الشنـــــــــــــاذر........

[حر ((قصاص))]

اولا السلام عليكم ورحمة الله وبركاته مساكم اوصبحكم الله بالخير

اخواني الصقارين حبيت لوتساعدوني في موضوع الشناذر

امس انا كنت عند محل رحلات وصيد وحصلت عنده كبسوله لونها ابيض

مغلفه ومكتوب عليها((شناذر صقور)) ومكتوب عليها من الخلف(( قبل اعطاء

طير الشناذر تأكد من خلو الطير من الامراض وان تكون صحته سليمه وان تكون

((الفرسه)) الحوقله خاليه من الطعام وسيبدأ مفعول الشناذر بعد عشر دقائق))

سؤالي لكم يأخوان بحكم اني ماقد شنذرت طيور ابدا ماهو الشناذر ومافائدته للطير بعد القرناس وهل هو يستخدم لجميع انواع الطيور جير او حرار او شياهين بحر ولا جبل وماهي طريقة اعطاء الطير الشناذر وخصوصا هذه الكبسوله وطريقة اعطائها للطير ؟

اتمنى ان اكون لم اطيل عليكم في الطرح .

اتمنى لكم مقناصا موفقا هذا الموسم ((جعلنا الله واياكم ممن كتب له طرح الحباري هذه السنه))

[فتى باريس نجد]

يشرفني اني اول واحد يرد عليك
فائدة الشناذر يزيل جميع الشحوم والدهون الموجود بالحوقلة
لاكن لابد من حسب خبرتي القليلة بعد الشنذرة اعطاء الطير الهبر بدون عظم ولا ريش لمدت 3ايام وعلى ما اعتقد انة تصلح لجميع الطيور

[حر ((قصاص))]

جزاك الله خير اخوي فتى باريس نجد وجعله في موازين حسناتك

لاكن اريد اجوبه شافيه
ماهي طريقة الشنذرة السليمة؟

[همس الرعد]

اخوي ترا فيه مواضيع كثيره طرحت عن الشناذره في المنتدى لو ترجع للمواضيع اللي قبل 3 اسابيع بتلقاها وراح تفيدك لانها مواضيع كثيره

[حر ((قصاص))]

اشكرك اخوي همس الرعد على مرورك

[ذياب999]

والله يا قصاص الشناذره الطبيه زينه ومفعولها جيد

ومفعولها زي ما قالك الاخ تزيل الشحوم اللي مخزنها الطير طوال فترة المقيض
وهي على حسب الطير فيه طير طال عمرك نص وزنه شبيكه(صيغة مبالغه)
وفي طير يستهلك ما يخزن

وطريقة اعطائها للطير:
اول شي طبعا ما يكون الطير عليه عشا يعني تعطى على معده خاليه
ثاني شي تدف الحبه(الشناذره) في حلق الطير
ثالث شي الله الله بالماء ولو يكون بخاخ افضل لأن الطير ماهو فاضي يشرب(عشان تذوب الحبه وتعطي مفعول سريع)
رابعاً طبعا خلاص قابله وتفرج انتهت وظيفتك الحين احسبله 6دقايق 7دقايق بالكثير
وبيقط الشبيكه(الشحوم اللي مخزنها الطير) وهذا القصد من الشناذره

وفايدتها تشوف الطير يحرص على العلف اكثر من أول بشكل ملحوظ
ويجيب جهده سواء في هدد ولا في دعو بالعربي ما عاد يخونز(يفسق)
ويفضل اعطاؤه هبر اي لحم صافي كما ذكر الاخ عشان ما تتعبه بالهظم لأن الطير تعبان خلقه وتريحه من الهدد والدعو يومين
بس يا سلام لو تكون الشناذره بعد دعو ويكون الطير فحمان شوي يبي يقط الشبيكه كلها وبوقت اسرع وهذا شي مجرب

اتمنى ان اكون قد افدتك

تحياتي
اخوك/ذياب

[عضو1]

اخوي قصاص
الشناذره فائدتها للطير اذا كان الطير كما قال اخي ذياب لايحرص
على العلف بشكل جيد . واذا كان لايحرص بالدعوا على صيدته
فذلك يكون من ان هناك شي في حوصله الطير يتسبب في ذلك
وعندما تعطيه الشناذره تصب الماء وراها وكل 5 او 10 دقائق
ترد وتعطيه ماء لان الشناذره حاره وسوف تجعل الطير يقط كل شي مخزن فيه
وبعدها تكثر عليه بالماء وتجعل الطير الى اليوم الثاني ثم تعطيه
علف ولكن بدون عظم حتى لايأثر على الطير ويكون سهل الهظم
وتريح الطير من الدعوا لمدة 3 ايام كأفضليه لصحته وللعلم
الشناذره لاتستخدم دائما الا اذا لاحظت ان الطير فسقان ولا يهتم للعلف
وتكون متأكد من خلوه من اي مرض ثاني لان الشناذره ليست بالشئ السهل
وممكن ان تقتل الطير فاحرص يااخي على هذا الامر
اتمنى انك استفدت

[حر ((قصاص))]

اخي ذياب 999:بيض الله وجهك ماقصرت كفيت ووفيت وفالك حبارى هالموسم.

اخي عضو1:جزاك الله عنا كل خير ووفقك على المعلومات المفيدة ووجهك ابيض.

لاكن سمعت ان الكبسوله ماتاثر على الطير مثل ماياثر الشناذر الطبيعي وان الكبسوله طبيه ولا على الطير خوف منها هل هذا الكلام صحيح؟

[عضو1]

اخوي قصاص للامانه انا مااستخدمت الشناذره الطبيه
استخدم الشب وصراحه اثق بالشي القديم وبمفعوله :)
ولكن الاغلبيه يستخدمون الكبسول الطبي لانه طبي ويكونون متأكدين منه
ولكن ماذكر احد اشتكى من الشب او سبها بالعكس اشوف ناس تشنذر الطير
بالشب
واتمنى لك التوفيق
وجزاك الله خير اخي

[هواي داورد]

انا اشنذر الطير بالسكر او ملح

وتراها تعطي مفعول


الشنذرة بالعربي تنزل كل اللي اكله بس

[بو هاشم]

اهم شي ياخواني ان يتاكد من الطير وانه سليم من الامراض
لانه تذبح الطير اذا كان ماهو سليم
البارح وحد من الشباب الله يهديه شال طيره من المربط ونقله يومين وشنذر الطير
ومات الله يعوض عليه

[حر ((قصاص))]

عضو1 :اشكرك على الرد السريع والمفيد اتمنى ان اجد الجواب الشافي من احد الاخوان الذين جربوا
bustard (http://www.mekshat.com/vb/member.php?u=93023) :اشكرك على مرورك ومعلو ماتك المفيده.

بوهاشم :كلامك صحيح وماعليه متم ماقصرت يالغالي كثير طيور ماتن بسبب الشنذرة الغير صحيحة او ان يكون الطير غير سليم من الامراض.