امس بالصمان ستر الله على ( النسوان ) عندما قال السلاح كلمته بـ( الصور )

[حفرلوجيا]

سلام يالربع

في رحلة للصمان مع أصحاب منذ الأربعاء حتى اليوم الجمعة صادفنا موقف تعرضن له مجموعة من النساء .. توقفت أنا وأصحابي عنده كثيرا بحيث صارت تفاصيله تسيطر على حواراتنا أغلب أوقات الرحلة ..
كما أن مطوعنا في الرحلة اضطر لتسليم سلاحه لشخص لايعرفه .. في موقف رجولي كان له الأثر في مزيد من الإحترام للمطوع .

أسمحوا لي بوصف على عجالة لرحلتنا ثم أوضح لكم الموقف

بعد ظهر الأربعاء الماضي ذهبت مع أصحاب للنزهة والكشتة من الرياض للصمان وعودتنا كانت مساء اليوم الجمعة , مررنا على عدة فياض وخباري وجيان في أنحاء متفرقة من الصمان منها ( ريطي , حسناء , حاكم , البخرا , الخمره , البحر .. وغيرها ) .. العشب والربيع أتركه للصور.

شاب مع ( أخواته ) مضيع أهله قبل الليل

كنا في فيضة شمال روضة حسناء السبق وقبل الحاصبيات يوم الخميس , أقبل مع وقت صلاة المغرب ونيت غمارتين محمل ( نساء ) و وقف غير بعيد ونزل السائق ( الرجل الوحيد في السيارة ) وهو شاب في أول العشرينات .. بدت عليه علامات الإرتباك والتوجس واضحة .. وبعد السلام طلب إستخدام جهاز الإتصال اللاسلكي يقول ضيعت أخوي وأهلي ومعهم جهاز ابنادي عليهم !

رافقه واحد من الشلة للسيارة وسلمه ( ريشة الكنوود ) وينادي ( ...... , ...... ) ويكرر وواضح أنه يكاد يبكي .. ولا أحد يجيب غير ( التريقات اللي تخبرونها من بعض قليلي الحياء للأسف) .

تأثرنا من تأثرة وتحلقنا حوله وبدت الأسئلة .. وأتذكر ان ملامحه وتقاطيع وجهه ليست غريبة علي .. سألته : أنت ولد الـ( ..... ) , صعق ولاحظت أن مشاعره اختلطت بين الرجاء والذهول .. ولم تكن شطارة مني بقدر ماهي معرفة بكثير من أفراد هذه العائلة التي يتميز الأخوة فيها بالتشابه الكبير جدا .. وهم يسكنون أحد مدن شمال شرق المملكة .. كان لي سابق إقامة فيها.

الموقف الآن ( مضيع سيارتهم الثانية اللي فيها أخوه الكبير وامه وأخوانه الصغار .. ويقول إني وقفت على شان أحدى ( أخواتي ) قالت وقف نسينا الترامس .. وتصورت أن رجعتي لن تستغرق دقيقة في الوقت الذي كنت اراقب سيارة أخوي الكبير وهي تتحرك وبعد مارجعت ماأدري وين سيارة أخوي وصرت أدور واضرب بوري ( يبدو أن الإرتباك ضيعه ويمكنه أخذ اتجاه مختلف ) ..

واستوضحنا منه وتبين انه معتمد على أن يتبع أخوه ( الدليلة ) ولا معه لاجهاز إتصال ولا جي بي إس .. وجايين من فجر الخميس وراجعين لديرتهم ( حوالي 150 كم شمالا ) .. تداولنا وكنا نرى الحل السليم أولا محاولة ان يعود لمحل كشتتهم وكان يتبعه اثنين من الشلة بسيارة لنا.. رجعوا بعد نصف ساعة بخفي حنين ( ليل وخوف وين يبي يدل الولد ) ..

تداولنا مرة أخرى وإتفقنا على أن يغادر الآن وبسرعة لديرتهم مباشرة.. بنفس الوقت يأخذ أحدنا جولة بالسيارة وينادي بالجهاز ( نداء أخوه فقط ) دون الإعلان عن وضعهم .. لأن عيال الـ( .... ) قد يسمعون وتسول لهم أنفسهم مالا تحمد عقباه تجاه النسوان .. على ان صاحب المهمة ( يكبس ) بأنوار السيارة بكل اتجاه لعله يجد أخوه ليخبره ..

مطوع معنا أصر بعد أن سلم ( الولد ) جهاز قارمن .. وقال للولد الضايع اتبعني حتى أوصلك لاقرب نقطة بالطريق المزفلت الذي يتفرع من المدينة العسكرية بحفر الباطن ( يسمى طريق السفانية ) .. وعلى شان يبث الطمأنينة في نفس ( المسكين ) قال خذ هذا المسدس مليان خله معك حتى نوصل الأسفلت ..

وضحت على الولد ملامح الخجل ولكنه أصبح أقل إرتباكا وهو يستلم المسدس ويتبع سيارة المطوع يرافقه آخر من الشلة..

بعد ساعة تقريبا رجع رفيقنا الذي تولى مهمة الدوران والمنادة والتكبيس بالأنوار مفيدا أنه لم يجد مستجيبا..

بعد أربع ساعات او أكثر وقبل النوم رجع مطوعنا ومرافقه الذي أوصلهم للإسفلت ويقول عندما وقفت لأستلم منه ( المسدس والقارمن ) كنت أسمع النساء بالسيارة مابين دعاء وبكاء ( ماينلامن ) ..

بقي أن أقول انني لم أستطع إخفاء انني سألت الولد وقتها ليش جيتو لكل هالبعد ؟ .. وقال كنا ناوين نكشت بالحاصبيات ( وهي قريبة منهم وطريقها معروف لأكثر أهل تلك المدينة الذين يكشتون بعوائلهم بها ) .. ولكن أخوي غير رايه بعد ماسمع بالإجهزة ان الحاصبيات كلها محمية ..

وأترك لكم الحكم على هذا الأخ وتصرفاته والموقف برمته .

للمعلومية : لم أقاوم رغبة في الإتصال في أول منطقة تغطية الجوال اليوم ببعض الأصحاب في تلك المدينة الذين كنت أتوقع أن يعرفوا أخبار العائلة .. تأكدنا ان الولد ( المضيع ) وأخوه الكبير اللي كان كاشت معه موجودين ببيتهم .. إذن الوضع ( سلامات : لكن ماندري كيف التفاصيل ) .

القصة حقيقية حدثت يوم أمس بالصمان..

----------------------- يتبع ........ ( حديث الصور ) ..

[الخبير]

ما قصرتوا والله
وهذي شئ متعودينه منكم ومن كل الكشاته.

والحمد لله على السلامة

[حفرلوجيا]

أخوي الخبير : شكرا .. وجزاك الله خير

الجزء قبل الأخير

1- إطار ( سدر شوب ) .. في روضة البحر التي تذكرت فيها ربيع 1418 هـ

http://www.mekshat.com/pix/upload/images4/y-20-2 008.jpg


2- لقطة أخرى للبحر ..

http://www.mekshat.com/pix/upload/images4/y-20-2 023.jpg


3- حاكم .... الخيار رقم 2 لو بغيت اكشت..

http://www.mekshat.com/pix/upload/images4/y-20-2 019.jpg


4- روضة البخرا .. واحدة من أكبر رياض الصمان ..

http://www.mekshat.com/pix/upload/images4/y-20-2 012.jpg


5- خبرا ليست بعيدة عن نهاية الأسفلت ( سابقا ك 26 كم تقريبا ) ولا أذكر اسمها وإحداثيها .... تميزت بأن النفل والحرف ( رشاد البر والبابونج ) يمثل 90% تقريبا منها ..

http://www.mekshat.com/pix/upload/images4/y-20-2 01355.jpg



--------------- ---------------------- يتبع ......... ( الصيد )

[راع الكحيلة]

موقف رجولي وشهم منك ومن خوياك

وبالنسبة لقصة السلاح والمطوع ذكرتني بقصة مشابهة ذكرها لي أحد الأخوة

أنه عندما كان يتقنص هو ويا قرايبه الصغار شافوا لهم منظر غريب......

شافوا فتاتين مرتبكتان و تلوحان بإيديهما للسيارة وعندما اقتربت سيارة صاحبنا منهما ورأت الفتاتان أن السيارة سيارة شباب هربت واحدة منهن وصارت تنادي على خويتها لتتبعها ولكنها خويتها تجلدت وتشجعت ووقفت مكانها حتى وقف صاحبنا بسيارته بالقرب منها

وأخذ يلح عليها أن تجيبه عن سبب وقوفهما هنا في الصحراء وما قصتهما فأخبرته أنها هي واختها وعجوزهما كانوا برفقة أخوهما وقد انقلبت السيارة وانحشرت رجل اخيهما تحت الجيب ويبدو أنها كسرت
وعندها صاح عليها أن ترافقه إلى مكان الحادث لإسعاف أخوها ولكنها خافت وأبت

فما كان منه إلا أن أنزل الشوزن وأعطاها البنت وطلب منها الركوب في الخلف وأن تضع السلاح موجها إلى رأسه حتى تطمئن.

وكان الله لطيفا بعباده وانتهت القصة بسلام والحمدلله.

والحمدلله أن أمتنا لا زال فيها الخير الكثير
مثل ذاك المطوع وابو سليمان وقصة صاحبنا هذا

[حفرلوجيا]

أخوي راع الكحيلة : شكرا .. ونحمد الله أن الأجواد وأهل الخير ... كثر والحمد لله ..
أللهم احفظ نساء المسلمين .

-------------------------- الجزء الثالث -----------------

وهذا صيد كان للكاميرة


6- صابر

http://www.mekshat.com/pix/upload/images4/y-20-2 010.jpg


7- صبر

http://www.mekshat.com/pix/upload/images4/y-20-2 022.jpg


8- صابرين ... ( كابوريا )

http://www.mekshat.com/pix/upload/images4/y-20-2 005.jpg


9- صبري

http://www.mekshat.com/pix/upload/images4/y-20-2 024.jpg


10- في ... حسنا .. كان عابر طريق ......

http://www.mekshat.com/pix/upload/images4/y-20-2 014.jpg

والملاحظة المزعجة أن روضة حسناء .. تشكل خطوط وطرق السيارات داخلها ( أكثر من نصف مساحتها !!)

11- أكل .... او رقص ؟؟

http://www.mekshat.com/pix/upload/images4/y-20-2 006.jpg

12 - الطرثوث .. كتبوا عنه في مكشات مؤخرا

http://www.mekshat.com/pix/upload/images4/y-20-2 016.jpg

وسلامتكم... انتهى

[السمح]

الحمد لله على السلامة أبوسليمان وأجعلها سلامة دايمة إن شاء الله
وتدري إن هالشاب المسكين وفقه الله بناس طيبين وساعدوه ، وإلا كان علوم الله يستر
ومرة أخرى مهما كان الإنسان يعرف المنطقة نقول يجب أخذ الاحتياطات من سلاح وأجهزة
أذكر إني مرة قرأت إنه في أستراليا يتعرض الخارج إلى البراري إلى العقاب إذا لم يحمل جهاز نداء
الآن وبعد هذه القصة جهاز نداء وجهاز ملاحة أصبحت من الضروريات ، وليست مجرد ترف كشتة

الصور رائعة وجميلة ، وأعجبني كثيراً قسم الصيد وبما حواه من صور الصبر .. حتى الصبري
ولكني أعتقد إنه بلبل وليس صبري .. وهما بالمناسبة متشابهان جداً

مشكور أخوي حفرلوجيا ، وعسى الله يخليك

أحلى تحية

[الطبيب]

ولي عوده ان شاء الله

[ريع الدياب]

بسم الله الرحمن الرحيم
السلام عليكم ورحمة الله وبركاته

الأخ حفرولوجيا

أحسنت أنت وأصحابك ومطوعكم النشمى
وهل هذا مستغرب؟ هل كان يجب عمل شئ غير ما عملتوا؟
الحمد لله أن الدنيا مازالت بخير وأن الأغلبية العظمى ممن يطلع للبر
هو شرواكم وأن عيال ال(.......) ليسوا الا أقلية ومن أجل هذه الأقلية
أوافق مع أخى السمح (مهما كان الإنسان يعرف المنطقة نقول يجب
أخذ الاحتياطات من سلاح وأجهزة)

وما أقول الا جزاكم الله خير على عمل الواجب

تحية وتقدير

على فكرة الصور جميلة بالحيل لكن ويش قصة الكلب الى بين الولد وصابر فى صورة 6

[المربد]

مسألة غريــبـــة هالسنة لاحظت كثرة النسوان الكواشيت بالصمان؟؟؟ يمكن علشان وصول الاسفلت وسهولة الوصول كان له اثر.

اما انت ومن يخاويك يا بو سليمان فما اظن يطلع منكم غير هالتصرف واحسن.

صور جميلة جدا ومصور محترف، ان كان انت المصور فاقول لك، باقي لك شوي وتغطي على اخونا نفل...

ثم ما شاء الله عليك ما مداك رجعت من البر الا ورحت للجهاز تـنـزل هالصور والموضوع، ان دل على شيء انما يدل على اهتمامك بالمنتدى...

[عروان]

بيض الله وجيهكم أخوي حفرلوجيا

ما قصرتو سترتو على محارم المسلم وطمنتوهم في وقت يمكن يكون من أصعب الاوقات اللي مرو فيها.

وتأكد انهم كل ما ذكرو السالفة بيدعون لكم جميع.


بارك الله فيكم وكثر الله من أمثالكم


تحياتي لكم

[القماري]

صور روعة ياحفرلوجيا ....
بس السالفة إلي قبل الصور ضيعت نكهة الصور ... بصراحة أنا شفقت على المسكين وأهله والحمد لله أن أخوه وصل البيت وماضاع وسط البراري وجزاكم الله ألف خير
بس عندي سؤال ( وش سالفة - رفيقنا الذي تولى مهمة الدوران ) لماذا لم يكن البحث جماعي ؟
وألف تحية لأبو سليمان وأخوياه

[صفوان]

عليكم السلام ورحمة الله وبركاته.. وبعد

الأخ/ حفرلوجيا

اشتقنا لسواليفك الشيقة.. وانت ما تجوز عن مغامراتك والغشمرة (المزاح)!:)

الحمدلله على السلامة.. ورحلة موفقة.

وياليت شلتو الحمل شوي عن صابر ونصحتو راعيه صبيري لا يشد عليه فوق طاقته.. نظرة حزينة تبي الفزعة.. بس وين!:(

وجزاكم الله خير على فزعة الاهيلي.:good:

صفوان

[ذيب البر]

السلام عليكم ورحمة الله وبركاته



رحلة موفقة والله لا يحرمكم الأجر وزي ماقال السمح وفقه الله بناس طيبين

والصور روعة

تحيااااااااااااااااااااااااااااتي

[* ضب *]

الحمد لله الدنيا بخير
والناس النشاما الطيبين واجد
ومايضيع شي
يقول الرسول صلي الله عليه وسلم
(من فرج على مسلم كربة فرج الله عنه كربة يوم القيامه)
وابشرو بالخير

[مهند]

تم الاطلاع :good:

يرفع مع الشكر والتقدير:D :D

[نفل]

السلام عليكم ورحمة الله وبركاته

اخوي ابو سليمان

اولا الحمد لله على السلامة

ومشكور وما قصرت على سردك للحدث اللي صادفكم واللي حصل للعائلة مشكلة تتكر مع كل موسم
وياليت الناس تعتبر من هذه القصص الواقعية واشكر لكم شهامتكم والحمد لله ان الولد ما استعان
بعد الله الا بكم ولا طاح بأحد هالسقيط والا كان علوم .

وتوني ادري ان متعاون مع :alarm: :redcar::D

ومشكور وجزاك الله الف الف الف خير على الصور واخبار الربيع .

اخوي ابو سليمان
بالنسبة للفياض المصورة هي رويانة من الماء ( يعني ما عليها خوف من العطش ) ولو جيت لها بعد اسبوع
تتوقع القاها مثل الصور ؟؟؟ ....
ورضة البحر وين مكانها بصراحة شكل ربيعها من الصورة مسكت . وما خبرتنا عن الفقع والا خاشه عنا :D .

ومشكور مرة ثانية لك ولربعك على موقفكم النبيل والله يعافيكم ولا يوريكم مكروه .

اخوك ابو محمد

[aahhhh2]

السلام عليكم ورحمة الله وبركاته
اخوي جزاكم الله الف خير وجزا المطوع 100000000000000خير وانتم معه

[abos3d]

الله يجزاكم خير يا حفر لوجيا انت وربعك عزالله انكم نشامى والله انكم سويتوا فيهم خير وياليت ان عيال الـ (....) فيهم نص الي فيكم الله يفرج لكم مثل ما فرجتوا لهم

[الهرش]

والله يا اخوان هذا هو الاصل اللي متعودين علية الشهامة والفزعات وتشكرون وجزاكم الله خير

[العنكبوت]

الله لايحرمكم اجركم ابو سليمان انت وربعك
والحق انكم احسنتم التصرف
واوافق الاخ القماري لو انك قسمت موضوع
القصه عن الصور لاني ما تطعمت بالصور

تحياتي

[عبدالعزيز الدباسي]

الحمد لله على السلامة يا ابو سليمان .

والحمد لله اللي طاحوا هالعائلة عليكم ،،، وما هي غريبة اذا كانوا اخوياك مثلك وشرواك ، لا تنس تسلم عليهم واخص منهم مطوعكم .

وما شاء الله عليك حتى بالصمان تلقى احد تعرفه ;)

[المسفهل]

ألاحظ أن كشتاتك - يا أبو سليمان - ما تكون هادئة ورتيبة .. فمرة معكم فتى
مفتول العضلات يقضي على كل خكري خسيس نذل ... ومرة تنسون نصف أغراض
الكشتة ومرة تصيرون أدلاء ومرشدين في فيافي الصمان وقفاره .. فهنيئا لك هالحبنتية .

[عاشق الصفاري]

مشكور ياحفرلوجيا على الصور الرائعة ..

[الطبيب]

اولا :- ماهي غريبه الفزعه عليك وعلى اخوياك يا ابو سليمان ( ونستشف ذلك من مواضيعك )

ثانيا :- على كل كشات ان يتخذ الاحتياطات اللازمه معه ( وسبق ان تطرق لها الشباب في مواضيع اخرى )

ثالثا :- اذا كانت الكشته اكثر من سياره فلا بد ان يتفقون على طريق الرحله وخطة السير ولا مانع من وجود خطه للطوارىء في حال حدوث شيء مماثل لما حدث لهذا الشاب

رابعا :- الاجهزه اللاسلكيه من اهم المعدات في البر للاتصال مع ربعك او طلب المساعده او اسعاف شخص متورط (( اللهم عجل لنا بالسماح بها ))

خامسا :- السلاح اهم ما يجب ان يكون معك وقت السفر مع العائله (( فما بالك بالبر ))

سادسا :- من اهم واروع ما عملتم لهذا الشاب هو التهدئه من روعه وهذا مهم لكي يستأنس بكم وينجلي حاجز الخوف والترقب

سابعا :- اساس المشكله هو انه نسي حاجه تافهه ( الترامس ) ولولا ستر الله لكانت الامور تطورت الى ما لا تحمد عقباه



واخيرا وليس آخرا

الحمد لله على السلامه يا ابو سليمان وموضوع تشكر عليه وطرح راقي ( كما عودتنا ) وتوظيف رائع وراقي للكلمات والمفردات

وسلمت يمينك عندما خطت هذا الموضوع القيم والمهم واللذي يعجز عن الوصف

وتقبل خالص تحياتي القلبيه

اخوك >> اللى اكبر من الصغير

الطبيب

[الملثم]

وعليكم السلام ورحمة الله وبركاته
الله يكتب لكم أجر تفريج هم ذا المسكين وأنا من رأيي نكثر من ذكر هذه القصص ومثل القصة التي ذكرها راعي الكحيلة التي يقشعر لها الجسم فرحا وفخرا لأنها ثير في نفوس السامعين شي من التضحية والرجولة

[الجوني]

هلا بحفر(وووواااوووو)لوجيا تصدق اني انا واياك متقابلين ومتوقع اني اقابلك انت بالذات هههههههها ممكن أسألك سؤال انتم وين بيتوا يوم الخميس ليلة الجمعه ..؟

هذي صورة للكلب نفسه هو والنيبالي اللي كان معه بس اليبالي ماطلع بالصورة اما الناقه كذلك لها صورة واضنكم انتم راعيين الـ...؟؟؟ الأسود صح ولا لا
http://www.mekshat.com/pix/upload/images4/hafr.jpg

[مراكي الذيب]

السلام عليكم ورحمة الله وبركاته.

الله يعطيكم العافيه وهذا من شيم العرب وماهي غريبه عليكم .

ولكن عندي تحفظ على كلمة( مطوع ) لان الناس كلهم فيهم الخير ولايقتصر هذا العمل على فئه معينه من الناس (الله يكثرهم ) لان بعض الناس اذا قرا مثل هالكلام يحس انه غير معني بهالمواقف النبيله .


والعذر والسموحه.

[صقر]

اخي حفرلوجيا:

موقف نبيل ذلك الذي وقفتموه مع هذه العائلة التائهة... ولكن

هل يستحق البر أن يعرض المرء عائلته للهلاك أو الأذى ؟

لماذا لا نأخذ الاحتياطات اللازمة...

أعتقد ان ما فيه داعي لرحلة طويلة وخطرة ... (يجوز العيد بلا حنى)..

لكن الله ستر عليهم ..


تقاريرك عن الصمان رائعة اخي ابو سليمان أحرص عليها لأن لها طعم خاص في مواضيعك فلا تبخل علينا بالتحقيقات ... ترا خبرتنا شوية بهالمنطقة الغالية جدا جدا علينا كمكشاتييييييين.

بارك الله فيك..

[حفرلوجيا]

أخونا الريس السمح الله يسمح دربه منين ماوجه : شكرا .. بس اللي ماهو بإستراليا وودك يعاقبون عليه اللي معه جهاز إتصال .. وقليل حياء .. إذ ذكر لي كشات أنه سمع طوال ليلة كاملة بالبخرا شخص مستلم ( العامة ).. وبمسمى ( مطينها ) ويتحرش بكل من يسمع صوته بإدعاء أنه سكران .. وخذ مما تقرف له الأذن من الكلام البذيء.. لذلك أشك بأن كثير من مرتادي البر يصدقون دائما ( استغاثات ) الأجهزة المستخدمة ..

ولعلك يابو تركي بخبرتك تفيدنا عما أعلن عنه قبل أكثر من سنتين عن الأجهزة التي تستخدم تقنية الأقمار الصناعية ويتم تسجيلها بكود خاص بالدفاع المدني لرصد إحداثي مكان تواجد الجهاز.. وتتم الإستغاثة على مسؤولية مالكها .

أما بخصوص ( الصبر ) .. فأزعم أن التعليق بكلمة واحدة مفتوح المعاني ..

فـ صبري ( صبر الطائر على المصور أو العكس إنتظارا له .....) .. بس والله يابو تركي قمة اللطافة والذوق يوم تقول (وهما بالمناسبة متشابهان جداً) ..
اللي بالصورة متهدلات جنحانه تقل ممثل مايعرف يلبس البشت بالمسلسلات البدوية .. ومنقارة زي المسطرة ) أما الصبري ( الجويرح ) اللي قصدته فعندي لك إقتراح بما أنك ( صقار )..
ذاك الطير شفته مره صايد ( ضب صغير ) .. ويقولون ( البصوة ) ماتفر من عنده بالشجره .. لذلك تصور إنك وقت الدخل جايب شبك مليان صباري .. وبدال التويقع وقد لاتقدي والتعب ومشاكل الأسلحة اللي تبي تلحق حتى السكتون .. تتكي بالظلال بعد ماتهد الصباري على الشجر وهات يادخل .. وبدون خسارة فشق أوتعب . . هاه وش قلت :D

تنويه : .. أبو تركي نبهني مشكورا على أن ماذكرته عن ( روضة البحر ) هي ( رديفة البخر أو البخرا) وليس ماذكرت .. وتنبيهك هذا خلاني أراجع جهازي وأطبقه على ماورد بكتاب ( الشبانات عن الصمان ) وعرفت أن جهازي أو ( غيره ;)) ناحر البطين في مسميات خباري وفياص بشمال شرق وشمال الصمان .. ولما راجعت مصدري وهو صاحبي ( راعي نطاع : اللي أحسن لكم إنكم ماتعرفونه ) قال خل عنك ( هذي أساميها يوم ضرب المشوك ) .. عاد بيني وبينك يابو تركي لقيت المشكلة أني من سنين مع ربع لي مفترة روسنا على بعض الأسامي الخاطئة ولو سويت لراسي ( فورمات ) :good: كان ضيعت ربعي .. لذلك مادام ضرب مشوك :rolleyes:.. والتنبيه من أبو تركي ( عمدتنا ) :heart:.. أبسميها ( رديفة البحر ) :p..

ولاأدري إن كانت هذه الأخطاء حصلت بسبب من كان استخرج الإحداثي بإستخدام الخريطة وقرأ ( بدل البخر : البحر ).. أو هي مسميات محلية .. لكن اللي أعرفه أن مصدري ( راعي نطاع ) لم ( ينازعني ) على المسميات إلا في شمال و شمال شرق الصمان .. يعني لو قربنا للنفود تلاشى التنازع ;)...

على أي حال آمل من آخواني هنا مراعاة تنبيه أبو تركي .. لاعدمناه.

[حفرلوجيا]

اخوي الطبيب : شكرا عاد ريس وطبيب .. الله يقويك ..ويعينك على الأعضاء ومغثة بعضهم .. بس ياويلك انتبه ترانا نشيل المشاعيب على طول ..

لكن ردك الثاني أشوفه موضوع متكامل ومستقل .. شكلك بديت تتقمص شخصية أخرى غير الطبيب ..:good::good:

أخوي ريع الدياب : شكرا .. نعم الحزابة .. وتوقع الإحتمالات السيئة والإستعداد لها مطلوب خاصة في مثل هذه الظروف .

أما قصة الكلب : ماله قصة .. لكن تعرف ان نبحة وحدة من هالكليب الصغير اللي مع الراعي تروع أبا الحصين ليلة كاملة ولا يقرب ( الرضع من الطليات ).. وصاحب الكلب هو الراعي بالصورة .

اخوي المربد : شكرا .. وبإستمرار تجامل أخوك الله يرفع قدرك .. نعم أنا المصور .. لكن ياكبرها تقارني باخونا نفل .. أنحن نرقى السلم ونفل فوق سور السطح ( كاشفنا ):D.. وكلنا وربعي لك وللمنتدى ياخوي ..

ونعم لاحظت كثرة العوائل .. في حاكم كان مجموعة عوائل .. وفي البخرا عائلتين .. وفي مكان آخر صادفنا عائلة .. كلهم بشغالاتهم ودشوشهم مخيمين وبـ ( خميس وجمعه ).:eek:

أخوي عروان : شكرا .. وهالوجه أبيض .. والله اللي ستر عليهم وربعي كانوا السبب ياغالي .

اخوي القماري : شكرا أبو أحمد .. تقييمك ثاقب الله لايضرك بس كنت منهد وبالنهاية الوضع كله بمكشات :good:.. أما سؤالك لماذا الدوران لم يكن جماعي ؟ .. كنا أربعة وسيارتين .. المطوع ومعه آخر توليا إيصال العائلة للأسفلت .. وواحد يحرس الخيمة بما فيها .. والدوران يكون على واحد بحثا عن أخوه إن كان متخلفا.. بعد مغادرة العائلة.. وألفين تحية لأبو أحمد وبس .

[حفرلوجيا]

اخوي صفوان : شكرا .. بس ترانا زعلانين عليك .. تدري ليش ؟ .. أخونا فرد حمزه لقى بالدحل اللي دخله مايتوقع أنه جمجمة انسان .. وكان مراكي الذيب صور جمجمة بأحد الغيران .. وقلنا وقتها وينك ياصفوان إبحث ونقب مالذي ينبغي أن نفعله شرعا .. وهل للفقهاء رأي حول ذلك ... وأنت إلى الآن مصكك القزاز .. يعني إذا كنت – غيرنا - غني البضاعة في البحث بهذه الامور .. لاتبخل .

أخوي ذيب البر : شكرا .. وأنت اللي أروع .. ومالنا منها شي ( الليالي تعدنا ).

أخوي الضب ::D شكرا .. نعم مايضيع شي .. ولو حط واحد منا نفسه بالموقف .. جاب أقصاه.

أخوي مهند : شكرا .. الله يرفع قدرك.

أخوي نفل : شكرا .. ولاحظ أولا تنبيه ابو تركي في ردي عليه .. أما العشب فالحزوم مطرفه قريب جدا ويلحقها العطش .. ولكن الفياض والخباري نبي نلحق عليها هالسبوعين .. واظن يلحقها مايلحق الحزوم .. والله يجيب الخير ويغيث ديار المسلمين.. أما الفقع فلم نبحث عنه طالما إن الدبدبة ( خالية ) .. مايبرد الكبد إلا فقع الدبدبة وبس ..:good:

أخوي aahhhh2 : شكرا .. ويجزاك بمثله ..

اخوي abos3d : شكرا .. هلا بالمحب أبو سعد .. وياليت اللي من نوع اللي قلت عليه يستشعر ويراعي حق الله والعباد .

أخوي الهرش : :D شكرا .. نعم .. وإذا تذكرت موقفك وكربتك لو كنت فيها .. هانت باقي العلوم خصوصا إنك بكشتة ولا تنقطع عن واجب .

[حفرلوجيا]

أخوي العنكبوت : شكرا .. وجزاك الله خير .. وأوافقك مع أبو أحمد لكن الكيس واحد .

أخوي شقردي : شكرا وبدون ياريس :mad:.. والله يخلي ( العنكبوت ) وباقي الأعضاء اللي يبثون فينا الروح .. ولعلمك لو بغيت أروح للمريخ .. الله لايخلي لي واحد من الجماعة يدرس هناك شاركنا الزاد سويا من ( قصيعة ) واحدة ( وبدون غمز ) ..:p

أخوي المسفهل : شكرا .. إيه نأخذ المكشات ياريس عرض طول و( نكيف ) ماهو نجيب كتب ونغوص في نخاشيش التراث >> والثعالبي وش قال >> وبن الملوح عشق بهاك المكان .. ونصير مانرجع إلا ببحوث وتحقيقات ولغة عربية و.. و ....

والمشكلة إن ردك مباشرة عند رد طيب الذكر .. لذلك مازلت تحت تأثير إنفعالات مؤقتة تجاه ( بعضهم ) .. الله يبعث لهم ( طبيب ) يتسبب بعلاج الصخونة اللي عندهم ..
وبعدين تعال لاأذكر إني قلت مضيع نصف أغراض الكشتة .. اقول >> الله يشفي ( الجميع )!;):D
وبكل الأحوال أسعدني ردك.:good:

أخوي عاشق الصفارى : شكرا.. وزين اللي شفتها رائعة .

أخوي الملثم : شكرا .. والله يجزاك خير على هذه النصيحة .

[سيف السيف1]

حفرالبحر[line]
كشتة حلوة وصور أجمل.. لكن مازلت راعي مشاكل ! ! قصدي مفاجآت تراي ما أعرف أمسح..
سعد معكم هاالمرة؟
وشلون أفياض الصمان رويانة ولا محتاجة ماء ؟
وش إعلوم الفقع؟
لابغيت تكشت المرة الثانية أرسلي الإحداثي عشان أتجنبك !!! ؟؟:D

[حفرلوجيا]

أخوي الجوني : شكرا .. وياليتني داري كان .. لكن ماكان :D.. وآخر نهار الخميس كنت شمال حسناء .. أما سيارتنا فللأسف خاب ظنك .. كان معنا همر وشبح ويحلق فوقهن هيلوكبتر ..:p

اخوي مراكي الذيب : شكرا .. وتحفظك له مايبرره .. لكني أقصد الأمير أو قائد الرحلة وأكبرنا سنا .. بمعنى أن المطوع هو المتبوع هنا ونمتثل لتوجيهاته بما لايخفاك من ترتيب الرحلات ..

وصحيح في الكل خير .. والله يخلي لنا كل من فيه خير من المطوع أو غيره .

اخوي صقر : شكرا .. سؤالك هل يستحق البر المجازفة بالعائلة .. في رأيي لا .. خاصة إذا كانت العائلة متدرجة في العمر .. يعني نسوان وبنيات ووغيدان .. ماحاجة إني اجرجرهم يمين ويساربينما البر يعني لهم شيء واحد مافرق عندهم بعيد أو قريب .. فيه صيد وإلا لا .. وحداني وإلا حولك غيرك ..

وعليه ... ( يجوز العيد بلاحنا )

أما عن خبرتك القليلة .. أقول ياليت عندي ربع خبرة بعض أهل بريدة بالصمان ( ونخاتيقه) ... أحب أهل الشمال .. لذلك دورني باللي يعانق الدبدبة من الصمان ..:good:

اخوي ابو فارس : شكرا .. هلا وكل الغلا .. واللي سألت عنه تلقاه بردي على الفنان أخوي نفل .. لكن وش عندك تطري ( سعد : قاهر المبصبصين ) ..وبنفس الوقت تقول هو معي وإلا لا .. وأيضا تقول علمني على شان اتجنبك :eek: .....

يانت تطيح نفسك هالأيام بمطبات مالها آخر .. وش علاقة إنك ودك تجنبنا بخوفك من سعد .. أفهم من ذلك إن سعد يمكن ( يتفاهم ) معك :(:D ..
يا( زين ) صرت أرحمك .. وقايل لك الرجا .. بالشقردي ( فارس ) :(.

[ابو شكاع]

ياخوي حنا وهو حنا يعني شباب وما علينا .......... ما مشينا الا معنا كناود وقارمنات وخرايط

لان الصمان مضيعه ...........

فما بالك بهذا الله يهديه .................. طريقته خطأ وهو بنفس الوقت صغير السن

لكن انتم ما قصرتوا

وجزاكم الله الف خير

[تواق]

حفرلوجيا والله ان كل ماسمعت موقف يمر فيه بعض من الشباب مثل موقفكم انت وخوياك
ويتصرف تصرفكم اكد واجزم بوجود الفروسيه والشهامه العربيه الاصيله باقيه في جيلنا

اخوكم / تواق

[خشم الحصان]

الاخ الغالي
ابو سليمان
السلام عليكم
اقول جعل ولديكم في جنات النعيم علي هالعمل الي يرضي ربنا سبحانه ولا نزكيكم علي الله سوتكم سوات الرجاجيل الي هبة وتذكرو ان الي في الددسن عيالهم ولا تلومه يوم يوقف بعيد المحارم هو الخط الاحمر مابعده الا الموت و الولد توه في العشرينات لا تلومه كني اسمع رجف قلبه كنه مكينة بلك ستون قطع 26 من الخوف علي خواته الله يستر عليهن والطيبين مثلك وشروك معليهم علمه مميزه ينعرفون ويرتاح البال لشفتهم
ولاتعرفهم الابعد فعايلهم الله لايلومه لو بكي وهو يتصل بالكنود وهالسملق الي يتريقون الله يهديهم لو يعرفون م
الوضع وان واحد منهم في مثل هالمشكله كان فاحة رحته .
اشونك مير عرفته طمنة قلبه كني اشوفه ينتفظ من الروعه قبل ماتنشده.
وخوه الكبير الله يهديه مامعه مريه بس دعسه وحده يعني العجيز بجزع ان درة انها مضيعه بنياتها.
ياجعل الترمس لذهاب او ورا الصين الترمس بدالها ترمس .
الموت في الرجعهلصار الي قدام مايدري عن الي وره.
خوش دليله ولا لاجي بي اس و كنود الله كريم.
اما عيال(.....) بيقربون وانتم معهم فنا خابرك يابو سليمان ماترضها انت وربعك لو يصير الروض حمر افا يابو شليمان انا خابرك منتاب مخليهم لين توصل النسوان لزلفة الباب انا بوك يامحمد.
يعل عيني ماتبكيك يالمطوع ياجعلي ماذوق حزنك ياخوي لي شفة هالوجيه السفره الي مره يسمونهم مطاوعه ومره ابا عبد الله انشهد انهم ابا عبد الله الدين عند امه وبوه ولا يرضا بالشين والدليل يبي يطمن الولد زود
علي ذالك عطه المسدس وهو محشي يعني ياولد الاجويد اهلك اهلي.
اطمئن يابو سليمان الله لايلومه توه يدري ان الي قدامه قروم ورجاجيل
ايه ذاك قد وصل ياهم لاالي الله المستعان
مكسب يامطوعنا تلقاها ذخر عند رب العالمين ياجعلك تسلم.
يوم سمع اثره راعي سمع ولا من الكنود ولايدري عن الي ورا هذا ماودك يسرح ولا بالعنز الي تضلع ولافيها ابو هجير.
هذا الي يسعد الصدر من وقفتكم وفعايلكم والله يرفع من قدركم.
عاد جي وقة الصور منيب مخليك
1- وشو سدر شوب يوكل
2-صور هالرياض زاد ياربي وين يجيب هالموقف وهالحكي المسطر منه اثرك تسدح علي البساط الاخضر ياخيي لويتسدك محرول قام يطامر من الريحه
3-هالجريو ذكرتني بالماضي منول اوش اوش حجلان
4- هالحين ابو صابر من صغرخده يومه يلتفة
5- كني مشبه علي الي ماسك الحبك...............تري مشبه يابو سليمان بس مانيب متاكد
6- الله من الشفحه فيك لزم تملي القدر خل شوي حق ها .........
7-وش ذا لجمل الونين كنها صقة هالجيل التالي لي قام الوحد منهم يحلق كنه يحلق بحصاده ثيل
8-هذي صورة طير ولا نقتف ولا ملصقينه بغراء
9-للبيع تري شاري حدو
10-هالبعير يذكرني بوحد ليقام يتهايق في قليب ولا شف عكفة الرجل كنه وقف علي الطي
11- يذكرني بدرريع الاسبانيات لقامن يرقصن
ياجعلك تسلم يابو سليمان
ياحبيل قلبك
اخوك
خشم الحصان

[بن قطر]

ما قصرتوا والله

[حفرلوجيا]

أخوي ابو شكاع : شكرا .. عاد وش تقول بقل الدبرة من بعض الناس .

أخوي تواق : شكرا .. وأرجوا ألا يكون الزمن الردي ( يكبر ) بعض ألافعال التي تقع في دائرة إحترام الناس ( وأصول التعامل ) معهم .

أخوي ( المتجدد ) خشم الحصان : :D:D:good:

شكرا .. وجزاك الله خير على دعواتك .

يمين بالله إني ( أدمنتك ) هالأيام .. وصرت أرجع لردودك مرات .. وكل رجعة ألقى فيك شي جديد ( لاتقول ذا غزل ) ..

وآخر ( الجديد حولك ) اني صرت أقرأ ( لوحة المفاتيح ) من جديد .. واكتشفت إن شوفك ( يالله القداة ) أو إن روس اصابعك ( على شكل مربع ) وإذا خمطت الحرف .. اهتزت باقي المفاتيح .. وصارت تخرط طبلونه تبي ترضيك ( وترضنا ) ..

المهم وأنا أخوك ( تويقع ) وانت تضرب على مفاتيح الكمبيوتر وإذا نويت ترد لاتهبلهن .. وإن كانك تبي تقول : ( ان خشم الحصان كبر ... وغير عضو ولاتغير طبع ) فـ أقترح عليك تبدأ بدل كتابتك على المفاتيح بالاصابع .. تنفخ عليهن ( أركد شوي ) .. لكن بهالحالة ياخوفتي تبدا توهم انك ( تقرأ ) على جن .. ونصير نشوف حروف ردك ترقص .

أخوي المرعب :D : شكرا .. القصور من غيرك.

[المترو]

الله يجزاك انت واخوياك الشقرديه الف خير وعافيه وهذي عوايد الرجال مثلكم يالشقرديه
وبصراحه موقف ماهو غريب عليكم ودائما من يعشق البر والرحلات يكون خلقه عالي ويبحث عن المساعده بالبر لانه اجر وغنيمه دنيا واخره
واقول جازما انك لم تذكر هذه القصه فخرا وسمعه ولكن ليتعض الاخرين بهذه المواقف وتنغرس هذه الاخلاق لدى من يقراء هذه القصه لتكون مثاله في مثل هذه المواقف النبيله وتوجيه لمن يخرج بعائلته الى البر لاتخاذ مبداء الحرص والسلامه له ولعائلته
ولا اويد خروج العائله مسافات بعيده بالبر عن الازفلت والمناطق الماهوله لسلامتهم
اما موضوع الملاقيف بالبر على الاجهزه فأسال الله ان يهديهم فحدث لي موقف خلاني لا اشغل الراديو الا نادرا بالبر حتى لو كنت منتظر احد لمناداتي لاحقن بمكان معين
مره من المراريت كنا بالصمان وخوينا الي يبي يلحقنا دليله بلحيل المهم وما معه gps وقال اذا جيت حولكم بالصمان ابي انادي عليكم المهم وكل بين فتره واخرى اشغل الراديو وكل مره يطلع واحد يتكلم بكلام الله يهديه فقط للتخريب على الناس وكأنه طالع للبر بس لهذه المهمهويمو لقت الرجال على الجهاز الا وملقوفنا معي على الخط وانواع التقطيع على الرجال وطلايب الى انه يلاحقنا بكل قناه للتخريب علينا فقط وابشرك وصلنا خوينابالنهايه الزبده لاني طولتها شوي الله الهادي
وتحياتي لك ولاخوياك وخاصه صاحب السلاح واسف لان اباريقي بدون غطيان ولا عراوي (حسب وصفك)
تحياتي الرحال 2003

[الهلالي]

أبو سليمان غالي ويزيد غلاك لمن أطريت الشمال .
والمرجلة والشهامة والنخوة غير مستغربة على مثلك وشرواك من ربعنا وشبابنا . وإذا فية قلة من ( ....)
فهذا ليس بمقياس . بيض الله وجيهكم على العلوم الطيبة .

[حفرلوجيا]

اخوي الرحال 2003 : شكرا .. والحمد لله على السلامة
و ندعو بالشفاء لوالدتك اللهم اجمع لها مابين الاجر والعافية .. واللهم أعط أخونا خيرا ورزقا وأجرا على نيته ببرها .. ورعايتها .
وكلامك عين العقل .. ولاشفنا إلا دلال بغدادية معطرة بالهيل .. كلامك ( بغطيانه ) أو بدون مهضوم ومقبول :good:.

أخوي الهلالي : شكرا .. الله يلوم اللي يلومك بالشمال .. وهالوجه ابيض .. لكن تعال : ليش مالك صور بمسابقة أجمل صورة لهذا الشهر.:confused:

[نقا هشال]

اخوي الرائع حفرلوجيا

دائماً انت متميز في كل شيء

ماشاء الله عليك وبيض الله وجهك على الصورالرائعه وعلى فزعتكم يالنشاما

[صفوان]

الأخ/ حفر لوجيا حفظه الله ورعاه

السلام عليكم ورحمة الله وبركاته

وآسف على تأخر قرائتي للردود وذلك لأني من فترة أصبحت لا تأتيني تنبيهات على الايميل الخاص بي! لا أعرف السبب.. ويصعب على متابعة المواضيع لكثرتها أولاً "ما شاء الله" وثانياً لانشغالي.

أعتذر لك مرة اخرى.. وأشكرك على ثقتك فيّ المفرطة بعض الشي! وشكلي أبي اجيب العيد فيك يوم:D

بخصوص موضوع مشاهدة وتحصيلكم لجمجمة إنسان..
والله يا أخي اللي أعرفه أن الانسان له كرامة وحق في الحياة والممات وهذا من عز الاسلام وحمايته للنفس البشرية.
وفي حالتكم.. كان ينبغي لكم إعادة دفنه إن كان ظهر من قبر، وإن لم يكن مدفون مسبقاً.. ياحبذا لكم أن لو دفنتو الموجود وواريتوه التراب.

مع ملاحظة أمر مهم ينبغي أن تستشيروا فيه أهل الخبرة من حيث الأمور الأمنية.. قد يكون هذا الرجل مفقود منذ زمن ويوجد من يبحث عنه، فلو كان هناك صورة وتوصل بشكل مباشر أو غير مباشر إلى المسؤلين من الشرطة في المنطقة القريبة من الموقع لكان أفضل وأجدر لإمكان علاج موضوع أمني.
وهذه البقايا قد تصل 15 سنة إلى عشرين تقريباً.. قد تكون مسجلة فيها حالة لدى قسم الشرطة فيكون قد أعنتم على إقفال حالة لهم ونفس الوقت أرحتو أهله.

لأني لا أظن أن يدفن أحد في دحل! غريب بعض الشيء..

هذا ما لدي.. وأشكر لك حرصك واهتمامك.

هذه الصور والمشاهد التي قد تمر علينا من خلال ترحالنا.. فيها عبر ودروس لا يتسع إليها المجال لذكرها.
رغم تفكر مآل الانسان إلى هذه الحالة.. مع ذلك تجده يتكبر على الله ويطغى ويعصاه!!!!! الله المستعان.

تحياتي،،،
صفوان

[حد السيف]

الغالي والعزيز
كاتب مكشات المحبوب
حفرلوجيا
السلام عليكم ورحمة الله وبركاته
الله يرحم والديكم على ما سويتو والله لا يجعلك بضيقة (او زنقة) وبسخر دروبك وييسر امورك ويبسط رزقك
( هذي جديدة عقب المغرب سمعتة من جدتي يعني دعوة تحت التمرين وانا طالع للمكتنب وهي تدعي ما ادري ليش ذكرتك:D )
يارايق انت على ها الصور والصورة التى قبل الاخيرة الاكيد قلت للسواق وقف وقف وقف الين ما ابعد كنة داري ان صورتة بتطلع بالانترنت
وبعدين الله يهديك عساك اخذت عنوان الحلاق نبي نسلمة جائزة احلى قصة وهي عبارة عن قوطي مثبت شعر بلس عقل
والناقة الطربانة:dance:يوم مريتو اكيد كانتو مشغلين مكتم طربان وهات يارقص وبعدين صابر وصابرين وصبر وصبري عسى ليقيتو صبار لتكتم الرصة وتصير احلى صابر وصابرين يا قلب العنا صبار:D :D
:mad: :mad:

[حفرلوجيا]

اخوي نقا هشال : شكرا .. وإن كنت ترى تميز .. فالتميز صار عنوان المنتمين لهذا المنتدى .. وانت في مقدمة ( المتميزين ) بالصور والتصوير .

أخوي صفوان : شكرا .. وتجاوبك مقدرينه .. لكني كنت أعني ماذا يمكن أن نجد لو بحثنا في مصادر ( الفقه والفقهاء ) حول ماشاهده مراكي الذيب وفرد حمزه .. وهو بقايا جماجم وعظام آدميه .. يعني لاتزحلقنا برأيك ( المستنير) وتقول ادفنوا وبلغوا الشرطة .. رأيك على العين والراس .. لكن ماذا نجد ( شرعا ) بمصادر الفقه ( ورطه ) .

أخوي حد السيف : شكرا .. الله يحفظ لك الجدة .. ولايحرمك من دعائها .. ( ولايحرمنا من تمريناتك ) .

وبعدين لايكون أنت اللي تسوق في الصورة اللي قلت عليها ... كنك معنا وأنا أوقفه .

وخل الحلاق ينقلع .. اللي مثلك ( وشرواك ) مايصلح له الحلاقة من هالنوع لأنه لو( قزع ) اللي تحت .. فـ اللي فوق ( منحت خلقه ) من تأثير السنين .. لذلك ( أطرف موس ) يمشي الحال....
( لاتزعل ... أمزح وإلا هالحلاقه ماهي للي مثلك ..>>>>>>>> قلنالك موس )

اما الناقة كان الراعي الهندي يجر لها الربابة .. وهذا اللي خلاها توهم أنها ( فيل هندي ) وترقص وهي ترعى.

والصبار .. عز الله أنت اللي للحين تقرأ هذا الرد .. ياقلب العنا ... صبار ....

[صفوان]

الأخ/ حفر لوجيا مع التحية

آسف على تأخري للرد على موضوعك.. وذلك لظروفي، "الله لا يشغلنا إلاّ في طاعته"

أما عن استفسارك.. تراه ما يحتاج ذاك البحث إلاّ ما أفدك فيه من حيث إن إكرام الميت دفنه، ولتأكيد ما ذكرت لك سابقاً وعلى شان خاطرك سألت من أثق بعلمه من طلبة العلم وأخبرني بأن يعاد دفنه فقط.
والأمر ما يحتاج فيه أقوال.. ما عندك إلاّ تدفنه ولاّ تتركه محله وتخليه، والأول أفضل لستره وإكرامه..
أمّا إذا تبي تبحث عن بعض أخطاء وبدع الناس في هذه الأحوال تراك بتلقى واجد.. مثل عند بعض الناس والعوام خاصةً في القرى، يقولون إذا تفتح قبر تحتاج أن تذبح خروف وتعزم عليه، ويمكن بعد تبي تلقى اللي يقولك إذا شفت عظام إنسان تبي تذبح لك خروف!! يعني أحسن لك خلك بعيد، لا يطلع اللي يقولك تذبح قعود!:(

هذا ما لدّي.. وشاكرين لك حرصك:good:

أبوك
صفوان
*لا تغيب عن البيت يا ولد*:)

[الناصح]

السلام عليكم ورحمة الله وبركاته
الموضوع يا أخي حفرلوجيا مهم جدا

وهذا يعطي درس لكثير من الأخوة بعدم التساهل عند الخروج للبرية وخاصة عندما تكون الرفقة النساء

يجب أن يكون هناك تنسيق جيد وأن يكون المكان المقصود من الأماكن المعتادة والتي سبق
الخروج لها مرات سابقة والبعد عن الثقة الزائدة بالنفس فهي كثيرا ما أضرت بصاحبها

وأقول لمن كانت النسوة معه ليس كل مرة تسلم الجرة

فالحمد لله أولا وأخيرا أنه لم يقع في ايدي أناس لايخافون الله

وكما قال الأخوة المصريين (الدنيا لسه بخير)

وأخيرا أقول للأخ الكريم حفرلوجيا أن في تفريج الكرب عن المسلمين والتخفيف من مصابهم

عظيم أجر ومن فرج عن مسلم كربة فرج الله عنه كربة من كرب يوم القيامة

ولا تنس أن صنائع المعروف تقي مصارع السوء

[الخَـجَـمْ]

بعض الناس فيهم اهمال غريب,,

يوم الاربعاء الماضي كنت رايح لشرق الصمان عن طريق رماح- شوية
وعند رماح اشر لي ونيت غمارتين وفيها حريم واطفال بالمرتبه الخلفية
وراكب قدام ولد عمره حوالي 10-12 سنه(المحرم) والسواق هندي,,
واغراضهم شكلها اغراض كشاته,,

المهم الولد سالني من وين اروح لشوية
قلت له امش وراي ادلك الطريق (قصدي مفرق شويه من طريق المزيرع)
فعلا مشى وراي ووريته الطريق وراح,,

بعد ساعتين تقريبا وعلى بعد 40 كيلو شمال شوية
(متعدين شوية بـ 40 كيلو )
لقيتهم واقفين ووقفت عندهم وسالتهم اذا يحتاجون اي مساعده,,

النكته قال لي الولد الصغير (المحرم) وين شوية؟؟؟؟
قلت الله يصلحك شوية وراك بـ 40 كيلو
قال مامريناها !!!!!!!!!!!!!!!!!
قلت ارجع 40 كيلو تقريبا وركز نظرك يسار
وبتلقى ديرة هناك
هذيك شوية,,,,

ورجعوا ومدري هل حصلوا شوية او
الى الان ضايعين!!!!!!!!!!!!

[عاشق الجبال]

السلام عليكم ورحمة الله وبركاته

تحية لكل اعضاء مكشات :
الله يعافيك اخي الكريم حفرولوجيا على الموقف البطولي لك ولاصحابك وهذا ماهو مستغرب على اهل الخير
في هذا البلد المعطاء ادام الله عليه الامن والرخاء .
اما الصور ففي غاية الروعه ولها دلالة واضحه على حرافة التصوير .
اما موضوع الحذر واخذ الاحتياطات فهذه امور ينبغي عدم الذهاب للاماكن الخطرة بمافيها البراري
الا بعد اخذ جميع الاحتياطات وتوقع اسوأ الاحتمالات .

حصل لي موقف مشابه مع عائله بحدود ثلاث نساء مع اطفال صغار وشاب بالعشرينات من العمر واخر
يقارب العشرة سنوات متوقفة سيارتهم في البر وهي من نوع فورد صغيرة موديل 89 كانت برفقتي عائلتي
فلما مررت بمسافة قريبه منهم اشر لي الكبير لم انتبه ان معه عائلة الا بعد ات رايت الولد الصغير
ادركت انه يحمل عائلة عندها اتجهت اليه واوقفت السيارة بحيث تكون العائلة متقابلة مع العائلة
ونزلت متجها لمقدمة سيارتهم مع الشابين وطمئنتهم بان الخلل بسيط وسوف تشتغل سيارتهم باذن الله
طلبت منه تشغيل السيارة لاحظت ان السلف يدور والبطارية قوية ولكن دون دوران الحذاف
احضرت عصا العفريته وحاولت تدوير المحرك من خلال الدينامو تحرك حركة بسيطه فقلت له
حاول تشغيل السيارة عدة مرات فاذا دار المحرك استمر حتى تشتغل .فعلا حاول ولكن عندما
دار المحرك فجأة لم يستمر فضيع فرصة التشغيل . طلبت منه اعادة المحاولة عدة مرات والاستمرار
وفعلا جاءة فرصة التشغيل واستمر بالتشغيل حتى اشتغلت السيارة فرح وشكرني
قلت له تشوف الاسفلت قال نعم
قلت له على طول لاتتردد على بيتكم
اخواني اعتقد ان سبب سيارتهم بسيط ولكن الجهل بميكانيكا السيارات له دور ينبغي على مرتاد البر
الالمام بها خصوصا الاجزاء المهمة .
تقبلوا تحياتي

[طير قنص]

ويبيض الله وجهوكم اخوي حفرولوجيا (اغاثة الملهوف)لها اجر عظيم

[ق ح ص 411]

السلام عليكم ورحمة الله وبركاته
ماقصرت يالغالي تسلم يمناك....

[حفرلوجيا]

ألإخوان صفوان , الناصح , الخَـجَـمْ , عاشق الجبال , طير قنص , ق ح ص 411 : أشكركم جميعا ولقد سعدت بكل ماأبديتموه للمكشاتيين من نصح وتوجيه وأقدر لكم مشاعركم تجاه أخوكم .. ولكم مني التحايا..

وتجاوب أخونا صفوان فيما طلبته أقدره .. ونبي نعتقك هذه المرة ( على مضض ) .