ادخل ولا تبخل برأيك وافكارك لتصميم بيت شعر

[دحيم_1]

السلام عليكم ورحمة الله وبركاته
لم اجد افضل من هذا المنتدى لعرض مثل هذا الموضوع


باختصار شديد انا ساكن في دور علوي وعندي مساحه جيده في السطح
وفيه مجال اني افصل بيت شعر 4.5X4 وابي رايكم وافكاركم في هذا المجال
وياليت اللي يخبر او جرب محل معين يعلمني عنه


الفكره الرئيسيه هي مجلس صغير خاص فيني الوذ اليه للراحه والاستمتاع بالشبه :j خصوصا ان الشتى جاي بالطريق


ابي اعرف وين افضل مكان للمشب وهل تنصحون بالوجار الصاج الجاهز ولا لا ولي عنده علوم زود يفيدني لا هنتو


شكرا واسف على الاطاله ,,,

[اسير الغضا]

يالغالي به بيت شعر جاهز اخذه وارتح لا وينقل لاي مكان

[عندك يابعدي]

أخوي دحيم كم يشرفنا أن تكون بين اخوانك وأحبابك في منتدى مكشات الذي يضم كوكبة من الشباب هم من أفضل الشباب نحسبهم كذلك والله حسيبهم وثانيانرحب بك عضوا فعالا في هذا المنتى وياليتك أخي الحبيب أخبرتنا بأي مكان تسكن حتى ندلك على من يحسن الصناعة في المكان الذي تسكن فيه وتلك ارشادات عساها تفيدك:
1-بالنسبة للمدخنة تأخذها جاهزة وهي مجربة وتصنع في الدوادمي مصنع الطخيس وتوجد في محلات الخيام وسعرها حوالي1500
2-بالنسبة لبيت الشعر يستحسن أن تكون معزولة من الداخل وبالنسبة للسقف عزل مائي
3-بالنسبة للجهة لايكون بابها يم جهة الشمال حتى لايؤذيك برودة الهواء
4- بالنسبة للوجار خذ حساب جلسك مع المسندة يعني متر وعشر سنتمتر ودمت بود

[دحيم_1]

اخوي ملك النيسان شكرا لك وياليت تعلمني وين القى الجاهز لان الفكره عجبتني اني اسقطه بالكرين على السطح والسؤال هل المشب راكب معها وعندي استفسار بعد عن الكهرب والاضاءه يا ليت تفيدني الله لا يهينك.


مشرفنا الغالي عندك يا بعدي انا ساكن في الرياض وبالنسبه لمكان الباب ما اتوقع يكون مشكله لاني ناوي احطه بالسطح والجدران قريبه فما اتوقع الشمالي بيأثر على الخيمه ولا وش رايك ؟

شاكر مروركم ويعلم الله اني استفدت من نصايحكم بارك الله فيكم

[اسير الغضا]

اخوي ملك النيسان شكرا لك وياليت تعلمني وين القى الجاهز لان الفكره عجبتني اني اسقطه بالكرين على السطح والسؤال هل المشب راكب معها وعندي استفسار بعد عن الكهرب والاضاءه يا ليت تفيدني الله لا يهينك.


بالنسبه للمشب يالغالي يجي معه اذا رغبت والكهرب والاضائه موجود فتحات مثل اللي بالجدران
وبالنسبه للرياض انا والله مااقدر افيدك الا بشي بسيط لو تروح للمحلات الخيام اومحلات الرحلات

لنه بعنيزه بمحلات الرحلات يجيبونه لك الى البيت

وبالتوفيق يالغالي

[دحيم_1]

السلام عليكم
حبيت اعقب على الموضوع ليستفيد اخواني اللي يرغبون بناء بيت شعر

انا رحت للمحلات في مخرج 15 شرق مسجد الراجحي ولقيت اشكال والوان بس المشكله ما تدري الصادق من الكاذب لان اسعارهم تختلف والفرق مهب بسيط
بيت الشعر الملكي يفرق عن العادي بالابلكاش اللي يحطونه داير مدار الخيمة ومتره من 245 الى 275 ريال
بيت الشعر العادي بدون جدران ابلكاش سعر المتر من 185 الى 220 ريال
الوجار قيمت بحدود الـ 1800 ريال
على العموم فيه ناس وصفولي محلات الغرابي وبروح ان شاء الله واعلمكم وش يصير علي

[Qosmio]

توافق للخيام .. من افضل مصنعي بيوت الشعر داخل البيوت والاستراحات ..

ويزينون ايضا المشبات ويفصلون الفرش والجلسات الداخلية .. عندهم عدة ديكورات .. انصحك بتركيب مروحة معدن للمشب وليس بلاستك ..

موقعهم بالرياض طريق الملك فهد في الجهة المقابلة لاسواق العويس ..

حسب علمي ينفذون اي طلبات داخل المملكة ولهم فروع بالامارات وقطر ..