((قصيده عصماء))...

[مطلاع]

بسم الله الرحمن الرحيم

من شعر النقد الاجتماعي يقدم فيها وصف للشخص(كثير الحكي)
الذي يلفت اليه الانظار من خلال النميمه:
كثر الحكي يمرض قلوبٍ سليمه

والصمت حكمه لرجال الحكيمين

لو ان كثر الحكي يجلب غنيمه

ماشفت بالدنيا رجالٍ شقيين

بعض الرجال اليا حضر في وليمه

شغّل تماتيكه على الزين والشين

جاب العلوم الحاضره والقديمه

فك الزرار وزود الصاع صاعين

ناقص ضمير وضاحك له رجيمه

الحلق مدفع والبراطم سكاكين

واليا نصحته طحت لك في جريمه

تنهزرك والا تحداك بالعين

اوما براسٍ مثل راس البهيمه

يقول وين فلان عني وانا وين

ينفخ بوردانه ويكرب بريمه

كنه صديعٍ هايش له مجانين

الاجنبي يقول وش هالصتيمه

وعندالجماعه من حساب الكراوين

نمــــاينٍ ياعلـــها للثليمــــه

ياليت عنها يغلسون الدواوين

يطلع رجالاً بالمجالس حكيمه

كلامهم للناس ورد ورياحين

طلقين الايدي والخواطر كريمه

خفاف النفوس مرجحين الموازين
..اتمـــنى ان تعجــــبكم..
* * *
* *
*
((للشاعر:.مفرح الضمني))

[يوسف الخليفة1]

الشكر الجزيل أخي مطلاع وصح لسان الشاعر وحياك ربي

[مطلاع]

الشكر الجزيل أخي مطلاع وصح لسان الشاعر وحياك ربي



الله يحيك يا شاعرنا الكبير
في قدرك وشعرك
شرفتنا بمرورك العطر
يابو {عبد الله}

[بـلـيـهـان 1]

صح لسانك قصيده جزله و فيها من الحكمه الشي الكبير
تحياتي

[جرير]

تسلم علي النقل
والشاعر مفرح ممتع في جميع قصائده رحمه الله
لك الشكر
.
ومن اجمل اشعاره
.



أنا رفيقي ماسمـع اللـي حكابـه
لو جاتنا منه السوالـف مضاريـع
اقرا مفاهيمـه واحسـب حسابـه
واشوف مدخال القـدم والمطاليـع
ماني عجول ٍ بالزعل فـي غيابـه
مادام ماسمع منه مااعطي ولا ابيع
ولاخير فـي رفقـه بليـا حبابـه
ولاخير في جمع القلوب المواجيع
رفيقـك الغالـي تحمـل عتـابـه
واحلم عليه ليـا دفعتـه دوافيـع
شيـم ثنـاه ولاتبـيـن عيـابـه
عاره يعـورك يابعيـد المراميـع
وان كان دون مرافقك صـك بابـه
لقه قفاك وخل مشيك مـع الريـع
خله على بعـدك يسـرح ركابـه
يقضي سنه ولا شهور ٍ واسابيـع
وليا طلبـك الصلـح يامرحبابـه
سهل طريقـه لا يجيلـه موانيـع
واحفظ لسانك عنه واستر جنابـه
لاتجرحه بين الذيـاب المجاويـع
ترى اللسان ملكـع ٍ يندعـا بـه
مثل الحصان اللي يبي له مصاريع
واجعل على هرج ٍ تقولـه رقابـه
عقل ٍ يصرف طايشات المواضيـع
والصمت في بعض المجالس مهابه
يكفيك شر اهل الفلـي اللواسيـع
عن كلمة يقضب خطاهـا قضابـه
يركض عليه مصنع الهرج تصنيع
خله يروح ومنـك خـال ٍ جرابـه
يرجع كما المفلس بسوق المطاميع
واحفظ صداقـة طيبيـن القرابـه
ربعك ليا قلـت عليـك المشاريـع
سيف ٍ نهار الضيق تقضب نصابه
يقاك من حدب السيوف البواتيـع
وليا جفاك الـدار مالـك ومابـه
رزقك على اللي طوع الكون تطويع
ممشاك في حزم ٍ تطـارد سرابـه
اخير من شوف الوجيه المدانيـع
خطو الرخوم مصاحبيـن الخيابـه
تجار هـرج وفاللـوازم كراسيـع
الرجل مثل الذيـب رزقـه نهابـه
ياخذ مع الدو الخـلاوي قراطيـع
والطيب ضلع زاميـات ٍ هضابـه
للريح في شامخ ركونـه ذعاذيـع
عسر المراقي يتعب اللـي رقابـه
ماياكره كـود الحـرار القواطيـع
والا الردى جرف ٍ هيـال ٍ ترابـه
حوله لزهـران المقافـي مرابيـع
يرقد به الحصني ويلقى الذرى بـه
والبوم بين غصون قشعه مواقيـع
رجل على الناموس بيض ٍ ثيابـه
ورجل ٍ يرقعها على المتن ترقيـع
ورجل يزايم علتـه مـن عذابـه
عيـدان نـاره للقريـب مواليـع
على الجماعة كـل يـوم ٍ طلابـه
خماش وجـه ولالقيبـه منافيـع
ورجل ٍ مـع الايـام ماينصخابـه
عون الرفيق ليا صفعته صوافيـع
غيث ٍ على من جاه يمطر سحابـه
عشبه عل روس النوازي مفاقيـع
ورجل ٍ كما ليث ٍ عطيب ٍ صوابـه
من دون حقه سنع الخصم تسنيـع
طيب وعصمان الشـوارب تهابـه
يرجى وتخشاه الرجال الصعاصيع
ومن لادرى بالناس ماحد ٍ درى به
ماله على سجل النشامـا تواقيـع
ومن لايحوش النعم فاول شبابـه
في شيبته يحسب حساب المراضيع
وختامها ذكر النبـي والصحابـه
واستغفر اللي مايضيع ولا يضيـع




.

[مطلاع]

صح لسانك قصيده جزله و فيها من الحكمه الشي الكبير
تحياتي

صح بدنك يا (شقران)شرفتنا بمرورك .
حياك الله وبياك.

[مطلاع]

مشكور مشرفنا واخونا الغالي(جرير)
على مرورك العطر
وانت مميز واختيارك موفق .
حياك الله وبياك

[جبل راف]

الله الله فعلا كما ذكرت قصيدة عصماء وقوية

رحم الله شاعرها والحمدلله ان عندنا في مكشات من يعتنون ويفتخرون بهذا الشعر الجزل وخارج مكشات ايضا

تكفون لايضيع الموروث

[مطلاع]

الله الله فعلا كما ذكرت قصيدة عصماء وقوية



رحم الله شاعرها والحمدلله ان عندنا في مكشات من يعتنون ويفتخرون بهذا الشعر الجزل وخارج مكشات ايضا



تكفون لايضيع الموروث



هلا بـ(نشو الشمال) وبمرورك العطر.
حياك الله ولا تقول تكفووووون
طلباتك اوامر

[الحضري]

بارك الله فيك وسلمت على النقل الطيب


ورحم الله الشاعر مفرح الضمني فهو فعلا شاعر جزل



لاهنت ومشكور

[مطلاع]

الله يبارك فيك يا((الحضري))
تشرفنا بمرورك العطر
حياك الله وكثر الله من امثالك