ولا عاد يقنص إلا كانه متفرج
((رحم الله إمرء عرف قدر نفسه))
قلت عز الله إنك فكيت عمرك من الشقى اللي لا هو لك ولا أنت له
وسلامتكم

[راعي الشلفاء]

السلام عليكم
ياكثر الي بالين الصقاره على قولت القائل ( البس العود ؟؟؟؟؟؟؟؟؟؟

[الطبشي]

وانا اخوك ما احد يولد عالم وتعلم الصقاره وعلوما تسر الخاطر والرجال خويك هاوي وانت حطمت معنوياته والمفروض انك تشجعه ما تدور عليه الغلط لاكن الله يوفق الجميع .......اخوك الطبشي

[@قرناص@]

,,

تسلم ع الموضوع..

والمفروض يتعلم اول منكم يالذيابه ثم ينقلي الطير..:good:

شآكرلك يآ الغالي,,:)

,,

[بن عويان]

هههههههه مشكووورو ما قصرت على السالفه

[سنجااار]

وانا اخوك ما احد يولد عالم وتعلم الصقاره وعلوما تسر الخاطر والرجال خويك هاوي وانت حطمت معنوياته والمفروض انك تشجعه ما تدور عليه الغلط لاكن الله يوفق الجميع .......اخوك الطبشي
صح لسانك يالطبشي المفروض شجعته ماتحطمه الله يهديك

[بومحمد 1]

راعي الشلفاء


مرحباً بك وشاكر مرورك


أخي/ الطبشي
ما أدري على أي أساس تقول إني حطمت معنويات الرجال
أنت بالأول قرأت موضوعي زين
هلى قرأت هذه العبارة


قالوا له الربع يا فلان إركد .. تعلم أول وشلون تنقل الطير ومن ثم تعلم وشلون تقنص


على العموم شاكر مرورك
والله يكفينا وإياك شر العجله

[صقار البحرين]

صح لسانك يالطبشي المفروض شجعته ماتحطمه الله يهديك




اتمنى ان يرجع ويشل الطير مره ثانيه ويستفيد منك ومن باقي الصقاقير ولا هنت على طرح القصه

[بومحمد 1]

أخي / @قرناص@
حياك الله وشاكر مرورك


أخي / بن عويان
مرحباً بك والسوالف واجد بس مين اللي يتعظ


أخي / سنجااار
حيالك الله وشاكر مرورك ، ليتك تقرأ ردي على أخي / الطبشي

[الرّمااااي]

السلام عليكم صدق اخوي الطبشي المفروض انك ماتحرج الرجال والمفروض انه مايحلف تري مو عيب ان الواحد مايعرف كل واحد يتعلم يعني انت طلعته مايفهم شي وغشيم والرجال قال مالي ومال هالكار احرج نفسي وبس
والله اعلم

[خلوي]

نفس السالفه, فيه واحد من أخويانا توه متعلق في الصقاره, المهم قانصين حول قيصومة فيحان, وكان عندي ثر حبارى قديم شوي , ماخذيت الا خوينا يصيح علينا أبشرو بثرها جديد, انا تداركت الموقف وقلت لاخويانا , أنتم أفنصوا في فالكم وانا بفزع يمه وبردلكم العلم, المهم كان بيني وبينه 25 كيلو, لما وصلت له لا ولقاه يقص ثر سودا الجناح(دحاريج):d

أنا علمته انها سودا الجناح, ولا بغيت أحرجه قدام أخويانا ولما رجعنا قلتلهم لقيناها اتقص ومهدوود عليها ;)
وحياتك من بعدها كل ماطاح على ثر راسلني وقالي انه مبنشر وذا جيته وطلع فعلاص ثر حبارى صوتنا على الشباب

[بومحمد 1]

يا جماعة الخير
اللي يقول أني غلطان وحطمت معنويات الرجال

يا إنكم أنتم الغلطانين ، يا أنا بالفعل غلطان مثل ما قلتوا

بس يالربع ..
هو أنا اللي شرت عليه إن يشري طير وهو ما يعرف له ؟
ولا أنا اللي قلت له يركب سيارته ويروح يقنص لحاله وهو ما يعرف جرت الحباره هي رايحه ولا جايه ؟
ولا هو بأصغر عيالي عشان أحلف عليه ما يشل الطير ؟

إذكروا الله وصلوا على النبي

وإقرؤا الموضوع زين

[شنكارuae]

بيض الله وجهك على السالفه بس ليتك شجعته

[بومحمد 1]

زبدة السالفه للي عنده صعوبه في فهمها
هي رسالة مبطنة لكل شخص جديد على الصقارة إنه ما يطير في العجه
وإن ما كل من شرى له طير وطلع للبر ... قنص وصاد
يجب على كل شخص توه يتولع بالطير والمقانيص إنه يتعلم من أهل الخبره
حفاظاً على ماء وجهه قدام الرجاجيل وأيضاً حفاظاً على حلاله
أرجوا إن الرسالة وصلت

[بومحمد 1]

أخوي/ شنكار uae

الله يبيض وجهك دنيا وآخره

أما مسألة إني أشجعه ، فكان اتصالي بالرجال وإعلامه بالخطأ الذي وقع منه هو لكي يتدارك خطأه
أما مسألة إنه يحلف ما يشل الطير فهذا أمر راجع له ، ولو كان هو يحب الطير فعلاً ما كان حلف بس اللي يبدوا لي إن الرجال أبو طريبه 0

[الطبشي]

الله لا يهينك اخوي ابو محمد انا والشباب ما نلومك انت اخو عزيز وهذي شرهه ولا يشره عليك الا الي يعزك ..... وتقبل مروري

[قشاع الرمث]

السلام عليكم ورحمة الله وبركاته


قصه غريبه نوعا ما لانه يقص بالعكس

يمكن انه سامع بنظريه قص الكروان بالعكس تلقاه

وعادي هذا رجال توه بدا يصقر

البلا لامن جاكواحد يصقر له سنين ثم سوا سالفة ما تنتسوا .

ويامال العافيه .

[بومحمد 1]

أخوي الطبشي
يعلم الله إني أحبك وباقي أعضاء المنتدى في الله


ولم أطرح الموضوع هذا للإستهزاء بالصقاقير المستجدين
وإنما لتبيان الأخطاء التي يقع فيها المبتدأ الذي يستعجل الصقاره والمقناص
ولا يسمع شور من يحبون له الخير
ودليل ذلك أني وباقي زملائي آثرناه على أنفسنا وأعطيناه الهدد مع قلة الحبارى
ولا لنا فضل .. الفضل لله سبحانة اللي جعلنا نلقاها ونتجمل مع هالرجال
لك ولباقي الأخوة مني التحية

[قشاع الرمث]

السلام عليكم ورحمة الله وبركاته


قصه غريبه نوعا ما لانه يقص بالعكس

يمكن انه سامع بنظريه قص الكروان بالعكس تلقاه

وعادي هذا رجال توه بدا يصقر

البلا لامن جاكواحد يصقر له سنين ثم سوا سالفة ما تنتسوا .

ويامال العافيه .

[المزروعي]

كلام أخونا بومحمد 1 صحيح !! و على قولة القايل شورك على من لا يشيرك هباله !! . كلنا بدأنا بدايه ضعيفه في الصقاره لكن إن كان معاك رجال صقار و هو صديق و الله ما تعدى شوره أبد و حتى لو شريت لي طير بتكون أغلب روحاتي معاه أتعلم منه . للأسف ذا وقت أصبح الرجال إذا نصحه خويه نصيحه يفكره حاقد عليه . و على قولة بومحمد1 الرجال توه شال الطير وراح لحاله يدور حباره الله المستعان . و هو ما يعرف ثرها إن كانت مروح أو تدرز أو ناير !!!!! الشغله مش أثر حباره وبس . والله العظيم أتصل لي واحد من الربع و قالي عنده سبع كراوين و هو يبعد عني 75 كيلو و قلت له أنت متأكد قالي أشوفن شوف العين ! المهم روحت صوبه و طلعن دحاريج !!

[جارح العين]

قصه مفيده جدا
وظروري الواحد يعلم قبل لينقل الطير
والله يعطيك العافيه عالطرح

[لعّاب المنايا]

الله لا يهينك قصه جدا رااائعه وخاصه للمبتدئين ,, ينتبه لا يتهوّر وما فيها شي لا سأل موب بكره
ينكب نفسه قدام الرياجيل ,,

[أبوإبراهيم1]

قلت عز الله إنك فكيت عمرك من الشقى اللي لا هو لك ولا أنت له
وسلامتكم
كلامــــــــــــــــــــــــ سليمـــــــــــــــــــــــ

[صحراوي uae]

بيض الله وجهك
مشكووووووووووووووور

[بومحمد 1]

قشاع الرمث : شاكر مرورك

المزروعي (ابومحمد) : صح لسانك
(شورك على من لا يشيرك هبالة) حكمة والله إنها تنوزن بالذهب

جارح العين : الله يعافيك وخليك لعين ترجيك

لعًاب المنايا : هذا والله الكلام الصحيح لا منك ناديت خوياك وعضرتهم الوعر 50 كيلو ثم طلعت الجرة مامن لون

ابوبراهيم : العين ما تعلى على الحاجب
شاكر مرورك ولا تنسانا من الدعاء الله يجزاك خير

صحراوي uae : ووجهك دوم أبيض إن شاء الله من الإيمان وطاعة الرحمن

[ناصر الحمد]

الله يبيض وجهك يالغالي على هالسالفه

الي المفروض أن كل مبتدى يعتبر منها

[طارق الحربي]

الرجال اخطأ وانت علمته بخطئه

والمفروض عليه انه يتعلم من الخطأ مايحلف انه ماينقل الطير

وانت المفروض ماتنقد عليه

رأيي

[راعي شلهوب]

صادق يابو محمد
والناس ذا الايام تزعل انا عندي حول ذا السالفه بس بدل الحباره
وانت بكرامه والي يقرى (ثعل) داعيني عليه واحد يقول حباره

[أبوتركي]

زبدة السالفه للي عنده صعوبه في فهمها

هي رسالة مبطنة لكل شخص جديد على الصقارة إنه ما يطير في العجه
وإن ما كل من شرى له طير وطلع للبر ... قنص وصاد
يجب على كل شخص توه يتولع بالطير والمقانيص إنه يتعلم من أهل الخبره
حفاظاً على ماء وجهه قدام الرجاجيل وأيضاً حفاظاً على حلاله

أرجوا إن الرسالة وصلت



هذا الكلام وبس ،،، وبيض الله وجهك يابومحمد

[][ الأصيل ][]

والله يالغالي
زين اللي فك عمره وتركها
وهذا يبي له دروس منكم
لازم تعلمونه لانه ماينولد عالم بالصقاره
ياملا العافية يابو محمد
وكثر الله من امثالك
احترامي

[قنيص غبر]

السلام عليكم .. انا ضد مع اللي يقول انه الصقاره لكل احد .. يا ناس الله عرفوه بالعقل الصقاره والطيرله ناسه .. مثل ما للبحر له ناسه وخبرائه .. الصقاره لازم تكون هناك اشياء من حولك ماثره فيك . مثل الوالد او الاخوان او ربعك المحيطين فيك او انها موروث في العائله ..
استحلفكم بالله يا جماعه .الصقر يعتبر من اشرف الطيور واكرمها .. حرام انشوف منها اللي مجني عليه .. اذكر واحد من الاخوان الله يهديه كان يطلب في خيمة شراء الطيور طير ويوم قلتله ابشر قالي بان الطير يريده للزينه !! يعني كل من عجبته السالفه قال بنقل طير يوم ويومين وبتركه .. ان ماكان سهرت عليه وعلى تربيبه فحرام والله .. . ..
دخيلكم اريد منكم بس تفكرون في هذي الابيات حتى لا تجنون على الصقاره بالاعدام ومن يقول عطو الناس كلهم فرصه بان يشيل طير .. اقوله بانك جنيت لعالم الصقاره
يا طير ما حدك نصيبك على خير ()() وراك مسجون بوسط الغمارة

حسبي على اللي عزروا فيك تعزير ()() تكفخ ويصلاك الحديد بحراره

حشرت وحوش البر حتى العصافير () ()من يوم دور من وراها تجاره

مار الغشيم من الولع غير تدبير ()() دايم عماره صاير في دماره

يا ناقلين الطير من غير تبصير ()() حصيلكم منه التعب والخساره

اوفوا حقوق الطير ولا اتركوا الطير ()()لا تظلمونه ياجداد الصقاره

[أبو أمين]

السلام عليكم .. انا ضد مع اللي يقول انه الصقاره لكل احد .. يا ناس الله عرفوه بالعقل الصقاره والطيرله ناسه .. مثل ما للبحر له ناسه وخبرائه .. الصقاره لازم تكون هناك اشياء من حولك ماثره فيك . مثل الوالد او الاخوان او ربعك المحيطين فيك او انها موروث في العائله ..
استحلفكم بالله يا جماعه .الصقر يعتبر من اشرف الطيور واكرمها .. حرام انشوف منها اللي مجني عليه .. اذكر واحد من الاخوان الله يهديه كان يطلب في خيمة شراء الطيور طير ويوم قلتله ابشر قالي بان الطير يريده للزينه !! يعني كل من عجبته السالفه قال بنقل طير يوم ويومين وبتركه .. ان ماكان سهرت عليه وعلى تربيبه فحرام والله .. . ..
دخيلكم اريد منكم بس تفكرون في هذي الابيات حتى لا تجنون على الصقاره بالاعدام ومن يقول عطو الناس كلهم فرصه بان يشيل طير .. اقوله بانك جنيت لعالم الصقاره
يا طير ما حدك نصيبك على خير ()() وراك مسجون بوسط الغمارة

حسبي على اللي عزروا فيك تعزير ()() تكفخ ويصلاك الحديد بحراره

حشرت وحوش البر حتى العصافير () ()من يوم دور من وراها تجاره

مار الغشيم من الولع غير تدبير ()() دايم عماره صاير في دماره

يا ناقلين الطير من غير تبصير ()() حصيلكم منه التعب والخساره

اوفوا حقوق الطير ولا اتركوا الطير ()()لا تظلمونه ياجداد الصقاره

أنا رأي الصقارة للجميع بشرط يقدرها ويرفع من شانها ويحشمها عن الأمور الرديئة

[الحبيليص]

يعطيك العافيه
القنص تعب وهوايه ووناسه

[طير الهقاوي]

ياما وياما من الغرابيل على الصقاره وهلها بس صبرن جميل والله المستعان

[صقااارالدمام]

تسلم على الموضوع والمفروض خليت الرجال يتعلم .... تقبل مروري

[F J]

جل من لا يخطأ

[رامى السيد]

العلم هبه من الله يسال عنها العبد يوم القيامه ماذا فعل به واهل افاد غيرة به ام لا ...........

[شنوان]

مرحبا اخي ابومحمد 1
سؤل لك يابومحمد وعموما ايضا لباقي الصقاقير
ليش حنا نسمي الصقاره شقى وهي احلى طرب وناسه عندنا
(يومك تقوله عزالله فكيت عمرك من الشقى)
هذا للمداعبه يابومحمد المشكله حتى انا اقوله هل تعرف السبب

[عاشق البسيتين]

ماصار الا كل خير اهم شي انه صاد خلاص ماعاد غيرها شي والله يوفقه في حياته ومشكور اخوي على طرح القصه

[ديزب]

ذكرني عنوانك بقصيدة لأحد الشعراء يقول فيها :
بعض العرب شقراء وشقراء مع الخيل === من وين ما هب الهوى جايز(ن) له
وبعض العرب من غير بندق ودربيل === ما له سلاح الا الرموش المظلة
وبعض العرب لا والله الا تهاويل === مهما عقدت العقد لازم يحله
---------------------------------------------------------[/b]

[راعي مطروح]

مشكور ماقصرت على السالفه ولا يوجد تعليق

[ذراع الذيب]

هلابك ياخوي بو محمد
مشكور على القصه الممتعه المشوقه
وفي نفس الوقت فيها تجارب ونصح للمبتدئين
شوفوا اخونا في الله نصحوه بالتعلم والله يستر عليه ماحد يلومه
شاف العناء ماحد يطلع السلم الا من البدايه
ومااقول غير الله يجزاك خيرعلى
ماسويت والسلام عليكم
ورحمته الله
وبركاته