يا جماعة صرت مسخره لخلق الله يقولون ماتعرف تسوى مضغوط دجاج يا رخمه [الأرشيف]

مشاهدة النسخة كاملة : يا جماعة صرت مسخره لخلق الله يقولون ماتعرف تسوى مضغوط دجاج يا رخمه

منتج رسمي

14/09/2008, 05:37 PM

السلام عليكم

والله مليت تكفون الطريقة والمقادير اللى تسوى اللى يبيض الوجه أبى أسوى مضغوط ولو مرة وبعدها خلاص :j

اول 111

14/09/2008, 05:45 PM

بسيطه مره
ا كشن الكشنه الا تبيها
2 غسل الدجاج ونضفه مره وحطها علي الكشنه وعبه ماء لين يغطي الدجاج
3 كتم الكاتم ربع ساعه
4غسل الرز ولا تنقعه
5 افتح الكاتم وشخله من الماء
6كب الرز علي كل كاس رز كاس ونص ماء وخله ربع ساعه

منتج رسمي

14/09/2008, 06:02 PM

بالراحة على اللى يرحم والديك ترانى صايم والعقل مبوش وخارج نطاق التغطية :D

اورنس الشرق

14/09/2008, 06:21 PM

ان كنت بعطيك الطريقه بس شفت الاخ دهران متواجد فى الموضوع

وقلت اذا حضر الماء بطل العفور

اول 111 تراك كثرة الماء كاس ونص واجد على كاس رز

عبدالرحمن 1

14/09/2008, 06:32 PM

السلام عليكم

والله مليت تكفون الطريقة والمقادير اللى تسوى اللى يبيض الوجه أبى أسوى مضغوط ولو مرة وبعدها خلاص :j

والله مهوب عيب انك ماتعرف

تطبخ مافيها شي والله من واحد

طيب ولا يعرف يصلح براد شاهي

تحياتي

أبووو محمد

14/09/2008, 07:09 PM

اول شي قل بسم الله

بعدين قطع البصل والطمامط

واحمسهن بالقدر وحط زيت شؤي وحرك البصل والطماط الين مايميل لون البصل الى السواد بشؤي
بعدين حط الدجاج وعب الماء الى حد اعلى دجاجه

وحط ملح طبعا على حسب كمية الدجاج وانت حط شؤي ثمن خله على النار شؤي وذق ان كان يبي له ملح زود وان كان زين الحمدلله

وصك الكاتم وعلى حسب نارك ان كانه قويه من 15 الى 20 دقيقه

وان كانه وسط من 20 الى 30

ونقع الرز بقدر علشان مايشرب ماء

بعدين ياطوويل العمر فك القدر وحط الرز

واحسب له 10 دقايق او الين ماينشف والزين انك تخلي النار هاديه عقب ماتحط الرز

ولاتنسا تحط الليمون الاسود وتجخره والحبحر مع الدجاج باول شي

وتقبل مروري

أبووو محمد

دهران

14/09/2008, 07:26 PM

يا جماعة صرت مسخره لخلق الله يقولون ماتعرف تسوى مضغوط دجاج يا رخمه

أخوي (( منتج رسمي )) الله يهديك ويجزاك خير , وش داعيه ذا العنوان أصلاً (( تكرم عن المسخرة وتكرم عن الرخامة )) أنت في مكشات يا طويل العمر وما كان عليك إلا إنك تأشر لنا أشارة ... لا إلا تا مر أمر ونسوي لك إللي أنت تبي وبالتفصيل الممل والصور المفصلة بعد (( وترى هذا عتب من أخو لأخوه فقط لا غير ))

أخوي الغالي طلبك محل إهتمامنا لكن أبي منك تقول لي كم حبة دجاج تبي تسوي ولكم شخص وكذلك نوع قدر الضغط وحجمه (( يعني كم لتر )) وعقبه إبشر بعزك .

وتقبل أعذب وأرق تحية .

سيد النشاما..

14/09/2008, 07:33 PM

سالفة أني بترك العيال يقولون رخمة هذه مردود عليها

أنا ياأخوي من النوع اللي ماأداني هالكلمة تقال و( خاصة ) عندما أقوم بعمل وتاعب عليه علشان سواد عيونهم ثم بالأخير يقولون ماتعرف أنت رخمة ومن هالحكي ( ماعليش ) على طول الفيوز تشط شط ويمكن أصل لدرجة أني اكب عشاهم فوق روسهم
يعني ماشاء الله عليك واضح أنك خفيف نفس وماقصرته بذلته المجهود لكن الشكو لله مازانت الكبسة خلاص خيرها بغيرها
أما أنك تتعب وتتعب وبالأخير يصير كذا وبمثل هالردود الساخرة وبدون تشجيع و توجيه صحيح مشكلة ياخوي وماقول ألا ,, الله يعينك بس اللــــــــه يعينك

تأبط سهما

14/09/2008, 08:17 PM

بعد اذن اخواني اللي ردوا واللي ما ردوا واللي قروا وانحاشوا !!

اقول خذلك لفة كعب على هالمنتدى الطيب واقر وتلذذ عشان اذا جيت تطبخ الا وانت عندك ريحة من الطبخة اللي تبي تسويها

وشف وانا اخوك ترى فيه مسالة نفسية مهمة جدا في الطبخ وغيره وهي الثقة فانت اذا طبخت وواثق في نفسك وكانك الشبف اللي يطلع بقناة دبي نسيت اسمه فصدقني تجيك طبخات ولا في الخيال اما اذا طبخت وانت خايف انها تخرب فالغالب انها تخرب

وبعدين هالناس اللي ما تقدر تعبك وش تبي بها ياشيخ غير ماسوف عليهم الا عاد شيابك واخوانك هذولي ما منهم مصد

تحياتي لاخواني حبايبي

أبشر بعزك

14/09/2008, 09:51 PM

حبيبي خد هدي الطريقة وراح تشكر الله
1- حط الكاتم على النار وحط زيت زيتون ومن ثم حط البصل وحرك لحد مايسير لون البصل دهبي
2- نجيب الطماطم ونحطها فوق البصل ونحرك لحد ماتستوي الطماطم
3- نحط ليمون أسود وفلفل بارد وفلفل حار وبهارات وماجي على الطماطم والبصل ونحرك الخلطه
4- نضيف اللحم على الخلطه الموجوده في الكاتم ونقلبها شوي ومن ثم نضيف عليها الماي وأنا بصراحة ماأحط ملح أزود الماجي عشان يعطيني نكهة اكثر بعد كدا نقفل الكاتم
5- بعد ساعة الا ربع افتح الكاتم ويكون عندي كميه من الثوم المهروس وأرجع أقفل الكاتم وأحسب له عنصف ساعة
6- أفتح الكاتم وأحط الرز ويفضل ابو كأس وماحصل مو موشكله اي نوع بس هدا على دووقي وأحسب له خمسة عشر دقيقة ومن ثم أطلعة وانجبه وأشمر عن ساعدي وبالهناء والعافيع عليكم

اول 111

14/09/2008, 10:02 PM

ان كنت بعطيك الطريقه بس شفت الاخ دهران متواجد فى الموضوع

وقلت اذا حضر الماء بطل العفور

اول 111 تراك كثرة الماء كاس ونص واجد على كاس رز

اجل كم في نا س يقلون علي كل كاس رز كاسين ماء وش تقول تراني ما منقع الرز

مجازف2010

14/09/2008, 10:40 PM

معليش مداخلة على كلام الاخوان
فيه خطأ شائع بين الناس ان اذا الرز ما تنقع بالماء يصير نثري مع انه من واقع التجربه انك اذا ما نقعت الرز يطلع هريس والحبه ماهي طويله اما كل ما نقعته اطول كل ما صارت الحبه طويله ونثري مع تقليل الماء

تحياتي للجميع

عم حمزة

14/09/2008, 10:54 PM

بيض الله وجوهكم .. حتى انا استفدت من طرق الإخوان وما قصرتو ...

تحياتي الحارة الفايرة تساووون بها شاي بالنعناع المديني ..

اورنس الشرق

15/09/2008, 01:01 AM

اجل كم في نا س يقلون علي كل كاس رز كاسين ماء وش تقول تراني ما منقع الرز

اختصرها لك اذا حطيت الرز وصبيت عليه الماء جب ملعقه

وعزها برز اذا وقفت كويس اذا طاحت معنات الماء زايد

مطلاع

15/09/2008, 01:34 AM

حياك الله يا {منتج رسمي}
ومحشوم عن المسخره
واكيد افادوك الاخوان

منتج رسمي

15/09/2008, 03:54 AM

الله يجزاكم ألف ألف خير

وكفو والله وماقصرتوا أبجرب وحده من وصفات االشباب اللى ردو فوق ولا يهون الباقين

أختارى وحده وصفها هين وأجربها وأرد لكم خبر بحول الله

وفقكم الله

اول 111

15/09/2008, 02:15 PM

اختصرها لك اذا حطيت الرز وصبيت عليه الماء جب ملعقه

وعزها برز اذا وقفت كويس اذا طاحت معنات الماء زايد

جزاك الله خير

DOHIM

16/09/2008, 02:51 AM

ياخوي من يوم جا الكاتم ماعاد فيه ارفل
كاس رز وكاس ماء وكل لتر ماء ملعقة ملح
اذا كانت الطبخه دجاج كشن بصل لين يجي اصفر
وحط الطماط لين يحل وانطل الدجاج وحط ملحك وبهراتك
واكبس عليه الغطا
لمدة خمس دقايق وافتح الكاتم وكب رزك ولاتنسى تحط علبين الى ثلاثة حبحر(فلفل)
لين يتستس ونمله ( اي اقصر عليه النار) وخله لمدة 15 دقيقه وبالهناء والشفاء

منتج رسمي

16/09/2008, 10:24 PM

مالكم إلا من يحط تجربته بالصور هنا أبشروا :D

دغــ أبومحمد ــيم

18/11/2008, 08:07 PM

عبدالرحمن 1

24/09/2013, 06:20 AM

السلام عليكم ورحمة الله
بشر عساك عرفت تظبط المضغوط بعد هالسنين انشا الله نبيك تعزمنا نشوف شغلك

saadqc

24/09/2013, 06:42 AM

موب لازم مضغوط يمكن إنك فنان في أمور أخرى