المساعد الشخصي الرقمي

مشاهدة النسخة كاملة : ادخل وعطني رأيك ج2 (ابوشكاع والجوني ورمش العين الدخول اجباري)


الـ ع ـارض
21/02/2004, 12:16 PM
السلام عليكم ورحمة الله وبركاته

كنت نزلت في موضوع سابق ( ادخل وعطني رأيك ج1) بهذه الخيمه صورة السله اللي تركب خلف السياره ونالت اعجاب اعضاء المنتدى الا ان البعض شكك في قدرتها على التحمل وبصراحه انا شكيت فيها ولذلك قررت اختبرها لاقصى الظروف لارى الى اي مدى تستطيع التحمل وبالفعل ركبت السله بالسياره وحملت اغراضي فيها وهي خيمه 3×3 باكستانيه وخيمه 280×260 امريكيه ورواق 180سم من النوع اللي ينصفط عاموده من النصف دافور غاز 70رطل عامودين حدين للاناره (موجوده صورهم بالموضوع السابق) ومظله تتركب على السياره 250×300 سم قماشها باكستاني ابيض مع عواميدها و5 ربطات حطب سمر .
لاتضحكوا علي بس قبل لا احد اي غرض بالسله كنت اوزنه وطلع اجمالي الوزن 320 كيلو تقريبا ودخلت الصمان من عند شويه ومريت عروق شويه همن دخلت داخل الصمان شمال شرق الى روضة المهريات همن اتجهت جنوب غرب الى الرفيعه في طريق العوده وبصراحه ربعي بهذه الرحل كانوا يراهنوا على فشل السله ولكن ولله الحمد ما خليت طعس والا جبل طلعوه بالباترول والاندكروزر الا طلعته بموتري وسلتي وبالفعل اثبتت جدارتها وهذه صور السله وهي محمله بالاغراض

http://www.arab3.com/gold/images/Feb04/al3ard_Image-31.jpg

http://www.arab3.com/gold/images/Feb04/al3ard_Image-32.jpg

وهذي صورة الخيمه الباكستانيه .
( كل الشكر والتقدير للاخ الجوني على الخيمه التي ذكرها بموضوع سابق له وانا اخذتها بناء على نصيحته)

http://www.arab3.com/gold/images/Feb04/al3ard_1Image-22.jpg

صورة تانكي المويه داخل السياره
مواصفاته :
140 لتر
فيبر غلاس مدبل وبين الطبقتين طبقة حديد من اجل زيادة قدرته على تحمل اوزان فوقه
ابعاده :120×120 سم وارتفاعه 10سم
(كل الشكر والتقدير للاخ رمش العين على نصيحتة بالمصنع الذي صنع هذا التانكي )

http://www.arab3.com/gold/images/Feb04/al3ard_Image-34.jpg

http://www.arab3.com/gold/images/Feb04/al3ard_Image-33.jpg



كل الشكر لمنتدى مكشات والقائمين عليه واعضائه الكرام على الكم الهائل من المعلومات والنصائح والتوجيهات وجزاهم الله عنا كل خير
* رمش العين *
21/02/2004, 12:56 PM
السلام عليكم ورحمة الله وبركاته
أخوي العارض حياك الله والحمد لله على سلامة الوصول من هالرحله الممتعه
والأمر وانا أخوك ما يستدعي أي شكر والحقيقة أن أغلب اعضاء مكشات دايم يهدفون لتبادل الخبرات وايصال كل ماهو مفيد لبعضهم البعض فالشكر للقائمين على رفعة هذا المنتدى من مشرفين واعضاء
وفي الختام أقول للجميع جزاكم الله كل خير وجعل الجنة مثواكم ووالديكم ولنا ولوالدين مثل ذلك وللمسلمين والمسلمات والمؤمنين والمؤمنات الاحياء منهم والاموات

أوكم الصغير / رمش العين
عروان
21/02/2004, 01:16 PM
مرحبا يالعارض

ما شاء الله على السلة اللي تشيل 300 كيلوغرام وتضرب بطن الصمان :)

بس أخوي الصور ما ظهرت. مدري يمكن المشكلة عندي.


تحياتي لك
مشغول
21/02/2004, 02:30 PM
ما شاء الله

الله يبارك لك فيها ،، وإن شاء الله بركب لي في الجيب

وهلا بك
الاجودي
21/02/2004, 04:21 PM
والله انها ممتازة

واكثر من رائعة

زين هل تنصح بها للسفر؟

ترى خويك راعي خطوط بسفرة امشي 2000 كيلو واكثر

كم تكلف؟

هل فكها وتركيبها صعب؟

وين سويتها؟

كم اكثر شىء تتحمل؟
الطبيب
21/02/2004, 05:25 PM
اخوي العارض

اقف احتراما واجلالا لهذه التجربه والتفاعل مع المنتدى واعضائه وتطبيق آرائهم واقتراحاتهم

وكذلك لك مني كل التقدير على هذه المصداقيه الرائعه في تجربتك وتوثيقها بالصور وطرد الاعتقادات الخاطئه بالتجربه العمليه

تقرير متكامل وعرض شيق للتجربه العمليه

و(( العارض )) متميز جدا

وتقبل تهاني الحاره وتحياتي القلبيه

اخوك

الطبيب
الـ ع ـارض
21/02/2004, 05:59 PM
رمش العين

الله يسلمك من كل شر
عزيزي لزوم نعترف بالفضل والجميله لصاحبها وهذا اقل شي ممكن نسويها ...


عروان

هلابك اخوي ... اعتقد مشكلة الصور من عندك


مشغول

الله يبارك بعمرك ولين ركبتها بالجيب لا تنسى تصورها لنا


الاجودي

عزيزي اللي استحملت الصمان بكل تضاريسه ماهي مستحمله المسفلت ؟؟؟
وانا مشيت عليها بسرعة 170 كلم وما كان لها تأثير على توازن السياره وفكها وتركيب بسيط وسهل جدا ما ياخذ 5 دقائق وكلفتني 500 ريال
( ادخل الموضوع هذا فيه شرح عن السلة بالتفصيل) (http://www.mekshat.com/vb/showthread.php?s=&threadid=14291)


مشرفنا العزيز الطبيب
كل الشكر لك لمرورك على موضوع البسيط وتكريمه بكلماتك الرائعه
عزيزي هذا الموضوع ماهو الا ترجمه بسيطه ومتواضعه للمجهودات الجباره والمفيده لاعضاء المنتدى واوجه كلماتك الى كل اعضاء المنتدى فلهم النصيب الاكبر منها

ولك من شكر وتقدير خاص
abos3d
21/02/2004, 09:40 PM
اخوي العارض انت روعة و سلتك روعه بس ياليت تحط الخيمة الامريكية و الرواق الي ارتفاعه 180 سم لاني خابره 125 سم بس اذا ما عليك كلافة
الجوني
21/02/2004, 09:52 PM
هلا والله بأخوي العرض:/
1- أتأسف لتأخري عن الرد وذلك لعدم قربي من النت الفترة السابقة.
2- أشكرك على شراء الخيمة وبشرنا وش نتايجها ياليت يكون ردك عن نتايجها بنفس الموضوع اللي كتبته عنها تذكر لنا سلبياتها وايجابياتها.
3- لا يهمك أحد وتراك سبقتني بها السلة واناقريبا سأقوم بتركيبها هي وشغله ثانية ماودي أذكرها اخاف تسبقني :p .
وياليت تاصف لنا المحل والشكر لله ثم لك على الطرح الجميل والتنظيم الابداعي ومزيدا من التقدم
الـ ع ـارض
22/02/2004, 09:39 AM
abos3d
انت اللي رائع بمشاركاتك المفيده ...
بالنسبه للرواق للاسف ما صورته ولكنه موجود بالسوق بعدة ارتفاعات 120 و 150 و 180 وان كنت تبي رقم المصنع اللي يسوي هذا النوع من الرواقات ( اللي تنصفط عواميدها من المنتصف) علمني وانا ارسله لك او احطه هنا بالموضوع حتى يستفيدوا الشباب . والمصنع بالرياض.


الجوني :
الحمدلله على السلامه هذا اولا
ثانيا : الخيمه ممتازه جدا بس فيها عيب صغينون وهو تتعب في تركيب الزوايا (زوايا رواق الخيمه وليس العواميد) والا الباقي تمام وبالفعل ردة البراد عنا وكانت درجة الحرارة الساعه 3 الفجر مابين 0-1 درجه مئويه.
ثالثا : السله ووصفهاموجوده على هذا الرابط (http://www.mekshat.com/vb/showthread.php?s=&threadid=14365) والشي الثاني اللي ماتبي تعلمني عنه ان كانه بخصوص السله وتطويرها فاعتقد اني عرفته وانا جالس الان اختبر عدة افكار ;) .

عموما في انتظار ابداعك

تحياتي واحترامي للجميع
الـ ع ـارض
22/02/2004, 09:45 AM
لمن اراد معلومات تفصيليه عن السله فهي موجوده على هذا الرابط

سلة للتحميل خلف السياره (http://www.mekshat.com/vb/showthread.php?s=&threadid=14365)


ملاحظه

اسف على وضع رابط غير صحيح في ردي على الاخ الاجودي



تحياتي واحترامي
abos3d
22/02/2004, 02:27 PM
اخوي العارض انا معك ان الخيمة تركيب زواياها يجيب الهم لكن وصلت لطريقة تريحك وهي انه يكون واحد جوا مهمته يطابقها ويركبها والثاني برا يشد له الخيمة لين تركب
الجوني
22/02/2004, 02:30 PM
صح عليك يأ ابو سعد وهذا هو الحل وكنت ابقوله بس ماشاء الله عليك سبقتني واخوي العارض لاتشد على الخيمة واجد ولاتسى ان الباب يكون مرتخيه السحبات بحيث يتم تركيب الزوايا بسهوله تامه
جرناس
22/02/2004, 02:39 PM
انا برايي لو تحط عفشك وخيمتك على سله الموتر احسن من السله هذي
وهذا مجرد راي وتخلي السله الي وره حق الاشياء الخفيفه
وهذا مجرد راي لانها من كلام احد الاخوه لي تاثر على الشاصي
وسلامتك
صيهد
22/02/2004, 02:46 PM
أخوي العارض

سؤال
ذكر اكثر من شخص ان المويه يتغير طعمها في تانكي الفيبر هل هذا صحيح.
سؤال ثاني
كم كلف التانكي.

وشكرا
عاشق الفـــــــيّ
22/02/2004, 03:24 PM
السلام عليكم ورحمة الله وبركاته

أخوي العارض الله يباركلك بموترك هو وسلته

اخي العارض اتوقع ان الغراض الي بالسله يجيهن تراب بوجه العدو من عجت الموتر

هل توافقني الراي وثاني شيء ماتصلح الى للمواتر الي ببانه الخلفيه شنطه يعني ماتصلح لنيسان

ولاكن لخطوط السريعه خطوط السفر اتوقع افضل بكثير من السله الي فوق الموتر وافضل من العربه القلص

لانها جايه بذرى الموتر عمومن الله يباركلك فيها

حبيت اسألك عن التانكي الماء الموجود بالموتر كم ياخذ لتر وهل هو مثبة بقواعد واللا مهو مثبة

تقبل تحياتي ،،،،،
الـ ع ـارض
22/02/2004, 06:28 PM
abos3d و الجوني : انا تعبت نفس الطريقه ومثل ما قلتوا متعبه ولكن لقيت طريقه اسهل وهي تركيب سقف الخيمه ادخلها بالفتحات الخاصه بها اما الاركان ادخل ركنين متخالفين يعني على شكل الحرف X ومشي حالك ;) بس شد الحبال بالاطناب مزبوط وادفن الارضيه والحمدلله ...


جرناس : المشكله انك شلون ترفع الاشياء الثقيله فوق السياره :confused: وانت عارف اناما من طول زايد والسن له احكام:( ما من جهد وقوة على الشيل والحط.
اما من تأثيرها على الشاصيه فما اعتقد ذلك لانها لك تأثر على اتزان السياره اثناء السير والله اعلم.
ويا هلابك

صهيد : بالفعل اول ما سويته كان طعمها شين ولكن بعد عدة استخدمات للتانكي زال الطعم ...عموما انا استخدم موية التانكي للوضوء والغسيل اما الشاهي والطبخ فلها قوارير المويه .. قيمة التانكي 600 ريال.
ويا هلابك

عاشق الفـــــــيّ : الله يبارك بعمرك ويخليك لعين ترجيك
من ناحية تغبيرة الاغراض هذا صحيح ولكن انا مسوي لكل غرض من اغراضي شنطه خاصه فيه عشان تحميه من التراب والغبار وغيره وايضا جالس اجرب طريقه بحيث اني احمي الاغراض وهي بشناطها من الغبار والتراب وقريبا انشاء الله لين زبطت معي الفكره نزلتها بالمنتدى . السله تنفل للخلفيه الابواب ولك بشرط ان ما يتعدى ارتفاع اغراضك حد جدار السله الجانبي ... وهي بالفعل افضل من القلص من ناحية توازن السياره وايضا من السله في اعلى السياره .... اما التانكي فسعته 140 لتر وهو غير مثبت باي قاعده انما يوضع بالسيارة بعد شيل الكرسي الثالث الاخير بالسياره ...
ويا مرحبا بك
صيهد
23/02/2004, 08:28 AM
شكراً لك اخي الكريم على الرد السريع والوافي.

وجزاك الله خير
الـ ع ـارض
23/02/2004, 10:35 AM
الشكر لله اخوي صهيد
وهذا واجب علينا اخوي

ويا هلابك
علي الشهري
14/02/2005, 05:59 PM
أخي الكريم: العارض
جزاك الله كل خير على الموضوع المفيد الموثق

لي سؤالين لو تكرمت:
1- التانكي هل هو ستيل؟ وكم ارتفاعه؟وهل فيه قواطع تمنع صوت المويه اثناء مشي السيارة؟ووين زينته بارك الله فيك(ترى كل هذا سؤال واحد :) )

2- التلبيسه الخلفية وين ألقاها بالرياض؟وكم سعرها؟

بارك الله فيك أخوي
الـ ع ـارض
15/02/2005, 09:31 AM
هلابك اخوي التنهات

1- التانكي مصنوع من الفيبر غلاس من خفة الوزن لانه غير مثبت بالسياره وموجود فيه قواطع من اجل منع صوت تحرك الماء ولكن للامانه صوت خضخضه الماء مسموع ولكنه خفيف جدا لان التناكي داخل السيارة وليس خارجها ...

2- رقم المصنع اللي سوى التانكي والمصنع اللي فصل التلبيسه برسلهم لك على صندوق الرسائل الخاص بك بالمنتدى
علي الشهري
15/02/2005, 11:49 AM
بارك الله فيك أخوي العارض

وألف شكر على سرعة التجاوب

لكن لو كان التانكي من الاستيل ما هو أفضل؟ من حيث المتانة وتغير طعم الماء؟؟حتى لو كان السعر غالي...

حتى لو كنت تستعمل الماء للغسيل فقط ....مهوب أفضل يكون للشرب أيضاً وتوفر مساحات من تحميل دبات موية الشرب؟

بعدين ما علمتني كم ارتفاعه؟

بارك الله فيك يالحبيب
الربذي
15/02/2005, 01:27 PM
الله يجزاكم خيرا اخوتي كم راهنت على فشلها ولااثق ان اضعها بسيارتي لكن الحين بعد اخونا الغالي والتجربة القاسية بالمرة اختلفت نظرتي لها
الـ ع ـارض
15/02/2005, 05:05 PM
هلابك اخوي التنهات

اولا الارتفاع 10سم والطول 120 والعرض 120 سم

انا معك الستيل افضل ولكن لو كان ثابت تحت السيارة مثل اللاندكروزر ولكن انت تبي تحطه داخل السيارة لين جيت تكشت ولين رجعت لبيتك تبي تشيله عشان ترج المرتبه الثالثه ...صح ؟
الستيل بيصير وزنه ثقيل وبيمصعك بالشيل والحط بس الفيبر بيكون اخف وزن ...
اما من ناحية الشرب تقدر تشرب منه لاني مسويه بنفس نظام خزانات المويه حقت البيوت معاج من الشبا والروائح الكريهه
بس للامانه اول الايام كانت ريحة الفيبر طالعه بس بعد الاستخدام اختفت الرائحه نهائيا.

ملاحظه : التناكي من السقف مسويه ثلاث طبقات ( طبقتين فيبر وبينهم طبقه صاج حديد ) من اجل انها تتحمل وزن اغراض الكشته فوق التانكي والعوارض الدخليه مسويها ستيل عشان صوت رجرجة المويه وتدعيم لسقف التانكي ...

واي استفسار انا حاظر وموجود وتحت امر الشباب جميعا للرد عن اي استفسار

تحياتي واحترامي
الـ ع ـارض
15/02/2005, 05:08 PM
الاخ الربذي :

لك كل التقدير والاحترام وكما يقال التجربه خير برهان ...

الفكرة ما نجحت من اول مره ولكن مع المحاولة والتطوير والاستفادة من اراء الشباب بالمنتدى وصلنا لهذا المستوى وايضا ما زلنا بحاجة تبادل الاراء من اجل الافضل


والله يوفق الجميع
علي الشهري
15/02/2005, 10:04 PM
بارك الله فيك أخي الكريم:العارض
والله يجزاك كل خير على رحابة صدرك وسعة بالك على الاستفسارات.

أذكر إني اطلعت في ها المنتدى على موضوع لأحد الإخوة ركب تانكي ستيل لليوكن أو للاند كروزر(لا أتذكر بالضبط) لكن المقصود إن التانكي ركبه تحت دعاسات الفرامل بجنب الشاص ويتسع لـ 90 لتر
فهل مرت بك هذه الفكرة...وما رأيك فيها بارك الله فيك.
*القبطان*
16/02/2005, 04:48 AM
اخي الغالي العارض
الف شكر على طرح تجربتك
بنسبة لتانكي كم رقم المصنع واين يقع
وجزاك الله كل خير
الـ ع ـارض
16/02/2005, 08:58 AM
حيك الله اخوي التنهات

بالنسبة للتانكي اللي تحت الدعاسات ما تنفع باليكون لان مكانه صغير اولا وثاني لو حطيت التانكي بتقابلك مشكله وهي صافية البنزين تحت الدعاسه مربوطه بجنب الشاصيه فبتصير مشكلة كل ما جيت تغير صفاية البنزين لازم تفك التانكي ...
وفيه مكان اخر باليوكون ... في الامام خلف الصدام الامامي فيه مكان يشيل تاكي حجمه 30-50 لتر بس ايضا مكانه غير عملي وما يستاهل حجمه انك تحطه
ما بقى الا مكان الاستبنه ومكانه مناسب والتانكي بيشيل حوالي 100 لتر بس تبي تبلش بالاستبنه وين تحطها ؟؟؟؟؟

بصراحه انا شرحت اليكون تشريح وما لقيت الا هذا الحل بالنسبة للتانكي

والله اعلم
الـ ع ـارض
16/02/2005, 09:00 AM
اخوي القبطان

هلابك يا غالي ومشكور على الاطراء

عزيزي ارسلت لك العنوان على البريد الخاص

ويااااا هلابك
علي الشهري
21/02/2005, 02:01 PM
ألف شكر لك أخي الكريم العارض على إيضاحك واقتراحاتك

أنا نويت أفصل تانكي ستيل -مثل فكرتك-يكون ارتفاعه 6 سم ويتسع لـ86 لتر تقريباً
أو ارتفاعه 5 سم ويتسع لـ 72 لتر
طبعاً العرض والطول 120سم × 120 سم

الفكرة أن يكون ثابتاً في الخلف

ومشدات المرتبة الخلفية أثبتها على ظهر التانكي بحيث لو بغيت أركب المرتبة تركب بسهولة على التانكي اللي ارتفاعه 5سم أو 6 سم

وأنجد ظهر التانكي بنفس لون ونوعية تنجيد الأرضية من باب إخفاء التانكي

فما رأيك؟؟

هل تؤيدني على الفكرة؟

بارك الله فيك وجزاك كل خير
الـ ع ـارض
21/02/2005, 06:33 PM
فكرة نوعا ما جيدة .....

ولكن لاحظ ارتفاع المرتبة الثالثة بيكون عالي والجلسة متعبه لان مشدات المرتبة داخلة في ارضية السيارة وليست على مستوى الارضيه يكون هناك زيادة بالارتفاع حوالي 5سم + 5 سم ارتفاع التانكي = 10 سم وهنا بتواجه مشكله في راس الراكب بيصير لاصق بسقف السيارة الا اذا كان بيركب اطفال صغار فقط فما عندك مشكله ...

اعد النظر والحسابات مرة اخرى ولا تستعجل واستشر صاحب الورشة اللي بيسوي لك التاكي ويزبط مشدات المرتبه

والله يكتب لك اللي فيه الخير
علي الشهري
21/02/2005, 09:55 PM
الله يجزاك كل خير يا العارض

ترشح لي ورشة ننصاها؟
الـ ع ـارض
22/02/2005, 09:16 AM
فيه ورشة الماجد بالصناعية اعتقد هم احسن ناس يسوون التانكي الستيل


ويا ريت تشيك صندوق الرسائل الخاص فيك يا بعدي
رفيع الشان
22/02/2005, 01:24 PM
هذا الشغل ... طريقه ذكيه جدا ... الله يعطيك العافيه يالعارض ... يعني تقدر تقول قلص صغير :)

الله يثيبك ... فمان الله
شاص
22/02/2005, 01:54 PM
تجربة رائعة ومفيدة تقطع الشك باليقين لا حرمك الله الأجر .. أرجو التكرم بإرسال رقم مصنع الفيبر قلاس وهل يصنع جميع التوانك بنفس المواصفات الموجودة لديك ؟ أم أنها مواصفات من طلبك ؟
الضيغمي
22/02/2005, 02:21 PM
ما شاااااااااااااء الله تبارك الله


اخوي العارض( عسى مايعرض لك شر قل آمين ) على هالعرض الزين

شغل متكتك وعدل الله يبارك لك فيما اعطاك

الحقيق انا ركبت سلة للجيب اللاندكروزر الصراح عمليه جدا ومفيدة
طبعا لها عوراض ومفصل له شراع بسحابات (شنطة) مانع عن المطر والغبار
لكن صناعة محلية يبدو ان اللي معك مستوردة لا واكبر ماشاء الله


الله يوفق الجميع لما يحب ويرضى
الـ ع ـارض
22/02/2005, 05:25 PM
رفيع الشأن :

جزاك الله خير اخوي وجعل الله لك من دعائك نصيب
الـ ع ـارض
22/02/2005, 05:28 PM
الاخ شاص : المصنع مسوي التانكي على طلبي وجاهزين لاي طلبيه ولاي حجم تبيه والرقم برسله لك على الخاص
الـ ع ـارض
22/02/2005, 05:30 PM
الاخ الضيغمي : هلابك يا بعد حيي والله بجزاك خير على الدعوه الحلوه ....

بالنسبة للسلة بالفعل هي مستوردة ولكن ادخلت عليها بعض التعديلات لتناسب احتياجي ...

والله يوفق الجميع
بن عدوان
22/02/2005, 10:28 PM
ما شاء الله تبارك الله ...

أنا حقييقة نسيت السلة .. وراح فكري .. صوب التانكي ...

والله انها فكرة ...

وجزاك الله كل خير
المطلق
22/02/2005, 10:41 PM
أخوي العارض

شي جميل جداً

بس أبي أعرف وين يكب من ورى

وهل يركب على غير الجمس مثل : VXR أو جيب لكزس

وإذا امكن صورة للمحل اللي بركب فيه ونفس اللي بالشبك اللي يدخل بالسيارة
الـ ع ـارض
27/02/2005, 10:11 AM
بن عدوان

حياك اخوي ويااااااااا هلابك
الـ ع ـارض
27/02/2005, 10:15 AM
الرياعي :

مدري وش قصدك ؟؟؟ قصدك التانكي والا السله ؟؟؟؟
راعي العوجاء
31/10/2005, 12:20 PM
السلة انا جربت الحجم الي اصغر شوي من نفس المحل الي وصفت جزاك الله خير

بصراحة مممتازة جداً وخففت من الحمل الي جوى السيارة وصرت اناضر من المراية الخلفية براحتي

بس اذا ممكن رقم المصنع حق التانكي
سعد الدين
31/10/2005, 01:11 PM
تجربة رائعة ومفيدة لا حرمك الله الأجر ..



أرجو التكرم بإرسال رقم مصنع الفيبر قلاس وهل يصنع جميع التوانك بنفس المواصفات الموجودة لديك ؟

والعنوان كاملا

مع التحية والتقدير
المجد
31/10/2005, 02:50 PM
ياليت رقم المصنع اللي سوى لك التانكي .. وموضوع ممتاز وجهد مشكور اخوي واسف للازعاج .
الـ ع ـارض
31/10/2005, 08:01 PM
الاخ راعي العوجاء .... حاولت ارسل لك رقم المصنع بس انت لاغي خدمة استقبال الرسائل الخاصه ...


الاخوان سعد الدين والمجد .... ارسلت لكم رقم المصنع على الرسائل الخاصه
راعي العوجاء
08/11/2005, 07:39 PM
اخوي انا ما الغيتها بس لاني جديد ما تشتغل عندي ياليت لو ترسلها على البريد
desperado.mac@gmail.com
راعي العوجاء
10/11/2005, 10:27 AM
اخوي ما رديت علي
الـ ع ـارض
10/11/2005, 05:51 PM
اخوي راعي العوجاء
اولا اعتذر عن التاخير ... ثانيا ارسلت لك العنوان على ايميلك
راعي العوجاء
12/11/2005, 11:34 AM
وصل الرقم والف شكر
منصور 1
29/01/2006, 01:52 PM
السلام عليكم
اخوي العارض
الله لا يهينك رقم المصنع التانكي اذا ما عليك امر وكذلك السلة وين سويتها
ابوخالد
29/01/2006, 02:43 PM
اخوي العارض ممكن رقم الى فصل التانكي والتلبيسه الله يخليك
هاه..؟
30/01/2006, 02:27 AM
الصراحة موضوع بالصميم .....
التانكي : الفكرة رائدة وأحسن مافيه إنك تقدر تشيله وتحطه
السلة : جازيتن لي بالحيل لكن الهوك اللي تعلق به السلة يلحم وإلا يربط ببراغي؟ وأيهم احسن ؟



*جتن فكرة إني أغطي السلة بشراع واخليه صندوق يصك من فوق(مثل شناط الحديد القديمة اللي بالبيوت)
وبذلك تفتك من المطر والغبار * (((( الفكرة مأخوذة من أخوي الضغيمي)))))
منصور 1
30/01/2006, 08:32 AM
العارض
الله يوفقك وجزاك الله خير وصل الرقم ومعروف المكان
لكن بنسبه للكنود كيف ثبته انا عندي المكان هذا فارغ
الـ ع ـارض
30/01/2006, 10:54 AM
الاخ منصور 1

هل المراتب منفصله وبينهم درج ؟؟؟ اما مراتب منفصله متصله ؟؟؟؟
سحاب1111
30/01/2006, 02:03 PM
ممتاز وجيد جداً
ابن بدران
30/01/2006, 05:42 PM
اخوي العارض الله يجزاك الجنة ووالديك

إذا ممكن رقم اللى فصل التانكي والتلبيسه ومصنع الرواقات الله لا يهينك
ابو شكاع
01/02/2006, 01:23 AM
<<< هذا العضو مستحي منك لأنه توه يشوف المشاركة

وانت الله يهديك ماتعرف تتصل وتقول أفتح مكشات :mad:

<< صار يهاوش ...تسني ما أخطيت :D

أبو فيصل ...يامال العافية ...بيني وبينك صرت أفكر أكثر بالسلة الخلفية هذي

ماتقول أنه بحال السفر ... تخبر عاد أنت ما ودي اقول شي وأبين للناس ... بس تخبر ..إذا كثر العفش ... صعبة الواحد يحط شي فوق بالسلة ...خصوصا إذا هو متعشي ومكثر :D
لذلك ودي أنشدك عنه
منهي عنده ...وبكم سعره ..وهل تركب على موتري مع العلم أن موتري ما بوه هوك
وأيهن تنصح به
السلة هذي أو الشنطة الي كانت معك يوم نكشت لم أم رقيبة ( الي كانت مثبتة فوق السلة )
وماقصرت ياعمنا :good:
نديم الليل
25/03/2006, 11:52 AM
اخوي العارض الله يجزاك الجنة ووالديك

إذا ممكن رقم اللى فصل التانكي ؟؟؟
منصور 1
25/03/2006, 11:58 AM
العارض الحقيقة انا السياره ما خذه مستعمله لكن مدري هلا صاحبنا هو اللي فصل المراتب او هي مفصوله لكن بيها درج ( مركى ) قدامه مكان فاضي وابي اركب درج في هذا المكان وشرايك العارض
منصور 1
25/03/2006, 12:01 PM
العارض الحقيقة ان السياره ما خذها مستعمله بس مدري هل صاحبنا فاصل المراتب او هي مفصوله خلقة لكن بين المرابت مركى ( درج ) وقدامه مكان فاضي ابي احط فيه درج
سحاب1111
27/03/2006, 12:10 PM
مشكور على الصور
يعطيك الف عافية
الضرغام
27/03/2006, 07:18 PM
الـ ع ـارض

في البداية أقول لك الله يبارك لك في السيارة
ويعطيك خيرها يارب ويكفيك شرها
موضوع مميز وماشاء الله عليك
تسلم أخوي وماقصرت <SCRIPT type=text/javascript> vbmenu_register("postmenu_296397", true); </SCRIPT>
خيال نجد
29/03/2006, 04:02 AM
أشكرك على العرض يالعارض

بس عندي مداخله ................

أذا كانت متكيه على حديده وحده بالوسط فزيادة الوزن والمطبات تأثر على وزناه فتنطعج إلي الجهه الأثقل

ولا تقدر تعدلها بعدين وهذا ماصار معي قبل 4سنين

أما أذا كان حديده من اليمين وحديده من اليسار فمهما حملتها تتحمل ...... هذا والله أعلم

أسأل مجرب ولا تسأل ......؟؟؟؟

ودمتم


http://www.mekshat.com/pix/upload/images15/mk23868_www.jpg