الشباب اللي عنده خلفيه بالخرازه

[بروق ورعود]

السلام عليكم ورحمة الله وبركاته

الحمدلله والصلاة والسلام على رسول الله وعلى آله وصحبه أجمعين:-

اخواني مساكم الله بالخير, زي مانتو شايفين بموضوعي, بقيت الله لايهينكم طريقه لوزنية الخرازه لاني بصراحه من وقت ماشريته من واحد من الطيبين بهالمنتدى الطيب. كانت ماشاء الله ماتخطي لكن مع الوقت وكثرة اللي يستخدمون السلاح اختلفت الوزنيه. فبقيت مساعدتكم . والامر الثاني وش الفشق الطيب انا كنت استخدم كنكورد ونوع صناعه فلبينيه وشي جنوب افريقي. لكن واحد من الشباب يمدح ستنجر وماقد جربته مادري وش قولتكم. وعساكم على القوه.
اخوكم بروق ورعود :)

[عليان الليل]

حياك الله ..
اول نقطة : السلاح اذا اختلفت عليه الايدين يخرب كل شي فيه من الوزنية
الى الكعب... هذي قاعدة مهمة السلاح زي السيارة ...
اذا كانت تقصد وزنية البندق بالدربيل فيه محل بالرياض يصلحه لك
50 ريال ...
بالنسبة للفشق الكونكورد زين وهو الدارج عند الناس والستنجر
ممتاز اذا لقيته.
تحياتي..

[ابوجود]

اخوي بالنسبه للوزنيه
اذا كان دربيل بامكانك انت توزنه
ولوزن الدربيل اهم شي يكون الدربيل ثابت يعني يكون مشدود للسلاح بشكل جيد
بعدها احضر ورقه بيضا كبير نوعا ما وضع عليها نقطه سودا بحجم فنجال القهوه (ارسمها بقلم اسود) وبعدها ضعها على بعد خمسين متر وصوب عليها وابدا بالرمايه وحتى توزنها لازم تكون الخرازه مثبته تمام يعني تكون مركي على شى ثابت وبعد اول طلقه اذهب للهدف وشف وين مكان الرصاصه عن النقطه السودا اذا كانت تحت ارفع وزن الدربيل واذا كانت يسار عدل يمين وهكذا مع الرمايه حتى تصل ان الرصاصه تكون بوسط النقطه السودا

اما ما يخص الذخيره للخرازه افضلها الالماني وبعده الانجليزي ثم الجنوب افريقي وطبعا العادي منه وتجنب المتفجر لانه غير دقيق الاصابه حتى لو كانت الخرازه موزونه
وبالتوفيق ان شالله

[بروق ورعود]

السلام عليكم ورحمة الله وبركاته

الحمدلله والصلاة والسلام على رسول الله وعلى آله وصحبه أجمعين:-
مشرفنا الغالي عليان الليل, واخوي الغالي ابوجود. مشكورين على ردودكم لموضوع وابداء ارائكم. اخوي عليان الليل زي ماقلت اذا السلاح ماسكه اكثر من واحد يختلف صحيح. لكن مثل ماقال اخوي ابوجود حاولت احط لي نيشان اركز عليه لكن مادري وش السالفه مره تزبط ومره لا. لدرجة اني عطيته الصبي عندنا بكستاني يجرب عليه. وبخصوص الفشق انا مجرب الكنكورد ولي مده وياه والا عليه خلاف. مادري كم اسعاره عندكم شباب. وبعدين وش نوع اللي ينفجر ان حصل اسم الماركه يعطيك العافيه.

مشكورين شباب وعساكم على القوه.

[عليان الليل]

برق ورعود هذي الساعة المباركة اللي نخدمك فيها
الكنكورد يجي نوع منه ينفجر وهو اللي راسه مفتوح او مجوف..
وذكر الاسعار ممنوع وانا خوك..
تحياتي..

[مطحن]

اخوي الندق تعتمد بشكل كبير على الدربيل اذا كنت مركبه .........
وترا الدربيل بعد مده من الاستخدام وبسبب الاهتزاز اللي يجيه ينحاس ........ مهوب بسبب مخالف الايدين عليه ..... الا اذ كان العبث مقصود!!!!

بالنسبه لطريقة الوزن ........ ثبت البندق على ملزمه ولف البند اول بقطعة قماش حتى ما تتعور..... همن حط لك هدف على بعد 50 متر وحط اكس بالهدف ولا تاقف من الوزن الى ما تطلق طلقتين بالاكس الثانيه بكان الاوله ....... بعدا هذا كلوه قل بندقي انوزنت صحححححححححححححححححححح.

جرب الدربيل نوع نوركونيا تراوه زويييييييييييييين ورخيص بس مع الستخدام الكثير ينحاس يعني كل سنتين غيره وخذ مقاس 30 لانوه يركب على القاوعد القصيره وهذا مهم جدااااااااااااااااااااااااااا لان القواعد الطويله صعب وزنه ولهيب دقيقه بالحيل لكن ووش سبب تاثيره ما ادري والله والا كان علمتك.............

بالنسبه للفشق للالالالالالالالالالالالالالالا تعدا الدسكفري تراوه مهبول وقرااااااااااااااار وميزتوه انوه ضعيف يعني اقل خطوره الى اخطيت الهدف ما يسوق واجد بسرعه يبرد وبكذا تامن من انوه ياثر على شي ما تشوفه....... الستنقر زين بالحيل قوي مره وقرار بعد ......... وبوه انكانك تدور القوه بالونشستر ابو ارنب مهبول تسمع شخفوه بالهوا ........ لكن انصحك هجججججججججج عن الجنوب افريقي تراوه شخاميط صوابوه ....... جرب ثبت البندق بملزمه واطلع على نفس الهدف ثلاث طلقات تلقاهن كل وحده بشنق ......... تصويبوه سيييييييييييييييييييء بشكل مهوب معقول ..... ارجع واقول الدسكفري هو الفشق اللي برد الكبد وبسسسسس

[ابوجود]

لاحظ شى مهم اخوي
ان الدربيل يكون مثبت صح يعني شد المسمار عن اليمين واليسار متساوي
بمعن اذا جيت تركب الدربيل على الخرازه ركب الدربيل وشد مسامير التثبيت حقه الدربيل من اليسار واليمين بشكل متساوي حتى لا يميل الدربيل لليمين او اليسار فيصعب وزنه
اما الذخيره فالمتفجر اخوي هو الى راسه مفتوح (به ثقب بالراس)

وسلامتك

[بروق ورعود]

السلام عليكم ورحمة الله وبركاته
الاخوان عليان الليل, مطحن, ابوجود. مشكورين وماقصرتو على ردودكم وان شاء الله هالمره يظبط السلاح وتستعدل الوزنيه. شكرا مره ثانيه.
اخوكم بروق ورعود

[الخبير]

السلام عليكم

الشباب ذكروا في مواضيع سابقة طرق وزن الدربيل بطلقة وبثلاث طلقات وبلا طلقة.

إذا كنت تبي تازن الدربيل بطلقة مثل ماقال مطحن ثبت البندق بملزمة وإطلق على هدف من 30-50 متر ثم أوزن صليب الدربيل لمكان الطلقة.

بثلاث طلقات أو أكثر هي إنك تطلق لين تعرف الوزنية وهذا شئ غير مجدي أبداً.

كيف تازن الدربيل بدون ما تطلق أي طلقة؟
فيه طريقتين أعرفهن:1- تلقى عند الهدف أو الرماية عدة وزن الدربيل.
الطريقة الثانية إنك تثبت البندق بملزمة وتحط في فوهة البندق ليزر وتوزن صليب الدربيل على الليزر.

بالنسبة للرصاص فمثل ما تشوف الشباب ماقصروا كل واحد حط إلي يجوز له.
انا عن نفسي ما استعمل غير الونتشستر أو ارنب و رصاص اسمه ليزر، والأخير هو الأفضل.

[أبو المقانيص]

بالنسبة للرصاص الجيد
فأنا مجرب رصاص الليزر في الحقيقة ماله مثيل تراه دوا
والتجربة هي خير برهان

أما بالنسبة للوزن فالبواردية كفوا ووففو ماخلوا لنا كلام

والسلام دائماً وأبداً هو خير الختام

[صفوان]

الأخوان جميع

السلام عليكم ورحمة الله وبركاته

يوجد كثير من المواضيع مطروحة بنفس العنوان والموضوع.. ياليت لمن أراد المعرفة عن موضوع معين أن يذهب إلى (بحث) في أعلى صفحة المنتدى ويكتب العبارة أو الكلمة.. وهذا يُنصح بها لمن أراد المعرفة أو كتابة موضوع حتى لا تتكرر المواضيع
ومثال لهذا الموضوع، فلو تم كتابة كلمة "خرازة" أو "وزن منظار" أو كلمة "طلقة" سوف يسرد لك بعض المواضيع.. وهكذا
ومن المواضيع المطروحة مسبقاً

خرازة (http://www.mekshat.com/vb/showthread.php?s=&threadid=3593&highlight=%E6%D2%E4%ED%C9+%CF%D1%C8%ED%E1 )

طلقة (http://www.mekshat.com/vb/showthread.php?s=&threadid=10011&highlight=%C8%CF%E6%E4+%D8%E1%DE%C9)

رمية واحدة (http://www.mekshat.com/vb/showthread.php?s=&threadid=3417&highlight=%C8%CF%E6%E4+%D8%E1%DE%C9)

بدون طلقة (http://www.mekshat.com/vb/showthread.php?s=&threadid=2358&highlight=%C8%CF%E6%E4+%D8%E1%DE%C9)

ولكم جزيل الشكر..

أخوكم
صفوان