ياشباب أنا الآن في الرياض أين أذهب ..؟؟

[عمر - الأفلاج]

السلام عليكم
كيف حالكم
ياجماعه الربع الان نحن في الرياض نبي تدلونا على مكان وسييل طيب حول الرياض
الله لايهينكم يارب

[الخافت]

عليك بالطوقي

[ذيب طي]

والله ياخوي احسن ماعندك ,شمال الرياض ,, شعبانه رويانه ولله الحمد

[ولد عبدالله]

طيب وانا اخوك عدة اماكن حول الرياض

- للعوائل :

انا انصحك بشعيب الجفير:
وصفه : نزلة القديه وبعد ماتنزل من القديه يجك مفرق قصور ال مقبل تفرق معاه
وتمشي شوي ويجيك مفرق على االيمين تفرق معه وتمشي تقريبا 50 كيلو وتوقف في الشعيب
هجره الجفير نظيف ومااحد يجيه الا العوايل

- والا عندك انك تمشي مع خط الشرقيه اذا كنت من اهل شرق الرياض واذا جت محطة خرام على يسارك بعدها يجيك مفرق يمين تفرق معاه وتمشي شوي ويجيك شعيب على يمينك .. كويس للعوايل !!


واذا كنت عزابي

فلا اوصيك تمسك خط الثمامه وتخلي محطة خزام على اليسار وتمشي لين يجيك مفرق الطوقي على اليمين تفرق معاه ( طبعا بعد التفتيش ) مافيه الاهو
وتمشي يروح بك الخط يسار وتمشي لين يجيك دوار الحفينه ( ان بغيت تروح يسار )
عندك شعيب الحفنه.

او تمشي سيده مع الدوار يجيك شعيب الطيري بعدها على اليسار ولوحته باينه وحلو جدا جدا


او تمشي سيده لين يجيك دوار العتش
وتختار بعدها تبي النفوذ رح للوحه الصمان والنفوذ على اليمين واليسار
او التنهات وتطببك علة الفيضه
او العتش ويجيك شعيب العتش


وانا تحت امرك ان بعيت اكثر وصف وتحياتي والله يوفقك بكشته ممتعه
وانا واله في امريكا والا والله النفس تبي الكشتع عندكم .. ياليتني عندكم ..

[عمر - الأفلاج]

جزاكم الله خير وماقصرت ولد عبد الله على الشرح الوافي ولاهنت

[ناصح]

حياك الله يا أخي الغالي

أي مكان شمال وشمال غرب أو شمال شرق تجده سايل بإذن الله

المهم لا تتوقع ربيع فلازال الوقت مبكرا

لكن أحذر من خطر الأودية وأحذر من التعمق في الصحراء والغراز في الطين ..

وتروح وترجع بالسلامة

[ابو الشباب3]

اخوي عندك شمال الرياض شعيب دقله ماشي السيل فيه امس او بغيت شعيب حريملاء ممتاز ماشي السيل فيه حتى بعد العشاء البارح او شعيب عبيثران نفس الشي ماشي لحد علمي انه ماشي حتى بعد صلاة العشاء بوقت امس الاثنين 5/11/1429هـ الله يوافق لكشته طيبه وممتعه استغفر الله واتوب اليه

[الذويبي]

اخوي عمرالله يحييك تعال عندنا في جده وتشوف الجو اليوم (شي خيالي)
غيوم وامطار ربيع ودرجة الحرارة فوق الثلاثين درجة يعني تخلي ملابس البرد عندك وتجي بثوبك

والله يحييك