مكاشيت الرياض .. خميس وجمعة ؟!!

[مطلع]

السلام عليكم ... صباحكم ورد ونفل

جانا الشتا وزانت المكاشيت .. والله يعين الطلاب العزوبية على الغربة والدراسة ونكدها

دلونا على مكاشيت اهل الرياض .. القريبة ( خميس وجمعة ) .. ولكم الأجر ان شاء الله

انا ساكن في شمال الرياض .. ودي بمطاليع نفود وفيها حطب وجلوف ( صخر )

خويكم شمالي وما يملا عينه الا شوف الحطب ودحس رجليه في النفود :)

ماهي مشكلة لو المكشات يبعد 100 او 200 كيلو عن الرياض .. ام شي ارض خلا وما نحتاج

نشيل الحطب معنا ولا يذبحنا البرد فيه ...

وسلامتكم

[جرير]

مادامك عزوبي حط رجلك للوسيع علي طريق الدمام 100 كيلو
به شوية ارطا وكلما ابعدت عن الخط زان المكشات


او مفرق الطوقي توشع النفود يمين وادعس لين يطيب خاطرك
ارض زينه وخليه . موفق ان شاء الله
ولا تنسى تعلمنا عشان نسير عليكم .

[الشنه]

مطلوبك عندي
اعرف مزاجك تبي الخلا الخالي
والعروق السنعه والنقا الي يشرح الخاطر
اسمعني زين
الثمامه /مخرج الطوقي/ سند معد الخط كنك تبي التنهاة/دوار الصمان تعبي بنزين وتشيك النواقص
والقط مفرق الصمان / وانت بتشوف العروق الي تسرك وكل ما تروح شمال وتدخل في النفوذ اكثر تلقى اكثر


وفيه يا ولد الشايب محل ثاني
القط طريق سدير
/ مفرق تمير / لين ينتهي الخط خلاص حرف تي
في ديره اسمها بوضا/رح يمين لين توصل ديره اسمها الشعب / واصل المسير واتجه لجلعوده ومن بعده تجيك الطعوس
هي نفسها الي في الشرح الأول جميعها امتداد لبعضها البعض لكن من جهه ثانيه .
وانا افضلها
للنظافه وكثرة الأرطى.
وقلة المرتادين

[مطلع]

مادامك عزوبي حط رجلك للوسيع علي طريق الدمام 100 كيلو

به شوية ارطا وكلما ابعدت عن الخط زان المكشات


او مفرق الطوقي توشع النفود يمين وادعس لين يطيب خاطرك
ارض زينه وخليه . موفق ان شاء الله

ولا تنسى تعلمنا عشان نسير عليكم .


سمعت كثير عن هالمحاري .. يقولون انها بلاد شرحه وتوسع الصدر

ان شاء الله اجيها .. وان شاء الله تكمل الوناسة وتستعزمون لنا .. تراني اتشرف بالساعة اللي تجعنا يا جرير .. :)

الله يعطيك العافيه

[مطلع]

مطلوبك عندي
اعرف مزاجك تبي الخلا الخالي
والعروق السنعه والنقا الي يشرح الخاطر
اسمعني زين
الثمامه /مخرج الطوقي/ سند معد الخط كنك تبي التنهاة/دوار الصمان تعبي بنزين وتشيك النواقص
والقط مفرق الصمان / وانت بتشوف العروق الي تسرك وكل ما تروح شمال وتدخل في النفوذ اكثر تلقى اكثر


وفيه يا ولد الشايب محل ثاني
القط طريق سدير
/ مفرق تمير / لين ينتهي الخط خلاص حرف تي
في ديره اسمها بوضا/رح يمين لين توصل ديره اسمها الشعب / واصل المسير واتجه لجلعوده ومن بعده تجيك الطعوس
هي نفسها الي في الشرح الأول جميعها امتداد لبعضها البعض لكن من جهه ثانيه .
وانا افضلها
للنظافه وكثرة الأرطى.
وقلة المرتادين

جعلها مبروكة الاصابع اللي خطت هالوصف

اشهد انك عرفت مزاجي .. يا ملا العافية

ودي انشدك .. بالوصف الاول .. مفرق الصمان اتجاه واحد .. والا فيه جهه اضربها .. اخاف اغدي وانا اخوك

وبالوصف الثاني .. طريق سدير هو اللي على طريق القصيم .. ومفرق تمير .. اي جهه اسلكها .. ياليت تفصل

ترى خويك يخاف يضرب له جهه ويجيب العيد :)

خخخخخخ

الله يعطيك العافيه ويبارك فيك

[ابوسلمى]

اخوي مطلع ترى اخونا الشنه قصده طريق القصيم يوم انه يقول طريق سدير ...

الله يهديهم بعض الشباب مدري ليش الا غصب يصير طريق سدير ..

[وائل علي]

الله الله ارسل لهم شوي من الحطب

[مطلع]

اخوي مطلع ترى اخونا الشنه قصده طريق القصيم يوم انه يقول طريق سدير ...

الله يهديهم بعض الشباب مدري ليش الا غصب يصير طريق سدير ..


الله يعطيك العافية .. وجعلك تسلم على التوضيح

[مطلع]

الله الله ارسل لهم شوي من الحطب

ان شاء الله يوم يصير معي حوض ( شاص ) .. ما يغلا عليهم :)

جعلك تسلم

[سفير الشمال]

السلام عليكم ورحمة الله وبركاته
اخي الكريم مطلع
حياك الله
الأخوان الكرام ماقصرو والله يعطيهم العافيه
وسوف أضيف على كلامهم الموقع التالي
تتجه من الرياض عبر طريق الصمان ـ الرفيعه حتى تصل النفود وتواصل المسير عبرالطريق المسفلت الذي يشق النفود حتى تعترض عليك أبراج خط الكهرباء القادمه من الجبيل وتفرق من عندها بإتجاه اليمين شرقا وتمشي مع الردميه التي تباري الأبراج وسط النفود وتمشي مسافه لابأس بها وهناك ستجد مطلوبك من نقر النفود والحطب المتوفر (الأرطى)
مسافة الطريق كلها لاتتجاوز 200كيلوا
تقبل إحترامي وتقديري

[عشانا]

لاتاخذ الدنيا خراص وهقوات //// يقطعت عن شيل الصميل البرادي
تبل ان تحرك اخذ معك كل اغراضك ومن ضمنها الحطب والدافور

[الشنه]

ما طلبت شي
بالنسبه لمفرق الصمان
من عند الدوار بتشوف اللوحع تبين اتجاه الصمان
وحتى تكون على بينه اسأل الناس في محطة البنزين الي عند الدوار
وعموماً اذا اقبلت على الدوار خذ يمين


بالنسبه لمفرق تمير
صحيح مع طريق سدير القصيم
واللوحه واضحه تمير تفرق يمين من السريع

[يسار يمين]

اببببببببببببببببببببببببببببببببببببببببببببب والله يا جرير ويالشنة ويامطلع انكم هيجتم المشاعر واطربتم الفؤاد الله يجيب الربيع وتزين العلوم ونجيكم الرياض ونستانس عندكم

[ذرب سدير]

أطيب نفود في العالم نفود الدهناء جهة أم رجوم شرق سدير خصوصاً حومة النقيان

والوصف عطاك اياه الشنه .. اقضب طريق سدير ثم افرق من تمير إلخ إلخ ووصفه واضح(ن) بالحييييييييل

[مهبوب نسايم]

أطيب شئ لك الدهناء .


تبعد شرق عن الرياض 100 كلم تقريبا أو اقل .







أتجه مع طريق الدمام السريع حتى يأتيك مفرق سعد , النفود قريبة جداً من المفرق يمكن 2 كيلو بس والأسفلت يمر بمحاذاة النفود .


وأضرب الدهناء من كل جهة أذا بغيت لايردك الا البنزين .







وتقدر تروح للنفود مع طريق آخر غير السريع هو الطريق الذي يأتي من حي النظيم شرق الرياض وهو سايد واحد لكنه أقل مسافة ربما يطيح عليك 8 كيلو .



وللمعلومية بجانب النفود منتزة بري معروف هو منتزه (( سعد )) وهو مشجر وكبير وفيه أماكن للسلخ ودورات مياه وملاهي للاطفال ومواقف للسيارات ومظلات كبيرة للجلوس واماكن للندي .


وسعد هجرة تقع قرب المنتزه وسكانها من قبيلة سبيع .



واذا حبيت تطول الاقامة يفضل المقيال والغداء في المنتزه , واذا برد الجو النفود قريبة ماتجي 1 كيلو على طرف المنتزه .



والله يذكر ايام سعد بالخير نخيم فيها باليومين والثلاثة واللي يزينها قرب النفود والنوم فيه ليلاً .




والمنطقة هادئة جداً ونظيفه .

[الفهد فهد]

شكرا على الموضوع

[أبو الحارث 4]

الدهنا وبس نفود وأرطى، واحمد ربك وذاكر دروسك.

[الشاهين2004]

اخوي مطلع ترى اخونا الشنه قصده طريق القصيم يوم انه يقول طريق سدير ...

الله يهديهم بعض الشباب مدري ليش الا غصب يصير طريق سدير ..
اخوي ابو سلمى الطريق هذا طريق سدير وهو يودي لسدير ومن بعد سدير يصير طريق الزلفي ومن بعد الزلفي يصير طريق القصيم الله يهديك بس الا غصب يصير طريق القصيم

[المهند تمير]

أخوي مطلع...
أطلع من شمال الرياض +الطريق السريع === 130 كلم

مخرج تمير يمين + تمير = 20 كلم

شمال تمير + مبايض = 15 كلم

شرق مباسض + الشعب = 15 كلم

الشعب + أم رجوم = 35 كلم

أم رجوم + الصيهد والنفود = 20 كلم

ومن ضمن الفياض والشعبان على طريقك .. روضة الخشم + الشوكي + التنهات ..