قصتي في بنبان الله ستر علي وعليهم (بدون صور )

[غرامي نجد]

بسم الله الرحمن الرحيم


اخوتي في الله
السلام عليكم ورحمة الله وبركاته


كل عام وانتم بخير وتقبل الله منا ومنكم صالح الأعمال


اروي لكم هذه القصه التي حصلت لي في ثاني ايام العيد في بنبان (ودي احط صور بس مااعرف يبيلي سنه عشان اتعلم )


تفاصيل الرحله


استيقظت لصلاة الفجر وبعد الصلاه قلت ياولد بلا فطور ابفطر في الشعيب وعيالي الله يحفظهم كانو بيروحون معي وشفتهم نايمين قلت ماني منكد عليهم ابجيبلهم الصيد وبيستانسون وطبعاً كنت مولم الأغراض وانا في قرارت نفسي متشكك من وضع الصيد فيه والا مافيه :( توكلت على الله وحذفت حصاة الا وانا في الشعيب
اول مادخلت الشعيب فز قلبي اي والله فيه نزل :eek: ماأصدق وأطلع اقرب شي لي وهي الفايروخ 80 والشوزن بالشنطه واقز بالدربيل <<<< شوفه شجر
اي والله وش هالمزيونه طررررررررررخ الا وهي طريحة الأرض وقعدت ابوس فيها مستانس <<< لحد يفهم غلط افصد حمام للتوضيح فقط :Dوالثانيه ونفس الكلام والثالثه
وتعمقت داخل للشعيب وفجأه وبدون مقدمات شي شطف خشمي وضرب في المرايه الجانبيه للراكب الا وهي منكسره :eek:
واخوكم يدنق ويحط خشته تحت الدرقسون كني قاعد افك الفيوزوارفع راسي شوي شوي :j
ياولد وش السالفه واشوف المرايه ولاحظة انها ضربت رصاصه
ارتفع ضغطي من الوضع قلت ابروح اشوف منوين جت الرصاصه واناظر يسار مافيه احد قلت ياولد حرك الموتر رح شف وش السالفه


المهم ماأطول عليكم لقيت ددسن فيه شابين ( ارمز لهم بالداشرين ) <<<<<ماوده يقولها المهم تراني غيرتها وخليتهم ( المراهيقين) عشان محد يزعل اترككم مع الحوار
أنا : السلام عليكم
المراهق1: وعليك <<<<<< حتى ماكمل سلامه
المراهق 2 :بنفس اللحظه هلا
انا : كل عام وانتم بخير تقبل الله منا ومنكم صالح الأعمال
المراهق1 : اخلص وش تبي <<<<<<<< معصب اخونا
انا : الله يجزاك خير اذا بغيت ترمي انتبه وش الي ورى رميتك
المراهق1: انت جاي تعلمنا والله لقافه على هالصبح
المراهق2 : انجز وش تبي
انا : وبكل أدب ياخوي بغيت تذبحنا وفكنا ربي جت بالمرايه
المراهق2: المطلوب وشو مافيه الا حنا
انا : والشرر يتطاير من عيوني قلت ايه مافيه الا انا وانتم وثاني شي هي حياة الناس عندكم رخيصه للدرجه هذي شكلك انت وياه حدكم نبيطه
المراهق1: اقول ورى ماتفارق لا أحط هالرصاصه بمـ؟؟؟؟؟؟ <<<< ماودي اكمل اكيد عرفتو
طبعاً الأخوان معهم خرازه
انا : اظن ماينفع معكم الطيب انت وياه واطمر للشوزن كانت في الشنطه لني متاكد انهم مايعرفون الساكتون من الشوزن لولا ستر ربي وتمالكت نفسي وتعوذت من الشيطان كان شخلت موترهم المهم وقفت عند الراكب وطلقه بالشوزن فوق التنده <<<<< اتوقع طاحت قميريه من فوق الأثله :D قلت هات الخرازه لا أخلي وجهك كنه تميس افغاني مخرق
طبعاً تروعو سمعو الصوت الي ماعمرهم سمعوه من قريب
المراهق1 : ياولد اركد ( ميت خوف ) ماصار الا الخير <<< راح هياطه
انا : مارديت عليه وبصوت عالي كزئير الأسد :director: هاااااااااات الخرازه الأوله جت في المرايه والثانيه مدري من تبي توقع فيه
طبعاً عشق الموتر بينحاش مابغيت احط فم الشوزن بوجهه سبحان الله اخاف يصير شي لا تحمد عاقبتها والشيطان شاطر وارفعها ثاني مره وطلقه ثانيه طفى السياره على طول ( من الروعه) المهم طلع الخرازه وخذيتها وراودتني نفسي بأن اصادرها :D بس قلت لا ضعوف وفكيت الأصبح والمخزن وحطيتها بجيبي وانطل الخرازه بوجيههم


ورجعت للبيت متنكد :( مع ان فيه صيد وماكملت ساعه


هذي قصتي في بنبان وأأسف أذا كان طولت عليكم بس حبيت اطلع الي بقلبي لأني كل ماركبت السياره ينتك صدري من الي صار


ملاحظه : ماكان ودي ان القبهم بأي شئ مسئ بس لقيت انسب وصف لهم بدون تجريح أوأسائه مبالغه هو هذا الوصف ارجوا لهم الهدايه بس هذا كان وضعهم مطولين على المسجل وزقاير ووضعهم غير طبيعي والله اعلم ماودي احط بذمتي شي ماادري يا أخوان هل كان تصرفي سليم ام لا ؟؟؟؟؟ نسأل الله لنا ولهم الهدايه وحسن الخاتمه وكل مسلم يارب
ايه نسيت اقولكم الي صدته وحده كبيره مشحمه شحمها طالع مع أذانيها والباقيات اتوقع صغار



ودمتم في رعايه الله

[المرقب العالي]

أولآ الحمد لله على السلامه

ثانيآ أعتقد ماقصرت معهم جيتهم بالطيب لكن مانفع معهم

والله يستر من الخرازات وسوقها خطره جدآ 0 انتبهوا ياقناصه الدنيا دروس

[فزاااع]

اولا الحمد لله على السلامه اخوي الخمشي والله ستر عليك وجت شطف من جنب خشمك الرصاصه 0000000000000
ثانيا0 هذولي مراهقين على قولتك ولا وورعا000 ماودي اكمل ولا لو انهم بالغين ورجال ويدركون حجم المسؤليه والغلطه الفادحه اللي بغيت تأخذ روح مسلم كان سوو الموضوع معك وتاسفو وكلن روح بنفس طيبه
ثالثا0 والله يخوي اضن لو انت مامعك سلاح خوفتهم فيه وقمت تشد وترخي معهم كان الضاهر جابو فيك العيد وخرمو سيارتك كلها لانهم على حد كلامك حتى الكلام الطيب ماينفع معهم هذا ذا انت سلمت من شرهم
رابعا واخيرا اضن يخوي مامعك الا هالتصررف وهو التصرف السليم وعويذالله من شرهم 000 هذا رائي الشخصي والحمد لله اولا واخيرا على السلامه 0000

[سلايل كحيلان]

تبي رايي لو ماشي ومخليهم أحسن قل ليه ؟


لأنك ما تدري هم طبيعيين ولا لأ ؟ زيمكن يتصرفون تصرف أحمق

ومن يوم شفتهم بزران قل سلام وامش وخلهم


عموما وفقك لاله وماتدري لو انها خيرة


بالتوفيق

[حق الفيتو]

الحمد لله على سلامتك


زين انها بالمراية اهم شي لا تخلي فيى اثر للضربة ع شان ما يمسكونك

[عاشق الموطن]

الحمدلله على السلامه وماتشوف شر

ووالله اليوم امام عيني اثنين ورعان صغار يعني اعمارهم تقريبا 10-13 سنه ومعهم خرازه وبوسط القريه يدورن قميري على اشجار الطلح ورعاة الغنم رايحين جايين والماره على السيارات المهم اللوم مايكون عليهم اللوم عل ابائهم المسئولين عنهم

[راعي بيشة]

الله يجنبنا وأنت أخي الخمشي المصايب
مشكلة لا طحت في معتوهين

بس بصراحة أنت عصبي ، جعلنا ما نبلش معك

[هدير الموج]

اخوي الخمشي السلام عليكم
والله ماقصرت معاهم عساك عالقوة بعض المراهقين يشربون من الكلونيا ويشمون الغرا والبنزين ويحسبون ان الواحد فيهم رامبو على غفله الله يعين الداخليه على الجيل الطالع بتمتلي منهم السجون الا اللي يربونه اهله وهم قليل والا اكثرهم دشير مامن احد يربيهم واعتقد انهم قاصدينك يبونك تنحاش علشان ماتشاركهم بالصيد شكل المكان كان فيه صيد كثير لكن الله وقعهم في شر اعمالهم تسلم يدك يالنشمي

كل عام وانت بخير

[غرامي نجد]

اخوي المرقب العالي
الله يسلمك من كل شر وشاكر مرورك

اخوي فزاااع
الله يسلمك من كل مكروه كلامك عين الصواب

اخوي سلايل كحيلان
والله أني حبيت انصحهم وصار الي صار

أخوي حق الفيتو
ابغير المرايه واخليها عندي ذكري

اخوي عاشق الموطن
الله يسلمك من كل شر الله بستر من هالجيل الطالع لاتقدير ولامسئوليه بس ماأقول الا الله يصلحهم

أخوي راعي بيشه
اللهم آمين لا ياخوك والله اني وش حليلي بس أتق شر الحليم اذا غضب

أخوي هدير الموج
الله يصلح ضال المسلمين ويهديهم

شاكر مروركم وتعليقاتكم

[برق و سحاب]

الحمد لله على السلامه والحمد لله انه مهوب انا لأنك حكيم الله يديم عليك نعمة العقل . لو انا مكانك كان صار شي اندم عليه طول عمري الله يكفينا الشر . كان مثور فيه قبل لا اسلم الحمد لله على كل حال

[المترو]

السلام عليكم ورحمة الله وبركاته
اولا الحمد لله على السلامه
ثانيا اسأل الله ان لايضعنا بهذا الموقف الذي ان قلت موقف صعب فهو موقف يحضر الشيطان به والغضب شين وقد تكون النتائج مختلفه لاسمح الله بشر
ثثالثا قد اقول لك اقديت بالسملق هذولا لانك خرشتهم ولو انها فيها مخاطره لانك تجهل وقتها ردة فعلهم ولكن اقول لا احيانا لانهم لايستاهلون حتى انك ترميهم خساره بهم الفشقه
وانت خطاك يوم ان الله قدرك تأخذ البندق ليش ترجعها لهم
ولو اني محلك صادرت البندق اللي معهم لانك تحميهم اولا وتحمي الناس من شرهم وتعطيهم درس عمرهم ما ينسونه هذولا ماهو قد بندق وخرازه بعد
رابعا
النصيحه ::الجاهل يجب ان تتفاداه قدر الامكان الا ان تمادى بجهله ورأيت ان قد يلحقك اذى اكبر بتركه حينها الا وقفه عند حده بطريقه مناسبه وهذا التصرف لايصدر الا من جاهل او فاقد لعقله لسبب ما
والله العظيم ان البر القريب من المدن صرت اكرهه من ما اجد به من سملق من هالنوعيه الله يكفينا شرهم

ويحفظ الله الجميع من الجاهل والغضب والشيطان


والسلام

[ردن]

حمد لله على السلامه

وتصرفك زين

[بعيرمان]

ودك والله انك مصادر هالخرازه والسياره بعد ومخليه يطقونها رجليه للخط :d

[مخطط 2008]

خير ماسويت الله يبيض وجهك

[بني حسن]

الحمد لله على السلامه ومثل ما يقولوا بالحديد ولا بالعبيد
سلامة راسك هي راس المال
وتصرف سليم ولائق
وادعو الجميع ان يكونوا اداة ردع لمثل هؤولاء المستهترين

[غرامي نجد]

اخوي برق وسحاب
الله يسلم هالوجه من كل شر والحمد لله انهم ماطاحو بيدك الله يستر

اخوي المترو
الله يسلمك من كل شر والصراحه انا خذيت الأصبح والمخزن يعني مافيه امل يرمي وهذا اقل حاجه سويتها لهم والبنسبه لمناطق الصيد القريب صار يجيها من الصيادين عينات واجد بعضهم راكد وبعضهم مطفوق وبعضهم مايدرون وين الصيد معه

اخوي ردن
الله يسلمك من كل شر وجعل تزين ايامك وجميع المسلمين آمين

اخوي بعير مان
المشكله قلبي حنين مايقسى على احد يكفيهم ماجاهم

اخوي مخطط2088
ووجهك ابيض

اخوي بني حسن
الله يسلم هالوجه عن النار الحمدلله مثل ماقلت بالحديد ولا بالعبيد

شاكر لكم مروركم وتعليقاتكم ووفقكم الله لما يحب ويرضى

[ابو انس2006]

الحمد لله على السلامه

[ولد الدواسر]

الحمدلله على السلامه

بس انت وسيع صدر انا لو صارلي ذا الموقف كان علوووووووووم

[غرامي نجد]

اخوي كابريس

والله يسلم هالوجه عن النار

اخوي ولد الدواسر

اشوى انهم ماطاحو بيدك


منورين

[هوى الشرق]

بصراحه زين ماسويت وبنفس الوقت فكك الله من انها ما طولت المهاوشه كان انتهت لا سمح الله بقتل احد منكم ليتك والله ماخذها منهم (جزوم انت؟)

[الوهاج]

الحلم زين في هذه المواقف
والحمد الله على السلامة
ولا الكثير مثل هذه المواقف تنتهي بماسي لا سمح الله
والشيطان حريص على هذه الامور
تحياتي

[طارق الحربي]

اسمح لي تصرفك غير سليم

المفروض انك اخذت الخرازه او على الاقل بلغت عليهم

[شامخ ألهيلا]

الحمدلله على سلامتك والمفروض من قبل ابتعد عن منطقتهم كلها
وزين انهم تعاملوا كذا وماطحت في راعي مخدرات الي مايقددرون يتمالكون شعورهم

واساال مجرب مع اهل الطاايف والقرى الي حولها مايجونك الا على 15 رجاال مع بعض ولاتلقى فيهم انسان حكيم

[فتى التويم]

الحمد لله على السلامه

اما انهم من الروعه طفو السياره هذي لحالها نكته


بس والله يافيك صبر وحلم ولا لوه انا ان كان معلقين هم وخرازتهم في مفرق بنبان

[بن نويشر]

مزدي فيهم وما قصرت ، وبيض والله وجهك .

[المونديال]

اخوي الخمشي الحمد لله على السلامة
والله انك جيتهم بالطيب بس الظاهر فهموك غلط وتوقعوا انك ضعيف
ولو اني مكانك والله اني ياذابح يامذبوح والحمد لله انه ماهو انا
وانا اتوقع لو انك ما اخذت منهم الاصبع والمخزن اتوقع انهم يبون يرمونك مرة ثانية وينحاشون
لكن تصرفك سليم مية في المية لانه ممكن يرمونك اذا مشيت من عندهم
ولاتنس تسال عنهم الجماعة اللي حولك وتتاكد هم منهم دشيرة اقصد منهم سرابيته اوووووووه اقصد منهم عياله وتعرف قصتهم هم صاحين والا فيهم بلا

[راعي النص]

والله أن تصرفك عين الصواب:good: الله يصلحهم

[موتي]

اهم شي سلامتك

ولوني مكانك ما دورت ورى احد لاني ما راح اكون مثلك هادي

الله يستر علينا بس

[جزلا]

الحمدلله على السلامة
والله انك بطل ناس ماتجي الا بالعين الحمراء
وتقبل مروري

[مخاوى ابوه]

والله انك شقردى واقديت فيهم
بس كان صادرت الخرازة وعطيتني اياها>امزح<

[عاشق الكل]

السلام عليكم ...

اول شي الحمد لله على السلامه ...


وبعدين الحديد بداله حديد لكن الانسان ما بداله إنسان ...

[حريب الياس]

لاحول و لا قوة الا بالله


و الله وانا خووك هذولا على قولتك سرابيت ما يمثلون الا انفسهم و تحكيم العقل في مثل هالمواقف محمود


و هالاشكال مع الاسف الشديد كثيرين الله يهدي الجميع و انت ما قصرت معهم شكلهم حرمو الصيد بعدك خخخخخخخخخخخخخخ

والله يلوم اللي يلومك

..

[غرامي نجد]

بسم الله الرحمن الرحيم


الى جميع من رد على موضوعي من الأخوان


شاكر مروركم وتعليقكم والله يجنبنا واياكم المصائب والله يستر علينا من أصحاب العقول الضعيفه

،
،
،
،


تقبلو تحياتي

[يا لبيه]

ما قصرت يالغلا
(مزدي فيهم )

[Wolf العتيبي]

الحمد لله على سلامتك ياخوي


اعوذ بالله جعلي مانحط بالموقف هذا << عصبي للاسف من جد وربي عصبت وارتفع ضغطي من مجرد قرايه القصه كيف لونها صايره علي ياخي والله جد عالم ماتفهم ولا يراعون المسؤؤليه وانا الي قهرني زود يخطي ويتمادى بخطاه صار خير وانا اخوك والحمد لله على سلامتك مره ثانيه .