نيدى ال الهلال الاحمر اين انتم

[خوي حسن]

السلام عليكم ورحمة الله وبركاته
الكل يعلم مارزقنا الله في هذه السنه من الخير والنعم وحيث ان
اكثر المناطق ولله الحمد مربعه ويعلم الجميع ان بعض الاماكن
يتواجد فيها الكشاته والمتنزهين بكثرة فلو تكرمة جمعية الهلال
السعودي بجعل سيارة اسعاف مرابطه عند هذه الاماكن ولو في
نهاية الاسبوع اربعاء وخميس وجمعة لااسعاف ومعالجة
من يحتاج للمساعدة ونعرف ان مرتادي هذه الاماكن من العوائل
التي تصطحب معها اطفالها والذين قد يحتاجون للمساعده عند
حصول مكلروه مثل لدغ حشرات اوغيره
او اسعاف المصابين في الحوادث كما حصل في يوم الخميس
الفايت عندما حصل تصادم عند مدخل روضة الخفس الشمالية
ولم يكن هناك مسعفين الى من بعض الاجاويد الذين قامو باسعاف
المصابين وتقلهم الى اقرب مركز اسعاف على طريق القصيم/
الرياض علما انه كان يتواجد سيارة المجاهدين ومع الاسف
لم يقمو بنقل المصابين وقامو بالفرجه فقط

[ابو شكاع]

الله يحفظك ياخوي

هالحين ما شالوا اللي طايحين على الطرق ............عاد يجون للي بالبر

ولكن وانا اخوك

رايك طيب ..................والله يجزاك الله الجنة قل آمين

:)

لاهنت

[عبد الله الفايز]

تراك هيضت خاطري أتكلم عن أفشل جهاز حكومي .
خذ قصة قريبة حصلت لي أنا شخصيا ماأقول يقولون
يوم 4 ذو الحجة يعني مفروض انهم في قمة التعبئة والاستنفار على أهم طرق الحج البرية حصلت لي قصة وهي باختصار
طلعت أنا والوالد والاخوان نبي الصمان مشينا عقب صلاة الاخير يوم صارت الساعة 11 والانا عند أم الجماجم قال الوالد خلونا نمرح عند النقيان الكبار حتى نشوفهن الصبح ونمشي خير انشاء الله طلعنا تقول خمسه كيلو ونزلنا عفشنا أحد يفرش وأحد يسوي لنا عشاء خفيف والوالد شب على الشاهي .
اجتمعنا عند الضو والبريق يفوح تونا حاطين السكر التفت واحد منات يبي ورق الشاهي وند البريق وهو يفوح
الله يكافينا الشر وينزل البريق على رجل اخوي وعليه شراب وتغدي رجله لحمة مستوية وينسلخ جلد يمكن 15 سم..... واقوم اركض نصب عليه ماء بارد وثلج واوديه للإسعاف جيت الشرطة اللي على المدخل .. وين أقرب إسعاف قالوا مالك إلا الهلال الإحمر واروح والقا مركزهم ماشاء الله أنوار مولعة وسيارات جاهزه وتلمع ... نزلت مالقيت عند السيارات أحد وأدخل أصوت مايرد أحد أدخل إلى الصالة وألقى دفاية ومراكي وشاهي بس مافيه رجال أصوت مايرد أحد أروح إلى المطبخ ماحولي أحد ياولد يارجال ماش مايرد أحد لقيت باب غرفة مسكر طقيت والله ويطلع لي رجال عليه بجامة نوم سلام عليكم السلام قلت معي أخوي وهذا وضعه قال طيب وش تبي قلت أبي مسعف يعالجه قال ماأعرف ولا فيه غيري الساعة وحده هالحين قلت طيب ناد لنا أحد قال مأنادي أحد قلت طيب عطنا ضمادات وأنا اسعفه قال ماعندي إلا لفات شاش كان تبي عطيتك
طيب مرهم مطهر مضاد قال ماعندي . المهم طولت عليكم أخذته لمستشفى الارطاوية ولا قصروا الشباب اللي فيه الله يبيض وجيههم والحمد لله توه هاليومين صار يقوى يمشي على رجله
الشاهد من القصه حال الهلاس الأحمر هذا مركز على أهم طريق وفي أهم وقت من السنة هذا وضعهم وش ترجي منهم وقصصهم واجد الله لايجعلنا نحتاجهم ... الله من الملايين صرفت عليهم وصارت لاشيء

[الطبيب]

الاحظ ان الموضوع اخذ منحى النقد اكثر منه للاقتراح ( كما تفظل اخي خوي حسن )

يعني المسأله بدأت باقتراح ثم انتهت سريعا بانتقاد

ولا اقول هنا ان الهلال الاحمر ليسو مقصرين او ادافع عنهم ( لا والله )

ولكني اقول لو نوقش الموضوع كاقتراح واضيفت اليه نقاط مهمه ووجهات نظر متعدده للوصول الى افضل النتائج لكان اولى
ولنتذكر ان منتدى مكشات اصبح اشهر من نار على علم وان الكثير والكثير من المسئولين في جميع القطاعات يتابعون اخبار الربيع والامطار والصيد من خلال مكشات

اذا فليكن نقاشنا منصبا لحل المشكله وليس للانتقاد وتفريغ الشحنات ( السلبيه )

هذا رأيي الشخصي

هذا والله اعلم

والسلام ختام

[* ضب *]

السلام عليكم ورحمة الله وبركاته

انا مع اقتراح الاخ خوي حسن :good:

عبدالله الفايز / الحمد لله على سلامه اخوك .. وما يشوف شر

واقول للمشرف الحبيب الطبيب :)
لكي تستقيم الامور لا بد من النقد ، نقد هادف لا يمس احد في شخصه


ولكم تقديري

* ضب *

[عبد الله الفايز]

والله يالطيب إني ماكتبت هذا إلا من القهر
ياليت النقد ينفع أو المدح ينفع كله واحد
الجامع لكل مشاكل الأجهزة الحكومية اللي من هالنوع إسعاف دفاع مدني بلدية ... الخ
(((( من أمن العقوبة أساء الأدب ))))
لو هم يعرفون إني أبشتكي والا اشتكيت جتهم مساءلة وعوقب المقصر بالعقاب الرادع ماكانوا كذا
(( معليش شكلي تهيضت مرة ثانية ))

[بركان]

اخوي الطيب
لم نبلغ الكمال بعد ولن نبلغه
فالكمال لوجه الله تعالى
لا تكن حساسا من النقد الى هذه الدرجه
خل الاخوان يأخذون راحتهم
فكل امريْ بما كسب رهين.
تحياتي.