مكشات : خمع , طار , ( وقع )!!

[حفرلوجيا]

سلام يالربع
عضو بمكشات ( متوهق ) أمس اتصل بي يقول المنتدى فيه مشكلة ! قلت : عادي يمكن تغيير سيرفر أو صيانة وجوانب فنية .. إلا ان هالعضو مصر على إن المنتدى طار .
فال ماهو فالك .. المنتدى وراه من يتولى أمره ريح بالك .. لكنه بـ( حياء ) يقول : لاتضحك علي.. تراني أدمنت منتدى مكشات ..وهو مقفل له يوم كامل ولا حس ولا إشعار ولاخبر .. ولا أنا لاقي ( صنف ) تكون (جرعتة ) بديلة عن ( مكشات ) :looney:.. وأخشى انه طار وراح حتى ( أرشيفه ) .
قلت عاد ( أبسرح ) به: لو طار أنت ( ماتطير );).. وترى رسالة وصلتني بالجوال يتداولونها الأعضاء والمشرفين تقول ان ( ابو ياسر عنده نسخة احتياط حافظها عنده بكراتين لكنه ماعنده مستودع مجود .. وإنه هو وأبو تركي يستفزعون المكشاتيين اللي صافين عندهم مثل سراء الخبازين ( ويكحش مكشات والسمح من طرف ) من كراتين المواضيع ويحطون بمخابي اللي صافين ( أحفظ لهن من المستودع ) .. لانه مقيولن لهم لاتامنون السيل بالعقارب همن تروح عليكم كل المواضيع .. ويطلبون من المكشاتيين يرجعون اللي بمخابيهم أول مايعود المنتدى في فضاء الإنترنت :p..
هالعضو المتوهق ضحك وسألني( يبي يسرح بي) يقول : ماتدري المواضيع اللي تحفظ بالمخابي مؤقتا .. هل هي بالإختيار ؟ .. قلت لا ( قوترا : يعني يكحشون من طرف بس مصنف بعضها بالموضوع وبعضها بأسم العضو ) .. انت وحظك :(.
في إتصاله الثاني البارح يضحك ويقول : أنا على النت اللحين رجع المنتدى .. يعني اللي أخذوا المواضيع لازم يرجعونها لكراتينها :D.. وللأمانة ;) سألني( ولن أفضح أسمه ) وكانت إجاباتي حرفيا على النحو التالي :
-- يسال : اللحين أكيد كل واحد شاف اللي بمخباته ورجعهن متأثر منهن .. وش تهقى اللي طاحن بمخباته
مواضيعي ( يقصد مواضيعه ) ؟
- هذا أكيد صاير بعدهن ( يتبلعس ) على كل شي ويبي يصير أكثر الأعضاء متابعة ورصدا .. وما هي بعيده يقنصونه المشرفين ( يساعدهم ).;)
-- ويسأل واللي شايل مواضيعك ياأبو سليمان؟
- هذا يرجع مفتحة ازارير ثوبه وشماغة ( طرف عند إذنه والطرف الثاني عند عرقوبه وطاقيته وراء هامته ومطير عيونه ويقول : وين الأثل ؟ يبي يدخل لهن .:D
-- ويسأل وش تختار لو كان بكيفك ؟
- سأحتار لكن هالأيام سأختار من صور مبدعين التصوير ( أبو محمد ونقا وثلاثة غيرهم ) على شان أرجع ( كاشخ ومتعطر ومشيتي موزونة ووضعي مرتب ).:good:
ويسأل وش اللي مانختاره ؟:mad:
- هذي ورطه .. لكن على إعتبار أن هناك تصنيف للمواضيع بغير اٍسماء الأعضاء .. سوف أستبعد ( التواقيع ) لأن أكثرها تبي ترجعني مخابيي مشققة و أمشي من الثقل ( اتلاحق نفسي ).. هذا غير اني لو حطيت التواقيع بسيارتي .. يبي يوقفني المرور حتى يعطوني مخالفة على ( الوزن الزايد ) اللي يتعب الطريق .. ويمكن يقولون : لازم تخفي بعضهن أو تغيرهن لأن مالهن داعي .
وسلامتكم

[كشات]

بسم الله الرحمن الرحيم
السلام عليكم ورحمة الله وبركاته

واخيرا الحمد لله على السلامه
رجع المنتدى لوضعه الطبيعي


بصراحه خويك يا حفرلوجيا معه حق

المنتدى وبهذا الوقت بالذات ادمن دخوله الكثيرين
ومب شرط من الاعضاء

حتى الزوار اللي يدورون اخبار الفقع والربيع

وكما هو واضح
الربيع موضته قدمت شوي
اما الفقع واخبار اماكنه هي اللي مسيطره على سوق مكشات

هذا رايي المتواضع


المنتدى رجع ولله الحمد
وما يحضرني تشبيه للي صار بالمنتدى الا هالجاي

اذا كان موترك مدردع
وصواميله مرتخيه
واكلت لك مطب سنع من هاللي بالشوارع
بعض المواتر حبيبه
يفصل الكهرب على طول (يغدي تقل متنّح) وشارب له طاسة لبن

لكن اللي يبخص بموتره
يحبرش به شوي ويعرف وين دواه
ومكشات الحمد لله ماهوب مدردع
ولا قديم
ولكن اتوقع انها كبوة حصان من السيرفر اللي زاد عليه الضغط عقب العيد






اما سالفة التواقيع
يبيله شبة ضو
ودلال
وفرش نتكي عليه



وسلامتكم جميع

[نفل]

السلام عليكم ورحمة الله وبركاته

اخوي حفرلوجيا

مشكور على الموضوع وجزاك الله خير .
ومكشات عزيز علينا
وصدقت المقولة اللي تقول ما تحس بقيمة الشي الا عندما تفقده
وتصدق اني ادمنت على المنتدى وما عرفت الا يوم انقطع عنا:D
وجزاك اله الف الف اف خير وشكلك مدمن اكثر مني:D :D :D
اخوك ابو محمد

[al-nashmi]

Originally posted by نفل
السلام عليكم ورحمة الله وبركاته

اخوي حفرلوجيا

مشكور على الموضوع وجزاك الله خير .
ومكشات عزيز علينا
وصدقت المقولة اللي تقول ما تحس بقيمة الشي الا عندما تفقده
وتصدق اني ادمنت على المنتدى وما عرفت الا يوم انقطع عنا:D
وجزاك اله الف الف اف خير وشكلك مدمن اكثر مني:D :D :D
اخوك ابو محمد

[مشغول]

اما أنا فحسيت إني يتيم

والله ماله لا يم خويك

[هواوي]

كالعاده مبدع يا حفرلوجيا

صح فيه مواضيع ودك انها تطيح من المخايب وفيه تواقيع مالها داعي واولها توقيعي ولو تامرون اشيله شلته لانها تسبب ثقل على السيرفر

عموما توقيع الاخ المبدع نفل صراحه رووووووووووووووووعه من جد والله ياني ضحقت من كل قلبي عليه

http://members.home.nl/rickvdwesten/pinguins.gif

نفل والله يا ذا البطريق الي في التوقيع نذل نذاله والمشكله ما كنه سوى شي

[حد السيف]

فنان الكلمة الساخرة
حفرلوجيا
الله يقطع ابليس ولايعيدها من ليلة كن الواحد مطرود من بيتوة وتحوم على الشلة الايعتذر عندة مشوار واللي المعزبة مجرجرته من جرف الى مشغل الى مكتبات وصايراكثر من تساعي الابعاد واللي مابعد صحى من سكرة الدوجان بهاالبران واللي حاط على راسة قالب ثلج من ضربات الشمس وعيونهم مايقدر الواحد يصكة من كثر ماهي مبققة من تدوير الفقع
بس تبي الصدق بانتة معزة مكشات ومكانتة الله يدمة لنا ويديمنا لة


محبك اخيك
حد السيف

[مكشات]

على أحد الطرق وقفنا للصلاة في مسجد صغير ..
وإذا بأحد المسافرين داخل المسجد وكأنه ينتظر أحدا ليصليها جماعة ..
ما أن دخلنا للمسجد إلا والرجل يقف ويقيم للصلاة .. فصففنا خلفه أنا ومن معي ..
تلك الصلاة لم يكن فيها أي معنى للطمأنينة ، لم نستطع قراءة اي شيء فيها .. بل وصل الأمر لدرجة انه يركع ويرفع من الركوع قبل أن نركع :(
أدركت ساعتها أن هذه الصلاة لابد أن تعاد بعد ذلك ..
ولا أدري كيف تخيلت الوضع ورسمته تلك اللحظة ، كاننا راكبون في حوض سيارة مسرعة في صحراء كلها مطبات وإلتواءات .. تقذفنا كيفما تشاء يمنة ويسرة وأعلى وأسفل دونما معرفة مسبقة لما سيحدث لنا ، ولا أي قدرة للوصول للسائق ومسكه من تلابيبه ووقفه عند حده ..
إنتهت صلاته وبعد مغادرته المسجد أعدناها بفضل الله ..
اليوم ( مع الأسف ) نحن جميعا في حوض تلك السيارة .. الفرق هذه المرة ... أن معنا في حوضها كثيرا من الأحمال الزائدة - التي تكرمت بالإشارة إليها اخي الغالي حفرولوجيا - التي لم نتمكن من إتقاء ضررها ولا الإلقاء بها ..
لكننا سنضل في محاولاتنا إن شاء الله حتى نصل لمقودها ونتحكم فيها ..
حينذاك سيكون لنا وقفة لا أشك بانها ستسر الغيورين منكم إن شاء الله ..
تحياتي للجميع

[الطبيب]

يوم(ن) عيا المنتدى لا يفتح وكنت ناوي انزل موضوع بخاطري من زمان وتعبان عليه وفيه صور ولي فتره اعيد وازيد فيه

ويوم(ن) اني انصدمت بوضع المنتدى هونت من الموضوع كله ومع حموضة الزعل واحذف الموضوع من الجهاز بطريق الخطأ

واقعد اتحلطم واسب وبغيت اكسر الجهاز

واخيرا لقيت الحل

كلمت لي واحد من الشباب وتخانقت انا واياه وطلعت اللي بقلبي من مكشات عليه

واخيرا بعد مارجع مكشات لطبيعته ( وخفت عليه الوعكه الاليكترونيه )

اخذت لي كم جرعه تعوض اللي راح كله

===============
وتروني بلشت بالتوقيع وآخر شي شلته احسن

كله من جرعة ( حفرلوجيه ) مركزه ظربت بالمخ وهدت الاعصاب

هذا والله اعلم

والسلام ختام

[مراكي الذيب]

الله يعطيك العافيه اخوي حفرلوجيا.

الانترنت ماتنفع بدون مكشات , والكمال لله !!!!!! حسيت ان الكهرباء طافيه


لكن الحقيقه فقدته لواني مشغول هالايام والاسابيع والاشهر القادمه:D بس اهم شي يكون موجود اذا بغيت مكشات لقيت النشاما .


بالنسبه للكم والكيف والتواقيع لاتنسوا ان الاعضاء وصلوا 6000 يعني اصابعك ماهي سوى لكن يجب النصح فيمابيننا ويكون المسلم مرأت اخوه المسلم .... بالنسبه لي ودي يكون مكشات من ارقى وافضل المنتديات في العالم حتى لوتتطلب الامر الى المشاركه بالمال بأن يدفع كل عضو مبلغ وقدره؟؟؟؟؟. حتى نضمن استمرار هذا الكيان الغالي علينا جميعا ولااحد ينكر انه استفاد يوما من الايام بفائده لاتقدر بثمن.


وشكرا للجميع

:good: :good:

[حفرلوجيا]

الأخوان : كشات , نفل , al-nashmi , مشغول , هواوي , حد السيف , الطبيب , مراكي الذيب : أشكركم جميعا وواضح أنكم ( عينة ) راقية تمثلون إخوانكم المكشاتيين المنتمين لهذا المنتدى في مشاعركم وإهتمامكم بهذا المنتدى والمنتمين إليه؟ .. أما التواقيع فأحولكم على ماقال عليها أخوي ( المأنتك .. الذي يتواضع بسخريته وطرافته دائما ويخفي أنه العارف بكثير من الأمور .. أخوي كشات .. قال :
(يبيله شبة ضو
ودلال
وفرش نتكي عليه) ..

أخوي الريس مكشات : شكرا .. ويابيي زين اللي أعدتوا صلاتكم .. وهذا يدل على حرصكم أن ( أعمالكم ) تكون نقية مما قد يخالطها من شك ..
وترى – مما لايخفاك - الإطلاع على الردود السابقة من المكشاتيين ذولا والبقية تخلينا نثق إن حوض السيارة الونيت يبي يصير ( همر ) أو صالون طلبيه .
لكن إذا تذكرنا أبو تركي وبقية المشرفين قلنا : اننا مرتاحين معشر الأعضاء .. وإن ماعنكم وعن الهمر بدل هالحوض اللي نبيه و لو هو كسرة سيارة ..:good:

[السمح]

يعطيك ألف عافية أبوسليمان على هالتذكير اللي فعلاً جا في وقته .
وترى الونيت اللي كلنا راكبين في حوضه ، ووصفه لك أبوياسر كنت موجوداً فيه لكن الله لا يوريك .. السواق جيد لكن الونيت له صجه ولجه وقربعة واللي بالحوض صاروا تقل حبات قهوة بمحماسة ، واللي زاد المشكلة إننا اكتشفنا بالحوض لصاتك قديمة وقطعة سستة ما لها سنع وابريق بدون غطا وأشياء أخرى نسيتها لكن الوكاد إنها مع هالطريق قامت تصبخ بالركاب ، قال السواق ما لنا إلا نتخلص منها أحسن من إنها توذيكم وتجرحكم .
لو إن هالونيت صار همر ياعيوني مثل ما تبي صدقني بيرجع ويصير مثل ونيتنا الأول إلا إذا وكلنا عليه ناس - ولا هوب أي ناس - وقلنا لهم تكفون ترانا شراكة في هالهمر انتبهوا له لا يلعبون فيه البزران أكييييد بيصير همر مثل ما تبي ومثل ما أبي أنا والثاني والثالث .
الله يرضى عليك ورسالتك وصلت ، سواء الخاصة أو المضمنة في هذه المشاركة الحلوة والخفيفة بخفة نفس أوسليمان .

أحلى تحية

[المربد]

ما برّد حرة انقطاع المنتدى الا موضوعك هذا ، تسلم يمناك يا بو سليمان...!!!

[حفرلوجيا]

اخونا السمح :هلا بك وغلا .. ووصفك وأنت بالرحلة خلاني أعيد النظر .. بريق بدون غطاء :confused:.. سسته :no:.. هذي ( بلشة ) .. لذلك هذا إعلان ( شخصي ) :
يعلن أخوكم حفرلوجيا إنه بريء من أي مخالفة فنية أو موضوعية في ( مشاركاته ) ارتكبتها بدون قصد ( خاصة مايتعلق بما حملته من صور ) .. وأطالب ادارة المنتدى بسحبها وحلتها من ( حوض الونيت ) .. وهذا إخلاء مسؤلية لو ( أنفلق أحد ):p .. وإن لقيتوا بأغراضي ( بريق بدون غطاء ) :mad: احلتوه على أقرب راعي..

أخوي المربد : شكرا .. ومن قال يسلم .. ياغالي .. والله لايعيد الإنقطاع .