ماطور تايجر صيني يوجد صووووووور

[يد النجر]

سلام يا شباب

وش رايكم بهالماطور الصيني انا توني شاريه و لا جربته اللي عندي 1500 واط

اللي عنده نفس هالنوعيه يعلمنا عنه و هل هو يعتمد عليه للطلعات الطويلة


و سلامتكم


http://www.pwbelg.clara.net/mercury/generators/img0.gif

[ملقاط]

والله يايد النجر :)
في ناس استخدموة ويقولون عبرهم بطلعة اسبوع وشغلوا علية تلفزيون ورسيفر و14 لمبة

بس يقولون اذا خزنتة ولا اسستخدمتة فترة طويلة يجيم ولايشتغل


بس ما ادري اذا احد مجربة بنفسة ويبي يفيدك
شباب مكشات مايقصرون


اخوك ملقاط

[أيمن]

كم قيمته يا يد النجر ؟

[القانوص]

السلام عليكم ورحمة الله وبركاته
يا اخ يد النجر مساك الله بالخير وجميع المشاركين
عندى واحد نفسه بالضبط ولكن اسمه dj ولونه احمر وصينى صارلى استعمله 11 شهر وحاطه بالشاليه واسبوعيا يشتغل بحدود 16 ساعه ولى الان ما مضبوط وماشى عدل واذا عبيته بانزين مع زيت فل يشتغل 8 ساعات بالحمول الكامله امااذا خففت عليه فانه يطول الى 10 ساعات واكثر.
وقيمته بحدود 350 ريال سعودى قبل سنة .
اخوك القانوص

[خوي حسن]

اخوي القانوص السلام عليكم ورحمة الله وبركاتة
اخوي الله لايهينك ممكن تقولي اسم المحل الي اشتريت منه هذا الماطور وموقعه

[الملثم]

يبيعونه عندنا في قطر 299 ريال في الكارفور في مجمع السيتي سنتر وفي جبل على في الإمارات 180ريال
وهو حق استخدام خفيف يعني ماتشغله ساعات طويله والله أعلم

[القانوص]

اخوي خوي حسن
السلام عليكم ورحمة الله وبركاته
الماطور اسمه بالانجليزي جينريتر دي جي وانا شريت من واحد يجيب كميات من الصين ( كونتينرات) يبيعهم بالمفرد والجملة وانا اعرف هذا الشخص . واذا موجود عنده تستاهل واحد.
اخوك القانوص

[راعي النحل]

اخوي
السلام عليكم ورحمة الله وبركاته

ماطور تايجر الصيني الازرق ...الموت الاحمر انحش منه تراه يوهقك
وما يصلح للاستخدام .....تراه عذبني ودوخني السبع دوخات....
حتى الميكانيكي يقول حرام عليك القروش اللي تصلح فيها هذا الماطور
عليك بماطور روبن او هوندا .....واشتر راحتك

[القماري]

الماطور المذكور عندي من سنه تقريبا وأستخدمه في الطلعات ويعمل لمدة 6 ساعات متواصله والكثير من الشباب يستخدمونه (إستخدامي له حشمه ومعظم الوقت مخزن في مكان جاف ونظيف )، هو ليس كالهوندا أو الماركات الكبيرة (لكن مقارنه بالسعر المتدني 300 - 350 ريال) أقول يستاهل وإذا خرب عليك بعد فتره أرمه وخذ لك غيره ( راح يشتغل معاك على الأقل 6 شهور بدون مشاكل مع الإستخدام المتواصل)
هذا رأيي فيه والله أعلم

[بن سلطان]

لا للمكائن الصينية !!


البارحة شفت موتور دبابة يفله الميكانيكي ، ويقول هذه دبابة ما خذت اسبوع ، والماتور يمكن ما كمل دقايق لين عطل !

[ابو شكاع]

احترنا :(


لكن للان النسبة متفاوته ما بين مداح وساب للماطور

لكن كلام القانوص والقماري + السعر يشجع على شرائة

خصوصا اللي يبي يوصي عليه من الإمارات

180 ريال فقط ..................... سعر بخس

لكن اخاف يكون اللي في الإمارات نوعية اقل



يمكن


:(



تسلمون

[يد النجر]

السلام يا شباب
اسف انا الظاهر حطيت السوال و انحشت :D
معليش انقطعت عن النت فترة


الزبدة و الخبر اليقين في هالمويطير الصيني

والله رائع رائع رائع رائع جدا و لا مثله شي بهالقيمة

طلعت فيه و لا 20 مرة و شغلت عليه رسيفر و تلفزيون و عد و غلط من اللمبات ام 13 واط و (مكيف مركزي و ثلاجة و ............قوية )

تصدقون عاد انه ماتعطل علي و لا مرة وكنت اشغله من قبل المغرب و لا اعبيه بنزين و زيت الا الساعة 12:30 او 1:00


الصراحة بالنسبة لقيمته اداء اكثر من ممتاز

يباع بحراج الدمام بـ 350 ريال

و السلام
يد النجر

[الفرعاوي]

السلام عليكم ورحمة الله وبركاته

وين افضل مكان نشريه في الرياض ؟

[دكتور شبعان]

بسم الله الرحمن الرحيم
السلام عليكم ورحمة الله وبركاته

تبي الصراحة الماطور هذا مقارنة مع ادائه المقبول وسعره الممتاز ينصح به
عندنا واحد شاريه قبل سنه تقريبا اخر حلاوه .. لكن قبل فترة بسيطة ( ايام العج ) مدري وش جاه وخرب .... وديته المصلح ونصحني اشتري جديد اوفر وافضل
واشتريت واحد

ينصح به للحبايب اللي يحبون التوفير:good:

[صقر البراري]

يد النجر وين بحراج الدمام هل عند معرض محدد والماطور الي يباع جديد ولا مستعمل


مع التحيات صقر البراري

[مهراس]

ألسلام عليكم: أنا سمت هذا الماطور جديد قبل شهرين في حراج الصواريخ جنوب جده بـ700 ريال وبالمناسبه قمت بتسعير هذه المولدات الصغيره لأنني عازم على شراء احداهم واشكر لكم أي رأي أو اقتراح:
- ياماها 650 وات / 600 ريال
- تايجر 1100 وات / 700 ريال (ممكن الذي سعره 350 ريال بالدمام أقل من 1000 وات)
- هوندا 650 وات /980 - 1150 ريال
- هوندا 1000 وات / 1200 ريال
- هوندا 650 وات نقال( أي له يد وشكله كالحقيبه الصغيره) / 1100ريال
- هوندا 600 وات نقال ( كاتم للصوت ) / 1450 ريال
- هوندا 1000EUوات نقال ( كاتم للصوت) 2000 ريال

[أبو ياسر ز]

قمت بشراء ماتور تايجر 1150 واط من جده من سوق هايبر بنده قبل سنه بسعر 249 ريال ويعمل عندي بشكل ممتاز ولله الحمد وأبحث عن ماتور آخر 1500 واط مثل الذي عند الأخ يد النجر الذي يستطيع مساعدتي يكتب لي رساله وأكون له شاكرا

[طارق الحربي]

يارجال خلك على المواطير المعروفه هوندا وغيرها ولا خذ المواطير اللي تجي تقليد لهوندا مجربه ومضمونه اسمها هيلدا

تحياتي

[الوانيت1]

أهم شى أنك تضبط وزنية نسبة الزيت الى نسبة البانزين...اذا زاد الزيت يحتر ويطلع صوت حنة عالى ومع الوقت يكربن والحل بسيط واذا قللت الزيت يحتر ومخطور يجيم ..ويستحسن ان الخلطة تكون فى جركل خارجى ويرج او يخض جيدا قبل التعبئة ويوجد مقياس لذالك تحت غطا البانزين حيث ان هذا المقياس مجزء الى اربع مستويات وهوعبارة عن كأس وكل مستوى او كل خط يقابلة (2لتر بانزين) تخلط معاة وقد أشتريت هذا الماطور منذ مدة 3 سنوات ولايزال يخدم وبدون رحمة وللعلم فان حجم 1200 يعطى من1000 الى850وات وحجم 950 يعطى 650وات ويتميز هذا عن مواطير الكهرب ان تصفيتة هى عبارة عن غسل مجرى البانزين من التانكى الى المحرك بالبانزين فقط وتنضيف شمعة الأحتراق بفرشاة اسنان أوبواسطة بخاخ تنظيف ونادر مايتم ذالك وشغل... يعنى كسر الأحتكار وحطم الاسعار ولاهوهين وشكرأ وهذا اللى عندى//// ملاحضة//// الزيت الذى يخلط مع البانزين يختلف عن زيت مكاين السيارت فهو مثل زيت البقيات او الدباب خفيف وفى حال أستخدام زيت السيارة مخطور يجيم ولايستمر للعلم

[ابو مشعل2]

سعره غالي مرة

[سهيل واحد]

**************


الاخ ... يد النجر .. ولا يهونون الاخوان
صراحة لولا الله ثم ماطور التايقر كان الله اعلم وش يصير علينا انا و خويي في الدبدبه ..هاك السنه

لان قبل سنتين او ثلاث امرحنا ليله بالدبدبة و الصبح عيت تشتغل السيارة وكانت المشكله ان البطارية فاضية مرة ولا حولك و لا الطير الخضر.. و كان ماطور التايقر جديد بكرتونه معنا وهو لخويي و كان جايه هديه و لا يدري عنه (لان خويي ما هو راعي تكنلوجيا) لا و اللي مهديه الماطور داري انه ما عندك احد بهالامور لانه معطيه معه جالون صغير فيه بنزين مخلوط بزيت يعني (هدية ما لك الا ولدً يقراء) حتى انه ما كان فاكه من كرتونه وبعد ما فكينا التايقر لقينا فيه اسلاك كنهن اسلاك اشتراك بس على اصغر و سئلته عن هالاسلاك و مط برطمه يعني ما ادري و شبكنا الاسلاك بالبطارية وانتظرنا شوي .. الا والله السيارة فيها نقره (السلف يدق) .. و خلينا الاسلاك شابكات بالبطاريه و الماطور شغال لين تقهوينا و افطرنا .. دق سلف يالخوي الا السيارة تقول تونا مركبين له بطارية ديلكو جديدددددددددددددة ...

تدرون وش قلت للخوي..والله اني قايله هالجملة
"يا رخصك يالتايقر بخمسة الاف ريال قاحوش ينطح قاحوش"

عاد وش رايك يا يد النجر

و الســـــــــــــــلام ختــــــــــــــــــــــــــــام.

أخوكم

سهيل واحد


***************

[Mr.3BDULMAJED]

طيب عطونا مكان معين بالرياض تكفون يالكشاته

[الوانيت1]

أستفسار ياسهيل 1 الله لايهينك أذابغيت اعمل شحن من الماطور للبطارية أهل اشبك على طول على أصابع البطارية السالب مع السالب والموجب مع الموجب والبطارية كما هى على وضعها اوأفصل البطارية عن السيارة بفك الاصابع ثم أشبكها للشحن لوحدها برجاء التوضيح لاعدمناك والسلام ختام/////

[برج الخير]

أستفسار ياسهيل 1 الله لايهينك أذابغيت اعمل شحن من الماطور للبطارية أهل اشبك على طول على أصابع البطارية السالب مع السالب والموجب مع الموجب والبطارية كما هى على وضعها اوأفصل البطارية عن السيارة بفك الاصابع ثم أشبكها للشحن لوحدها برجاء التوضيح لاعدمناك والسلام ختام/////


نفس السؤال ؟؟؟؟؟؟؟؟؟؟؟؟؟؟؟؟؟؟؟

نبي الجواب !!!!!!!!!!!!!!!!!!

الله لا يهينك :(

[رجل شرقي]

بكل امانه ما عليه كلام ، انا شريته من سنتين والى الحين شغال معاي ما شاء الله وقد شريته ب 300 ريال من سوق الاحمد في قطر ، ولكن الان نزلت اسعاره فصار يباع 230 ريال وقوته 650 وات

ودائما اذا طلعت البر احمل معي 4 لمبات البيض 20 وات ( على فكره لا احد يستعمل اللمبات الصفر لانها تستهلك كهرباء ووات اكثر على سبيل المثال اللمبه الوحده حجم 60 تستهلك 60 وات ، لذا استخدموا اللمبات البيض ) واحمل معي تلفزيون ورسيفر و بلاي ستيشن ومروحه اوقات الصيف .


وكان على احسن ما يكون ( طبعا تاكدوا كل جهاز كم قوته من الوات ونقصوها من قوة وات الماكينة ) .

والان في قطر يباع في كارفور

وفي سوق الاحمد عند الصقر الذهبي ( واحلى شيء الصقر الذهبي لانه يشغل لك الماكينه قبل لا تاخذها )


وعلى فكره انا الماطور عندي من سنتين ولم احط فيه شيء ما عدا البترول والايل ، باضافة الى ان به بلك مثل بلكات السياره فاذا حسيت بان قوة الكهرباء ضعيفه في الماكينه ( اي ما تشتغل الماكينه من اول هندل ) غير البلك ورح صوب كهربائي سيارات وخله يركب فيه بلك تويوتا لاندكروزر موديل 89 . لان هذا الحجم اللي ركب مع الماكينة .


وملاحظه اخرى لابد ان تخلط البترول مع الآيل خارج الماكينه وليس بداخل الماكينه اي في جركل خارجي ومن ثم تسكب البترول المخلوط مع الآيل في الماكينه ، لانك اذا سكبت البترول داخل الماكينه ومن ثم الايل فيكون الايل ثقيل والبتالي يحكر الماكينه ويجعلها ما تشرب بترول لذا ما راح تشتغل الماكينه .




وملاحظه اخيره : كذلك الماطور مزود باشتراك لتعبئة بطارية السياره وقت تعطلها لا سامح الله كل ما عليك ان تشغل الماكينة اولا ومن ثم تضع السالب مع السالب والموجب مع الموجب ودع الماطور يعبىء البطارية .



وموفقين يارب




رجل شرقي

قطر