قصيده في الامطار التي عمت على بلادنا الغاليه وجريان وادي الرمه

[الرحال الجديد]

اريــــد رأي الاخوه الشعراء في هذه القصيده حيث اول قصيده لي في هذا المنتدي (ابوصالح ) تحياتي للجميع

ركبت أنا اللي موردينه من الغرب ،،،،،،،، الوارد المعروف محـدن يفوقـــه
شيكتله وغيرت زيته على الــدرب ،،،،،،،، من شان لاعطل ولا من مروقــه
دقيت سلفــه والمكينـــــه إتـعـذرب ،،،،،،،، وطلقت بالخط المزفلت إسبوقــه
ريحت قيره والمشاويــــر تــقـرب ،،،،،،،، يالله تكفيــــه العيون الرموقــــــه
أعطيه وآمالي تخالف كمـا الحرب ،،،،،،،، او حر نار بالصباح إمحروقـــــه
مشيت لـديـــــار بهـا النبت مشرب ،،،،،،،، من ماء مزن لامعات إبــروقــــه
خذتلها إسبوعين تـرعــــد وتسرب ،،،،،،،، وتسيـــل شعبــان زمـان شفوقـــه
قلبي أنــا من الشوق ياناس معطب ،،،،،،،، متلهف لـديـــــار نجـــد العروقــه
امشي وطالـــع والنــواظر تـرقب ،،،،،،،، ودعي بعد منشي السحاب الحقوقه
اشوف طير البر بالصوت يـرعب ،،،،،،،، ومن الفرح مدات ريشـــه طلوقـــه
الطيــر يغرد والتــــوالي تــطرب ،،،،،،،، والماء صافي والنـــواظر طلوقـــه
غدران وفياض بهــا النبت ينصب ،،،،،،،، ورويت بفضل اللي يراكم اطبوقــه
أبكي من الفرحه وخايل عطاء الرب ،،،،،،،، الـرب يعطي والمعاصي غموقـه
اجرى الشعيب اللي له اسنين مارب ،،،،،،،، يمشي إبـدربـــه راسيات اعروقه
من اعتـــدى دربــــــه ابيت تخرب ،،،،،،،، يجرف جميع اللي يحادي اطروقـه
مسايل ربي بـــداهـــــا من الغرب ،،،،،،،، تمشي ولاتحتــــاج ردم ومشوقــــه
مابين كــاف ونـــون امره يـتكرب ،،،،،،،، يالله تبـــــارك في مبـادي اشروقــه

وسلامتكم

[الرحال الجديد]

السلام عليكم اتمنى من الاخره الرد على هذه القصيده مع الشكر للجميع

[العمدة ابو صالح]

هلا وغلا
والعذر من الله ثم منك والله ماشفت المشاركه الا متأخر
فحياك الله في محل يتنومس بمثلك وشرواك والله
وحللت اهلا ووطئت سهلا يالقرم
وصح لسانك ثم صح لسانك وتعلى شانك
وقدومك مبشر بكل ماتعنيه الكلمه
لاهنت يالقرم

[الرحال الجديد]

شكرا لك اخوي ( العمده ابوصالح ) وانا اتشرف بهذا الكلام الجميل منك ومشكروووووووووووووووووووووووووووووو جدا