ملحق أو بيت شعر [الأرشيف]

ابراهيم125

23/09/2008, 02:46 AM

اسلام عليكم
الله يعافيكم ابي رايكم في الملحق الخارجي او بيت الشعر
لااني والله محتار بينهم وش احط
علمن اني لو حطيت ملحق ابي اخلي شعبي من الداخل وبحط مشب وبيه طين ولمبات اسراج
ولاو حطيت بيت شعر برضو بحط مشب ولمبات على شكل اسراج بس هل بيت اشعر اقدر احط فيه مكيف اسبلت مو صحراوي
علماً ان المساح راح تكون خمسه بخمسه
اتمنا نصيحتكم يا اخووووان

Abu Saad

23/09/2008, 03:06 AM

عليك بالملحق ..
لايحتاج صيانة ، لايتلف بمرور الوقت ، غير قابل للاشتعال ، غير قابل للتهريب ، غير قابل للغبار ، لايحتر صيفا .
وبالتوفيق :)

أبو مسفر

23/09/2008, 03:23 AM

اذا كان البيت ملك فعليك بالملحق ومسلح بعد
ونصيحة ابتعد عن المربع عليك في المستطيل 6× 4 = 5×5 في الاستيعاب
واذا كان الملحق في الحوش يجب ان يكون فيه دورة مياه مستقلة

وش كبر مقدمة بيتك ؟

حزين الكون

23/09/2008, 06:43 AM

يالغلا انا من وجهت نضري ملحق ..

مريقب العيفار

23/09/2008, 07:57 AM

عليك بالملحق ..
لايحتاج صيانة ، لايتلف بمرور الوقت ، غير قابل للاشتعال ، غير قابل للتهريب ، غير قابل للغبار ، لايحتر صيفا .
وبالتوفيق :)
اخوي لو حطيت بيت شعر فكم سنة بيجلس؟!!!!!!!!!!!!!!!!

ومصيركم شايله وباني ملحق

وانا مع راي الاخوان ان الماحق أفضل بكثير

ابراهيم125

23/09/2008, 08:23 AM

مشكوووووووورين وماقصرتو على نصايحكم
ابو مسفر
مقاس الملحق بظبط 4.25 في 4م اكثر من كذا ما فيه امكانيه وما اتوقع اني راح احط دورة مياه لانه ما عندي مساااحه كافيه ولا انت وش رايك؟؟؟

دغيم1

24/09/2008, 10:47 PM

السلام عليكم ورحمة الله وبركاته
حياك الله أخوي
لاشك أن بيت الشعر زين وواجهة ، وكذلك بيت الطين حلو وتراث
لكن من وجهة نظري ومن خبرة ومجرب
عليك ببيت الطين .
عندي بيت الشعر يحتاج لصيانة ومتابعة لأن فيه حشرات صغيرة سوداء تاكل الصوف حقه وتحتاج دوما ترش مبيد عليه ، وإذا يتعرض للشمس بعد فترة راح يحترق الصوف وصيانته مكلفة ومتعبه .
لكن الطين أول مرة وخلاص . لكن عليك بالشغل الزين
تمنياتي لك بالتوفيق
تقبل تحياتي

ابو زكي

25/09/2008, 01:07 AM

من وجهي نظري الملحق تتعب فيه مره وحده ولك وللزمن وتقدر تركب الديكور الشعبي اللي يعجبك ولا تتعب بالصيانه على قولهم وهالامور
يعني انت فكر بوقت الصيف والشتاء والامطار راح تتعب مع بيت الشعر ومع الوقت تأثر فيه عوامل الجو
وترجع تشتغل فيه من جديد الملحق يريحك كثير
تقبل مروري

ami1948

25/09/2008, 02:48 AM

نصيحة مجرب عليك بالملحق ودوكره حسب رغبتك وإمكانياتك ؛ بيت الشعر لو ما فيه غير القلق والخوف من الحريق لكفا للإبتعاد عن فكرته وعسى الله يقويك وتنزل صوره فى المنتدى قريباً .

Abu Saad

25/09/2008, 03:20 AM

اخوي لو حطيت بيت شعر فكم سنة بيجلس؟!!!!!!!!!!!!!!!!

ومصيركم شايله وباني ملحق

وانا مع راي الاخوان ان الماحق أفضل بكثير

يختلفن وانا اخوك اشكال وانواع وحسب الخامة والشغل والضمان ...
لكن المسلح لك وللزمن ...نصيحة اخو .. والسلام عليكم ورحمة الله وبركاته .

أبو مسفر

27/09/2008, 05:43 PM

http://up5.m5zn.com/photos/00290/7r0i2orc9pnv.jpgاخوي براهيم
مقاس الملحق بالظبط 4.25 في 4م هذا مقاس الحوش والا الملحق االلي تبي تحطه ؟
ياليت تعطيني ابعاد الحوش طوله في عرضه وكم يبعد باب الشارع وباب المدخل

على كل حال هذا رسم مبسط مقترح على مقاساتك للملحق ومعه دورة مياه
http://www.mekshat.com/vb/__________________________________________________ _______.

القطاوي 2008

03/03/2010, 01:57 AM

نصيحة مجرب عليك بالملحق يالغالي

محمد-الرس

03/03/2010, 07:33 PM

صراحتا بيت الشعر مال أمه داعي-الملحق أحسن بكثيييير

كاشخ 24 ساعه

06/04/2010, 02:19 AM

ان طعتني لا تبني ملحق

طق لك بيت شعر والان يبنونه افضل من الملحق

اول شي له قاعده متينه جدا ويركب حديد متين جدا وجميع التركيبات بواصطه براغي قويه وهي ميزه اذا جيت تفكه مستقبلا

ايضا يتوفر بعدة طبقات عازله وجدران خشبيه معزوله من الخارج ومن الداخل مبطن باي لون تريد ومن الخارج سدو الماني اسود جميل جدا وايضا وضعت له انوار سبوت لايت من الاعلى وثريات تراثيه

انا عندي واحد مسويه من 6 سنوات ضد الماء ومعزول حراريا وله باب المنيوم سحاب ونافذتين

وكل هذا لا يكلفك الا تقريبا 15 الف من ضمنها مشب كبير وراقي وفرش مع لباد ومكيف صحراوي زي اللى عندي 3/4 طن

الملحق جدا ممل وبكره اذا مليت منه كيف بتشيله او توسعه لو بغيت ولكن بيت الشعر اي وقت تفكه وتقدر تركبه باي محل.

بالتوفيق في ما تختاره

الشويغيه

06/04/2010, 10:22 AM

الملحق لك ولزمن وآمن من الحريق

العودالازرق

06/04/2010, 11:54 AM

المعذره على التأخير في الفزعه
الشباب يرشحون الملحق
لكن ليش ابني ملحق وليش ابني بيت شعر

أول شيء تكلفة بيت الشعر .
مقاس 4×5 =6000 ريال كامل عادي الملكي له سعر ثاني
مكيف صحراوي = 1000
موقد أو ومشب قرميد 1500ريال أوحديد 800ريال

فرش + مجلس شعبي أرضي + طاولة + تلفزيون+ رسيفر 3000ريال
عيبوب :

يجمع الغبار والتراب بشكل غير طبيعي فالسدو الخارجي يمسك الغبار وصعب تنظيفه

الجو عندنا مايناسب الشمس الحارقة تحرق الشعر الخارجي ثم تضطر الى تغييره

الشعر الأصلي مع الأمطار والمياه تطلع منه ريحة كريهه تصير كأنك جالس في حوش غنم .!

مميزات بيت الشعر
1- الجو فيه غير فأنت تخرج من المنزل له تحس بتغير عكس الملحق اللي ما فيه فرق بين أي غرفة في المنزل

2- يمكن إزالته وقت ما حبيت تغيرعكس الملحق اللي تكلفته ازالته عالية تقارب تكلفة بناءه لبناءه

بخصوص نصيحتي لك اذا كنت من النوع راعي قهوة وتجلس بكثرة في المنزل عليك ببيت الشعر فهو وناسه ومع المكيف لصحراوي أجمل نومه .

أما أذا كنت قليل الجلوس في البيت عليك بالملحق .

هوايتي مكشات

06/04/2010, 01:22 PM

بيت شعر احسن من اي شي

بواردي الدلم

07/04/2010, 02:30 AM

السلام عليكم ورحمة الله وبركاته

ابعطيك راي لعله يناسبك ومن واقع تجربه

بيت الشعر له نكهته الخاصه فعلا بس مشاكله واجده ولو تبي تنام فيه الله يعينك على الإزعاج من بزارين او بواري سيارات او حتى لجة عصافير هذا غير التلف والأرضه والغبار ومشاكل الباب يبيله تزييت والزيت يجمع الغبار والغبار والزيت يوصخ ملابسك وجع راس .....

لكن سو لك ملحق على شكل كوخ او خيمه واصبغه من الخارج أسود وخطين بيض بنفس شكل بيت الشعر ومن الداخل لبسه سدو وخلاص وصدقني لك وللزمن بإذن الله :good:

او سو لك ملحق وصلح فيه جبس بالاعلى على شكل جذوع اثل او مرابيع خشب والجدار يضربونه لك من الداخل والخارج بويه بنفس شكل بيوت الطين ويحطون معها تبن بعد :good2:

واعتقد الراي الثاني افضل لك ولضيوفك ولأهلك بعد

دكتور بر

08/04/2010, 04:30 PM

طبعاً ... ملحق ولا تشاور
1 ـ عمر بيت الشعر الافتراضي أقل بكثير من عمر الملحق..
2 ـ لا يستخدم بيت الشعر غالباً إلا في الشتاء..
3 ـ بيت الشعر غالباً وقت التغيرات المناخية كالأمطار أو العواصف الترابية يبقى له أثر إما على سقف البيت أو ضرر الماء به وعلى جدرانه ،أما الملحق فلا يتاثر بهذه العوامل ...
4 ـ من تجربة شخصية أعرف الكثير ممن استغنى عن بيت الشعر بملحق بديل وجمله إما بالطين أو بالسدو إلى غير ذلك...
وفق الله الجميع لكل خير...

عشقي الصحاري

12/06/2011, 01:15 PM

عليك بالملحق تراه زين @
لاني شايف قريب لي مسوي ملحق ونفس طريقه صرااحه طالع مهبووول يعني رووعه@
بس يبيلك واحد فنان لجل يضبطلك الشغل المرتب@
تحياتي لك@

الحر503

26/10/2011, 12:52 PM

بيت شعر بدون كلالام

خبيرة حاسب

15/11/2011, 07:33 PM

الملحق افضل لانه اكثر خدمة من البيت الشعر وايجابياته اكثر

والملحق يجلس فتره طويله اما خيمة الشعر وقت له وتنتهي

اورنس الشمري

04/12/2011, 12:18 AM

عليك بالملحق صيف ولا شتاء , بيت الشعر لو غبره بسيطه يبي لك تنظيف وعرك , أما الملحق قفل بابه ودريشته وريح بابك , صحيح بيت الشعر يطربك لكن صدقني لك وللزمن حط ملحق جدران ومن فوق قرميد أفضل لك حتى مستقبلاً .
أنا مشبي 5ونصف , في خمسه ونصف , بنيته جدران وعتقته وضبطته والقرميد معطي لمحة حلوه وحطيت فيه رفوف للدلال ووجار , حتى إني أشب الآن فيه نار , كانه بيت شعر مطور , الفرشة معكرونة والمراكي والمخاد من أروع ما يكون وشاشة lcd ومرتاح فيه حيل وإلا بخرته بالعود الريحة تعلق فيه فترة طويلة , بينما أخويانا أهل بيوت الشعر لو يمطر طلعت له ريحة غريبه , ولو يجي عج صار أشهب ودخل الغبار عليك , بالصيف لا يحفظ برودة السبليت , أنا مشبي بعز الصيف والشمس صاقعته أولع السبلت ربع ساعه ويبرد .

شف أخوي : إذا تبي ملحق عندي لك نصيحه حلوه إن شاء الله , الجدار الي تضربه الشمس حطه عازل علشان الحرارة بالصيف ..

وبالتوفيق

عرفان1

05/12/2011, 01:42 AM

انا عملت بيت شعر على السطح وحقيقه انه ممتاز ولله الحمد مرتاح له لأنه جلسه خاصه لي 6*4 مكيف عادي وشباكين وباب سحاب المونيوم 00 بس انا مع الأخوان اللي يقولون مسلح افضل لك وللزمن 0

باترول 1987

11/12/2011, 01:38 PM

عليك بالملحق ..
لايحتاج صيانة ، لايتلف بمرور الوقت ، غير قابل للاشتعال ، غير قابل للتهريب ، غير قابل للغبار ، لايحتر صيفا .
وبالتوفيق :)

نفس الكلام :good2:

بربنجي

11/12/2011, 03:29 PM

صقر نجد99

15/12/2011, 04:10 PM

اخوي ومشرفنا كاشخ

أويد كلامك وبقوة وانا مسوي بيت شعر الماني ضمان عشر سنوات وكلفني مع المشب والفرش والسبلت

تقريبا 17 الف ريال وبكل صراحة اكثر من ممتاز

اما انت اخوي ابراهيم

استخر وشف اللي ترتاح له وعلى حسب المساحة ان كانت صغيره الملحق افضل

الله يكتب لك الخير

×

ديرتي حزره

17/12/2011, 08:09 AM

حجر وطين لك وللزمن

http://www.majaless.com/up/get-6-2009-27oqx9np.jpg

khalid2003

16/01/2012, 10:21 AM

ملحق احسن لك وافضل لا صيانة ولا شي ويدوم لك واريح
انا عندي بيت شعر بصراحه متعب حييل بصيف اذا دخلت اعوذ بالله فرن مايصلح ابد والشتاء نفس الشي بااارد
مع انه فيه عوازال بس ماانصح فيه ابد والحين والشمس تلعب فيه ويتقطع ويخر ادا جاء مطر لذلك المحلق ازين
وانا ان شاء الله مخطط على اني اشيله وابنيه ملحق .

alwadi711

31/01/2012, 03:47 PM

بيت الشعر احسن

محب الرمنغتون

21/02/2012, 01:52 AM

ملــــــــحق أقولها للـــــحق

البعير المغوار

10/05/2012, 06:17 AM

الملحق في البيت لسبب أنه لو عزمت ناس ببيت الشعر بينزعجون أهل البيت إذا ارتفع حسهم.

بس بيت الشعر في الإستراحة رايق.

ناجز

03/09/2013, 07:58 PM

عندي طال عمرك ملحق وعندي بيت شعر
بيت الشعر للاسف اشغلني خلال خمس سنوات غيرت الشعر الي فوق
وحطيت بي في سي المشكلة الثانية الشعر الجانبي الخارجي دائما مغبر
القطاوه لعبو فيه بظافرهم يريقون وينزلون للبيت عن طريقه
الملحق لك وللزمن
وجهة نظر وانت من يقرر ولاتنسى الاستخارة

وهج الحياة

09/09/2013, 11:23 AM

من وجهة نظري ميزة بيت الشعر ثنتين الاول شكله حلو والثاني دافي في الشتاء
ولكن مكلف من ناحية الصيانة ومكلف الشراء وسريع العطب وخطير وهذي شي مهم اهمله الاخوان النار اسرع له من الملحق

اما ميزات الملحق
اولا غير مكلف من ناحية الصيانة ، طويل الامد اكثر عزلا من ناحية الماء والغبار وانت تعرف جونا وكذلك يعزل الصوت بعكس بيت الشعر الشي الاخر اكثر عزلا للحرارة لأنك تستطيع وضع جبس والجبس يعتبر مادة عازلة للحرارة

عزيزي من واقع تجربة الملحق افضل من جميع النواحي وخصوصا لما تجعله على شكل طيني وتراثي

بلاكوتا

29/11/2013, 04:27 PM

السلام عليكم

الخيمه الشعر يازينها بالشتاء

لكن تبلش بها بالصيف

هذا وماذكروه الشباب

من أن الخيمه تقفض بالشتاء وترتخي بالصيف

ملحق وحط الديكور الداخلي خيمة تجمع الثنتين بنكهة واحده

مزن طيبة

27/08/2014, 02:03 PM

سبحان الله وبحمده سبحان الله العظيم

pure poison

23/12/2014, 01:20 AM

اكيد ملحق

بيت الشعر اصلا ما يتحمل الظروف الجويه عج مطر و غيره

Wa7ed

07/12/2015, 10:47 PM

السلام عليكم

الملحق مافيه شك افضل الصلاة خير من النوم...

لكن اذا كان الواحد مستأجر مو مالك البيت ، المؤجر ما راح يرضى انك تبني وتعدل و .. و .. الخ ..

اذا كان بيت الشعر فيه عيوب ..الخ ، هل فيه حل للمستأجرين ؟:)

شكرا