اذا طاح الجيب بالطين وشلون يطلع

[المنقفط]

سلام عليكم
كيف حالكم ياشباب ويعطيكم ربي الف عافيه على الموقع

انا مسجل لي شهر وهذي اول مشاركه لي ومابيكم تردونن

لي موتر طاح بالطين حول الرياض غطس غطسه بنت كلب وحاولن نطلعه عجزنا بالطرق التقليديه (واير وسلسه وحفر )المهم انه ماطلع وش رايكم الحل بالحاله هذي

ويعطيكم ربي الف عافيه

[شاهد عيان]

أتوقع إن ( الحراثة ) مناسبة للجر ..

إن شاء الله ماترى مكروه .

[تالي الاولين*]

.


اعتقد ان الاكثر عمليه في هالحاله

هو المكره او الونش .


.

[كشات]

بسم الله الرحمن الرحيم

السلام عليكم ورحمة الله وبركاته

ياهلا بك ومرحبا اخوي المنقفط

اذكر فيه موضوع كان عن هالشي

واسمحي لي ماذكر الكاتب بس يمكن تلقاه بخيمة (عدد وادوات المقانيص والبر)

والطريقه سهله

يقول الكاتب الله يجزاه خير
انك تحط العفريته بشكل مايل وتخليه ترفع الجنط من برا ولازم تحط لك شي تحت العفريته عشان ما تغطس بالطين هي بعد
ارجو انك تكون فهمت القصد يالغالي

وسلامتكم

[الرجبه]

السلام عليكم ورحمة الله وبركاته

مالك ياخوي الا انك تبرح لكل الكفرات من الطين من جميع الجوانب, لان الطين اقشر يمسك الكفر مع جنوبه اكثر شي. ثم دورلك لوح والا حطبه طلع الموتر عليها. بعدين كان معك احد حاول تهز الموتر وتوكل على الله وجرب طلعه الحين...




و السلام عليكم ورحمة الله وبركاته

[* رمش العين *]

السلام عليكم
انا لست خبيراً يا اخوي (( المنقفط )) يازين هالسم يذكرن بواحد من الشباب اسموه المنبقط ماعلينا نرجع للموضوع واقولك ما من خبره لاكن لي تجربه تحوم السبد ما تقول اننا العام كشتنا يم الزعبيه حول اعيوج لينه ومير انروح انتمشا من الساعه 10 الصبح ويوم ابعدنا عن الخيمه وهي بفيضه جنب اعيوج باليل نشوف اللمبتين الي باعيوج ما بوه غيرهن المهم بعد ما طلعنا بساعه بدت السما تمطر ومهب مطر الا شين يوحش وتقطعت الخطوط من الشعبان والارض غدت مطينه ومغير انهجهج عن الشعبان والقيعان المطينه (( اكمل والا مليت من قرقي )) كان انك ما مليت قلي اكمل واعلمك وشلون غطسنا بالطين بجيب باث فايندر وشلون طلعناوه.

وياحبنا لنا

[فـ(الجـوف)ـتى]

اخوى الغالي

عليك ان تنسم من الكفرات وتحفر له من جميع جهات الكفرات وتضع تحت الكفرات

شجر او خشب او لساتك وتحول ان تطلعه واذا لم تستطع ان تسحبه بجيب او غيره عليك

بالحراثه وبأذن لغير تطلع 0

[السحقان]

طيب وش رايك بهاذي:confused:

دور اكياس شعير ويا كثره بالبر:mad:

وامله تراب(بوجه العدو)

وارفع السيارة وحطه تحت الكفرات

وقدامه كذلك ثم توكل على الله:good:


:D :D :D

:D :D

:D

[المنقفط]

الله يجزاكم خير على المعلومات

المشكله حراثه دورنا بالمزارع اللي حولنا مالقينا

واننا نجره بسياره ثانيه ,المنطقه اللي حول الموتر كلها طين ومافيه ارض زينه الا عن السياره 40 متر تقريبا وجربنا سلسه بس مثل منتو عارفين السلسه كل ماطالت كل ماصر الجر اصعب وصارت اثقل.


التبريح للكفرات المشكله لو نبي نقعد نحفر ماقضينا الا بكرا ,اعلموا ان باب جهة السواق ماينفتح علشان الطين ساد عليه

الله والعالم مالي الا دفاعنا المدني غديهم يفزعون معي ولا اني ادق على 911 مع العلم اني دقيت عليهم وقالولي فيه ارواح قلت لا قالو اجل ماعلينا منك

وماقصرتوا يالربع

[ابو شكاع]

((على 911 مع العلم اني دقيت عليهم وقالولي فيه ارواح قلت لا قالو اجل ماعلينا منك ))

ههههههههههههههههههههههههههههههه

المعذرة اخوي ولكن شر البلية ما يضحك

الله يكون بعونك

طيب فكرت في السطحة؟؟

ترى السطحة ممكن تفيدك من خلال الونش اللي بها ؟
او الحراثة

او الونش

والله معك

[الحاتمي]

الامر سهل يالمنقفط
مره واحد غطس بطين لدرجة ان الصدام اللي ورى واللي قدام
لامسات الطين وسيارته جيب سفاري والمسافه يمكن اكثر من مسافة 40 متر
المهم ربطنا الوايربالسفاري اللي غاطس وجلسنا نوصل الوايربواير ثاني وثالث لما وصلنا الارض
الزينه وربطنا الواير بالجيب(تويوتا ديزل؟) وشغلنا الدبل الثقيل ماقدريسحبه؟
جبنا جيب ثاني سفاري ربع وربطنا واير قصير بينه وبين التويوتا الديزل وشغلنا الدبلات الثقال وسحبناه بالريوس ولا عاق نقزمن غطسته تقول انك تسحبه بابوجنزير.وللمعلوميه اول ماجريناه كان صدام ورى يجمع طين من شدة الغطسه وشوي شوي ارتفعت الكفرات لما وصلناه للارض الزينه....
تحياتي

[الثادقي]

هذ جيب لكزس 2003
غاطس في دركال مهوب في مزلقه طين وطلع بالشيول

[الـفـحـل]

سلاااااااااااااااااااام
انا اقول لا تنسم الكفرات لانك لو نسمتها بيتعلق اكثر



اهم شي انك تجيب حراثه لان الطين تعلق به السياره وما ينفع به السيارات الثانيه



تحيااااااااااااااااااااااتي

[المنقفط]

الله يجزاكم خير انشالله

بس شكلي الله والعلم اني ابجرب حقتك يالحاتمي لأنها اسهل وحده وماتحتاج حفر ولا يحزنون اربط وجر بس

بس اذا مانفعت تراك تبي تجي وتطلعها انت :D

تحياتي لكم جميها وماقصرتوا يالنشامى

[بركان]

قربة الهواء التي توضع تحت السياره وتوصل بفتحة العادم -الشكمان- قد تكون اهم
قطعة يجب اخذها هذه الايام لان الاراضي كلها موحله فهي مفيدة جدا في رفع السيارة
ثم ردم المنطقة تحتها بما يتوفر لديك.

ونصيحتي للكشاته امش مع درب الناس المدكوك ولا تتشاطر وتقول معي دبل وتفتح لك درب
جديد خلك مع دروب المسلمين واحذر تسلم.
لا تقول ليتني اخذت براي اخيي/ بركان ومشيت مع دروب المسلمين.!!!

وسلامتكم.

[بنيللي]

مرحبا يا الأخوان :
في مثل يقول اسأل مجرب ولا تسأل الطبيب .
ما في واحد كثري طاح في الطين مدري الله داعي علي وإلا الحظ مو زين .
وما طلعني من هالغرازات إلا الله ثم الونش واترك عنك التل أو النتع لأنه يخرب عليك البككس أو الشاصي يحركة من مكانه .
والله يكفيكم شر الطين وأهواله .
والحافظ الله .

[المربد]

ايش رايكم بسلالم الحديد،
انا اشوف على سيارات الخواجات يربطون سلالم حديد طول كل واحد متر وعرض ثلاثين سنتي متر يربطونها على الصدام سالتهم قالوا للتغريزات والطين.. نفتحها ونحطها تحت الكفر ونمشي عليها ... !!!

انا ما جربتها بس تظنون انها تنفع.؟