تكفون أبي شوركم يالذيابة

[أبو هيا]

السلام عليكم ورحمة الله وبركاته
يا الربع تكفون أبي الفزعة معي جيب ربع باترول
وودي أركب له تانكي موية للطلعات
الطلب
وين أحسن مكان أركب التانكي فيه بالسيارة
ووين أحسن محل يركبها لي في الرياض


تكفووووووووووون

[مخاوي الكشات]

شف وأنا أخوك وهذا رأيي يحتمل الصواب والخطأ .. لكن نصيحة لوجه الله لا أريد منك جزاء ولا شكور .. فيه شيء أزين من التفصيل كجودة ومساحة يعني بدال ما تفصل إستيل أو حديد أو ألمنيوم وهذا يصدي وهذا يتغير طعمه أشتر خزان الوادي فيبر غلاس ضمان خمس سنوات وفيه 90 لتر وفيه على ماأظن 145 لتر وفيه حجم آخر مدري وش هو .. وممتاز وخفيف وتعامله راقي ورائع حسب كلام المجربين وسهله وضعه في أي محل بإمكانك وضعه خلف كرسيك في المرتبة الثانية ورائع >> بس ال 145 بـ 500 ريال !!!!

[عاشق السيل]

وعليكم السلام ورحمة الله وبركاته ،،،

أنا من راي أخوي مخاوي الكشات ،، وإذا مابغيت خزان الوادي أنصحك تفصل ألومنيوم لأنه أرخص واخف وبنفس الجودة بالنسبة للاستيل ،، ومالك إلا مكان واحد وهو إنه يكون مفروش بالشنطة خلف المرتبة الثانية إذا بغيته كبير أما إذا كان يكفيك 35 لتر ممكن تفصله تحت السيارة !!

أما الورش المشهورة فيه المواهب الصناعية القديمة ( استيل ) وفيه المميز بصناعية الدائري ( استيل ) وفيه ورشة اليحيى بحي السلام ( الومنيوم ) ،،

والله يوفقك وتقبل مروري يالغالي ...

[منتعش]

حي الله أخوي الغالي والمحب : أبوهيا
شف الله يحفظك ويرعاك
أنصحك بأن تأخذ الجاهز الموجود عند محلات الرحلات لعدة أسباب منها
سهل الفك والتركيب
خفيف الوزن
السعر رخيص مقارنتاً بالتفصيل
تفرغ مويته عند الأنتهاء من الكشته لكي ما تعفن الموية وتطلع ريحه
عند الأنتهاء من الكشته أو الطلعة تنزله وتفرغ مويته لكي ما يزعجك بأصوات الماء
عكس المفصل الثابت بالسيارة
وعندي واحد جاهز شاريه من ثلاث سنوات وما شاء الله
والله يكتب اللي فيه الخير للجميع

[أبو هيا]

الإخوة مخاوي المكشات - عاشق السيل - منتعش
شوركم وهداية الله
الله يبيض وجوهكم يالغالين ويعطيكم العافية