سرقة العيال و(ابوهم ) مايدري .. بسبب ( مكشات )

[حفرلوجيا]

سلام يالربع
وصلت بيت جار قديم بعد صلاة الجمعة أزوره .. وجدته مع أخوانه وأبوه راكبين السيارة كاشتين ( خفافي ) .. أحرجوني عند اصرارهم أرافقهم وقالوا الغداء معنا.. كلها ساعتين ماراح نطول ..
ركبت وكنا أربعة بالشايب ( مية بلوت ) :D .. قال الجار : نبي نروح للمكان اللي تخبرونه مافيه زحمة ونظيف .. رد ابوهم : أثاريك خبل ماتعرف :confused: .. ذاك المكان مافيه مطامن ولا هو ذاري ,, معصي خلك شمال عنه .. ( رغم ان الجو مغيم ولا فيه نسمة هواء ) .. لكنه ابوهم .. لذلك قال الولد : ان شاء الله .. :good:
نزلنا بمكان (الشايب) واجتهدت وقتها أشب النار من حطبهم اللي يتقاطر ماء من أثر الأمطار .. لكن بعد جهد ( شبيتها ) .. وقام الشايب يحورف بها حتى طفت وعجعجت الدخاخين .. وهذا اللي خلى أصغرهم يقول ( ليش يابيي ؟) .. قال الشايب ( وبثقة ) : هذا من رفيقكم ( الأرفل ) !! :confused:
وعند ملاحظتي إن بعضهم كان محرج قلت : وش نسوي ياعم ماحنا ( سنعين ) مثلكم الله يسلمك ! .. قال ( أيضا بثقة ) : اللي ماهو سنع لايصير ملقوف !:looney: .. عاد خذ يا أشكال الإحراج اللي ظهرت على ملامح جاري وهذا اللي جعله قبل نتقهوى يقول : هاتوا الغداء.. وهنا استمر الشايب ( يبدع ) وقال : خلو بعضه بالقدر لاتفسقون ..:mad: ( المرة ذي انا االلي تبعثرت ملامح وجهي من الإحراج ) .. وواضح ان ( شايبهم سوبر ستار دبرة ) .
بعد الغداء قال لي الجار تعال نشوف البسباس والقريص اللي هناك ( يمكن يبيني بحديث جانبي ) .. تنهضت لكن ( الشايب ) قال وراكم كل واحد ( له خط وشط ) لحاله .. انثبروا معنا خلونا نوسع الصدر ولا ( تحوسون ) علينا الكشتة !! :looney:
لكني المرة هذي رديت عليه المرد اللي يناسبه ‍‍‍‍‍‍‍‍‍‍‍‍‍‍‍.. ؟:good:.. ولانفع به:(
أقول لكم وش صار ..
---------------------- يتبع

[السمح]

يازينك وزين سواليفك .. بس بك هالطبع الاقشر .. ( اصبروا خلوا أروح أشرب ماء وأرجع ) ( أبشوف من اللي يطق الباب وأكمل لكم ) .. وأنواع التصريفات .. إذا استمخ الواحد يقرا ما يدري إلا طالع له أبوسليمان يقطع عليه .. :D
حنا بالانتظار ولا تبطي ياعيوني ..

أحلى تحية

[مجنونها@@]

بانتظارك

[حفرلوجيا]

هلا بالريس الكبير أخونا ابو تركي .. وهلا بأخوي مجنونها .. المعذرة ..
على جنب : سألني عزيز : ليش تقطع المواضيع ؟.. قلت إذ بغيت أهذ المسباح .. ومخافة أن أبدأ أهذري : أبدأ بجزء .. على شان أحط ببالي ان اللي وراي رجال ينتظرون مايفيد مع التسلية .. خصوصا اني جربت لو ماكانت الفكرة مكتملة مجرد دخولي مكشات يخلي أموري تمام .. وتفسيري لذلك .. أني بوسط مجلس رجال ينخونك على العلم الطيب.

------------------------- نرجع لشايبنا

قلت : سم ياعم ماعاش اللي يحوس أو يكدر خاطرك .. وبديت أسولفت عن شي على الانترنت اسمه ( منتدى مكشات ) يصلح لراعي البر .. وميزته فيه قروم يكشتون بك وأنت قاعد بالديرة .. أكلف ماعليك تفرج على صورهم أو تطلب معلومات .. وكنت أفحط بالشرح والتوضيح .. وبعد ماخلصت سالفتي علق الشايب وهو يقلب كيسة التمر مفتح عين ويغمض عين بقولته : ( والله من الخراص !! ) :eek: .. قلت : لا ياعم هذا صحيح إذا رجعنا يورونك عيالك بالبيت .. ورد يقول : خلنا من هالسالفة وشف لنا شي يصدقه العاقل !! :mad:
وهذا اللي جعلني أطلع من المواضيع وأجيب له شي ينسجم مع اهتماماته وكنت أقول : ياعم فيه فلكي بالجرايد يقول : ماجانا برد بمربعانية هالسنة .. علق ها( الشايب ) : ايه بلاه متحضن مرته ومقابل الدفايات .. البرد ذبحنا وشف المشق من رجليني واصل خشمي .. عاد انا ابضحكه قلت : ولا تهون شطوب رجليك مفتحة صايرة تقل دشوش بعمارة بالبطحاء .. ياعم .. وش تشوف من القنوات الفضائية ..:love2:
اثاري الرجال كشر وقال : ليا .. ثور .. اللحين عيال عيالي أكبر منك وتضحك علي ياهالفسقان ..:(
تأسفت : ماكان قصدي ياعم أضحك عليك .. طمعت بعد قولتك خلونا مع بعض نوسع الصدر ..
قال : اللي وده يوسع الصدر لايفصخ الحياء !..:looney:
قلت عطني راسك لاعدمتك .. لكنه استمر مكشر ويقول : خل راسي وانطق بمحلك وخلك رزين .. ( أنواع التحطيم )... .... واضح انه متعدي الدبرة وصاير سوبر ستار( ...... ) ..:mad:
ماأبطينا جهزوا عياله القهوة والشاهي .. وكأن السوالف تبي تتغير من عياله وتزين الكشتة .. لكن هالعم الشايب قال لولده الكبير : مشينا .. رد ولده : خلنا شوي يابيي .. مستانسين !.. قال : ورانا شغل يالله مشينا .. عاد ولده يحاول يتلطف وقال : الله واكبر وش هالشغل ماوراك إلا تطقم بالوزرة بغرفتك وتقابل إذاعة لندن وأنت ( تطلس ) الفقس أو تسعط أبو فاس .. :bounce: وكان رد ( الشايب ) : ( إلفقه ) وخلونا نرجع للديرة .. وهذا اللي صار .
وقبل شوي يكلمني بالتلفون - في حديث ثنائي ;) رفيقي ( الجار سابقا ) يتعذر ويبث همه لي في أن ( أبوه ) أحيانا يكون ناشف ويحب ( يدبر ) الأمور على كيفه .. ويقول انه يحب البر لكن إذا طلعنا وزانت الكشتة مثل ماشفت طلب نرجعه للديرة .. ولا يرغب الصغار يكشتون معنا بحجة انهم يزعجونه .. ولو درى ان أحد الأخوان ( سرق ) عياله كاشت بهم بدون ياخذه .. زعل منه شهرين ..
قلت : هذا ابوكم هو ( البركة ) والله يعينكم على طاعته وبره ..
وأظن ردي ذا هو اللي شجع رفيقي يعزمني الخميس الجاي يقول خل نعوضها بكشتة تعجبك ..
لكني على طول قلت له ( هذي منوتي ) .. لكن اعذرني .. مديري بالعمل يطري هاليومين انهم يبي يودوني ( انتداب للصين ) ولا أرجع إلا إذا طلعت الشبط و( العقرب الثالثة ;)) .. :D
وسلامتكم.

[صقر]

واضح انه متعدي الدبرة وصاير سوبر ستار( ...... ) ..


ههههههههه

الله يقطع ابليسك يا حفرلوجيا .... قصة رائعة ....
..................................................
......................................

هههههههههههههه

[((( الحر)))]

Originally posted by حفرلوجيا
[عاد انا ابضحكه قلت : ولا تهون شطوب رجليك مفتحة صايرة تقل دشوش بعمارة بالبطحاء .. ياعم .. وش تشوف من القنوات الفضائية ..
اثاري الرجال كشر وقال : ليا .. ثور .. اللحين عيال عيالي أكبر منك وتضحك علي ياهالفسقان ..
تأسفت : ماكان قصدي ياعم أضحك عليك .. طمعت بعد قولتك خلونا مع بعض نوسع الصدر ..
قال : اللي وده يوسع الصدر لايفصخ الحياء !..
. [/B]

هههههههههههه ابو سليمان والله قمة التحطيم...!!!
معذوووووووووووور فكه...!!!

[راعي الحزم]

كلام جميل وسالفة طيبة من رجل أطيب ودي أعلق على نقطة أو جزئية بالموضوع الا وهي (( حطو نصفه بالقدر ))) هذه من الاخطاء التي دائما ما نقع فيها اذا جاء الواحد يطبخ حط حق عشرة وهم ثلاثة هاذي مفروغ منه انه خطأ لكن الشي اللي ما ننتبهله اننا اذا جينا ننكب الغداء حطينا نصفه بالقدر ثم رجعنا به للديره بارد واخذته الشغالة وكبته بالزباله وتعرفون وين يروح وحرمنا منه الطيور والحيوانات البرية اللي ميته من الجوع
خذ باقي الطعام وحطه على صخر او شجر وتراه ما راح يقعد اكثر من يوم تاكله الطيور بس عاد وخر عنه
السفره والبلاستيك والورق لاتخرب البيئة

[القماري]

أرفل وملقوف؟؟؟!
وراك تصدق على طول وتغامر وتطلع كشتات مع شيبان ، تستاهل إلي جاك ويعين الله خويك على عصبية أبوه.
الظاهر أنه مايواطنك ياحفرلوجيا. وسلم لي عليه في الحلقة القادمه :D

[Ra7aL]

السلام عليكم ورحمة الله وبركاته

هههههههههههههههههههههه
والله يا بوسليمان ماقول الا الحمدالله انك قدرت تتحمله بس ما ادري حسيت كذا في كلامك انك ودك تكشت معه مره ثانيه :D

تحياتي لك،،،،؛

[مشغول]

هلا والله وغلا بحفرلوجيا

تصدق كنك تسولف عن ابو زوجتي نفس الحال مساكين عياله

إذا حطو الشيء في مكانة قال ليش وإذا ما حطوه في مكانه قال ليش
وإذا شاف أحد يتمشى قال تخلونا وإذا تسوبف معه قال حطب ليل .

وآخرتها قال لي ... إيييييه المراجل تروح وتجي :(

[عبدالعزيز الدباسي]

حسبي الله عليك يا ابو سليمان ،،،،، فتحت جروح عميقه وكلن قام( يفضفض) عليك ،،، وهذا وانت تكتب عبر الانترنت ،،،، وشلون لو يجونك بالعيادة وتسدحهم على السرير ،،، كان كل واحد ( هذ ) اللي عنده وقال ( المستخبي ) تصلح تصير ضابط تحقيق .

لكن ما تقدر تصير طبيب نفسي ،،، ;) ولا اخصائي اجتماعي ;) .

[ابو عايد]

Originally posted by راعي الحزم
كلام جميل وسالفة طيبة من رجل أطيب ودي أعلق على نقطة أو جزئية بالموضوع الا وهي (( حطو نصفه بالقدر ))) هذه من الاخطاء التي دائما ما نقع فيها اذا جاء الواحد يطبخ حط حق عشرة وهم ثلاثة هاذي مفروغ منه انه خطأ لكن الشي اللي ما ننتبهله اننا اذا جينا ننكب الغداء حطينا نصفه بالقدر ثم رجعنا به للديره بارد واخذته الشغالة وكبته بالزباله وتعرفون وين يروح وحرمنا منه الطيور والحيوانات البرية اللي ميته من الجوع
خذ باقي الطعام وحطه على صخر او شجر وتراه ما راح يقعد اكثر من يوم تاكله الطيور بس عاد وخر عنه
السفره والبلاستيك والورق لاتخرب البيئة :good:

[ابو عايد]

Originally posted by راعي الحزم
كلام جميل وسالفة طيبة من رجل أطيب ودي أعلق على نقطة أو جزئية بالموضوع الا وهي (( حطو نصفه بالقدر ))) هذه من الاخطاء التي دائما ما نقع فيها اذا جاء الواحد يطبخ حط حق عشرة وهم ثلاثة هاذي مفروغ منه انه خطأ لكن الشي اللي ما ننتبهله اننا اذا جينا ننكب الغداء حطينا نصفه بالقدر ثم رجعنا به للديره بارد واخذته الشغالة وكبته بالزباله وتعرفون وين يروح وحرمنا منه الطيور والحيوانات البرية اللي ميته من الجوع
خذ باقي الطعام وحطه على صخر او شجر وتراه ما راح يقعد اكثر من يوم تاكله الطيور بس عاد وخر عنه
السفره والبلاستيك والورق لاتخرب البيئة :good:

[المربد]

كثير من الناس يتعمد يصير دعله، وينسون "أعـيـنـوا ابـنـائـكم عـلى بـركــم" ،
لكن المسألة فطرة ما يقدر عليها الا قليل من الناس ،،،
كم من شيء كنا نعـيـّـب عليه وحنا صغار ولما وصلنا الى عمرهم صرنا نسوي مثلهم،
اخاف يجينا يوم يا بو سليمان ونصير انا وياك مثل ابو جارك...
تصدق امس قالوا الربع نمدد كشتتنا بالبر، قلت ما عندي مانع بس بشرطين:
1- تخلوني اتصل بالعمل ، والبيت.
2- نروح يم احد الابراج اشبك انترنت اقرا موضوع ابو سليمان


يعطيك ربي الف عافية وبانتظار جديدك

[الهلالي]

أبو سليمان
السلام عليكم ورحمة الله وبركاته
والله البلشة ياذا الشايب السوبر ستار . نقول هذا شايب وينعذز لكن المشكلة من بعض الشباب اللي
يتصرفون مثله وتلقاهم سوبرستار ملتي سستم .
أبو سليمان إذا النار كفانا الله وإياكم شرها هي فاكهة الشتاء فأنت فاكهة منتدانا الحبيب . لماتملكه من
حس إبداعي وقدرة عجيبة في نقل صور رائعة مطرزة بالمفردات الشعبية . نحن بإنتضار جديدك .

[abos3d]

ابو سليمان اجل انتداب في الصين ههههههههه الله يهديك انا لين شفت موضوع لك ما ادخله الا بعد نص ساعه او ساعه عشان يكون مكتمل لكن الله يسلمك شوي شوي علينا تشققت بطونا من سوالفك الله يعافيك ويفرحك في الي تحب ويجزاك كل خير

[مراكي الذيب]

الله يعطيك العافيه اخوي ابوسليمان.


سوالفك كلها عبر وحكم , :good: .


لكن لا اوصيك اذا رحت للصين معك امانه لازم تعلم الصينيين ان عندنا منتدى اسمه مكشات يهتم بالكشاته وعلوم الرجال .:good: :good:

[الطبيب]

وسعوا صدوركم على الشيبان تراهم ما يتغيرون ابد

ومن هذي القصه اقدر اقول ان الشايب هذا من شبابه وهو ما يعرف يجامل ولا يعرف يكن الكلام بصدره ويسكت

بمعنى آخر..............( اللي بقلبه على لسانه ) حتى لو كان مايجوز للي مقابله

والظاهر انك تبي تقول انك منت شايب بها الموضوع :)

عموما الله يصبر عياله ويعينهم على بره لان لهم الاجر الكبير لما يدارون مثل ها الشايب الاقشر

وهذه رساله لنا جميعا ما نعود انفسنا حنا الشباب ( بحكم اني شاب توي باول العمر )

على القشاره ورفع الكلافه بيننا وبين اللي ما نعرفهم لمجرد انهم خاوونا بطلعة بر او لانهم اصغر منا

احترم واقدر كل ما تكتبه اناملك اخوي ( ابو سليمان ) على صفحات منتدى مكشات الغالي على انفسنا جميعا



بس عندي سؤال؟؟؟؟؟؟؟؟؟؟ ومحيرني؟؟؟؟؟؟؟؟؟؟؟


الحين انت لما تروح للصين وشلون تبي تفرق بينهم؟؟؟؟؟

اشكالهم مثل بعض!!!!!!!!

وبعدين بحكم انك شايب ونظرك على قدك وشلون تبي تدل ترا الصين بعيد !!!!!!!!!!

يا الشايب المثقف

ارجو ان يكون مزحي معك خفيف وتتقبله بصدر رحب

اخوك

الطبيب>>>شاب يقدر الشيبان

هذا والله اعلم

والسلام ختام

[حفرلوجيا]

أخوي صقر : شكرا .. وزين اللي ضحكت .. على صراحتك وسعيك ( الجاد ) وراء التحقيات ماأتصور أي شي يضحكك .. تدري : البركة بشقردي اللي حط التوقيع الجماعي وخلاك تغير صورة ذاك الصقر اللي كان بتوقيعك الأول.. كنت أحس من عيونه ( المطيرة ) انه يبي يشق الشاشة ( ويهد) ..
أخوي الحر : شكرا .. أنت تقوله صادق .. هذا ماهو تحطيم .. شايبنا يخليك ( حطام ) ..
أخوي راعي الحزم : شكرا .. الله يجزاك خير صدقت الطيور وأحياء البر أولى ببقايا الطعام الذي لانحتاجه .
أخوي القماري : شكرا .. عاد وش نسوي ياأبو أحمد بغينا نصير سمحين .. مادرينا ان شيبون اسمح من الجميع .
أخوي Ra7aL : شكرا.. ومن قال يسلم .. اللحين إذا جاء طاري حارتهم جتني النفاضة تبيني أكشت معه مرة ثانية !
أخوي مشغول : شكرا .. تقول ابو زوجتك نفس الطبع :( .. كأني افهم العكس يعني إذا صرت أنت شايب تكون حبوب وعيالك ( من تأثير الخوال ) دبرة .. الله يعينك عليهم .. لكن تعال ..
كل الشيبان ( دبرة ) :good: .. يعني تصير أنت وعيالك دبرة .. يعني إذا نويتوا تكشتون الإربعاء تبلشون ( تدبرون) ولايتهيئ لكم بعد فواصل من ( الملاسن) إلا المرواح يوم الجمعة .. وتكتشفون ان بكرا دوام وتهونون عن الكشتة..:D ... أحسن .... ( خلك وشو له تنقد على خالك ؟!) :p..

[حفرلوجيا]

أخوي شقردي : شكرا .. ملاحظ ردودك الفترة الأخيرة أكثرها ( صور غمزات ) .. تصدق واحد من المشرفين الكبار ( مانيب معلم من هو حتى لاأكون فضيحة مثل غيري ) يقول إن السيرفر لمكشات عليه ( حمول ثقيلة ) .. ودوروا وفتشوا لقوا ( غمزاتك الكثيرة ) هي سبب المشكلة .. :mad: .. أظنهم بهالحالة بحاجة ( مؤسسة ) إعلانية تنسق وتطلع بأفكار تجيب ( النقد ) والدراهم .. يمكن( يوسعون وتضيق دائرة المشكلة ... ويفتكون ) ..:good:
أخوي أبو عايد : شكرا .. ونحن معك نؤكد ماطرحه أخونا راعي الحزم فيما يتعلق ببقايا الطعام بالبر.
أخوي المربد : شكرا .. والمشكلة بالطباع .. وقالوا ( غير عضو ولاتغير طبع ) .. وصدقت الخشية من أن أكثرنا مع اللي أصغر منا حول ( الشايب ) ..
وأشكرك على الإطراء .. ولو أدري وينك اجيك أسلمك كل المواضيع بمكشات بالمكان اللي أنت فيه .. لكن المشكلة ماعندي ( دينا) تشيل ( غمزات شقردي ) ..:mad:
أخوي الهلالي : شكرا .. الشايب يمكن كبر سنه يشفع إنك تستمر تحترمه .. لكن إذا كان ( شاب ) هذا ودك ( تشب ) فيه ..:p
وأقدر لك إطرائك ياعزيزي .. الله يديم القبول والألفة..

[حفرلوجيا]

أخوي abos3d: شكرا .. والله يفرح قلبك باللي دوم يسرك ..
أخوي مراكي الذيب : شكرا .. ويعافيك ربي .. وسأوصل السلام للصينيين وأقولهم عندنا منتدى مكشات وفيه بعد مراكي الذيب حتى لايفكرون يطلعون نسخة مقلدة من مكشات.. يكفي اللي حولنا ..;)
أخوي الطبيب : شكرا .. نعم ياليت نعود النفس على أن ( نكن ) بعض الشي حتى لانصير نكديين ..
ومادام أتهمتني اني شايب فتلك ( تهمة لاأنفيها وشرف لاأدعيه ) .. وقولتك أني ( مبتلش بشوفي الردي ولاأفرق بين الصينيين ) .. فـ الشكوى لله مالقيت ( الطبيب المفتح ) اللي يمكن أعتمد عليه .. إلا أنت وش تخصصك يا( الطبيب ) ؟:p
أما المزح .. فأتقبله مهما كانت حدود المزح .. الشرط الوحيد أن يكون المازح ( مكشاتي ) .. وأنت من ( أحلاهم ) .. بالشماغ وبدونه ;)

[حفرلوجيا]

أرجو أن لايفهم من الردود الثلاث السابقة .. أنني أستخف بالشيبان .. أو أدعوا لعدم إحترامهم .. لا .. لا ..
وإن كنت أظهرت بعض التعليقات او ( القفشات ) فإنني كنت أمازح ربعي بمكشات .. مع طرح بعض الأراء في ثنايا هذه التعليقات ..
اما كبار السن فـ لهم منا كل الإحترام والتقدير .. وإن كان منهم من تكون تصرفاته ( ناشفة ) مع عياله وغيرهم .. فالأبناء أولى ببر أبائهم .. أما الغير فـ أظنهم ( غير ملزومين ) دائما بالبر .. وإن نفروا من التقرب لهم فلهم العذر..

[خشم الحصان]

الاخ الغالي
حفرلوجبا
السلام عليكم
حيالله ابوسليمان هالمره مانيب مخليك لئني قريت موضوعك اليوم الصبح في المكتب بغو يخصمون علي والسبه الضحك الله يرج بليسك والربع قالو اكيد البارح رقدآ في السطح او في السور وخافك برد قلت الي
يدري يدري ولي مايدري عن ابو سليمان لايدري.
1-الاحظ انك دايم تقول لزمو علي عزمون مريت منغير قصد حلفو علي ماضن الضاهر انك ترزز قدامهم
لين يركبونك لئنهم عارفين انهم ماهم سالمين من شرك سوي شالوك معهم ولا خلوك قاصبهم قاصبه الله
لا يعوقها بشر
2-اجل ميه وشلون تجي ميه بالشايب الا اذا كنت شايب مثلهم وهم شياب وهذي اعتراف رسمي انك مثلي
3-طاعة الولدين واجب حتي ولو حدك علي الشوك
4- اح الله ينة جبة راس غليص شبية نار اثرك منتاب سهل ولا يتقاطر زود تعجيز
5-حيل الله اقوي شايبنا وراسه يابس ماهوب معترف يعني مثل راعي المثل الي يقول (عنز والو طارة) ولصق
التهمه فيك تحمل يابو سليمان
6-وشوله تفتح علي نفسك باب يومك تقول مناب مثلكم سنعين ونت خابره مثور مثور سكة مثل عياله يالله
خذ نقدي صكك بوحده يالملقوف تستاهل الي يبي الدح لايقول اح
7- ولده وهو خابره وش تبيه يسوي
8- لاتلوم شيبانا مر عليهم سنين من الجوع يدقون العبس وهذا الي خله يقول خلو نصفه النعمه زواله
ياخوي يابو سليمان
9- وشو سوبر ستار هو زيت مكاين
10- مادمك خابره انه بخرشكم وش الي قومك مع ولده كان جلسة وتعذرة من الولد انت خابر الشيبان معاد في العمركثر مامضي يبون الوناسه وسعة الصدر ولو زادو الكيله علينا هم ابونا الله لايحرمنا منهم
11-اقعد يابو زيد الهلاالي(المهلهل) وش سوية
12-ايه درينا (ياعم ) دخلة الذره زين المفروض من البدايه تدلعونه ياعم ياولد امر سم وصبرو عليه
13- انترنت يصير خير مالقية الا انتر نت الله كريم اشون ما معه شوزل الحين طاق هالعمر كله وجاي تسلفله
عن الانتر نت ومكشات ولا مجهد روحك عقب ماشاب ودوه للنتر نت ياقلب محميد قلبه عطني الي بعده
14-استلم يابو سليمان هاذا وش الي بقنعه كني اشوفه وهو يصر عينه ويناضرك ويقول وش الله بلاانا به
صدق عطه شي يصدق عقله دور سوليف قبل عن الغزو والغوص وعن خفش الريم الي كنهن دلاال رسلاان
مهوب انتر نت ومكشات يعني لو اشترك النضارت الي بيلبسها علشان يشوف الشاشه كنها قيعان بيلاات من
السماكه
15 ردينا يابو سليمان علي الجروف والحفر وش دره عن الفلكين شيبانا يلبسون هالبيدي والوبر والفرو
ويقعدون في مدخال الديره وخذ راشد الخلاوي يقول كذا وكذ يعني لو يمر موتر مسرع من عندهم ويلفحهم
هواء قالو دخل نجم
16- ايه هاذالي يبي لك تسولف له فيه الحر..... والدفي موهوب انتلر نت ومكشات
17-مشق اجل ذا صنفره خشنه اجل الشطوب الي في عرقيبه كنها ارض غريف عقب مايبسة
18- ابو سليمان الله يرحم والديك لا تجيب العيد ترك دابلآ كبده اجل شايب رجل في الارض ورجل في القبر
ويجيب طاري الدشوش لو يشوف احد هالقنوت والله اهن يطفي ومايقوم الا بشترك في العنايه
19-هذا الي انت تبيه مترتاح الا بتثويره
20- ماكل شايب ينطمع فيه يابو سليمان ترهم يذبون الكلمه علشان يصدون الواحد
21-ماقلتلك انهم ماهوم سهلين الدنيا ملوعتهم اخذ صكك بوحد فاصخ الحياء وش بيرقعها الحين عسي مايجي اكبر منها والله مايطهرك ولا البحر يابو سليمان تكفي اركد المر الاخر
22- كني اشوفك من الطفقه كاب الدله علي النار تبي تحب هالراس ياخيي لوني منك رجعة رجليه او مع تريلة شعيراشر لها علي الخط من كثر هالتحطيم غادي جسمك احمر كنك ماكلن بيض وفيك حساسيه الله يعينك
23- الضاهر الشاهي ويا القهوه بتصير مر ولا عشرق
24- هذا الي حصل والسبه انت مسوي فيها راعي بر اجل انتر نت وش تبيه يقول
25-الشايب شايب وكلمته سيف قومو يعني قومو
26- وين تستانسون وحفر لوجيا معكم اجل انتر نت وفلك ولا جريد بعد
27-يزين شيبانا للبسو الوزار وقعدو في المشراق تحت هاك الجدير والطاقيه في نصف الراس وفنيلة ام بقره
ومخبوقه من عند الابط وعياله قدامه يلعبون كنهم مصاقيل منكبه ياهي تسوي ديره عنه وعجيزه بهاك الشيله
وفي طرفها مفتاح والديرمه في هاك الخشيشه الله لايخلينا منهم وصبعات رجلينهم متخولفه كنهم يشوتون قواطي يومهم صغار يالله اجعل والدينا في جنات النعيم مهيب مثل رجلينا من زود النعمه كنها موطي بزر الله لايغيرها من نعمه وين رحة انا ياني سجية ردينا لبو سليمان وجرياته
28- ايه غرفته هو عرينه ولندنه تقربه عالمه
29- ابو سليمان وشي اخيي (تطلس) دورة في القوميس كلها معرفتها هي (تلطس) ردلي اخيي
30- اجل تبي مضاد حيوي يافقس يابو فاس وما فاد كوي ولا شافو الا العافيه
31- الفحل فحل و الشايب فحل
32- ابو سليمان شيبانا حنا في نضرهم صغار لو نطق الخمسين لاتلومهم من حبهم لنا الله يجزهم خير
33- اانت متاكد انه لزم عليك مره اخري يوم الخميس ولا مرتز في العاير خذوني معكم ودي اروح
34- زين انك تعذرة الله يرحم والديك
35- انتداب ولا وين الي الصين مالقية الا الصين هالي عيونهم تقول خفوس فروه ياخيي اذا رحة الي
الصين لاتعداء الشقه تكفي اخاف تجيب الطعه ترهم مايرحمون ان غلطة بيجلدونك ثم رح دور منهو طقاقك
كلهم مثل مثل يعني مكينة تصوير اباتبع اخبار الصين يمكن يضهرونك علي فكره ترهم ياكلون عقارب بس
شبط مدري
36- ومن قال يسلم
اخوي ابو سليمان كتابتك مثل الوحه السرياليه الي يرسمها ذاك الي شنبه مثل ذنب العقرب بكاسو كلن يقراها
ويفسرها حسب عفله الله يحفضك ويخليك لعين ترجيك وياحبيل قليبك حبه
اخوك
خشم الحصان
ملاحضه
تري كتبة وانا اضن اني امون بس مدري هو انا علي يمه ولا لا
:D :D

[حد السيف]

اخوي ابو سليمان
حفرلوجيا
اسعد اللة اوقاتك بكل خير
بعض الشيبان مقهورين ماعندهم مكشات ولاقارمن ولاسيارات مثل الحين وخذ ياتحطيم
حنا اول نسري على النجم وهو ماتحرك مسافة واحد كيلو وحنا ندل والضياع شهر بة يرجع وبة مايرجع حنانقطع النفود وهم اقل شي ثلاث سيارات تمشي سواء وان هون واحد تعذر الباقين ان السيارة يبلة تصليح وخذ انواع الذراقة اشكال واللوان والحافظ اللة وحناوحنا وذا فتشة وراة تلقى انواع الفشيلة احم احم نقول بعض الشيبان
لايعجبهم العجب ولا الصيام بالقيض احم اقصد برجب
وانت وشولة تجلس خابرك التصريف والحوصان مايعوق معك بس الظاهر ان الشايب
قراء عليك

محبك اخيك
حد السيف

[النجم الملتهب]

Originally posted by الهلالي
أبو سليمان
السلام عليكم ورحمة الله وبركاته
والله البلشة ياذا الشايب السوبر ستار . نقول هذا شايب وينعذز لكن المشكلة من بعض الشباب اللي
يتصرفون مثله وتلقاهم سوبرستار ملتي سستم .
أبو سليمان إذا النار كفانا الله وإياكم شرها هي فاكهة الشتاء فأنت فاكهة منتدانا الحبيب . لماتملكه من
حس إبداعي وقدرة عجيبة في نقل صور رائعة مطرزة بالمفردات الشعبية . نحن بإنتضار جديدك .

[حفرلوجيا]

عز الله اللي طحت بعوشزة ..
أخوي خشم الحصان :.. حسبي الله على شيطانك أثرك شايب ومهذري .. ماراح أتعرضك
أقولها ( من جد ) ماقدرت أرتب أفكاري .. نصف العقل راح وأنا اجاهد نفسي وعيوني وأنا أقرأ ردك والنصف الآخر راح بعد ماأغمي علي من الضحك ..
بس كله كوم و ( 15 , 22 , 27 ) كوم لحاله .. حسبي الله على الشيطان ..
:D:D:D

---- لكن أشوى عيالي ماكبروا حتى لايحجرون علي مثل سواة عيالك بك .

---- ومعنى تطلس : فهي مرادف لـ( تمرخ ) ..

بس تدري عقب ماخلصت من قراية ردك تصورتك واحد من الموظفين الشيبان بوزارة المعارف ( أيام الخويطر الله يذكره بالخير ) .. قاعدين بلوذة حول مكتب الوزير ( لاشغله ولامشغلة ) بعد ماتورطت الوزارة ومددوا لهم الخدمة للمرة العاشرة .. زود على انهم مزيفين بأعمارهم بالتابعية ( يعني عدادهم يبي يقلب ) .. وكل سواليفهم إذا تسمعها وإنت ماتشوفهم بـ( لقاح النخل.. والعرس .. وأنا سنة من السنين ذبحت عشرة .. والآخر مايعشية إلا حاشي .. واللي كل ليلة مشابط ذيب وذابحه .. واللي جايب له كسرة خشب يبخرهم ويقول هذا عود طيب أنا جايبه من جاوه يوم الدنيا دنيا :D) .. وإذا دخلت تبي تسلم عليهم لقيت أكبرهم جسم يكفيه ( بيت القارمن ) سليبن باق ( فراش بر ).. ويرهي عليه .. :p
عاد ودنا تشوف لنا معاملة عندكم بالوزارة الله لايهينك ياعم خشم الحصان .. مصبحينك باكر عند اللوذة..
---- أما الميانة .. قلت ان المزح مقبول الشرط أن يكون المازح مكشاتي .. وأنت شايب مكشات الله لايخلينا .. انت بالذات لايردك إلا اصيبعاتك وفكرك كان هو إلى اللحين معك..:p

أخوي حد السيف : شكرا .. يازين ردك أحس إنه مركب على عمنا خشم الحصان الله لايخلينا :good:..

أخوي النجم الملتهب : شكرا .. وشرفت بمرورك ياغالي.