لغز طازج من الفرن ( 2 )...,,,,,,(اللغز محلول),,,,,,(صاحب الحل:ابو ماجد2)

[راع الصقلاويه]

السلام عليكم :

حيا الله النشاما , استلموا يالربع :


أنشدك عن رجلين في ظهر رجال = مصيرهم مترابط ٍ مع مصيره

من دونهم يشغِـل ولا يستر الحال = وإن قصَّر حداهم مايقصِّـر قصيره

يجون بالدنيا على الوان واشكال = عشرة ستر بين العشير وعشيره

[ابو ماجد 2]

صح لسانك
ممكن حجري الكاشف

[حسين2006]

هلا والله براعي اللغز
.
برمع وعلى الله
.
بلوف المكينة

[راع الصقلاويه]

صحت ابدانكم , ابو ماجد وحسين

رمعتين طيبات من لحي غانمه

بيض الله وجيهكم , ومالكم لوا .

ليس هذا حل اللغز .

[torrjom]

صح السانك راع الصقلاويه
البيت الثاني (يشغل) يعني (يشتغل) المقصود

[راع الصقلاويه]

صح السانك راع الصقلاويه
البيت الثاني (يشغل) يعني (يشتغل) المقصود



صح بدنك اخوي طرجم

المقصود : يشغل راعيه ويتعبه بالتفكيروبذل الجهد.

[torrjom]

نقول الزفلت والخطوط اللى فيه

[قريب الدار]

موس الحلاقة المزدوج

[ابو ماجد 2]

السلام عليكم
محاوله
وش رايك بالتاريخ الهجري والميلادي على المنتج وبالذات المواد الغذائيه

[فهد الهلالي]

صح السانك اخوي راع الصقلاويه
والله يمسيك بالخير
رمعه
لو اني مع رمعه قريب الدار موس الحلاقه
ولكن محاوله اخرى
مايكون البرشوت الكبير والاحتياطي في ظهر المظلي
ومصير الرجال مرتبط بالبرشوتات الاثنين
تحياتي لك

[راع الصقلاويه]

اخوي طرجم : مالك لوا يالغالي .

اخوي قريب الدار : مالك لوا يالغالي .

اخوي ابوماجد :وعليكم السلام : مالك لوا يابعدي .

الشيخ مسكين : صح بدنك , ومسيت بالرضا والسرور

ومالك لوا يابعد حيي .

[فهد الهلالي]

مايكون الاكسجين على ظهر الغواص تحياتي

[راع الصقلاويه]

مايكون الاكسجين على ظهر الغواص تحياتي



مالك لوا ياخلف جدِّي = أبعدت بالحيل يالغالي

الحل ماهو بمتعدي = بالبيت ياطيب الفال ِ

بيحت ياصاحبي سدي = ارفق علي يابعد حالي :D

قدام عينك مهو مصدي = عيالك تعرفه مع عيالي


وش تبي أكثر من كذا توضيح ياالغالي :)

[النبقي]

اخوي
راع الصقلاويه
صح لسانك يالغالي
وخذ الرمعة الله يسلمك
( البليستيشن )
تحياتي لك
اخـــوك
النبقي

[خالد ماغير]

مساك الله بالخير وصح لسانك ياراع الصقلاوية
انا اقول ازرار الماوس (الفارة).وشكرا

[راع الصقلاويه]

اخوي : النبقي

صح بدنك يالغالي

مالك لوا يابعدي .


اخوي : خالد ماغير

مساك الله بالنور والسعادة والرضا

صح بدنك يابعدي , ومالك لوا يالغالي .

[ابو ماجد 2]

السلام عليكم
محاوله
قدر الضغط والاثنين البلف وبلف الامان ولا تسكر البلف اشتغل بلف الامان
تحيتي لك

[المكشات]

صح لسانك يا راع الصقلاوية ..

رمعة على الطاير ..( الستاير - ستارة البيت )

[راع الصقلاويه]

اخوي ابوماجد

وعليكم السلام ورحمة الله وبركاته

ومالك لوا , وترا حسابك بدا يثقل :D

حياك الله يابعدي .


أخوي المكشات

صح بدنك ولاهنت

مالك لوا يالغالي لم توفق للحل .


حياكم الله .

[قريب الدار]

محاولة اخرى
رمعتين:
انتل التلفزيون
او انه البنطلون
وسلامتك وطولة عمرك

[راع الصقلاويه]

اخوي قريب الدار

سلمت وغنمت الله يحفظك

ماشاء الله عليك لاقوة إلا بالله وسيع صدر

صدقني بغيت افطس من الضحك يوم شفت البنطلون :D

يعني ماهنا ترابط بينه وبين انتل التلفزيون

رمعاتك غلط يابعدي , حاول مرة اخرى .

[المكشات]

رمعة

يصير حلق الباب و الدرفتين حقة الباب

[torrjom]

هحاوله

مادام رمعة اخوي ابو ماجد القدر الكاتم والبلوف ماركبت
اجل خذ رمعه موليه

الكبريت وجنوب الكبريت اللى تولعه

[راع الصقلاويه]

رمعة

يصير حلق الباب و الدرفتين حقة الباب



ياعنك انك خطير بس لو تدقق

لكن لاتبعد .

[راع الصقلاويه]

هحاوله

مادام رمعة اخوي ابو ماجد القدر الكاتم والبلوف ماركبت
اجل خذ رمعه موليه

الكبريت وجنوب الكبريت اللى تولعه



هههههههههههههههههههههههههه

خلك تستاهل فحط لين تدوخ مثل ماخليتني افحط

لين تفجرت الكفرات عند لغزك .

تسلم لي يالغالي .

[خالد ماغير]

الغاز طال عمرك,المحالة +الساعة حقت الغاز

[ابو ماجد 2]

السلام عليكم
ممكن قفل الباب والسقاط لزيادة تامين قفل الباب
تحيتي لك

[راع الصقلاويه]

الغاز طال عمرك,المحالة +الساعة حقت الغاز



وعمرك يالغالي , مالك لوا .

[راع الصقلاويه]

السلام عليكم
ممكن قفل الباب والسقاط لزيادة تامين قفل الباب
تحيتي لك



وعليكم السلام ورحمة الله وبركاته

أحسنت يابوماجد , ماشاء الله عليك

نعم هذا هو الحل بارك الله فيك .