شركة تويوتا والسمعه الغلوطه عنها!!!

[ياوجودي]

السلام عليكم ورحمة الله وبركاته

أخواني الأعزاء أبدخل بالموضوع سيده :D
بالمختصر انا عندي كامري 2006 سمعت طقطقه مع المطبات من الجهه الخلفيه المهم وديت السياره
للشركة(عبداللطيف جميل) قالوا لي بنشيك على السياره خلها عندنا وحط رقم جوالك, قلت أوكي.
حطيتها عندهم ورحت وبعد تقريباً 3 ساعات دق علي واحد سوري وقال لي المساعدات الخلفيه يبي لها
تغيير قلت اوكي غيرها , قال لازم تجي توقع على أمر التشغيل (مدري الظاهر قال لي كذا)
قلت لازم؟ قال إي كذا النظام
المهم قلت ابجيك ,وأركب ليموزين وأروح لهم ويوم دخلت ويقولون لي لازم تدري إن المبلغ (القطع+شغل اليد)
هو 1663ريال. أوف :eek: مساعدات كامري والا مساعدات بنتلي؟
قال هذا سعرها يمين ويسار قالوا ترا هالمبلغ بعد الخصم < يعني إحمد ربك:p

المهم اللي ودي أقوله ياشباب إن الناس تقول لك تويوتا وبس وقطعها في البقالات ورخص التراب<< هالكلام
صحيح
بس مو قطع غيار الأصليه أقصد اللي مصنعه في نفس البلد اللي صنعت فيها السيارة - سواء اليابان
أو اوستراليااو او او ...الخ . الرخيص والمتوفر بكثره هو القطع المقلده والتجاري على قولهم او أصلي السوق مهوب أصلي الوكاله ,
وهالشي طبعا غير متوفر في النيسان (أغلبها أصليه من الوكاله نيسان) على سبيل المثال الباثفاندير حسب ماسمعت من الإخوان ان أغلب القطع الكبيره لاتوجد الا بالوكاله او بالتشاليح.

فاللي أبي أقوله إن الأصلي غالي ولكن سعره فيه يعني بالعربي نيسان او غيرها من اللي ماتوفر قطع مقلّده لاتعتبر غاليه لأن لو بنقارن قارن قطع غيار اصليه بأصليه وليس قطع غيار أصليه بقطع تجاري او مغلّف.

هذا وأتمنى توصل فكرتي لأني شريت الكامري وفي بالي (حسب كلام الناس) إنها بتوفر علي وطلعت نقمه :no: كنك تسوق هيلوكس 96 مع العلم اني طاقها وكاله وموديلها 2006 لكن مقول غير الله يخلي فخامة النيسان والهوندا والأمريكي :good:

ودمتم

(ملاحظة << أتمنى من المتعصبين للتويوتا أو غيرها لايشبون علي :no2: لأني والله ماقلت الا الحق ومن واقع تجربه وشكراً)

[الشهابة]

اخوي ياوجودي ..

اول شي الله يبارك لك في سيارتك و لا يريك فيها اي مكروه بإذن الله ..

لا تنسى يالغالي إنك رحت للوكالة و طلبت منهم صيانه لسيارتك .. و المعروف إن الوكالات أسعارها غاليه في قطع الغيار و في الصيانه ..

و خصوصاً إن المشكله الي عندك تغيير مساعدات .. يعني لا هي مشكله في الكهرباء او مشكله في المكينه اللي تكون من المشاكل الصعبه او المعقده و تخاف الورش يلعبون في سيارتك و توديها للوكاله ..

و بالنسبه للقطع تقدر تمر اي واحد من موزعين قطع تويوتا المعروفين .. مثل الضحيان او الرشيد او النهدي و تسال عن القطع عندهم و بتلقاها ارخص من الوكاله بفارق بسيط يعتبر من صالحك ..

و التغيير لو مريت احد الورش في الصاناعيات و تكون من الورش المعروفه و النظيفه و سمعتها جيده و طلبت منهم تسعير لشغل يد تغيير المساعدات بتشوف فيه فرق كبير و احتمال بعض المرات يوصل للنصف في شغل اليد ..

و بصراحه السعر مبالغ فيه جدا .. و لا اظن ان فيه قطع من تويوتا بتوصل للسعر هذا الا عند الوكاله ..

و الموضوع مافيه عصبيه لتويوتا .. بس فيه وجهات نظر مختلفه ..

يعطيك العافيه .. و الله يهنيك في سيارتك ..

[طير جراح]

لا تقرب الوكالات

[ابو نوره 2006]

خذ منهم قطع وركب برا .... على ماذكر ان مساعدات الكامري الخلفيه من الوكاله 570 تقريبا والتركيب باي ورشة بحدود 150 -200

[سيف نجد FJ]

والله شوف يمكن بتستغرب من كلامي لكن على الاقل في الوكاله قد ركبوا لكذا الف كامري يعني الفني مهب بس متخصص الا يسويها وهو مغمض

وبعدين انت اطرح دايما قيمة قطع الغيار ولا تاخذها في الحسبان في امور مثل هذي لانها مسلمات مثل موضوعك سواء في الوكاله او في ورشه بتدفع قيمة المساعدات بتدفع . . . صح؟

طيب الاجره مقابل الضمان و راحة البال ماودك توديها لورشه مابراسهم ولا اساليب التركيب تكون غلط يعني صح ركب لك المساعد بس خرب شي ثاني " وهذا للاسف صاير عاده قبيحه عند كثير من اصحاب الورش "

وبعدين تعالوا ترى كل شي غلا مهب في السعوديه بس في كل العالم وهذا حال الكل

[قناص1975]

يا جما عه اسمحولى حرام تاخذ اسم تويوتا ادرى ان البعض راح يهاجمنى بس هذى وجهت نضرى نسيتوا الكورلا والكرسيدا الطيبه اللى لا مساعديات ولا هيئه ولا بريك ولا ولا ولا ولا الكامرى لو تشيلها عن الارض تفرقع تفرقع

[سيف الظفير]

يا خي الفاضـــــــــل مافيه وكالة سعودية تخص السيارت


فيها شئ من الامانة يجب ان يكون النصب والاحتيال له دور فعال في تشغيل تلك الشركة


والدليل على ذلك وكلاء السيارات بالمملكة

[AMAZ]

انا شايف ان وكالة تايوتا من افضل الوكالات الموجودة في المملكة من حيث توفير قطع الغيار سرعة انجاز العمل ... روح للوكلات الثانية وشوف الفرق بالسعر وقبل كل شي الوقت بعض الوكالات على شان تغير عندهم الزيت السياره تجلس عندهم يومين .
اما المساعدات في الكامري وسعرها الذي انت ترى انه مبالغ فيه يمكن نوعا ما لكن تراه معقول اذا نظرنا اليه انه يعيش معاك اكثر من خمسة سنوات ويمكن اكثر لانه مايخرب الى من شي كايد زي مطب قوي او حمل زائد عن الازم . ماهي زي السيارات الامريكية الى كل سنة تغير لها مساعدات .صح انه على كلامهم رخيص لكن احسب كل سنة مساعدات شوف كم بالخمس سنوات رايح تكلفك يمكن فوق ثلاثة الاف مع التركيب والهجوله بالورش .

[بدوي جنوبي]

انا مني مصدق ان كل كلامكم هذا عن مساعدات
كيف لو كان الخراب مكينه او قير

اللي يقول لازم تصلح المساعدات في الوكاله

واللي يقول ان سعرها معقول
او سعر الااصلاح معقول
كل هالكلام غير منطقي وما يخش الراس
تغيير 2 مساعدات يكلفني 1663
طيب لو افترضنا ان القطع تكلف 600 ريال
يعني بالله شغل يد يكلف 1063

فكونا بالله من الدفاع المستميت لهذه الشركة وغيرها
اتمني من كل شخص ان يبدئ رايه في الشي المعقول
والسعر المناسب للاصلاح ،، كلنا نقود سيارات واصبحنا نعرف
تكلفه اجراء الصيانه لسياراتنا

انا ضد الشجع والنصب والاحتيال ،،،
المكشله ان اغلب مدراء الوكالات من الاجانب
والعاملين في الورشة من الاجانب ،،، بالله ويش ترجى منهم

اغلب الوكالات استغلال وطمع عند اجراء الصيانه الدوريه
والمواطن الغلبان ما يبي الضمان يروح عليه ويجبروه علي استمرار الصيانه الدوريه عندهم
بتكلفه تقوف التوقعات ،،،

[a.الخثلان]

الظاهر يابن الحلال ما عندك إلا مسمار منحل وهو سبب الطقطقة

[ياوجودي]

مشكورين على مروركم وشرفتونا ياإخوان كلن بإسمه.

أخوي بدوي جنوبي والله إني يوم قال لي هالقيمه إني زعلت ورفعت صوتي عليه وقلت له بالحرف الواحد:
أنا بعت سيارتي هوندا2005 لأن قالوا قطع الغيار غاليه. وأنا إنسان ماشي على خطه إقتصاديه يقال لي يعني أبوفر شي من الراتب لذلك بعت الهوندا وشريت الكامري بناءً على كلام الناس تجي إنت تقول مساعدات بـ 1663؟
لكن والله يوم شريت الكامري وصارت معي هالقصه تذكرت وشلون إني إستبدلت الراحه (قير أوتوماتيك+ تمشي 200 على الأكورد ولاتحس لابهواء ولابإزعاج+ تمشي 200 بالخط وتفك الدركسون تمر جمب تريله ولايهزها شي) لكن تعال للكامري
أول ماجيت أبشتري قالوا لي ان التويوتا الكامري القير العادي يعمر أكثر قلنا أوكي نشتري عادي وليه لا نتحمل
ثاني شي اذا وصلت السرعه 110 يبدا الهواء صوته يجي من كل مكان وجهه (على فكره السياره شاريها من الوكاله يعني مافيها صدوم او انقلابات) .

يعني بإختصار إستبدلت سياره حلوه ومريحه علشان كلام الناس(توفر ولاتخرب وقطعها رخص التراب وبالبقالات يبيعونها القطع )
لكن أقول الله يعضوني خير بس:(

[قناص1975]

يا وجودى عزا الله انك بعت الزين الهوندا من افضل السيارات اليابانيه بالعالم ولا تقارن بالتويونا الكامرى يكفى اسما باليابان الاسطوره اسنعملت الهوندا لو امدحها ما اوفيها حقها قبل الناس الفاهمين اللى كانوا داخل الديره ما يستعملون الا الهوندا وحنا يا ربعك ما نعرف الا كابرس طيوس شفر ولا توتا
تستغرب لو اقولك اكثر استعمال فى اليابان الاول السابارو الافضل والثانى الهوندا والتويوتا ما عندك احد

[جفيل]

المساعدات انا الي اركبها بالبيت .. اما توديها للوكاله !! :)

الله يعينك

[.البدراني.]

ما اقول الا
الله يصلح الاحوال

[بيالة]

حبي عندي فيوتك ٢٠٠٥ خرب عندي حساس الدعسة ولقيته في الوكالة ب ٦٠٠٠ وهو حساس احمد ربك

[بيالة]

حبي عندي فيوتك  خرب عندي حساس الدعسة ولقيته في الوكالة ب  وهو حساس احمد ربك

[التعـ King ـديل]

اخوي الله يعينك على مابلاك لكن انا بقولك قصتي مع الباثفيندر صارت عندي مشكله بالرمانات والموتر ماشي حوالي 30 الف وديته للوكاله وكشفو عليه قالو الموتر جديد حرام نفك القير ونغير رمانات لذلك بنغير لك قير
جديد قلت بيض الله وجهك وكم بيكلفني قالي بكلفك 300 ريال قلت تستهبل علي انت ولا شلون قالي لا ال 300 طال عمرك قيمه الكشف بالوكاله وحنا على حساب الشركه بالضمان بنغير لك قير جديد وكلتش جديد قلت طيب
متى استلم الموتر وهالكلام كان يوم سبت الظهر قال خله عندنا والثلاثاء تجي تاخذه قلت طيب المهم يوم الثلاثاء دقيت عليهم لاني ماابي استاذن وحسب ماسمعت ان الحمراني مواعيده سواليف ولكن التجربه خير برهان صح
المهم كلمت الفني يوم الثلاثاء وقالي السياره جاهزه بس باقي عليه تشيك القير والموتر بشكل كامل تعال بكره الظهر تلاقيها جاهزه وفعلا رحت الربوع لهم ولقيت الموتر جاهز ومغسل وريحه الوكاله اول ماشريته اشمها فيه

[ابوعدي]

خذ منهم قطع وركب برا .... على ماذكر ان مساعدات الكامري الخلفيه من الوكاله 570 تقريبا والتركيب باي ورشة بحدود 150 -200
سويت مثل ما قلت يابو نوره وشريت مكينة قزاز 470 بعد الخصم وقلت كم تركبونه عندكم قال 260 لكن الورشه زحمه تصريفه :D المهم رحت لورشه قال اركبها لك ب 50 ريال قلت ركب جلست يومين وتنفرط المكينه زي الاولى يعني خربت لازم تغيير كامل رجعت للوكالة قالو مالانا علاقه انت ركبته برا
تحسفت قلت ليتي مركبها عندهم بالملبغ المذكور عشان اضمن ارجعلهم وانا عيني قويه لكن الله يعين اني ادور واحد يولفلي بدل المكينه هندل افضل الف مره
للعلم السيارة شيروكي الله لايقبل اللي صنعه

[ابو سحاب]

السلام عليكم و رحمة الله و بركاته
أشكر كل الأخوان المشاركين في هذا الموضوع
أما عن مداخلتي عن شركة تويوتا
فيه واحد من الشباب (شرواكم) معه كامري م 2007 راح يبي يشيك على السيارة و قد مشت 5000 ك و قبل ما يدخلها سمع عن نصب و إحتيال الوكالات قام و حط إشارة بقلم خطاط على السيفون و راح الوكالة و قال ابي اشيك على السيارة و غيروا لي الزيت مع السيفون لاحظوا مع ( السيفون ) المهم جاء لهم في يوم إستلام السيارة وقبل الإستلام ( طل ) تحت السيارة ولقى نفس السيفون الي عليه العلامه
تطاق معهم ومع المهندس المستلم للسيارة و هددهم أنه راح يفضح الوكاله و اكتفت الوكالة بإخراج السيارة و حفظ سمعتها ( منقول )

[غضنفر]

كلامك على متمه
التايوتا من تالي قطع غيارها أغلى من النيسان
التايوتا أرخص بالمساعدات فقط
مثال بسيط جدا
كرتون فلتر الزيت
للربع نيسان 185 ريال
بينما التايوتا 205 ريال

السيارة الوحيدة من تايوتا الي قطع غيارها شبه بلاش
هي الهايلوكس 2005 وتحت
غيرها من سيارات تايوتا ما شفت بها رخص
والسلام.

[ابو شهد جدة]

ياجماعة الشي الي ينخاف منه ومعقد سويه في الوكاله حتى لوكان اجرة التصليح 10 اضعاف عشان تضمن الشغل.

وبعدين انا تعلمت شي مع شركة العيسائي وتوكيلات الجزيرة تعلهم سوي مشكله من اي شي يعني بالعربي اتلبش فيهم يسيرون معاك ميه ميه.

[ناوي نيه]

معي جمس2002 شاريه مستعمل
والله العظيم ماقد فكرت امر على الوكاله ولااطبها انشاءلله
اذا فيه خراب ياكثر الورش الجيده

[ياوجودي]

الله لايهينكم يالربع وشاكر لكم مروركم الكريم

انا طرحت موضوعي هنا ليس لأني أريد حل لكني طرحته لأني أبي أبيّن إن السمعه المنتشره بين الناس عن شركة ابو جميل مغلوووطه وإنها دعااااايه يرددها الشعب على غير علم.

تقبّلوا رأيي بكل روح رياضيه والله يعينا كلنا على النصب والإحتيال والمبالغه بكل شي (قطع الغيار+شغل اليد+قيمة السيارات أصلا كل سنه ترتفع 10 آلاف او اكثر عن الموديل اللي قبله اذا صار تغيير بالشكل أتوقع بعد عشرين سنه تلاقي الهيلوكس الغماره بـ 220 ألف << فكسار3 :p


الله يعيييييييييييييييين الشعب وبس :hot: << الأسعار نااااار

[مواسي الطعوس]

كلامك على متمه
التايوتا من تالي قطع غيارها أغلى من النيسان
التايوتا أرخص بالمساعدات فقط
مثال بسيط جدا
كرتون فلتر الزيت
للربع نيسان 185 ريال
بينما التايوتا 205 ريال

السيارة الوحيدة من تايوتا الي قطع غيارها شبه بلاش
هي الهايلوكس 2005 وتحت
غيرها من سيارات تايوتا ما شفت بها رخص
والسلام.
*************************************
كلام يكتب بالذهب .والله انك ذيب عقب هذه(لاني مااعرفك قبل)لكن لاتنسى الصدمات نوعا ما والخطوط اللي تصلح بجده.
انا اعذرهم ومعهم 1000 حق موتر يبيعونه ب200 الف وتركض الناس عليه لازم تصير قطعه اغلى من غيره

والاموتر ب 80 الف ونفس مواصفاته ب 60 الف سياره ثانيه.

[قطب 999]

مو معقول مساعد لندكروز ب 98 ريال من الرشيد اصلي وكاله والتغيير 50