دفن كاشتين بمنطقة محمية !!!

[حفرلوجيا]

سلام يالربع
قرأت أول أمس خبرا في أحدى الصحف المحلية يقول أنه ( بإمكان الشخص أن يفصل لمنامه حلم على المزاج يرفع من المعنويات. . من خلال جهاز تم ابتكاره باليابان لهذا الغرض (http://www.alriyadh-np.com/Contents/15-01-2004/Mainpage/MIS_5218.php).. ) :looney:

ورغم أنني أرى أن الذي يصدق مثل هذه الأخبار انسان ( متوهق ) .. إلا انني - وعلى خلفية ظروف العمل اللي حبستني الخميس والجمعة - وما قدرت أدج في فضاء المكشاتيين ( البر ) .. بحيث لم أقاوم الرغبة في تفصيل ( حلم كشتة ) على مزاج رايق مع شلة من المكشاتيين .. وبعد مااخترتهم .. قال اميرنا فيها أخونا راعي عنيزة مانبي ( مشرفين ) وقال أسمح لكم تأخذون واحد منهم يكون واسطة .. ويجيب الكور الضايعة إذا نوينا ( نعربج ) بلعب ( الكورة ) .;)
والحقيقة كان من أبطال هذه الكشتة أخونا ( كشات ) مساعد الأمير لكل الشئون .. وكذلك أخونا فرد حمزة اللي كان المسؤول الأمني ..

ياحنا تونسنا وفلينا الحجاج لأن اميرنا راعي عنيزة اختار لنا روضة وقال تراني حميتها لكم ( تقول وتطول ياخلفهم ) .. يعني ماشفنا كشاتة غيرنا .. لاأحد يوصخ ولا أحد يزعج .. ويقول المسؤول عن النواحي الأمنية في أحد تقاريره انه اضطر يكون عنيف مع شلة كشاتة يبي يكشتون حولنا ويقول انهم ( مشرفين ) بس مايدري من وين ؟؟ .. ولم يخضع لتوسلاتهم يوم قال بعضهم ترانا ( سمحين وشقردية ودربنا دايما أيمن ولا نحب الدروب العوج ) :p لكن فرد حمزة كان شديد وقال لهم : شوفوا لكم مكان ثاني تسفهلون به حتى لو لقيتوا سعالوه بدربكم خلو مكشاتكم حوله..:D
وكانوا مسؤولين الكشتة يفطروننا ( هرافي ) .. ويغدوننا كبدة حاشي .. ويعشوننا حنيني ومراصيع ..
وقبل تنتهي الكشتة خطب بنا ( الأمير ) وقال : ( قبل نرجع للديرة وإذا بغيتوا ندخل منتدى مكشات ) أبيكم تتواعدون على تضبيط حالكم بالردود .. وهدد اللي يخالف التعليمات اللي ذكرها ان يسلط عليه المسؤول الأمني يجيبه من الديرة ويدفن ردوده بهالروضة .. وأظنه قال اللي مايعقل أدفنه بكبره ( شوي شوي يالأمير ) .. ووضح بخطبته ان أي واحد يبي يرد على أي موضوع بمكشات يراعي :
1- ماترد رد كيدي .
2- ولا رد مايجيب إلا مشاكل.
3- ولا رد كله طفاقة ( يعني خل بعضه مطفوق والباقي مفيد ).
4- وتخلون العدد على جنب .. وتنسون الرقم .. ( ياسلام إذا كان الكم والكيف زينات ) .
5- وما تتقصدون إرباك تسلسل الموضوعات بردودكم مثل مايسوون ( البعض ). ;)
وأكد الأمير على أن الأعضاء يبي يتخذون صلاحياتهم بـ( شطب العضو اللي مايلتزم من المنتدى ) .. وكرر التهديد بدفن ( الردود ) أو هو قال شي ثاني ..
ياشين راعي عنيزة هذا وهو عضو .. وين لو هو ( مشرف ) ؟! .. بس عاد الزين به ان الهرافي والحواشي كانت على حسابه الخاص ( أقول حلم .. حلم ) :(:mad::p:D;)
وسلامتكم

[المسفهل]

وش هالكتابة الرمزية ... ترى أكبدنا طاقة من الشعر الحداثي وكتابات أدونيس ..
بس في الحقيقة استطعت أن توصل الرسالة للأذكياء فقط :good:

[مطحن]

اخوي حفرلوجيا
جهازك ذا كهرب والا على حجرات؟؟؟

اهنيك اخوي على هالاسلوب المرح والله يوفقك.

[ابو سلطان العتيبي]

ابو سليمان

والله انك دست على الجرح

انتم حلمتوا عن اميركم هالسنه لكن حنا نحلم به من سنين!!

بس ترى اميركم اشوى من غيره واللي يمنع كل كائن حي من الأ........

ولا يقهرك الا لجاك واحد وقال الأرض وسيعه، خلنا ساكتين أحسن !!!!

تحياتي لك

اخوك/ عقاب

[السمح]

.
.
:good: :good: :good:
.
.

[مراكي الذيب]

ماشاء الله عليك اخوي ابوسليمان .
:good:


عجسنا نردعليك وانت واعي دوبن نبي نردعليك وانت تحلم:D

وين هالجهاز والله اني بحاجته بهالربيع لاني مشغول جداجدا يصير الواحد كل مابغى يكشت بس يحلم بمحميه وتريلة خرفان ومافيه مانع احلم بكم واحد اضحك عليهم .

[الجوني]

Originally posted by oqab
ابو سليمان

والله انك دست على الجرح

انتم حلمتوا عن اميركم هالسنه لكن حنا نحلم به من سنين!!

بس ترى اميركم اشوى من غيره واللي يمنع كل كائن حي من الأ........

ولا يقهرك الا لجاك واحد وقال الأرض وسيعه، خلنا ساكتين أحسن !!!!

تحياتي لك

اخوك/ عقاب

[صقر]

1- ماترد رد كيدي .
2- ولا رد مايجيب إلا مشاكل.
3- ولا رد كله طفاقة ( يعني خل بعضه مطفوق والباقي مفيد ).
4- وتخلون العدد على جنب .. وتنسون الرقم .. ( ياسلام إذا كان الكم والكيف زينات ) .
5- وما تتقصدون إرباك تسلسل الموضوعات بردودكم مثل مايسوون ( البعض ).
وأكد الأمير على أن الأعضاء يبي يتخذون صلاحياتهم بـ( شطب العضو اللي مايلتزم من المنتدى ) .. وكرر التهديد بدفن ( الردود ) أو هو قال شي ثاني ..

شكرا لك أخي حفرلوجيا على هذه النصائح.... وأتمنى ان يلتزم الجميع بهذه التعليمات

وبارك الله فيك.

[((( الحر)))]

ابو سليمان بارك الله فيك وفي وقتك الي تقضيه بيننا بمكشات...!!!

والله يالربع ويالمشرفين ماقصر فيكم ابو سليمان حاول يقنعكم ويعلمكم الي بخاطره بالعلم ولا فاد وقال خلني اجرب لعل الحلم ينفع معهم...!!!
الف تاج وتاج مذهب على مشاركاتك يابو سليمان وتخط بماء الذهب وخاصة ماكان حلم منها...!!!

تحياتي...............((( الحر)))................ابو محمد...!!!

[راعي عنيزة]

وخرو جاكم الامير <<<< هذا وهو حلم صدقت اجل لو هو صدز كان وش اسوي :D :D


يا مال العافيه ابو سليمان عزالله انك جبت العلم الي بيرتقي بمكشات زود على رقيه ويبتل يرقى يرقى يرقى لما ياصل السطح :D


وبالنسبه للمكاشيت السمحين والشقرديين التي تجرأو وكشتو بفيضة طويل العمر ما يسد التعامل معهم بعنف ولكن لابد نخليهم بالفيضه لما يرقدون واذا رقدو صبينا على خيمتهم قاز وللعناه بكبريت :D <<<< عقلية خوي ممهونة كرامته وحده يمسك نعال الامير ويبي يعوض نقصه ويحط حرته بالناس ;)

[عبدالعزيز الدباسي]

ما قابلتوا في طريقكم نقطة تفتيش ،،، كانت منصوبه في وسط الطريق ، وكان الشرطي سمح بالحيل الله يسمح دربه وين ما يمم ، وكان معه خوي اقل رتبه منه لكنه شري شوي ،، شفته يفتش سيارة قدامنا وانثلها نثل وما خّلا درج ما فتحه ولا شنطة الا نثر ما به ، تقول نقطة حدود ، ويحاول يسأل كل واحد من اللي بالسيارة سؤال ، لكن كان يسألهم على جنب ، تقول يفحصهم واذا خلص من الفحص وقالهم يالله تحركوا ، طلع اوراق وقلم وقام يكتب ، تقول مخبر ،،، وان انه يجمع معلومات عن شى معين .

ويوم جاء دورنا ، قرب يم السيارة وقام يتمقل بكل واحد منا ويقز بنظرات من فوق الى تحت ثمن يلتفت للثاني تقول يدور على احد يعرفه ،،، ويوم التفت ( لمي ) قال ايش فيك انت ا شوفك تتحرك كثير وش عندك من فين انت ، ايش تشتغل ، لازم تحترم المكان اللي ( انا ) فيه ، وقام يهثري بكلمات ما ادري وش يبي ، لكن الصدق اني خفت منه ، احس انه يهدد ويتوعد ، وخفت انه يمنعنا من الكشتة ، وسكت غصبن عن .

وما درينا الا جاء هاك الضابط المليح اللي كل وجهه سماحة وطيبه ، وقال وين وجهتكم يا شباب ،،، قلنا نبي نكشت مثل هالعالم ، قال الله يساعدكم ، لكن انتبهوا للمكان (( لا توصخونه )) بقراطيس منثورة ولا تكتبون على الاشجار او الاحجار ، وانتبهوا اذا اقبلتم على رجاجيل لازم تسلمون عليهم ، واذا لزموا عليكم اقلطوا عندهم ، ولا احد يهرج بكلام ثرثره ولا احد منكم يغلط على احد قدامهم ، واحترموا المكان اللي انتم فيه ، واحرصوا انكم تستفيدون من هالشيبان تراهم راعين خبرة ومعرفة ، وما يمنع انكم تعطونهم من المعلومات اللي عندكم اذا شفتوا انها بتنفعهم ، والا ترا الصمت حكمة في هالمواقف .

وانتبوا ياشباب ترا الدرب وعر لا تحاولون تسرعون او تسابقون احد ، ترا الواحد يمكن يصدم بشجرة ، او ينقلب بأحد الشغايا الكبيرة ، ثمن يصير مضحاكه للي يسابقهم ، ، وبعدين ما تستفيدون شى تبي تجيكم الشرطة وتأخذ رخصتكم وتشيل السيارة الخربانه وتنحرمون من الكشتة .

والحقيقة ان كل كلامه عسل ، و واضح انه ( فاهم ) وكل اعلومه ( علوم ارجال ) وما اكذب اذا قلت لكم اني اندهشت من طريقته بالكلام وسماحته بالحديث واسلوبه الممتع ،،، وعرفت ان اللي مصّبر هاك الشّري اسلوب هالسمح ، وعرفت ان كل الكشاته اللي مروا بهالنقطة استفادوا من نصايح هالضابط ، وما فيه احد الا استفاد منه ،،، لكن فيه ناس تسمع وتطبق ، وناس تسمع وتعصلق ، واذن من طين واذن من عجين ،،،،

[فرد حمزة]

حفر لوجيا

كلامك ذهب وألماس لا يفهمه إلا فطين وصاحب بصيره ، يقرأ مقصودك المخفي بين طيات كلماتك ..

ونصايحك درر

لكن ... !

على قولت الشايب

" قد يقول قايل .. ناس تلمح لها .. وناس تلوح لها .. وناس لا تلوح ولا تلمح "

أنتهـى كلامه حفظه الله ...

كل ما أخشاه أن موضوعك هذا .. يمر عليه من وجهته لهم كعادتهم في المرور !!!!!!!!!!!!!!!!

[الطبيب]

السلام عليكم ورحمة الله وبركاته

اخوي ابو سليمان

احلامك ارهابيه

ونبي نبلغ عنك مكافحة الارهاب

والله انك جبت شي لي فتره خايف لا اقوله ثم اتورط

وما يخفاك اني دفش شوي

==============

اسمحلي اقولك سالفه حول ها الموضوع

رجال معه فرد ( دايم متجنده ) تهدده حرامي ( ما معه الا ايديه )
وبدال ما يخوف الحرامي بالفرد هو هج منه

يوم لا موه وقالو له ليه ما رميته والا صوبته والاخوفته وانت مبلشنا ماغير متجندن هالفرد

قال ولد عمه ( يبي يتعذر له )

الفرد خربانه

قال هو

لا والله

شوفو لهبته بالعروس عند قذل البنات

لكن تبيله يد ولد تطلعه ترميبه وقت الخوف

=================================

هذا والله اعلم

والسلام ختام

اخوك

الطبيب:D

[المرصاع]

ردود الشباب عقدن لساني::::D

مشكور أبو سليمان ويامل العافية:::

تقبل تحياتي:::

[المربد]

والمسألة اخوية ، والشباب فيهم بركة، واللي متعجل اليوم بـيـفهم بكرى.

ولو سوالف الشعر قطعتك عـنـنا، لكن موضوعك هذا ازال الغـشــاوة.

ولا تـبــطي علينا الله يخليك.

[عروان]

.

الله يشرح صدرك يا بو سليمان


كانك تشرح صدورنا بهالسوالف الزينة.

نصايحة كلها درر الله يحفظك.


تحياتي للجميع

[ابو شكاع]

هذا ما يسمى المختصر المفيد

بعيدا عن الإطالة الغير محببة

شكرا لك وما قصرت

[حفرلوجيا]

الأخوان: المسفهل .. مطحن .. oqab .. السمح .. مراكي الذيب .. الجوني .. صقر .. الحر .. راعي عنيزة .. شقردي .. فرد حمزة .. الطبيب .. المرصاع .. المربد .. عروان .. ابو شكاع
والله لقد سعدت بكل ماأبديتموه .. وأشكركم جميعا.. وكنت أرغب في التأكيد على ماتفضل بعضكم به .. لكني تورطت وشايف الموضوع صار ( أدونيسي ) .. كما ذكر المسفهل .. يعني البعض حلق في الرمزية ..
عليه أستأذنكم في أن نوحد ونركز .. وننتقل إلى مجلس الفنان التشكيلي أخوي ( راعي الكحيلة ) .. وأبث همي هناك .. مثلكم يعرف التشكيليين صدورهم وسيعة .. أبو طلال : نقلط ؟ ...
يقول تفضلوا .. عطونا الرأي بتركيز في موضوع ...... لا ترفع موضوعا وتهدم آخر لمجرد كلمة ((شكرا)) (http://www.mekshat.com/vb/showthread.php?threadid=15391&perpage=15&pagenumber=2)