سؤال عن الدله الهاجره

[البر بريرة]

الأخوه الأعضاء

تحيه طيبه ،،،

أولاً نبارك لكم هذه الأمطار الطيبه جعلها الله امطار خير وبركه


سؤالي بشأن الدله الهاجره عندي دله طيبه جدأ وعلى كيفكم ولها مده طويله في شنطة العزبه وهجرت

وش افضل طريقه لحل هذه المشكله

انا وضعت بها عويدي و هيل مع مويه وتركته يغلي وما ادري اذا فيه طريقه ثانيه

ولكم منا جزيل الشكر

[بواسامه]

ربها عند رباب
عشان تتمتع بطعم القهوة الصح
والربيع قدامك والكشتات والفله
فلا تتردد في ربها
وفقك الله

[البر بريرة]

مشكور يالغالي بو اسامه

بس وين اللي يربون الدلال معاد نشوفهم زي اول

اذا تعرف احد شمال الرياض

[أخو هدلى]

انا مجرب يالغالي ابد حط فيها شوي قهوة وخلها تطبخ ثلث ساعة أو نصف ساعة

طبعا وانت ماليها كلها وماعليك الا العافية , وتطلعلك إنما إيه .....

[البر بريرة]

مشكور أخو هدلى

بيض الله وجهك

[abumesfer]

دوا غسيل +صابون ثم بعد ذلك ضعها على النار حتى تغلى ثم نضفها ثم ضع قليل من القهوه والهيل والعويدي وخليها تغلي ربع ساعه واذامنفع فعليك ان تربها وشكرا لك مجرب

[البر بريرة]

مشكور أخوي abumesfer (http://www.mekshat.com/vb/member.php?u=95980)

الله يعطيك العافية

[ابوفهيدان]

اللبر بريرة
اذا هي مطعمة يعني تسبب طعمة بالقهوة او تحس بملوحه بالطعم
لازم تربها والافضل تربها مرة وحدة
وسالفة حط عويدي فيها هاذي الله يسلمك تحطه بها اذا انت بتخزنها او ماراح تستخدمها مدة طويلة

وبعدين الرب للدلال القديمة اما اذا هي من حقات السيف مايحتاج تربها نظفها عدل واطبخ بها قهوة مدة طويلة وكبها

[البر بريرة]

الله يوفقك أخوي ابو فهيدان

جزاك الله الف خير

[الدهاس]

اذا كانت ملبسه من داخل فلا تحتاج الى رب واما اذا كانت نحاس فعليك ربها وتجد الحين محلات معاد فيه ربابين مثل اول يعني قلو اهل السيارات اللي يربون

[البر بريرة]

مشكور اخوي دهاس

[ابن مسعوده]

افضل شي أنك تربه
ابوصفلك محل للنحاس يرب الدلال ممتاز جداً مقابل مبنى المعيقيليه الغربي الجنوبي من جهت الغرب

[سرهيد]

السلام عليكم

انا عني افوح فيها ماء مع شاي ورق لمدة نصف ساعة او ساعة وتروح الهجرة

بعض الاخوان يقول فوح فيها ماء مع ملح وما جربت

تقبل احترامي

[دغيم1]

السلام عليكم ورحمة الله وبركاته
حياك الله أخوي
بالنسبة للدلة الهاجرة
إذا هي ستيل فلا تحتاج إلى رب .
أما إذا كانت نحاس فهي تحتاج إلى رب
وتجد مثل هذه المحلات كمكا ذكر أخي ابو عبد الله
مقابل المعيقلية من جهة الغرب
أو تجد في سوق الزل بالديرة
وفي حال عدم وجود محل لرب الدلال
فعليك بتنظيفها بالماء الدافىء وقليل من الكلوركس ثم بعد ذلك تضع فيها الماء وقهوة وتجعلها تطبخ مع عدم ملء الدلة كاملا .
تحياتي

[البر بريرة]

مشكورين

الله يعطيكم الف عافيه

مع تمنياتي لكم بكشتات موفقه

[ebnjala]

السلام عليكم

انا عني افوح فيها ماء مع شاي ورق لمدة نصف ساعة او ساعة وتروح الهجرة

بعض الاخوان يقول فوح فيها ماء مع ملح وما جربت

تقبل احترامي

نفس طريقة امي جعلها في الجنه

[سرهيد]

نفس طريقة امي جعلها في الجنه

يا جعلها للجنة آمين

هذا يعني ان الطريقة مجربة من قديم

الله يجمعك بامك آمين

تقبل احترامي

[البر بريرة]

نفس طريقة امي جعلها في الجنه



الله يغفر لوالدتك والدتي ويجمعنا وأياهم بجنات النعيم

مشكو يالغالي على المرور

[الشنه]

اطبخ فيها خل وخله يغلي
ثم اطبخ فيها مويه وعويدي او مسمار او قرفه
وثقلها
وكرر مره ثانيه
وان شاء الله تضبط

[البر بريرة]

مشككور أخوي الشنه

[الشقردي]

سالفة الشاهي هي الصح والمجربة مع دلال السيف الستيل
وعلى ما قالوا ما تحتاج رب

أما الثانيات النحاسية أتصور زي ما قالوا الشباب تحتاج رب.

[البر بريرة]

مشكور أخوي الشقردي