يا أخوان عندي مشورة

[عقريص]

السلام عليكم ورحمة الله وبركاتة


كيف حالكم يا اعضاء منتدانا الغالي , وش اخباركم عساكم مرتاحين

انا عندي جيب باترول سلقة قديم , وشاورت واحد من الربع عن المساعدات الزينة وقالي ركب مساعدات شاص ...........
وركبتة , ولاكن للأسف طلع الموتر فية مطب مب صاحي تقل معي شاص , قلت انا ماتفقنا على كذا :no2: , وعلى هالحال يبي يتكسر الظهر ماجاء الشتاء..:( ,

والحين انا جايكم ابي شوركم وش المساعدات الزينة بس ماتصير قاسية مرة , وودي اركب ياي عشان يرتفع شوي لانه نازل الحين



وشـكــــرا

[التميمي ك د ك]

انا من رائيي تركب المساعد حق الوكاله بلا خرابيط وضياع فلوس واما الياي عندك الاسترالي تلقاه عند الرمايه وشكرا

[جيبي جايزلي]

اخوي عقريص شف مشاركتي بالموضوع على هالرابط لعلها تفيدك ......وبالتوفيق

http://www.mekshat.com/vb/showthread.php?t=76310&page=2

[عقريص]

الاخ العزيز حوطي مشكور على النصيحة بس المشكله حق البلد على طول ينفقع
وانا مركب حق شاص وبرضة منفقع واحد واخاف من حقات البلد يخرب على طول

الاخ العزيز جيبي جايزلي مشكور على الرابط وشفت مشاركتك بس شكلك تنصح بمساعدات جبريل وانا ماعندي خلفية عن المساعدات فياليت توضحلي مواصفاتها من ناحية التحمل والراحة والسعر وموقع شراءها وطريقة تركيبة اذاكان فيها ترهيم

[قناص خلاوي]

اخوي شكلك راعي مطاعس ومطامر
جبريل لا تهمك تراها نفس حقات الوكالة
يجي منها نوعين الاصفر ( زيت) هذا ما ينفع ولا بريال وينفقع على طول
الازرق ( غاز) ماعليه زوين احسن من الاصفر
اذا تبي المساعد اللي يخدمك صح عليك بمساعدات مونرو عملية ومطبها ماهوب قوي
تحصلها بصناعية القديمة ( دوار الخرج) المحل يفتح جنوب وراء البنك الاهلي

[نايف292]

شوف اولا المساعدات مستحيل يرفعن السياره

ثانيا ركب اي مساعد اصلي وركب ياي استرالي وهذا هو اللي يرفع الموتر

والله يكتب اللي فيه خير

[جيبي جايزلي]

الاخ العزيز جيبي جايزلي مشكور على الرابط وشفت مشاركتك بس شكلك تنصح بمساعدات جبريل وانا ماعندي خلفية عن المساعدات فياليت توضحلي مواصفاتها من ناحية التحمل والراحة والسعر وموقع شراءها وطريقة تركيبة اذاكان فيها ترهيم


من ناحيه التحمل لا يعلى عليها والراحه بعد مثل شد البلد واقوى شوي والسعر اربع حبات 300 تزود عشره عشرين تقريبا ولونها ابيض ثلاث طقات وتركب زي الحلاوه من دون ترهيم والموقع اذا جيت للصناعيه القديمه وجهك غرب وجاك الكبري اخر الصناعيه رح من تحت ولف يمين من عند الاشاره تجيك اشاره ثانيه ديور وارجع اول ملف خله ثاني ملف لف من عنده طوالى تقريبا 200 متر تلقاه على يمينك محل اسمه السبت للمساعدات ورقم تلفونهم 4482470 وبالتوفيق

[اسير الغضا]

اسمع وانا ابوك امزح وانا اخوك

المساعدات المعروف انهن نوعين
الاول غاز وهذا نوع يتحمل بس يقص الظهر
الثاني جبريل مريح بس مايصبر بالبر ويبلشك بالهزهزه

[عقريص]

اشكررررررررررررررررررررررررر جميع الاخوة اللي ردوا على الموضوع خاصة
واللي سيروا ولا شاركو عامة
اهم شي انا شكلي جزمت على مساعدات الجبريل بس ودي اعرف هل هي مثل مطب مساعدات الشاص لاني السراحة ركبت مساعدات شاص وتوذيت منهم قاسيات بالحيل ولا يصبر لانه انفقع معي واحد وانا ماطلعت للبر ولا شي من ركبتة وانا بالاسفلت ولا جاها مطبات جامدة ومع ذالك ماصبرت (بالعربي ماتنفع )

[بلاكستون]

السلام عليكم

عليك بشد البلد لأنه الأنسب مما يطيل العمر الافتراضي
طع شوري وقل تم

[عقريص]

الاخ الغالي بلاكستون
اشكرك على مرورك وتعليقك
ولاكن اخاف من مساعدات شد البلد انهم يخربون على طول ولا مامثل الوكالة

[GX 2008]

اول شي السلام عليكم ورحمة الله وبركاته
ثاني شي هذي اول مشاركة فالمنتدى حبينا تباركبها بالرد عليك ياخوي
ثالث شي الحل ياطويل العمر اذا انك فاضي ابييك ااجيي الامارات وبخلي موترك ورده وارجعه لك وكاله مع الترفيعه اللي تعجبك وعساك سالم