فزعتكم بطلب قصيده

[عاشق الطرد]

السلام عليكم ورحمه الله وبركاته
لو تكرمتو شعراء مكشاتي الحبيب ابي طلب فزعه لقصيده سبق سمعتها من زمان
ارجو من تحضره القصيده مع القصه كتابتها تكفون يالنشاماء مع العلم اني لم احفظ منها سوا بيت
ياذيب يالي تالي الليل عويت ثلاث عويات قويات وصلاب
ابسالك ياذيب بالله وش سويت يوم الثرياء عودت والقمر غاب
ولكم تجزيل الشكر

[دغيم1]

حياك الله أخوي
هذى قصة الأبيات وهي منشوده في شريط
خطب أحدهم بنت وعقد عليها , وقبل الدخول عليها حدثت دماء بين الأسرتين وتفرقوا فأرسل الى زوجته سرا يطلب منها الخروج اليه اذا سمعت عواء كعواء الذئب ثلاث مرات ليتفاوض معها في شأن اتمام الزواج فخرجت اليه وعادت الى أهلها خفيه ثم ظهر عليها الحمل مما نغص حياة اخوانها وأجمعوا على قتلها لولا أنها أخبرتهم بأن الحمل من زوجها وذكرت لهم القصه0000فقال أخوها الأصغر واسمه رشيد: ان زوجها لا يعرفني وسأذهب اليه واخذ منه الخبر فان صح خبرها والا قتلناها فتسلل الفتى الى العرب وأكرموه وكان عندهم رجل يجر على الربابة فقال له رشيد أعطني الربابة فأنشد :

يا ذيب ياللي تالي الليل أعويت
ثلاث عويات على ساق وصلاب
سايلك بالله عقبها وش سويت
يوم الثريا راوست والقمر غاب


وبعدها أخذ الزوج الربابة ليعترف لأخو زوجته ولجماعته عن الواقعة وليبرىء ساحته وساحة زوجته
وأنشد :
أنا اشهد اني من قراكم تعشيت
وجريت شاة البيت من بين الاطناب
على النقاء والا الردى ما تهقويت
ردوا حلالي يا عريبين الانساب


الأبيات فيها إختلاف بين بعض من نقلوا القصيدة

تقبل تحياتي

[طريفان]

أنا اشهد اني عقب جوعي تعشيت



واخذت شاة الذيب من بين الاطناب



على النقى والا الردى ماتهقويـت



أدّور ، حلالي ياعريبين الانسـاب




صح لسانك ولا هنت

[arrow]

بسم الله


تصحيح حسب مااعلم :

ياذيب ياللي تالي الليل جريت

ثلاث عويات قويات وصلاب
سايلك بالله عقبهن ويش سويت

يوم الثريا سرجت والقمر غاب



الرد :

انا اشهد اني من قراكم تعشيت

واخذت شاة البيت من بين الاطناب

على النقا ولا الردى ماتهقويت

ردو حلالي ياعريبين الانساب

[عاشق الطرد]

السلام عليكم مساكم الله بالطيب
بصراحه يعجز اللسان عن الشكر لكم
دغيم الف الف شكر لك اخوي ماقرت بيض الله وجهك
طريفان الف الق لك مشكور
arrow يعطيك الف عافيه وشكر
الله يعافكم جمعا ويبيض الله وجيهكم

[جرير]

الشكر لابو فيصل دغيم1 علي الافاده
وللمعلوميه القصه موجوده ضمن سلسلة
قصه وقصيده
وهي مثبته في اعلى الخيمه
لكم التحيه