دافور بريمس لعزبة الشاهي

[راعي عنيزة]

السلام عليكم ورحمة الله وبركاته

طلب مني احد الاخوان الاعزاء الي اول حرف باسمه فرد واخر حرف حمزه :D
صور لدافور بريمس صغير استعمله لعزبة الشاهي وعشان المنفعه تعم الجميع حبيت احط الصور هنا

اول شي الدافور امن جدا ودبته تربط بسنه وتركب بسهوله وتقدر تفكها بسهوله وبدون ما يتسرب الغاز

مهب مثل الدوافير الي دبتها زرقا كبس تركيبها غثيث وتحوس ثيابك اذا صرت ارفل :D ولو فكيت الدبه هربت ، وتلقا الدبه مكبوسه بعلاقيه ثياب على قولة ابو همام :D ولو ارتخت شوي او طاحت تسرب الغاز وصار مالا تحمد عقباه :(

وغير كذا حرارة البريمس بدون مبالغه تعادل حرارة الدافور الصغير العادي مرتين او ثلاث مرات لانه اكبر عين واقوى دفع غاز وجربناه على قدر كاتم وظبط

وهذي صورة الراس مع الدبه الصغيره برايمس 225 جرام

http://store3.yimg.com/I/4site-outdoors_1776_12366424

وهذي الدبه الصغيره مع الدبه الكبيره برايمس 450 جرام
http://store3.yimg.com/I/4site-outdoors_1776_12173988

والراس قيمته بالمحلات بحدود 80 ريال
اما الدبه الصغير ب12 ريال والدبه الكبيره ب15 ريال
والكبيره اعتقد انها الافضل واوفر

وهذي صورة للمقارنه مع دافور صغير عادي

ولاحظ فرق العين

http://www.mekshat.com/pix/upload/images3/DSCN0378.JPG

وفي الختام اكيد الدافور الازرق الصغير ارخص وارخص دبات ولكن السلامه مالها ثمن ;)

[الحاتمي]

مشكور والله يعطيك العافيه
ياراعي عنيزة
والله انك صدقت ان السلامه مالها ثمن
بس ماادري وش صناعة الدافور البرايمس؟؟
اتوقع ان البرايمس شركه المانيه!
الحاااااااااااااااتمي

[راعي عنيزة]

هلا والله بشيخنا الحاتمي

بريمس طال عمرك شركه سويديه ولها مصانع منتشره حول العالم
لذلك الدبه تصنع بمصانع بريمس في فرنسا
والراس يصنع بمصانع بريمس في الهند

وهذا موقعهم على النت
http://www.primus.se/

[برق نجد]

عندي مثله اشهد انه دوا وبس:good: :good: :good:

[نقا هشال]

الغالي
راعي عنيزة
مشكور ولاهنت

[راعي عنيزة]

عاشق الدخل
وش خليت دوا ومرهم بعد :cool: :good:

نقال هشال
هلا والله اخوي الغالي
وحياك ربي

[ذيب البر]

صح كلامك السلامه مالها ثمن يابو حمد بس ماتلاحظ ان السعر شوي غويلي خاصة

كانك كييف شاهي وطلعاتك واجد

انا معي الازرق من زمان والحمدلله ماشي تمام والدبة بريلين وكانك اخذت بالكيلو:D

يعني كمية يمكن يطلع ارخص

تحيااااااااااااااااااااااااااااتي

[abos3d]

الله يعطيك العافيه راعي عنيزة لكن هل هي تباع في الرياض

[اسيزو 4x4]

والله دافور على مستوى بس وين يباع يا اخوي راعى عنيزة ؟؟؟......

ومشكور والله الدوافير الزرق غثتنا

لازم اشتري بريمس افضل وامن من العادي

ولك تحياتي..:good:

[عاشق الصفاري]

تسلم ياراعي عنيزة على الموضوع المتكامل .. وهو غير عن العادي .. ووين نلقاه

[ابورشيد]

هذا الدافور ممتاز بالحيل
ولقيت عند محل اليوسف اللي حول مستشفي اليمامه علبه يركب عليها
ويركب لها دبات الغاز ام ريالين
وسلامتكم

[فـ(الجـوف)ـتى]

الله يعطيك العافيه0

[ابو شكاع]

مشكوووووووووووووور وما قصرت ياخيي

فعلا الشي اللي يستهال اكيد غالي

بس ما تلاحظ انه غالي <<<<<<< ما له هرجتن ثابته خخخخخخخخخخ

الظاهر اني اباخذ لي وحي يد

الصورة اللي به مقارنة للهب ممتازة

انا معي الازرق وماشي تمام

لكن اذا مسكت مع الكور فهي مشكلة

الظاهر اني اباخذ لي واحد

شكرا لك

[صقر]

مشكور يا ابو حمد

ومثل ما قلت السلامة مالها ثمن

وممكن تقارن لي كمية الغاز اللي بالمنتجين ... يعني يقعد معك اطول مدة..؟

وبارك الله فيك...

[راعي عنيزة]

مكرر

[راعي عنيزة]

ذيب البر
صدقت الازرق ارخص لكن كانك طير بر والعزبه ما تنزل من الموتر ماظن يوم ودك تركب موترك وتلقا الدبه مطشرة الغاز على المراتب والريحه على بعد كيلو هذا ان ما قبعت بعد :p


ابو سعد
اذا عندنا بعنيزه موجود بكل محلات الرحلات فمافيه شك انه يباع بمحلات الرحلات عندكم يا بعدي


اسيوزو
محلات الرحلات ما تخلى يا خلفهم وتكده بالعافيه مقدما


عاشق الصفاري
باقرب محل رحلات يا عرزي :good:


ابو رشيد
دبات ام ريالين تركب عليه :confused:
ماظنه نفسه ياخوي لان الي عندي سنه مب كبس


فتى الجوف
يعافيك ربي ويخليك


ابو شكاع
اذا صرت مثلي تحتاس اذا جيت تركب الدبه الزرقا وترجع للبيت وريحتك تفاوح تقل غاطس بحدى خزانات شركة الغاز فانت تبي تشتري بريمس سنه لو هو بالف :p


صقر
هلا والله ابو احمد
يا طويل البقا والسلامه الدبه الكبيره منه 450 جرام والصغير 225 جرام
بينما الدبه الزرقا الصغيره 199 جرام
عموما هو ما ابطى معي ويمكن استعملته ب6 طلعات وللحين الدبه مليانه
وواحد من الربع مبطي وهو معه وحاط الدبه الكبيره ووين يقعد له اشهر ما غيره

[ابورشيد]

نعم ابو ريالين ومسوا له توليفه

[ابورشيد]

كلامك علي متمه من ناحية ان غازه يطول
انا عندي هالدافور من فتره واستغربت من انه يطول ما يخلص
وبعدين من ناحية التوصيله فيه عند محل المقناص مسوين تحويله له علي
دبة الغاز الزرقا اللي تعبا
لكن اللي عند اليوسف يركب له علبه بلاستيك يحط فيها العلبه ام ريالين وتركب له
وانا ابي احاول احطها لكم بمشيئة الله في المستقبل
لكن انا من ناحية قناعتي بأن غازها الاصلي افضل ويطول اكثر

[راعي عنيزة]

ابو رشيد

هلا وغلا بالغالي
صدقت غازها الاصلي يطول اكثر وخبرك العلبه ام ريالين ما تقوم شي الا وهي مخلصه
ولكن مدام ذي العلبه فيها امان مهب شينه نجربه خصوصا ان سعر العلب الزرق اخو البلاش
ومشكور يا بعدي ولا تعبت

[محتار]

السلام عليكم ورحمة الله وبركاته
كم احب اسم عنيزة وكم يرتعد قلبي اذا سمعتة
كل ايام الطفولة
خوالي
خوال عيالي
ذكرياتي الحلوة
كشتاتي
تربطن باسم عنيزة ما علينا
كل هالكلام علشان اعتذر للاخ راعي عنيزة فقد تلقفت وكتبت موضوع مشابة قبل ان اقرا موضوعك الشيق
ولاكن حصل الي حصل وكتبت هذا الموضوع
http://www.mekshat.com/vb/showthread.php?s=&threadid=15416
ولكم تحياتي
وشكري الخاص لراعي عنيزة
وعنيزة مقر الخير
وا حبنا له وطاريها

[desprado]

شكلها ممتازه الي يخبر وين تباع في الرياض يعلمنا

[الأشهـــــب]

بالفعل في الواقع أن دبات ورؤس غاز ( بريموس ) ماعليها كلام أبد ابد .

عندنا دبة غاز ( بريموس ) لها أكثر من 25 سنة ومن أروع مايكون ماشاء الله لاقوة إلا بالله . لكن الي عرضها لنا الأخ الفاضل : راعي عنيزة مافيه شك إنها غالية لكن مع ذلك ثق إن شاء الله إنك إذا شريتها ماراح تتحسف أبد لجودتها العالية جداً .

عموماً أنا لو خيرت في هذا النوع فالحقيقة أنني لن أشتريه وذلك لوجود البديل وهو الغازالأزرق كالذي عرضه الأخ راعي عنيزة . ولكن ليس النوع الإيطالي لأن الإيطالي فيه عيوب واضحة وتظهر لك في المستقبل ( القريب ) كذوبان القاعدة التي أسفل الرأس مباشرة وخاصة في فصل الصيف ، أو خراب الرأس ذاته ، وغير ذلك . ولكن النوعية التي أنصح بها وهي التي أستخدمها حالياً هو الفرنسي . فهو قوي وعملي ولايقارن بالإيطالي وسعره حوالي 50 ريال .

الإخوة الذين يسألون عن أماكن بيع هذه الدبات وخاصة البريموس فهي موجودة لدى محلات الغاز في سوق الزل وبالأخص لدى محل ( اليابس ) وكيل بريموس ، وكذلك في حراج ابن قاسم .

أرجو أن أكون قد أفدت الإخوة الكرام .

تحياتي للجميع ، وللأخ راعي عنيزة على موضوعة الجميل .

[((ابومحمد))]

السلام عليكم ورحمة الله وبركاته
الحقني ياخوووي انا عجزت وانا ادور راس دافور بريمس اسود
الله يجزاك خير دلني على هالمحل الي يبيعها

[الأشهـــــب]

تعديل في جزئية بسيطة :

الا وهي أن وكيل بريموس هو ( بادحمان ) وليس اليابس .

[الأشهـــــب]

تعديل في جزئية بسيطة :

الا وهي أن وكيل بريموس هو ( بادحمان ) وليس اليابس .