قرب رمضان تعالو قولولي وش تحبون فطوركم يكون

[هبووب الشمال]

مرحبا كيف احوال الطباخين...ياطويلين العمر...ابي اشوف وش احب الاكلات اللي تحبون تاكلونها برمضان الكريم بالتفصيل يعني مو تقول سنبوسه وتكست سمبوسه محشية بايش ...
انا ببدا بنفسي
اللقيمات-السمبوسه بلحم العجل-والسمبوسه بالجبن-سبرينغ رول-والشوربه-وحلا والقهوه واللبن والتمر وقشطة الصافي هذا شي مهم دايم على السفره
الطبق الرئيسي هو اللي ابدل فيه
نشوف باقي الاعضاء بمكشات وش يحبون يفطرون..لان من جد انتم يالرجال مزاجكم صعب....هالموضوع طرحته حتى استفيد لو صار عندي عزيمة فطور رجال اعرف وش يحبون ياكلون بالتوفيق

[أسامي]

اللهم بارك لنا في رجب وشعبان وبلغنا رمضان
موضوع ممتاز وفي وقته
بارك الله فيك

[عاشق السيل]

ماشاء الله عليك ياهبوب الشمال كل هذا على السفرة ؟؟!!!!

طيب يمديك تاكل كل هذا وتلحق على الصلاة بالمسجد ؟؟ ههههههههههههه

عموما أنا فطوري مختصر جدا : تمر وشوربة مع لحيمات غنم ( علشان الوضوء ) وإلا أنا أحب الحاشي !! ولقيمات وكاس موية ،،،،، وإذا مافيه شوربة لفيت على دلة القهوة !!

وبعد المغرب شاهي وحبتين فطاير شغل البيت ،،

وبعد التراويح بساعة تقريبا صحن رز مع لحم أو دجاج وسنبوسة وتوت وسلطة ومثلك خابر !!!!

والسحور (( وهذا أنصح فيه الجميع )) كاس لبن مع تمر وبعدها كاس موية فقط ،، واللي يجربها يبي يدعيلي طول رمضان !!

وأشكرك أخي على الموضوع الممتع وتقبل مروري يالغالي .....

[حق الفيتو]

الحمد لله
رمضان السنه هذي رجيم ع شان اطلع بالنيو لوك <<وش راكم اعرف اقول حركك ناس كول

فطوري حبتين رطب و شوربة و عليها الي بعد بعد التراويح والله يعين نشوف نصمل والا لا


اقترح يوقف القيم بنهار رمضان تعرفون كود نصوم زين

[عين الداب]

مشكووووووور على الموضوع
فطوري عند المغاتير واذا في الرياض خير الله واجد طب السفره وتخير
اول شي قهوه زياده عويدي وتمر خلاص من تمر اشيقر وسمن بري مع التمره وطاسة حليب خلفات اذا صرت عند البل والفطور الثاني حميس ومقلقل من هرفي لباني

[الكهف1]

مشكورين
رطب وجبنية ودلة قهوة بعدها الصلاة
بعد الصلاة اكمل الجبنية مع القهوة والرطب حتى الصلاة
بعد التراويح شربة(اول رمضان وبعدها تختفي)وتبولة او سلطة مع شي خفيف محشيات؟؟
والسحور الساعة 2 دايم كبسة لازم
وسلامة روسكم

[اول 111]

الله يبلغنا رمضان

[عبّار]

قبل الصلاة رطب + قهوة زيادة هيل + واذا بغيت اتحلى حبتين لقيمات "العلالي" بالدبس:)
بعد الصلاة شوربة شوفان و اذا كان و لا بد صحن سلطة "فتوش"
و بعد التراويح اتريض ناوي انزلي كم كيلوا هالسنة :d
بس يالله الصبر لأن المغريات في رمضان كثيرة وانتم اهل الدراية:)

[آمري يا كامري]

اللهم بلغنا رمضان وجعلنا من صوامه وقوامه أما الفطور فهو تمر سكري مع قشطة الصافي والقهوه الخولانيه والقيمات وبعد صلاة التراويح كبسه ولا مكرونه

[هبووب الشمال]

عاشق السيل قل ماشاء الله ههههههههههه
بعدين انا ام العيال ولابد اطبخ ارضاء لجميع الاطراف والا لو علي شوربه وتميره وكوب لبن وكم حبة سمبوسه لحم بس

[عاشق السيل]

ماشاء الله تبارك الله وعسى مهابيطه العافية ،،،،

بس شوربة ولبن ؟؟!!؟؟ ماتجي !!!!!!!!!!!

[ابو تمام]

اللهم بلغنا رمضان واعنا على صيامه وقيامه واجعلنا من المقبولين

اهم شي عندي التمر والماء والباقي عادي وان حصل مع التمر زبادي اوقشطه ياسلام

[ابوحمد 10]

اللهم بارك لنا في شعبان وبلغنا رمضان
فطوري الله يسلمكم جميعآ
تمر سكري او خلاص
قشطه
قهوه
فيمتو
شوربه مع لحيمات هريفي أو حاشي
سمبوسه + لقيمات
والله يوفقنا للصيام والقيام

[مطلاع]

مشكور ه اختي{هبووب الشمال} على الموضوع
وانا اقول حطي كل شيء تعرفينه قبل صلاة المغرب’
واللي تعرفينه واللي ما تعرفينه بعد صلاة العشاء
وبكذا راح يدعون لك بصيام مقبول وذنب مغفور
اللهم بلغنا رمضان وصيامه وقيامه وتقبل منا .
{السيف ما يزهى سوا كف سياف
والخيل دون حصانها مستخــــيره}
اخوك:مطلاع

[راعي الصطحه]

شكرا على التعليمات شهويتنا في السفره


وتقبل تحياتي

[فتى السمار]

اللهم بارك لنا في شعبان وبلغنا رمضان

تمر خلاص الاحساء + قشطة المراعي واحيانا سمن بري مع دخن + قهوه + عصيرفيمتو اوسن كويك

بعد صلاة المغرب سنبوسه جبن او لحم + لقيمات بالعسل

بعد صلاة التراويح شوربه + مكرونيه

السحور كبسة لحم اودجاج

[naif 888]

الحمد لله الخير واجد
بس القمري له طعم اخر على الفطوووووووووووور

[هبووب الشمال]

ياحليلكم كان هذي طريقتكم بالفطور....انا احط اول شي القهوه واللبن والحليب والتمر السكري وقشطة الصافي وحلا خفيف مع التمر للي ما يشتهون التمر كثير

بعد صلاة المغرب احط فطوري كله...بس زين في ناس تصبر لين بعد التراويح

السحور اكيد لابد من وجبة يتخللها الرز..اما كبسه او مقلوبه او مشخول او برياني.. الخ...والله السحور اطبخه بس لابو العيال والعيال والا انا من وجب علي الصيام ما تسحرت الا اربع مرات بحياتي معرف انام وانا ماكله شي ثقيل اكتفي بلبن و تمر او لبن وتفاحه ويارب لك الحمد

الفطور ياليته بالبيت كان اهون لصار علي الدور بافطار العزابيه ..لكن تعال انقل هالطبخات للاستراحه سالفه لان ماشاء الله تبارك فوق 15 شخص..وتعرفون العزابيه احسهم مزاجيين متعودين على اكلات المطاعم ..

[هبووب الشمال]

ابو تمام اللبن عشان التمر...والا مشروبي المفضل الفيمتو

[ضحية بيشة]

الله يبلغنا الشهر وجميع المسلمين ويجعلنا من المقبولين ويجيب دعوانا ...ويرحم موتانا ويتقبل الله الصدقات

والزكاة ..الله يلطف بحال المسلمين والله يااخوان اوصيكم بحث احبابكم بالتمسك بالعبادة والبعد عن السهر

السنه هذي رمضان في الإجازة والله يعين على المراهقين والسهر ومن يترصد لهم من المسيحيين واعوانهم

بالمسلسلات الهابطه والموسيقى وتجريد رمضان من العلاقة بالله عز وجل وربطة بالمسلسلات والسهر

ســلوم الفطور تختلف كثير من منطقه الى منطقه وم شخص لاخر بصراحه مااحب انعزم على الفطور

الفطور وجبه حساسة اذا عزمت احد لازم ترضيه ....خاصه اللي يشتغل اما الكسره اللي ينام لين المغرب

حط له نواشف تكفي ههههههه جعل مهابيطه العافيه عليكم جميع ......

انا ممنوع عن معظم الوجبات فقط وجبات بسيطه اللي مسموح لي بها ....لاتنسسوني من دعائكم اخواني

[القطاوي 2008]

اللهم بلغنا رمضان واعنا على صيامه وقيامه واجعلنا من المقبولين

[dim106]

أنا عن نفسي أختار:
ثلاث تمرات يبيس.
وبعدها ثلاث فناجيل(صينية كبار) قهوة متروسة إلى الخط العلوي.
وبعدها السمبوسه بلحم العجل والسمبوسه بالجبن ولا تكثر..
بعدها كاس لبن

ويالله يمدي على المسجد.

تحياتي

[عاشق ربيع نجد]

فيمتتتتتتتتتتتتتتتتتتتتتتتتو وسمبوسسسسسسسسسسسسسسسسه

[اذكر ربك]

سكري مكنوز وحليب بااااااارد ....



سبحان الله وبحمده سبحان الله العظيم

[الكونترولCONTROL]

ما شاء الله تبارك الله ,,,, موضوع حلو جدا و في وقته
بلغنا الله و جميع المسلمين صيامه و قيامه ,,,, أحب الفطور الجماعي و خاصة العائلي ( راحت ايامه ) ,,, و لو على تمر و ماء
لكن أكثر ما أفطر بالبيت لظروف التراويح ... و أما الطعام الذي أحب للعشاء لو أفطرت بالبيت بعد المغرب أو بعد التراويح أحيانا :ـ لقيمات - شوربة خفيفة جدا - سمبوسة - فيمتو

[ابوالعز4800]

والله بالعادة اطب واتخير اللهم لك الحمد لكن هالسنة شكلها تمر وقهوة وبعد الصلاة فول وتميس(عزابي)

[عاشق تمير]

الله يبلغنا رمضان وجميع اخواني المسلمين وبالنسبه للفطور في رمضان والله كله له طعم خااااااااااااااااص

[منزلي الصمان1]

اولا/ أصب كاس القهوة علشان يبرد قبل الاذان 0

ثانيا/ سبع تمرات وبس
بعد الصلاة أكمل القهوة الين تسورب الدله همين ابدا بالشوربة وحبتين سمبوسة ((جبن كيري))

وصلى الله على محمد
______________ أنا آكل لأعيش ولست أعيش لأكل __________________

[هبووب الشمال]

طيب وش افضل شوربه عندكم؟
شوربة الجريش في طريقتين يا مع اللبن(لبن الربيع طبعا بس لاحظت انه منقطع من سنه بالشرقيه والشمال هل بالرياض لازال موجود دايم ودي ادق واسال وانسا) فتطللع الشوربه بيضاءاو بالصلصه مع مرقة اللحم فتطلع شوربه حمراء
شوربة الشوفان (الكويكر)
شوربة الهريس نفس طريقة الجريش
شوربة العدس
وش غيره من الشوربات ما ذكرته

[ابو صعب]

اللهم بارك لنا في شعبان وبلغنا رمضان

[مكشات com]

اللهم بارك لنا في شعبان وبلغنا رمضان

أولا:التمر والقهوة ولقيمات وعصير

بعد الصلاة: شوربة وسمبوسه أو فطائر ومكرونة

[ذيب الزوية]

السلام عليكم يا اخواني ..

اللهم بارك لنا في شعبان وبلغنا رمضان ..

الحقيقة كله خير ومن نعم الله .. لكن أفضل فطور عندي أن أبدء برطب مع كأس ماء بارد ثم نخش عالشوربة وطبق فول بزيت زيتون ..

والسحور عاد أي شي يقسمه الكريم ..

[ياربى ارحمنى]

اهااااااا
اكلات رمضان

بسم الله بعد سماع الله اكبر
رطب
ودله القهوه
مااقدر اشوف شى ثانى معهم
الا ان كان كاس ماااااااء بااااارد
وبعد الصلاه يمكن اشوف الشوربه وخبيزت تميس

وخلااااااااااص
لين بعد صلاه التراويح
بعدين اجى اتناااااااااااااااااااااااافض من الجوع
ماابى الا الكبسسسسسسسسه والسلطه
وخلاص
ليييييييييييييييييين وقت السحووور
شى من لبن وتميره يا الله من فضلك
ومبارك عليكم الشهر

[فل اوبشن]

تميره وقهيوه وصحين شوربه وشوي باستري بالعسل ..
انا أكل قبل الاقامه لاني ان قمت من على السفره ماعاد اشتهي اكل ..
ومبارك عليكم الشهر

[قلب شاهين]

الله يبلغنا شهر رمضان بالعباده ان شاء الله ،،

بالنسبة للموضوع وبالنسبه لي انا :

الفطور آول مايقو الله وآكبر ابد نحط المفطح وناكله كله ونشرب اللبن ،،

هذا نحلي بس على مايجي الفطور الأصلي ،،

وبعد الصلاه فطورنا حاشي بكبره وناكله كله ،،

ههههههههههههههههههههههه حشا والله لو اننا فيله هههههههه

امزح معكم ،،

انا فطوري لاكنت بالبر فطو خفيف يعني تمر وقهوه ومويه واذا رجعت كبسه دجاج ولا لحم على حسب الي القاه بالبيت ،،

آو بعض الأحيان يمدحوون مطعم ماضينا بالخبر اااه بس لاخذت منه نص مثلوثه اونص دمامي مامثله والله ( انصحكم فيه )

ومشكووره على الموضوع ،،

تحياتي / قلب شاهين ،،

[اراك@]

اللهم بارك لنا في شعبان وبلغنا رمضان

أولا:التمر والقهوة وصحين شوربة
مخرع بقطيعات لحيمة تويس

وللمسجد نمكن الصلاة
وعقب بريق شاهي خاثر بعد المغرب
وبعد صلاة التراويح حبيب قلبي

الرزيزات

مع لحم مع دجاج مع كلاب هههههههههههههه المهم رز والسحور كوب لبن وتميرات