مشكله في الدينالي الدخول ضروري ياجماعه

[عاشق GM]

اليوكن الدينالي اللي عندي فيه تهريب في المكينه من عند الشبنه او الصوفه على ما اعتقد مثل ماتتسمى في السعوديه من الجهة الخلفيه اللي جهة الجير بدلتها ورجعة وبدلتها مرة ثانيه وليلحين تهرب وش الحل يالربع

[ابوطاقية]

انا عندي نفس المشكله وكان السبب اني اوقف السياره مده طويله على باب البايكه وكانت مرتفعه بقوه
والسبب الثاني عدم تحمية السياره اشغل وامشي على طول واعدم علي الصووف

[عاشق GM]

مشكور على المرور طال عمرك بس وش الحل

[tooto]

وسبب اللي انتم مو متوقعينه تركيب ابو يمكن الله بالخير
لان من اصعب شيء ويبغاله دقه تركيب الصوفه للقير
واللي بيغيرها يوديها عند انسان فاهم

[عاشق GM]

هو في احد فاهم بصناعيه كلن قام يشتغل اي شغله المهم يقبض قروش المهم انا ابغى الحل

[الوحش79]

عاشق الgm
كان عندي يوكن2002 وصارت فيه نفس المشكله والسبب كان حادث وخربو الصوف
الحل يبيلك 3صوف صوفة المكينه الخلفيه و2صوفة العكوس(اذا ماخانتني الذاكره عموما هم 3صوف بنفس الشكل) وهذي لابد من فك الدبل يعني وديه لشخص فاهم 100ميه وعنده يوكنات كثيره عشان يستريح قلبك

طبعا بعد كذا راح التهريب ولا عاد ابد برغم اني مركب نوعيه امريكيه سعر الوحده حول25
والتركيب350 وحولها وتاخد لها نص نهار وعلى زحمة الورشه

اذا تبي ورشه انا حاضر ادلك عليها بس وين انت فيه بالاول (واجيب لك القطع بعد
راسلني ع الخاص وان شاء الله اخدمك


وان شاء الله تدعيلي دعوه بالغيب صالحه


ومايشوف شر موترك ولاعاد ينزف ومواتر الحاضرين
(-:

[عاشق GM]

رحم الله والديك يالوحش انا بالكويت

[راعي الركيات]

اذا هي صوفة المكينه الخلفيه
كثير ماتهرب بسبب زيادة الزيت في المكينه
تاكد من مستوي الزيت في المكينه لايصير فيه زود يفجر باقي الصوف

[الوحش79]

اذا تجي الشرقيه ابشر بعزك

[عاشق GM]

دام عزك يالوحش

توني جاي من الصناعيه وعرفت سبب التهريب الثاني لاني مثل ماقلتلكم بدلت صوفة المكينه والغير ولازال يهرب طلعة الصوفة حقة كارتير المكينه وماتتبدل الصوفه الى لما تنزل المكينه حسبي على من صنعهاااااااااااا بهالمكان اللي ماتقدر تبدلها الى لما تنزل المكينه براااااااا وهي مكلفه جدا يعني سعر صوفة كارتير المكينه 10 دنانير وسعر شغل اليد من تنزيل المكينه وتركيب الصوفه واعادة المكينه وتركيبهااا اكثر من 120دينار وانا مكلفني من قبل تنزيل الغير والدبل وتركيب الصوفه الخلفيه وصوفة الغير يعني مأساة الله لايوريكم

[عاشق GM]

للرفع ؟؟؟؟؟؟؟؟؟؟

[الجندي2005]

الله لا يحلهم ............
وشذا الصناعات حوالي 200000 وهالخرايات

[عاشق GM]

حسبي الله ونعم الوكيل

[الوحش79]

قل الحمد لله
تجي بهذي ولاتجي بمكان ثاني ياخوي
عموما تنزيل المكينه وتغيير الصوفه بمايقارب 1500ريال غالي جدا
انا اسويها لك بـ1000ريال وانت تضحك مع القطعه بعد
عموما ماتسوى تجي الشرقيه عشان توفير 700ريال تقريبا

الله يعينك

وقول الحمد لله غيرك مبتلي بموتر موعارف شبلاه
ابتسم فانت في كف الـgmc
(-:

[عاشق GM]

اذا كذا ابدل الصوفه الاماميه بعد مدام بنزل المكينه مره وحده

[راعي البحري]

هذي مشكلة اللي يروح لمحلات غيار الزيوت امهات عشرة تلقى فيها أبويمن أو ابو هنود مايعرف وين الله حاطة ويزيد الزيت لين تنفقع الصوفة
أنصحك تغير الزيت في ايسي دلكو أو الخدمة لسريعة للجميح وغيره

خاصة انك تسوق سيارة مميزة ما شاء الله

[مزاااااجي]

السلام عليكم
اخوي الوحش 79 اذا تعرف ورشة ممتازة للدينالي تكفى دلنا عليها للضرورة عجزت وانا افر الصناعيه بالخبر والدمام بس ماني مرتاح كل واحد يعطيني كلام اذا تعرف ورشه زينه دلنا عليها ولك جزيل الشكر طبعا في الخبر او الدمام
وتقبل تحياتي

[Magellan]

صوفة كارتير صوفة دفرنس صوفة قيرصوفة مكينة
لازم تخرب لو زدت الزيت أجل وش له العيار حق الزيت
انا موتري ياخذ 6.6 لتر وأحط فيه 6 صافي
تدري ليش عشان ماتتفقع الصوف
كذلك زيت القيرنقصه شوي
ترى هالشيء في أي موتر وعن معرفة التويوتا والنيسان أكثر شيء يتفقع صوفهن

[عاشق GM]

بس لانقص يضر بعد

[الوحش79]

يحلوك ياماجلان

عجبني ردك الاخير حييييييييييييييل

هههههههههههههههههههههههههه
جبتها ع الجرح وكانك مادريت..............
(-: افرحتني جزاك الله الف خير

الاخ مزاااجي لك رسالة ع الخاص
وانا حاضر وممنون لمن يبي المساعده


تحياتي لكم

[عاشق GM]

كائن الموضوع فيه تعصب على .. و ..
هههههههههههههه

[Magellan]

حياك أخوي الوحش79 وعاشق Gm
والله يجمّل أيامك يالوحش
بس المشكلة إنكم تروحون لعامل مال البنشرجي وتقوله يبه بدّل الدهن
وتخلي هالجيكر يعبي فل الدهن
وعشان كذا تنفجر الصوف
ها وش رايك ياعاشق Gm بلهجتي تراني سعودي أو كويتي:p

[شاقي القميري]

اللى يبي يرتاح من التهريبات ياخذ له نيسان ويرح دماغه

[شاقي القميري]

يريح دماغه

[Magellan]

اللى يبي يرتاح من التهريبات ياخذ له نيسان ويرح دماغه


أخوي شافي القميري حياك الله
هنا في مكشات مايمكن إننا نرغم الناس على سلعه معينه أو سيارة بحد ذاتها ،،،
الناس أذواق وأنا أخوك وصدقني أغلبية الإختيارات لاتعتمد على أداء السيارة
بعضهم يكره شكلها فبالتالي يكره الموتر كامل أو قلة في التجهيزات والكماليات
والنيسان لاشك بطران في النفد وموتر بر وفيه بعض العيوب اللي قد تخلينا نصرف النظر عنه
وهذا الموضوع مطروح لمناقشة مشكلة عند الرجل ولايعني وجود خلل فيها يعني على طول نحطx على السيارة
وماوضع هالمنتدى إلا لمناقشة الخبرات والحلول وقد يكون الحل أبسط من وصف صاحب المشكلة بأقل التكاليف
لذلك يكمن الدهاء في معرفة الخلل وتشخيص المشكلة ووصف العلاج وهو الحل ،،،
وصدقت بتوقيعك:
فل الحجاج وخل عنك الهواجيس.....كلن يموت وحاجته ماقضاها

وبارك الله فيك

[عاشق GM]

أبشركم يالربع الحمدلله انتهت المشكله ودخلت السيارة الوكاله وعلى قولت المثل ( عط الخباز خبزه ولو اكل نصه ) وبدلت كازكيت الكارتير بدون تنزيل المكينه من تحت وتبديله وتنضيف الكارتير وارجاعه والحمدلله انشالل المشكله انتهت واشكر اخواني المكشاتيه الاعزاء على الفزعه واقول ماهي غريبه عليكم يالغاليين وتسلمون وانشالله تكون تجربتي استفدتو منها وهذا اهو المهم وشكرا