ممكن هالخيمه تتسوى بالرياض؟

[كشات]

بسم الله الرحمن الرحيم

السلام عليكم ورحمة الله وبركاته

الاخوان الاعزاء

بما اني لمست الكثير من تعاونكم مع بعضكم البعض ومعي انا ايضا

بدت الميانه تزود شوي :)

وهالميانه هي اللي دفعتني ان اطلب هالطلب منكم

عندي خيمه ممتااااااازه جدا واستعملها من اكثر من عشر سنوات
ومميزاتها

1- الارضيه منها وفيها
2-رواقاتها رفيعه
3-مافيها ولا عامود بالداخل
4- سهلة النصب للي ينصبها اكثر من مره
5- دافيه وما تخر ماء( قماشها ممتاز)

المشكله ان هالنوعيه كانت موجوده بالرياض من زمان
ولا اوقع اني بلقاها الحين

لكن انا مضطر اني اخيط مثلها
هل راعين الخيام اللي بالغرابي ممكن يخيطون مثله
وماهو افضل قماش من ناحية عزل المطر والبرد
اما بالنسبه للاعمده انا ممكن اسويها عند اي حداد
لكن اللي يهمني ممكن تتسوى
وكم وقت تاخذ
ووش احسن قماش
واحسن محل تنصحوني فيه

اخوكم ابو علي يبي يتعنى من الشرقيه للرياض عشان هالخيمه بس

فزعتكم لاعدمناكم

وجزاكم الله خير
وهذه هي الخيمه المبروكه


http://www.mekshat.com/pix/upload/images3/khymah.jpg

حست بارشيف الصور اللي عندي ولا لقيت لهالخيمه الا كم صوره عساه تكفي

:what:

[الجمس]

اخوي كشات
السلام عليكم ورحمة الله وبركاته
مافيه شي ما يسونه بالغرابي . فقط احضر الخيمه وقل ابي مثلها ويسونها وحسب المقاس المطلوب ولكن السعر يمكن يكون مرتفع شوي . بالنسبه للقماش عليك بالتنزاني من عند السنيدي ويتراوح سعر المتر من 12الي 18 ريال حسب النوعيه ولكنه جيد وخفيف ولايسرب الماء ولايحتاج الي بطانه. بالنسبه لاحسن محل ماعندي فكره ولكن مجرد ما تطب الغرابي تلقى المحلات كثر الدود ويعتمد عليك ومكاسرهم وشوف طريقة اخياطه. ارجوا اني استطعت افادتك .

تحياتي

[ابو حسام]

فيه نوع شبيه بمثل ماذكرته عن القاضي وسعره 1200 ريال
مصنع القاضي موجود بالدمام ولا اعلم ان كان لهم فرع بالرياض
وشكرا

[كشات]

بسم الله الرحمن الرحيم

السلام عليكم ورحمة الله وبركاته

اشكرك اخي الغالي الجمس على الرد
وبصراحه

عطيتني دفعه قويه اني ممكن اجد احد يسوي هالخيمه

كثر الله خير يالغالي وما قصرت





اخوي ابو حسام

خيمة القاضي اللي مقاسها 4.5 ×4.5 فيها عامود بالنص
وقماشها هندي وسبق اني قريت عنها قبل يومين بهالمنتدى ومالقيت احد يمدحها بالحيل

احسن مافيها
صغيره وملمومه
ممكن لشخص واحد انه ينصبها
ارضيتها منها وفيها

واقول لك بصراحه
كل خيامنا من القاضي وشغلهم مايعلى عليه (متكزين) ويسوون اللي انت تبيه من غير ماتقول ولاتدري حتى انك بتحتاجه

كثر الله خيرك يالغالي وماقصرت

انا اليوم بحول الله وقوته بروح للرياض واشوف بنفسي هالغرابي اللي من زماااااان وانا اسمع عنه ولا شفته

كثر الله خيركم جميع
وجزاكم الله كل خير

[راعي عنيزة]

ولد ديرتي حياك :good:

كانك بتجي قريب لعنيزه فانا شايف مثل ذي الخيمه عند محل السليم الي بالبحيريه
هي نفس الطريقه المواصير من طالع ولونه ابيض وكاني منب واهم انه باكستانيه وتقل تقل انه مهب قماش ومنب متاكد

وكانك تبي تلفونهم عطن خبر واجيبه لك


وكانك معزم بتفصل مثل ما قال لك اخوي الجمس لا يهون عليك القماش التنزاني تراه ممتاز ولا يخر الما ابد

[كشات]

بسم الله الرحمن الرحيم

السلام عليكم ورحمة الله وبركاته

اخواني
ابشركم وصلت للرياض واول ماطبيت الغرابي
ولقيت لي واحد عرضته عليه وهو بدوره عرضه على كذا عامل من عماله وماعرف له الا واحد منهم

مابغيت السالفه تطول
اخذ القياس وعرف وش اللي ابيه وقال لي سعره ب 1650 ريال بدون العمدان
عمدانه انت تسويهن

القماش ثلاث انواع
السناح اللي هو السقف تنزاني ابيض
الرواق تنزاني جيشي
الارضيه قماش بلاستك pvc ما ينشق بسهوله


اخوي الغالي والحبيب راعي عنيزه
ترى بيننا سكري وحنيني من العام الماضي
بس انا مغيرن اسمي والا كان عرفتن

من تعرف بالخبر غيري ؟؟؟؟

اما بالنسبه للقماش اللي توصين عليه
ياخوي تقل اني سامعك وانا اعمد الرجال على الخيمه
راعي المحل عجز وهو يبين اخذ قماش باكستاني يقول انه احسن ما بالسوق كله

المهم ياعرتسي لاهنت وكثر الله خيرك
وبالنسبه لمحل السليم
ليت لو كلفت عليك تجيب لي رقمهم واسم المسؤول بعد

لا هنت يا بعدي

[السحلي]

لاتعدا التميمي والقاضي بالغرابي بالرياض
هم افضل مصانع الخيام

[ابو شكاع]

الله يوفقك وانا اخوك وتقدر تصمم مثله

انا مثلك احتري راعي عنيزة علشان يدلنا على المحل

وشكرا لك

[الجيب الربع]

السلام عليكم ورحمة الله وبركاته

أخواني جماعة مكشات

أولا : اوجه أجمل تحيه وشكر للقائمين على هذا الموقع الرائع والجهد الهائل

ثانياً: موضوع الخيام موضوع شائك ومعقد لكن مايحدد المناسب منها هو عدة عوامل منها عدد الأشخاص ومدة الرحلة ومكانها والموسم والميزانية المحددة لشراء الخيمة.

ولكن للإستعمال العادي للمكاشيت الخفافيه والتي يكون التحرك والتوقف فيها متكرر في أكثر من مكان فيجب أن تكون الخيمة خفيفه وسهلة النصب والفك ولا تأخذ حيزاً كبيرا خصوصاً لآهل الجيوب.

من هذه الخيام الخفيفه خيمه إم حمير من توافق أعتقد انها ثلاثة في ثلاثه وارتفاع الرواق حوالي 90 سنتيمتر والجميل فيها أن في داخل الرواق مواصير المونيوم مخيط عليها وبمجرد ماتشد الأطناب يبقى الرواق مشدودا جيداً وهناك ماصورة بالمنتصف عبارة عن ثلاث مواصير متداخلة في بعض واثنتان قائمتان أمام كل باب كأي خيمة أم حمير ولن الميزة أن جميع المواصير الطويله ألمونيوم ايضا ومكونه من جزئين متداخلين أيضا والأبواب بسحاب والجميل انك تطق الخيمه في أقل من خمس دقائق وتشيلها وتصفطها وترجعها لبيتها في أقل من عشر دفائق ولاتتغير مصافطها أو حجمها وطولها في داخل الكيس مايتعدى المتر وعشره ومحيط الكيس حوالي 40 الى 50 سم ومعها كيس صغير للأطناب وكان سعرها حوالي 400 ريال.
النوع الثاني عن توافق نوع أكبر شوي لكنه أولا أكبر حجماً وهي مصفطه ويجب أن تقيم الهيكل الألمنيوم بادخال المواصير وتجميعها عن طريق قطع من الألمنيوم ثم بعد ذلك تلبسها الشراع وتدق الأطناب وهي واسعه ورواقاتها مرتفعة حوالي متر ونصف وسعرها كان حوالي 1100 ريال وسوف أحاول أن أصورها وأعرضها انشالله.
قمت بجوله أمس على عدة محلات بالرياض والخيمه التي تعرض عند باب الرمايه يعمل مثلها محل رحلات اسمه على ماأظن عالم الرحله وهو بجانب بنك الرياض قبل محل المقناص مخرج 15 و ثلاثه في أربعه سعرها 870 ريال ولكن حجمها وهي مصفطه كبير وهناك كيس آخر للمواصير وهي حديد وكيس آخر للوصلات التي تمسك المواصير وهذا كثير على ماأظن.:D

من وجهة نظري المتواضعه فارى ان خيمة توافق ام حمير ان كانت لاتزال موجوده هي الخيار الأمثل للكشاته اذا كانوا في حدود الخمسه ونازلين شايلين من مكان لمكان والتجربة خير برهان.

تحياتي للمشرفين وجميع المشاركين وعذرا للإطاله والسلام عليكم ورحمة الله وبركاته.

[الملثم]

السلام عليكم ورحمة الله وبركاته ،،،
أخي الكريم كشات ، أنا نزلت الأسبوع الماضي الرياض وأخذت عناوين الخيام من الموقع هنا فيه مثل خيمتك بمخرج 15 عنده 5*4 ---1800 ريال ويفصل أصغر ومثله توافق بس هاذولا ما عندهم جاهز كله بعد العيد والغرابي في الصلال وهو مثلهم ، وطحت لك على خيمه في الغرابي في مصنع التميمي بس حجمها 3*3 صغيره وخفيفة لين تصفطت ، فيها عامود في النص ولا فيها رواق وجهه منها تنكشف كاملة قماشها عجيب سألت البايع قال لي ثلاث طبقات مضغوطة مستويه طبقة وحدة قال نصنعها من سنتين بس طورنهاه من ست شهور ما أبالغ 10دقايق نصبتها قيمتها 550 سعودي إن شاء الله أصورها مع كشته العيد وتشوفها

[الوانيت1]

للرفع ............... ////.