يا اهل القصيم الكرام: ودي بمصافحة سيل وادي الرمه. وين ممكن اقابله.؟؟؟

[التورنيدو]

السلام عليكم ورحمة الله وبركاته.

ماشاء الله تبارك الله
مبروك عليكم هالخيرات والنعم التي انزلها الله علينا واكرمنا بها والله اسأل ان ينزل البركة فيما انزل فبدون البركة لن يكون لما انزل الله اي فائده.
------------
اشوف وادي الرمه صار عريس الوسم لهذا العام
اخباره طغت على كل الاخبار حتى معشوق الجميع الصمان راح في خبر كان وضاع وسط الزحمه( الله يازين اللي حضرت وغطت على كل الحضور).
ما اطول عليكم.
ودي اقابل سيل الرمه واسلم عليه وبعد اصور معه.
وين احسن مكان لاجراء اللقاء وللعلم اخوكم الفقير الى عفو ربه ورحمته جاي من العاصمة الرياض.!!!!

[الضيغمي]

السلام عيكم

مساك الله بالخير اخوي الترنيدو

ابشر بسعدك انت بمنتدى الكرم والفزعات
الحين يجيك يا مهنا ما تمنا

طبعا من الاخوة الاكثر خبره مني والا انا ؟؟؟؟؟؟؟؟؟؟؟؟؟؟؟؟؟:;)




يجيك من يشفي غليلك ويعطيك = وصف(ن)يبين لك مناك العزيزة



ارجو ان تحقق مبتغاك وتستانس

[لفح الهجير]

حياك الله يالترنيدوا بين أهلك وأخوانك ولوتامر نجيب لك الوادي للرياض قويه شوي
أخوي أول ماتاصل من الرياض يجيك الدائري الشرقي يمينك رح معاه أول مخرج جامعة الامام او القصيم الوادي يمشي من تحته , المخرج الثاني التشليح تشوف الوادي وانت بالسيارة بعده خذ يمين مع مخرج الربيعية والشماسية وتمتع بالمناضر الجميلة والبحيرات حتى تصل الربيعية, لعلي افدتك.

[شاهد عيان]

نرحب بك في القصيم سواء في بريدة أو عنيزة أو البدائع أو الرس أو أي مكان آخر ...

[زياد مكشات]

مشكوووووووووووووووووووووووووووووو

[ابو شكاع]

أخوي الكريم
أهلا وسهلا بك بالرس ... ولكن نصيحة ياليت تشاهد الوادي من أي مكان غير الرس ...لأن عندنا أجلكم الله إختلطت مياه الوادي بمياه الصرف الصحي ... الرس الوحيدة بين المحافظات التي يقع فيها مشروع الصرف الصحي على ضفاف وادي الرمة .... مصيبة الحقيقة ...الله يجبر حالنا
هذا أمر
الأمر الثاني كانت المنطقة عند وادي الرمة بالرس تتمتع بكثبان رملية جميلة "نفود" قضى عليها من قضى عليها بكل طمع وجشع الله لايوفق الظالم
عذرا لك ولكن ما أقول إلا ماقال المبدع ضيدان بن قضعان مع تحريف العجز
حزين إي والله إن قلبي حزين وخاطري مكسور ... لو أضحك وأتظاهر بالسعادة ياوادي الرمة

[راعي الرجم]

توجه فوراً الى عنيزة
فهو يمر محاذي لها
ويمر باجمل منطقة في القصيم حيث النخيل والكثبان الرملية
منطقة الوادي من سد عنيزة حتى الخنقة يمر فوقه خمسة جسور
اول ما تاصل عنيزة الوادي محاذي للمدينه من الجهة الشمالية
جسر الوادي على الطريق السريع
جسر الوادي الواقع بجوار مرور عنيزة
جسر الوادي طريق القصور
جسر الوادي طريق المطار
جسر الوادي في الخبيبة
كل الجه الشمالية المحاذية له كثبان رملية رائعة
مع اشجار الغضى
وفي المقابل تجد الوادي يفيض على مزارع النخيل


وياهلا ومرحبا

[أبونورة777]

حياك الله وبياك يالغالي ... وإذا ما كفاك وادي الرمة ... عيوننا لك .. ولا تنسى ترا ما نسامحك لازم تسير علينا نفرجك على باقي الخيرات اللي أكرمنا بها ربنا ..الله يرزقنا شكرها
والأخ لفح الهجير .. ما قصر عطاك الوصف اللي عليه العلم

[سحاب الرياض]

الأخ / التورنيدو

إذا أنت تريد تصافح الوادي .. أحسن مكان للمصافحة .. هو شمال البندرية 10كم على الأسفلت ثم اتجه مطلع
شمس أي شرق 8 كم ..سوف تجد أعمدة للكهرب لف معها .. هناك سوف تصافح الوادي .

أخوك توه جاي منه .. ورحلة سعيدة للجميع

[فتى شنه]

اجل بتصافحه :d خلك في العاصمه على قولتك لا يصير لك ماصار لصاحب الجمس ;)

[m1m]

قبل ما تمشي شيك على حالة الطقس :)

لكن أقترح تروح للثويرات تشوفه وهو يجتمع ويحير

[حقوق المطر]

توصل بالسلامة ...
اذا انت تبي تصوير مثل ماقولوا لك الشباب ماقصروا

لكن اذا انت تبي تصوير وكشته وتبي تشوف لسان الوادي ومناظر طبيعية
الأفضل :

وانت جاي من الرياض .. تفرق يمين ( للشماسية ) بعد نقطة ام سدره المشهوره
بعدين تسيّد تجيك الربيعية تسيّد لين تطيح بالوادي وتشوفه كانه بحيره
او بعد الربيعية تفرق يمين ( طريق الأسياح ) واذ وصلت اسأل عن ( البندريه )
والله يحييك ...