!!! قصتي مع الذيب !!!

[Bo Rashed]

السلام عليكم ورحمة الله وبركاته

للتوضيح الحادثه وقعت خارج المملكه بتاريخ 21/1/2004 الساعه 1:10 ظهرا

طاقني الجوع وتعبان من الدوام واروح اركب سيارتي اتفاجا الا بذيب واقف قدامي!!!

هذا اللي صار لي اليوم يا جماعه، طالع من المحاضره ورايح بركب سيارتي وقاعد افكر وين اتغدى صيني ولا سي فود (اكل بحري) وتوني حطيت المفتاح بالباب والتفت جنبي والا هذاك الذيب اللي عيني بعينه، تسمرت مكاني من المنظر والشعور الغريب، ما اخبي عليكم اني حسيت بفرحة شوي على الاقل شفت الذيب على الطبيعة، لكن الشعور الحقيقي طغى على اي شي ثاني وراح الصيني والسي فود وجات النفاظه وام الركب.

الحين الذيب جالس يطالعني وما شال عينه عني مدري هو خايف مني ولا جالس يشيك على نوع البتلو اللي واقف قدامه واللي هو انا، طرت علي ضروسه وهذا اللي زاد الطين بله يالله وش ذا البلوة، سميت بالرحمن وتعوذت من الشيطان.

فريت المفتاح وانا قلبي دقاته في تزايد واضطراب، وافتح باب السيارة واسوي حركة سريعة تقول حقين النينجا والا انا داخل السيارة، تنفست الصعداء وحسيت اني فرطت والحمد لله من ضروس هاللئيم اللي كان متربص لي. قعدت اطالع فيه من داخل السيارة طبعا لان الشجاعه ماش والمثل يقول الشرده نص المرجله في مثل هالحالات. تمنيت لو كانت عندي كميرا كان صورته وحطيت لكم الصورة لكن اوعدكم اني احاول اصورة مره ثانيه لان الشباب يقولون انهم يشوفونه دايما يدور حول الجامعه، طبعا الجامعه في الحديقه حقتها في ارانب برية عايشة بس القوانين تمنع صيدهم لكن العرب ما يقصرون يحذفونهم بالنعل اجلكم الله.



تحياتي

[المري]

مرحبا اخوي ابو راشد


الحمد لله على السلامه



اخوك / المري

[Bo Rashed]

الله يسلمك اخوي المري

والسالفه نعم صايرة لي شخصيا

تحياتي

[صقر]

شكرا بو راشد على القصة


وودنا تصور لنا هالذيب وهل هو يشبه ذئاب الجزيرة العربية أم لا؟؟


بارك الله فيك...

[Bo Rashed]

العفو يا بو صقر

وان شاء الله بقعد اتحقط له واحاول اصوره وفي طير بعد اشوفه دايم وموالف على نفس المكان ودي اصوره واحط صورته عشان نشوف وش نوعه لاني شاك فيه ومدري هل هو صقر ولا عقاب

والذيب لونه بيج فاتح وفيه رمادي خفيف فوق ظهره وما يشبه الذيب العربي على حد علمي

[فـ(الجـوف)ـتى]

الحمدلله


على


السلامه

[نجمة سهيل]

لوني منك تسان دخلت يدي في حنتسه ومعطت:D لسانه <=== :D:Dإيه هين :D:D


الحمدلله على السلامه ، والمره الثانيه نبيك تكون انت البطل :D وتخوف الذيب;)

[عاشق الصفاري]

الحمد لله على السلامة ..
والظاهر انه ناويك من اول ما شافك ..
اقتباس:
لوني منك تسان دخلت يدي في حنتسه ومعطت لسانه <=== إيه هين

[ابورشيد]

لكن وش هالديره اللي ارانب البريه في اراضي الجامعه
لاوبعد ذيييييييييييييييييب انحش انحش
انا مره في ماليزيا مادريت الا وام رشيد تصايح وراي وارجعلها الاوذيك الحيه وراها
وانا اقوم اطق الحيه بالنعله تدرون ويش سار يا اخوان
جتني هاك السايحه اضنها المانيه وتدهر علي وتزبد تقول خلها لاتوذيها

[ابو شكاع]

وين يبون بنا

وش الذيب اللي يجي عند الجامعة هذا ؟؟

طيب المفروض يعطونكم بدل عرشة كتف او عرشة راس

معقولة ؟؟

طيب وين الأمن ؟؟

هل معقولة ذيب يكون طليق بهالشكل ؟؟

لايكون كلب ومسوي فيها ذيب خخخخخخخخخخخخخخخ

الحمد لله على سلامتك يابورويشد

وانتبه مرة ثانية

خذ الحذر منه

ولاهنت

[Bo Rashed]

السلام عليكم ورحمة الله وبركاته

فـ(الجـوف)ـتى

الله يسلمك اخوي من كل شر

نجمة سهيل

ايه هين انا احمد ربي اني ما طلعت ناقص يد ولا رجل والمره الجايه بنقز عليه واتصارع انا وياه:D

عاشق الصفاري

الله يسلمك اخوي من كل شر، والله يخوي من كثر الارانب ما هوب يمي بس الظاهر انه كان ملقوف شوي وجلس يراقبني وش بسوي

ابورشيد

هالديره اسمها ولاية كولورادو بامريكا وهي معروفة بجبال اسمها جبال الروكي وجمالها شئ خيالي والحياة البرية متنوعة دببة وغزلان وذياب وارانب و وبر وعقبان وصقور وانواع واجد من طرايد الصيد والحيوانات المختلفه ولان الان حنا في فصل الشتاء تنزل هذي الحيوانات من الجبال من شدة البرد والثلوج وتدخل المدن تاكل من اكل الناس وما احد ياذيها الا اذا هاجمت احد والقوانين مشدده والغرامات تصل لعشرات الالوف والسجن لكن اخوانك ما يقصرون بالنعل على الارانب.و احيانا واجد تشوف لك غزال خاطف الشارع ولا ذيب مصدوم على الخط ولا واحد صادم له غزال :D

ابو شكاع

اكيد انه ذيب والجامعه يخوي حولها وديان وجبال وهالحيوانات تجي من الجبال ترعى وتلقط ومحد يجيها ولا ياذيها الا اذا هاجمت احد والحيوانات واجد يعني ما بيجلسون يطاردون كل شي يشوفونه واحيانا يحصل ان تجي الدببه تاكل من النفايات لان حنا في فصل الشتاء ويقل الاكل لكن الحمد لله ما شف دب الى الان واذا شفت واحد بحط لكم موضوع !!! قصتي مع الدب !!! :D

تحياتي للجميع

[حد السيف]

Bo Rashed
سلامات وماتشوف شر ان شاء اللة
اكيد ان الذيب حس انك جوعان وقال مالي بة او انة توة ضارب من الارانب اللي حول الجامعة وبغاك توصلة مايبي يهضم وانت فهمتة غلط
انتبة لعمرك وتعود سالم لنا بعد انتهاء دراستك ان شاء اللة بالسلامة
تعيش وتحكيها واللة يحفظك من كل شر ومكروة


محبك اخيك
حد السيف

[بن عباد]

السلام عليكم ورحمة الله وبركاته


هلا اخوي بو راشد صدقت يالغالي ان كان على خبري

انت في بويبلو والا كلورادو سبرينغ

اخوك له عنها 22 سنه
تمتع يالغالي ولا تنسى بولدر وضواحيها

وكل عام والجميع بصحه وعافيه يا اعضاء مكشات الغاليين

اخوكم بن عباد

[(أبو معاذ)]

السلام عليكم
أسأل الله أن يردك إلى بلدك وقد حققت ما تتمناه من النوايا الصالحة

أخاف أن الحال جلد وعظم .. ما انت مربرب"سميّن"
انتبه ما نبغا تصوير عساك سالم !!

[Bo Rashed]

اخوي حد السيف

الله يسلمك والشر ما يجيك ان شاء الله
شكله هالذيب ما عجبه مقاسي يبي من اللحم الحمر مهب لحمنا اللي صار لحم ضبان من كثر ما شوته الشمس بالبر والبحر
والله يسلمك يا الغالي وجزاك الله خير

اخوي بن عباد
وعليكم السلام ورحمة الله وبركاته
والله انك جبتها يا الذيب اثريك منتب سهل بس ليش قلت 22 سنه الحين عرفنا انك شايب:D ادعو الله ان يطيل في عمرك وان يحفظك لاهلك
انا يا طويل العمر في بويبلو وتراها تنشد عنك هي وكولورادو سبرنغز و بولدر ودنفر وتراهم على حطت يدك ما تغيروا بس يمكن العمران شوي تغير وبالفعل الناس هنا تقول ان قبل 20 سنه كانو العرب مالين المدينه الان ما في الا 20 شخص تقريبا
بارك الله فيك

اخي (أبو معاذ)
وعليكم السلام ورحمة الله وبركاته
امين وبارك الله فيك وجزاك خيرا
اخوي دقيت على الجرح يوم قلت ان الحال جلد وعظم وانا اشهد انك ما زليت في كلمة وشكلك مجرب الغربة وخابر الهموم والتفاكير وتراي ناقص 10 كيلو عن وزني الطبيعي لكن الله يعين ويكتب لنا الاجر ان شاء الله.

وفقكم الله

[الخرازة]

) اخوي ابو راشد

اولا - الحمدلله على سلامتك

ثانيا - هل صليت في ذلك اليوم الفجر في جماعة

ان كانت الاجابة ( بنعم ) فقد انجاك الله بسببها

لان الرسول صلى الله عليه وسلم يقول :

( من صلى الفجر في جماعة فهو في ذمة الله حتى يمسي .......)

- ومن يكون في ذمة ملك الملوك ورب الارباب لا يضره شيء -

وان كانت الاجابة ( بلا ) فاعلم انه انذار من الله بسبب تقصيرك

وهذه نعمة من الله ان تستيقظ من غفلتك..

حفظنا الله واياك من كل سوء وعدت الى بلدك سالما غانما ,,,,,,,

والسلام ,,,,,,

[العزوم]

السلام عليكم ورحمة الله وبركاته

هذا ذيب متعود على الدمقراطيه, والا لو أنه من ذيابة ديرتنا كان ما اعطاك فرصه:D
الحمدلله على السلامه,,,,,,,,,,,

[الوهبي 205]

والله انك شجاع والله لوني مكانك امسك النعال ( وانتم كرامه) واعض ثوبي بسنوني واحط رجلي 220

على العموم : الحمدلله على السلامه

انا انزلت موضوع برحلت البريه (( يا ذيب لاتامن الذيب )) شفه واحمد ربك على السلامه

[VXR.2007]

يوووووووووو قديم الموضوع
ماكان فيه احد من الاعضاء

[حجلان]

لا هنت يابوراشد

ودنا انك تعيد المقطع من جديد بس المره هذه يكون معك كاميره حنى يتسنى لنا نشوف الذيب وانشوفك وانت خايف وكيف جاتك ام الركب وقمت تتنافض وكيف ركبت السياره كل هذه ودنا نشوفها:D



الحمدلله على سلامتك حتى لو انها قديمه من عام 2004 بس انت مازلت تتذكر هذا الحلم الحقيقي:good:

[AL-Hadbani]

دنى بخاف من الكل يطلع لي آسد

[مخاوي الذيابه]

الحمد لله على السلامة ......

[sierra denali]

الحمدلله على السلامة

[ابو عزيز1961]

الحمد لله على السلامه -والله يردك بالسلامه
ودايم خل معك -عصا الله يعزكم
يمكنه coyote مش ذيب

[اسير الغضا]

وش دعوا ياشنبات الموضوع من عهد قارون والاداره متشتشه ماتبي احد يرفع
المواضيع السابقه (قلعته وراه ماتقفل المواضيع بالمفتاح)
وبعدين عندي سؤال ابي احط صوره رمزيه تحرك وشلون
تحياتي لكم يالغالين

[هبايب الخريف]

هذا علم ولاخيال مشكور على القصة

[حوات جده]

مشكور يا بو رشاد حقيقة دخلت مع الموضوع الرائع

[ابوعبدالله 20]

الله يعطيك العافيه

[كلمة الدوريات]

جزاك الله خير

[الشمطري]

الموضوع قديم

واشكرك على القصة يابو راشد

وين المشرفين عن رفع المواضيع القديمة

اذا كانولا بد تقفل وتفهرس

[راعي الطلعات]

وين هالجامعه فيه داخل المملكة ولا خارجها

اذا داخل المملكة اتصل على حماية الحياة الفطرة كود تجد له المكان المناسب

وننتضر صورتك

[أبو إبراهيم !!]

الله يستر وحمد الله على السلامه

[أبو فهد ( 1 )]

الحمدلله على السلامة ويبدو أنه غير مؤذي والدليل أنهم يشوفونه دائماً يدور حول الجامعة ولو كان مؤذى ما ترك على كيفه والسلام

[القطاوي 2008]

الحمد لله على السلامة يالغالي

[ابوو ترركي]

الحمدلله على سلامتك اهم شي

[المغامر2]

الله يعينك ذيب يطلعلك في الجامعه والله هالبلشه تفكر في المحاظرات والى في حطة الرجل من باب الجامعه الين داخل السياره --!!! لا وبعد فيها دببه يعني ماتفيد السياره يبغالك مدرعع ؟؟؟؟
الله يهميك ويردك للديره سالم غانم

[مراسل الخير]

يازين قصتك ياأبوراشر تصدق اني تخيلت نفسي مكانك وبغت تجيني ام الركب والله يحفضنا وياك من كل شر وتقبل مروري.

[المقنع666]

الله يرجعك لهلك سالم غانم غانم بالشهاده وليس مغنوم من الذئب بسم الله عليك

الحين انت متأكد انه ذيب لايكون طالب في الجامعه وتحسبه ذيب يمكن متوهم في لحظه جوع لأن الجوعان

يشوف الناس ذيابه :p :D :D

[الربذي]

الحمد لله على السلامة

سوال ليش الذيب اذا وجد النائم يقعد يكوح عليه التراب لين يصحي هل الذئب لاياكل الميت قصه حصلت كذا مره

وايضا احيانا حتى والانسان يمشي يكوح عليه تراب لماذ؟؟؟؟؟؟؟؟؟؟؟؟؟