قصيده للشاعر هشام السلمي في تمنيه وتوجده على المطر

[حسيان]

هذه القصيده للشاعر هشام السلمي يتمنى فيها المطر على دياره وقد اسمعني القصيده في الجوال قبل اسبوعين تقريبا وانا تحت اول سحابه على طريق الرس دخنه مما كان له اثر علي وعلى كثير من الشعار ومحبين المطر وقد جاراها بعض الشعار سوف اورد قصائدهم في الأيام القادمه ان شاء الله تعالى واليكم القصيده




عسى الغايم اللي بالسما بارقه شباب =يهدي به الشرقي شهر ماهدى هبه
تراكب مراديمه تقل شامخات هضاب=على كل دار ممحله يامره ربه
يفضي خزينه كل يومه وهو سكاب=على الماقع اللي كل ماجيته اطربه
وفير الحطب ماداجبه موتر الحطاب=كثير الشجر راع الدبش مابعد طبه
عن الضيق لامن جيت به قفل الأبواب=يزين المزاج وتوها زانت الشبه
اركد معاميلي على النار بالمركاب=اقرب لي الدله وفنجالي اصبه
حياة الفتى ساعات يبذل بها الأسباب= على ماهواه الخاطر وخافقه حبه





الشاعر هشام محمد السلمي
ارجو من المشرفين تنسيقها 24/10/1429الرس

[حسيان]

ثلاثين شخص يدخل على القصيده وله يومين مابهم من قال صح لسانك شرهتي والله على المشرفين لكن يقول المثل(( توبة ابو عيسوب عن نومة الضحى))

[جرير]

صح لسانك واحساسك ولا هنت
ولك حق تزعل ثم لك حق نرضيك
تعرف المشرف هالايام ماغير مطامر بهالشعبان
متشفقين السيل

لك الشكر

[قرناس 22]

صح لسانك وسلمت يمناك وبيض الله وجهك

تقبل مرورى اخوك ابوبندر

[الضب الصماني]

صح لسانك ،،، والله قصيدة جميلة وقوية ومعبرة وهذا وقتها ،،، وياليت من يشيلها على الربابة....

[مفتاح التقنية]

للأسف اذا حطيت الؤشر على الصفحه اشوف القصيده واذا فتحت الصفحه ما تطلع القصيده ليه؟؟

هذي ثاني مره ابي اقراء قصايد ولا اشوف القصيده مع ان الكلام او المقدمه ظاهره عادي لكن قصيده ماكو ؟؟؟؟؟؟؟؟؟؟؟؟؟؟؟؟؟؟؟؟؟؟