طلب خاص وعااام(( أرجو من الكل الدخول)) الموضوع لن يكتمل الى بدخولكم )* يأهل مكشات*( [الأرشيف]

الجوني

25/02/2004, 08:27 PM

السلام عليكم ورحمة الله وبركاته

الحمدلله والصلاة والسلام على رسول الله وعلى آله وصحبه أجمعين

اخواني بدون مقدمات اول شي أسف على اختيار العنوان ثاني شي انا ابي خدمتكم
الله يسلمكم قررت اني اطلب عربة سحب للعفش لاكن انها تكون من تصميم انا واهل مكشات هذي صور للعربة واطلب منكم ان كل واحد يطرح راية بالعربه يعني يقول اضف كذا عدل كذا كي نطلع او نسنتنج عربة من نوع غير وتكون مكتمل وفيها اجتمعة افكار طيور البر لا تفشلوني على الاقل لو برفع الموضوع كي من لم يره يراه

أدعوا الاعضاء كلن بإسمة :/ مكشات.السمح.ايمن.حفرولوجيا.العارض.ابو راشد.رمش العين.فرد حمزة.راعي عنيزة.عليان الليل.صقر.$الزير$, abos3d, أبرق الضيان, , ابو حمودي, بارق الضحى, حائل, saag, فـ(الجـوف)ـتى, ن.64.الحر.الملثم.مفتش الريضات.كشات.كل الاعضاء تراي ودي اذكر الاسماء كلهم بس ماعندي وقت تكفون

هذي الصور

http://www.mekshat.com/pix/upload/images4/3arabh.jpg

http://www.mekshat.com/pix/upload/images4/3arabh2.jpg

http://www.mekshat.com/pix/upload/images4/3arabh3.jpg

أنا إقترحت اني ازيد الكفرات يعني بدل انهن ثنين يصيرن اربعه امن للربعه . يالله انا فتحت الباب

abos3d

25/02/2004, 08:51 PM

بسم الله اول تعليق
لو تطولها شوي وتحط الكفرات الي ودك تزيدها وبغيت اقولك عنها قبل ما اقرا التعليق انه تكون متحركة يعني اذا لفت سيارتك تلف معها يعني تكون مربوطة بسيارتك مباشرة وتحط مكان لماطور كهرب صغير من الي تكون كنها شنطة تطلع حول الثمان مية واط تكفي لخيمة او خيمتين مع انارة مكان الجلسة مع شاحن جوال ويكون يتسقط فيها تسقيط عشان يثبت مظبوط ومكان لتانكي بنزين ثاني وتكبر الثنين وسلامتك

الجوني

25/02/2004, 08:54 PM

هلا والله بأ ابو سعد وشكرا على مرورك السريع واجابة الدعوة الماطور :good: راحت عن بالي وكذلك ابضيف بطارية واشبك عليها افياش وش رايك ;) بس ياليت تشرح بالتفصيل هالكلام ((كنها شنطة تطلع حول الثمان مية واط تكفي لخيمة او خيمتين مع انارة مكان الجلسة مع شاحن جوال ويكون يتسقط فيها تسقيط عشان يثبت مظبوط ومكان لتانكي بنزين ثاني وتكبر الثنين وسلامتك
ياليت تشرح اللي تحته خط

البوصلة

25/02/2004, 08:59 PM

اقترح عليك ان تركب مكان اسطوانة الغاز والجركل خزان ماء وتضع حامل اسطوانة الغاز في الجانب الايمن او الايسر . هذا اولاً
ثانياً : الانوار الخلفية شبه غير واضحة على الجانبين .افضل مكان في الخلف تماماً.
ولا تنسى النسافات .
هذا اقتراح والامر اليك اولاً واخيراً .
وتقبل تحياتـــي

abos3d

25/02/2004, 09:27 PM

الماطور شكله مثل الشنطه الصغير او الحافظه الصغيره ويطلع لك ثمانمية واط كهرب وينفع ينور خيمتين مع مكان للجلسة ويكون المكان للماطور مثل حق الغاز يعني يكون عليه شبك يثبته ومكان تناكي البنزين تكبر لانه صغير ولا يكفي الماطور الا ليوم او ثنين فتاخذ معك ازود من حاجتك احتياط لو تفضا سياره مثلا او شي ثاني

فهمت والا افصل الشرح زيادة

مكشات

25/02/2004, 09:45 PM

وعليكم السلام ورحمة الله وبركاته
حياك الله اخوي الجوني ومشكور على الدعوة .. بارك الله فيك ..
شف الله يسلمك الصورة تبين إن العربة بوضعها النهائي ولايمكن إجراء التعديلات التي أراها ولذلك إعتبر رأيي في عربة لم يتم تصنيعها بعد ..
رأيي :
1 - كونها بكفرين أفضل لعملية التوازن والإنعطاف ..
2 - يفضل تطولها شوي من شان يكون فيها مجال لوضع تانكي ماء وشنطة لأدوات البر .. الشنطة بين حامل الغاز وحامل البنزين أعتقد هالمكان مناسب أما الماء فيمكن أن يوضع خلف الحوامل مباشرة ..
3 - يفضل أن تهيء العربة لتحميل ( الدباب المتوسط ) على ان يكون الباب الخلفي مهيء لتركيبه بطريقة سهلة ..
4 - يفضل ان يكون هناك عمود متداخل يمكن إطالته عند الحاجة لتعليق الذبيحة أو تعليق إنارة ..
..............
هذا مالدي في هذه العجالة والسموحة ..
بعد إذنك : تم نقل الموضوع إلى مكانه الطبيعي
تحياتي

الجوني

25/02/2004, 10:52 PM

البوصلة::/

أشكرك على مرورك:)....أشكرك على رفعك للموضوع:)...الأ تلاحظ ان بعض اقتراحاتك موجودة:(...اللمبات الخلفيه ماعليها انا أسأل اخوي البوصلة عن الاضافات وانت أبخص.
[line]
abos3d::/

مشكور على التوضيح:rolleyes:... لاكن هل تخبر لي ماطور يسوى مع سعر طيب;)...وياهلا ومرحبا وشكرا على اقتراحاتك.
[line]
مكشات ::/

أشكرك على تلبية الدعوة:good:.... العربة ليست هي اللتي سأنفذ عليها طلباتكم انما عربة في طور التنفيذ اخت هذه لاكن حتى الان لم أبدأ...والله الكفرين اكيد لاكن اتوقع الاربعه أرسى ولو لا قدر الله انفجر احد الاطارات ما تتورط لأنها قد تسبب لأنقلاب السيارة لأنها تلتف بزوية حادة وانت ابخص...رأي جميل:good: .... الا ترى ان العربة هي بالاصل للدبابات وراجع الصور ستجد الحدايد اللتي في الخلف الصورة رقم 2....كأني فهمت الجزء الرابع لاكن ان حصل ان تشرح بزيادة يكون أفضل... وشكرا لك على نقلك للموضوع.

...أنــــا بإنتظــــــار البقية...

مغليكم:/ أبو صالح:heart:

ابو ســــاره

26/02/2004, 04:29 AM

بصراحة حبيت اضيف شي اساسي للعربه ومهم وهو الاتزان يعني اذا بغيت تحط تانكي احرص انه يكون مفروش مثلاً يكون هو ارضية العربة عشان تحفط التوازن وكذلك لما تحط مكان للماطور لازم تخلي فيه شي مقابل له في الجهة الثانية مثلا دبة الغاز .
واذكر مره شفت عربة مركبلها راعيها ادراج من جميع الجهات ومجرد انك ترفع حديده زي المزلاج تنفتح جميع الادراج واقرب مالها بالوصف سيارات شركة الكهرب القديمات .
كذلك لا يلعب عليك راعي ورشة المميز ويقوللك اشتر من دبابات البقي الي عنده تراهن مكاين هايلكسات قديمه:D

الهرش

26/02/2004, 06:28 AM

هلا بالجوني وفكرة ممتازة
انا اقترح ان يكون هناك اعمدة على الزوايا قبلة للطي يعني تطولها وترجعها تصير لشراع للتضليل تستفيد منعه , وضع امكنة خارجيةلبعض الحاجات مثل واير للسحب و الشيول و خزان ماء اسفل العربة يكون مستطيل حتى ما يصير نازل كثير
كذلك بالنسبة للغطاء الخارجي الاصفر لو انك حاطة قابل للزيادء تطويلة او تقصيرة حسب العفش , ويكون شبك افضل او يلبس شراع , في الحقيقة فكرة ممتازة
ويعكيك العافية

الجوني

26/02/2004, 08:53 AM

ابو سارة:mad: الله يقطع شياطينك اخس انت يافضحهم هههههههههه لا ماني راعي دبابات وش قالوا لك مراهقه متأخرة الله يصلحك ومقبول اقتراحك مع اني مافهمت بعضه ياليت الشرح يكون مفصل
[line]
الهرش مشكور على اقتراحاتك والصراحة القلوب عند بعضه انا فكرة بنفس مافكرة انت فيه والشراع ابحول اضبطه ان شاء الله

الـ ع ـارض

27/02/2004, 06:07 PM

اهم شي الامان

العامود اللي طالع من القلص ويركب على الهوك بسيارتك لازم تركب له مساعد بستم صغير عشان وانت ماشي ومركب عفشك ومسكت فرامل ما يدف القلص السياره ..

الفكره هذي موجوده على القلص الفرنسي ومكانهم على الدائري الشمالي قبل كوبري الفحص الدوري على اليمين .

ثانيا لو تركب دفرنس للكفرات افضل من العامود للحفاظ على توازن القلص وبالتالي توازن السياره .

ثالثا لين سويت القلص وجربته لازم تعطيني فيه دوره :D

والله يعطيك خيره ويكفيك شره

الجيب الربع

28/02/2004, 03:02 PM

أخي العزيز الاخوان كفو ووفو في المواصفات ولكني اريد أن تشدد على مسألة الأمان في المقام الأول ولذا فمن الأفضل أن يكون:

1- العمود الذي يمسك فيه الهوك من الأفضل أن يتفرع على شكل 7 حتى يصل الى مكان اتصال الكفر بالبودي والدنقل وفي هذه الحالة سوف تقلل احتمالات الإنقلاب في حالة البنشر.

2- الدفرنس سوف يكون زيادة ثقل مع العفش والإضافات فلو حصل دنقل يكون أخف.

3- من رأيي الخاص أن تطويل المقطورة سوف يسبب ازعاج في المنعطفات والريوس وفي حالة الإحتياج الى حيز أكبر فكر في رفع الحواجز الجانبيه.

4- من الممكن الإستفادة من الجوانب التي بجوار العجلات لوضع شبك للرواقات أو الحطب.

5- فكر في وضع أماكن من الجهات الأربع لتثبيت مواصير للذبايح أو لتعليق الأضواء أو لتركيب خيمه خفيفه.

6- لاتنسى تركيب استبنه اسفل اذا فيه مكان.

7- تانكي الماء من الأفضل أن يكون متحركاً في حالة ان تستعمل المقطورة لأغراض نقل أو تحميل غير المكاشيت.

8- حاول أن تكون المقطورة خفيفه بقدر الإمكان بالتقليل من الحديد .

أرجو أن لا أكون أطلت عليكم وتقبلوا صادق التحية

ظنى مرزوق

28/02/2004, 03:15 PM

جاني جنى مجنياً عليه ومتجني . ( امزح معك ) ;)

اما العربة فكما قال مشرفنا العزيز مكشات :
لكن هل العربة هذي هي وإلا صورة فقط .

هذا شي ، واما إن كانت هذي هي :
فارى ان تكون اطول .
وتكون مجهزة للشراع عن المطر وكذلك تركب كفرات عريضة ويكون الراس حق العربة متحرك
وتحط على الجوانب وإلا امام او خلف صناديق صغيرة للعدة والمسحات والواير وغيرة عشان تكون قريبة للشغل .

وشكراً .

اقراحات اخيك الصغير ؟
:p

الشبارم

29/02/2004, 02:45 PM

اخوي الجوني
السلام عليكم ورحمة الله وبركاته

اذا كنت ناوي تطول المقطورة اود ان اقترح عليك مايلي

1- هنالك صناديق جاهزه تستعملها بعض الشركات كاورشة متنقله كما في شركة الكهرب و شركة ارامكو
و هي تجي بحجمين على ونيت حجم 35 و على القطع 10. و انا قترح عليك حجم القطع 10 و هو نفس مقاس صندوق القطع 10 بس كله دروج على الجهتين اليمنى و اليسرا و في الوسط فيه مساحة تحط فيه الي تبي من خيمه الى تفصيل تانكي .

و يكون هذا الصندوق على سطحه بمثابة مقطوره .

ارجو ان اكون اوصلت الاقتراح على اكمل وجه .

اذا كان عندك اي ستفسار ارجو مراسلتي على الخاص لكي اتمكن من اعطائك رقم الهاتف.

اخوك

الشبارم

سرحان

29/02/2004, 06:05 PM

عندى ملاحظه ولا يضيق صدرك دقق على اللحام زين قبل البويه:D

مع احترامى للعماله يعملون بدون نفس..........;)

اقولها من واقع تجربه فى هذى المحل .

احلى تحيه

كشات

29/02/2004, 09:04 PM

بسم الله الرحمن الرحيم
السلام عليكم ورحمة الله وبركاته

اخوي الغالي الجوني

اسمح لي يالغالي ترى ماشفت موضوعك الا تو
هذا وانت ذاكرني بالاسم الله مير يسلمك ويسلم غاليك

حبيت اضيف بعض الاقتراحات
بس ماشاء الله تبارك الله الشباب ماقصرو الله يسلمهم جميع
ياخي تحس انهم يقترحون شي لانفسهم

الصراحه بيض الله وجيهكم جميع
ومن ناحيتي الا ابطلع لك بشي جديد :D
لو هو عدد صواميل الكفرات خلهن مثل جنوط سته صواميل عشان تستعمل استبنة البترول وما تحتاج تستعمل للسياره استبنه وللقلص استبنه غير

هذا ما اسعفني الوقت لذكره
ولي رجعه جايه ان شاء الله

عروان

01/03/2004, 12:18 PM

مرحبا أخوي الجوني

أنا ودي أحرصك على شاصي المقطورة وكفراتها. لانهم هم العمود الفقري للمقطورة.

الشاصي الخفيف ما يتحمل أوزان ثقيلة مثل الخيام. وأيضاً الكفرات الصغيرة لها حمولة محدده. أحرص على تركيب كفرات مناسبة.

أيضا أحرص على تلحيم الشاصي لحام كامل حتى يكون متماسك بعض اللحامين مثل ما قال أخوي سرحان كسالا و تلقى لحامة بسيط.

وأحرص على توزيع الحموله على كل الاتجاهات. مثل كلام الاخ أبو سارة.

تحياتي لك

راشد ابراهيم

01/03/2004, 01:30 PM

الاخ العزيز الجوني

السلام عليكم ورحمة الله وبركاته
ارغب ان اذكرك بقلص تعمله ورشة السريع في الدمام واوردة بعض الاخوان في هذا المنتدى المبارك ،حيث وضع مكان للبوتغاز والخيمه حيث يسهل استخدامها وارجاعها بيسر وسهوله والله يوفقك،ولاتنسى تضع مكان للاستبنه،ومكان عدة الطبخ لابد ان يكون مجلفن عن الصداء

* رمش العين *

01/03/2004, 02:08 PM

ياحبيلك بالحيل واغديك تعذرن على تأخر الرد لاني توي اسير على الموقع
والله يعطي الاخوان كل خير ما خلو شي لكن لعل الله ينفع بنا اخواننا واقولك لدي مقترحين بسيطين وهما :-
1 - حاول ان هالعربه تضف كل عفشك يعني لا تركب ولا قطعة عفش بالموتر السعه زينه.
2 - لو تجعل غطاء العربه من قطعتين تنفرش على الجنبين وغطاء في الوسط بطول العربه بحيث انه يكون سرير للنوم ( خصوص بالصيف وطلعات الصيد ) وكذلك الجنبين ممكن يكون فيها مرابط عشان توصل فيها شراع ويصير مثل الخيمه على الجنبين .
وكذلك اويد رئي احد الاخوان بان يكون تانكي الماء في ارضيت العربه كامله وبسعه كبيرة ترى الماء مهب حسوفه ولو يكون فيبرجلاس اخف على العربه.
اضافه (( لو تقوم بتجهيز حبال ثابته في اجزاء مختلفه من العربه للربط وتثبيت الاغراض ))
والسموحه على القصور ولكن البركه في الاخوان وهم اخبر مني ولكن من زود غلاك عصرنا المخ عصر لين طلعت هالمقترحات البسيطه والله ينفع به
وفي الختام السلام

الملثم

02/03/2004, 01:09 PM

الأخ الكريم الجوني أرجوا السموحة حيث أنني لم أدخل هذه المشاركة إلا التو هذا وأنت زهمتني بالأسم فالسموحة .
أما اللي عندي أقول أخواني ماقصروا وانا خابرلك واحد عنده ورشة يجهز هالعربات وعليها زيادات أنواع وأشكال إن شاء الله أمر عليه هاليومين وأصور اللي عنده واخذ الصور القديمة ولو تبي سعره علمتك وإن شاء الله بتفيدك

الملثم

02/03/2004, 08:34 PM

السلام عليكم ورحمة الله وبركاته

ترا يالجوني ماقدرت أصبر لين بكره مريت على المحل اليوم وصورت بعض الصور اللي عنده مع ملاحظة أن
الصور غير واضحة لأني صورتها من صور عادية لكن تصلح شي ماء
عموما هاك الملاحظات مع الصور

تلاحظ في هذه الصورة مكان الكفر وقدام خزان ماء ومكان جريكن بترول وخلف صندوق والصورة الثانية من الجهة الثانية ماطور الكهرباء

http://www.mekshat.com/pix/upload/images4/DSC00077.JPG

http://www.mekshat.com/pix/upload/images4/DSC00076.JPG

وعندك هذا النوع شف وين خزان الماء
http://www.mekshat.com/pix/upload/images4/DSC00075.JPG

وعندك هذه تفتح الجوانب لتصبح مجلس وخيمة
http://www.mekshat.com/pix/upload/images4/DSC00074.JPG

http://www.mekshat.com/pix/upload/images4/DSC00073.JPG
http://www.mekshat.com/pix/upload/images4/DSC00072.JPG

وجينا في الجد شف هذه الزيادة وانا باسميها بلهجتنا لأني ماأعرف وش تسمونها
جانبين وطي مع الريش يعني انسى الوعرة والقرقعة ريافة آخر كلام
http://www.mekshat.com/pix/upload/images4/DSC00071.JPG
http://www.mekshat.com/pix/upload/images4/DSC00070.JPG

وسلامتك والسموحة على القصور