تدريب الطير على (( الكروان ))

[..@القناص@..]

:D الســـلام عليكـــم ورحمــــه الله وبركاتـــــه :
وشــ احسن طريقه لـ تدريب الطير على الكروان ؟
الرجاء من الجميع المشاركه ,,,


اخـــــــوكم / سلطان القناص

[مشبر البران]

يفودونك الأخوان

[..@القناص@..]

يفودونك الأخوان
مشكور الله يعطيك العافيه على المرور ..

- ننتضر ردود الاخوان ,,,

[روووح]

اخووي اول شي لازم يكون عندك كروان حي معزول من طير او ممسكوك حي المهم
نتف ريش جنحانه او اربطها وابعد شوي فرع للطير ولازم يكون الطير مطوف ليله او اكثر علشان يطيع معك وهده عليها واذا ما نفع جب لك طير ثاني يهد عليها وطيرك يشووف واعزلها ثم هد طيرك
واللاخوان ما يقصروون

[..@القناص@..]

[quote=روووح;1934425]اخووي اول شي لازم يكون عندك كروان حي معزول من طير او ممسكوك حي المهم
نتف ريش جنحانه او اربطها وابعد شوي فرع للطير ولازم يكون الطير مطوف ليله او اكثر علشان يطيع معك وهده عليها واذا ما نفع جب لك طير ثاني يهد عليها وطيرك يشووف واعزلها ثم هد طيرك
واللاخوان ما يقصروون[/q
مشكور والله يعطيك العافيه .. وماقصرت.. يابعدي


- نشووووووووف اراء الاخوان البقيه ..

[دواس الضلما]

الطريقه الممتازة مثل ما قال أخوي روووح أنا مجربها ونجحت ؛؛ والأخوان مهب مقصرين انشاء الله

[شنوان]

نسر الطير على ظهره وهده طيار

[عاشق الصقاقير]

ما قصروا الاخوان

[ملاعب الطير]

نسر الطير على ظهره وهده طيار
كلالالالالالالالالالالالام طيب
بس حط شطرطون(تيب) لصقه
على منقار الكروان لأن مرات الكروان يعض الطير ثم يرتاع الطير ويتوب يهد مره ثانيه وبعد صياح الكروان يروع بعض الطيور
المهم اذا صاد ساعده
وصح مثل الكروان بس بصوت خفيف وكل شوي ارفع صوتك لين يغديلك صدى
عشان الطير مايتروع اذا الكروان قام يصايح
واق واق واق
هلب هلب هلب
النجده انجده النجده

وبعدين لا تخليه ياكل من الكروان حطله سمانه بريه فوقه
لأن بعض الطيور يصيد الكروان واذا ذاقه ما يعجبه بعدين معد يحرص عليه
وبعض الكراوين تمرض الطير
وسلامتك

[أبو رداد]

طيرك وش نوعه ؟؟؟

[راعي ذياب]

السلام عليكم كلام شنوان طيب

[ملاعب الطير]

طيرك وش نوعه ؟؟؟
ابو رداد
فاتني ذا السؤال
لكن اعتقد انها شيهانه جبليه
لآن خوينا مبتداء
واضح من سؤاله
او وكريه
وكل الناس او اغلبهم اول ميبتدون بوكريه وانا منهم

[ملاعب الطير]

الله من واحد نسر طيره على كروان وهده طيار لحق طيره وعلق الكروان ويوم صاح الكروان جنب
والله من طير يوم صاد الكروان وحولبه عضه او نقره الكروان وتروع
والله من طير صاد وعلف وشبع وبطل يهد من كرهه لطعم الكروان
الطيور اذواق زي الأوادم
والله من طير صاد وعلف ومن بكره معد يعف ومرشه صار اخضر ثم اسود
وقام يضعف شوي شوي ثم انتقل الى رحمه لله
اذا جيت تعلم على كروان لازم تحسب للكلام هذا كله
او بكيفك نسر وهد وخلها على الله والله يستر
ومش امورك بالبركه

[ملاعب الطير]

ابو رداد يهمني رايك بكلامي
الواحد مايدري وش بيصير معه وهو يعلم الطير عشان كذا لازم نحسب لكل هذي الأمور
طول عمري اعلم الطيور والحمد لله كلها تصيد
ودايم اسمع واشوف الظروف اللي انا ذكرتها
وتفشل الطيور

[..@القناص@..]

ابو رداد
فاتني ذا السؤال
لكن اعتقد انها شيهانه جبليه
لآن خوينا مبتداء
واضح من سؤاله
او وكريه
وكل الناس او اغلبهم اول ميبتدون بوكريه وانا منهم
لا منب مبتدىء لاكن ابي اشوف وش احسن واسهل طريقه مجربه
وووووصحيح طيري شيهانه جبليه

[ملاعب الطير]

لا منب مبتدىء لاكن ابي اشوف وش احسن واسهل طريقه مجربه
وووووصحيح طيري شيهانه جبليه
عساك على القوه
والله يطعمك من صيدها

[@قرناص@]

,,

الطريقه الافضل تنسيرها على ظهر الكروان

وبعدها ادرجها وبتهد ان شاء الله وجوعها واقصر عليها

,,

[الصقارالصغير]

السلام اخوي الطريقه الاسرع والاحسن هي تاخذ كروان حي وتاخذ الثندوه حقة الحمامه وتاخذ الثندوه وتحطها على ظهر الكروان وتخلي الطار وتنسره على ظهر الكروان وبعدين اتشيل الثندوه واحذف الكروان وباذن الله تلحقه ولا تنسى قبل لا تسوي كل هذا صومها يوم