كشت لكن هل أستــــانست ! حلول للوناسة :

[شاهد عيان]

أحبتي الأعضاء :

السلام عليكم ورحمة الله وبركاته
الكثير منا يكشت ويتغربل لكن لايستانس .. لأنه حاط بباله إنه يطلع للبر ويجهّز الأغراض لكن أغراض الوناسة معدومة ..
هنا سوف أقوم بتجميع الآراء منكم لنضعها كحلول للوناسة إذا طلعت للبر ( لكن وناسة فيما لا يغضب الله تعالى ) وهذا أهم شيء .

على سبيل المثال :
1- اللعب بالكورة مثل القدم أو الطائرة .
2- اللعب بالدباب .
3- هواية التطعيس ( بس مهوب بالحيل ترجع قالب بالسيارة ) ..
4- التحدث بالكنود .
5- التزحلق على الرمال .
6- ....

عطونا ماعندكم يصلح للوناسة

[abos3d]

احلى شي انه اذا كان معك واحد دب وانت في النفود اطلعوا به طعس ودربوه من فوق ( يعني طيحوه ) والله العظيم تتقطعون من الضحك والوناسه والا الشباب يتصارعون فوق طعس والي يطيح الثاني من فوق يفوز هذا الي عندي وسلامتكم

[مريقب العيفار]

اخي الكريم شاهد عيان

شكرا لك على هذا الموضوع الجميل والمهم

غالبا في النهار يكون الكشاته ما بين تمشي ولعب

وحطاب وطبخ ونفخ الخ

لكن الكلام على الليل

من ما يكمل الوناسة السواليف الزينة والعلوم الطيبة

حول الضوية مع رفقة شرواك

أيضا لو كان فيه مسابقة ثقافية اذا كان العدد يسمح بهالشيء

هناك ايضا الالغاز والطرف

كذلك طرح قضية تهم المجموعة ومحاولة مناقشتها مناقشة

هادفة وليست مناقر وهواش وزعاق

اكيد الاخوة عندهم الكثير

لكن هذا ما تهيأ في هذه اللحظة ولك الشكر

[العليمي]

لا يمنع من أخذ ام صتمه اذا كانت الكشته للتمشي ، ووضع إشاره و التحدي عليها ....

[Ra7aL]

مشكور يا شاهد عيان على هالموضوع وانا مع الاخ مريقب العيفار ان في بعض الامور تكون في الليل مثل التجربع عشان كذا انا اقول انك تجمع من الشباب الاقتراحات وتصنفها على صنفين نهاربيه وليليه.

وجزاك الله خير،،،،؛

[الحاتمي]

اخوي شاهد عيان
اهم شي اذا بغيت تستانس بالبر
وتفله انك تعرف من تكشت انت واياه
وانا اكفل لك كشته ونيسه لوانكم مانزلتوا
من السيارات.
لكن التحديات بالبر زينه وتونس خصوصا اذا كانت بصوره غير فرديه.
والاونس اذا صارمعك خفيف دم وعيار( عمله صعبه)
وسلطته على خوياك وتفرغت للضحك عليهم...
وفيه التجربع بالليل بس اهم شي انك تصير السواق
اوتكون حذر من اللي يسوق وانت نازل
عشان ماتصيرمسخره......