عندي عزومة وودي أشري ذبيحة ، ولا أعرف ..ممكن تساعدوني !!!

[سماوي]

بسم الله الرحمن الرحيم
السلام عليكم ورحمة الله وبركاته

الصراحة يا أخواني ...

لمّا أدخل سوق القنم .... قصدي الغنم ...!!!

أبلش بروحي ...

ودي أشري ذبيحة ... بس ما أعرف ...

لأني أخاف أشري ( غنمة حويل ) ...:mad:

قصدي محيل .... لا لا لا ... حايل ... :D :D

ومرّة أشوف هكا التيس اللي تخاف من لغابيبه .... ( أحسن يا مثقف )

وودك بس تعرمشه وهو واقف بالمبيعة ...

وفي الحلقة الأخيرة ... يطلع فحل :(
*****

إلى شفت الرخلة المدحرمة ( المدوّرة ) .... بدت سعابيلي تتقاطر ...

فأجي للدلّال وأقول : بكم الذبيحة ؟؟؟ والله يا شكله مربّعة ..!!!:good:

من وين جايّه ... شكل أرضه ممطورة ...


فيناظرن نظرات حقد ...:mad: :mad:
ويقول أنت ووجهك ...
هاذي مضرع ( حامل ) ... يا قنم

أنصحك ...رح إشر دجاج تراه دايم مربّع ....

فأحط يديني وراء ظهري متشابكات و أرفع راسي فوق وأدلّي أصفّـر ... وأهج عنه !!!


فقلت غدين أشوف أحبابي ( حقين مكشات ) ....

يعلّمونني كيف أشتري ذبيحة ...!!!:what: :what:

وانا داري إنهم يعطوننا من البعمات والمصايب اللي تعوّدناها منهم ...
وهي ما هب غريبة عليهم .....!!!

ويا ويلك يا سماوي ....

[خشم الحصان]

سماوي
السلام عليكم
مغير اقول الله يفشل بليسك فشلتنا اسحب كلامك لاحد يدري الحين مكشاتي وخر ياولد وصياح ونجره وتلاتها
ماتعرف تشتري كمخه اجل لو قالو رح جب لنا حاشي وش بتجيب........ الله يعين.
اخوك الذي ضيقة صدره
خشم الحصان:mad: :mad: :confused:

[راع الكحيلة]

ما عليك وانا أخوك
الدعوة هينة

شف يا خوك إن كانك رايح تشتري خريّف هرفي ( وهذ إختصاصي) أول شي تجي يمه وتناظره ..وتتمقل..في زوله هو زين والا لا... صوفته هي زينة والا مكرمشة ومطينة.... والا مغسّل... (هذي ماراح تصيدهاإلا عقب بطا)

إن لقيت أسفل بطنه مصيّن ومطيّن ترا ..ها الطلي رابي في حوش ضيق ووسخ والله أعلم في علفه.

طبعا ما يحتاج أقول لك شلون بتعرف انه طلي والا رخل.

ثم حط يدك على ظهر الطلي ..

إن لقيت ظهره مليان ولا تشعر بعظام العمود الفقري في يدك بل تحس بأنه مليان لحم. ...فهذا زين على زين

وانتبه ترى بعض الباعة يركض على أبو أنه بيخدمك ويرفع لك مقدم الطلي ويقول جس (أي تحسس ظهره)

فانتبه ولا تفعل وقل له ينزله أول ......ليييييييه؟؟؟

لأنه إذا رفعه ستحس أن ظهره مليان وهو خرطي مغير اللحم اللي فوق نزل على الظهر والسبب الرفع.

بعدين لا زم تجي يم البايع بكل ثقة (يبغا لها تدريب) وتصيح..... بكم ذا الطليان؟؟

إن أعطاك السعر زين على زين .......لكن

إن طالعك بكل إستخفاف وقال لك.... ماهنا طليان ذي معزة

فهنا تحتاج لك دورة لا تقل عن ثلاث سنين تقضيها في صياهد الصمان وتتأمل الحلال حولك.

[ابو ايمن]

هههههههه

ياحليلك اخوي سماوي وانت حاط ايدينك ورا ظهرك وتصوفر . :) <--- حلوة هذي .

ولا تنسى اخوي تطالع في خشم الطلي . كانه ( مزكوم ) <---- ياربيه . يعني هذا يدل على أن رئته ماهي صحيحة بالحيل ويمكن توه طايب من علة .

وحاول تفتح سنونة تشوف فيها أثر عشب خضر ولا يابس (ن) لسانه . من الشعير

ولا تنسى الخواريج . خاصة النجدي في الرقبة والفخوذ وتحت الايدين حول الصدر .

وإن كان ( مخصي ) يكون أطعم إلا إذا كان صغير مافيه مشكلة .

وبالهناء والعافية ( بس لاتنسى تعزمنا ) .<--- كل ماشاف موضوع حول الاكل قال اعزمنا .

تحياتـــي .

[احمد الثقفي]

Originally posted by سماوي
ومرّة أشوف هكا التيس اللي تخاف من لغابيبه .... ( أحسن يا مثقف )

وودك بس تعرمشه وهو واقف بالمبيعة ...



وعليكم السلام ورحمة الله وبركاته
والله ياخوي فتحت نفسي للأكل مع هاالصبحيه .... باهالتيس:D :D

**************
ترى الأخوان مشاء الله ماقصرو أعطوك وصف ممتاز
وأحب ان اضيف ناظر بسنونه ... هل هو جدع .... ثني... رباع أو سداس

وأهم شيئ خلك قابض طليك والا تيسك عند الشراء

والا ضعاف النفوس يبدلونه لك وقت دفع القروش

تحياتي

[فرنوس]

الله يرجك خيال الكحيله ههههههههههههههه سماوي ذكرني بواحد في ماقفة الغنم مايعرف الذبايح ينشد الرشيدي عنده هاك الرخال يقوله بكم الحبه ؟:D ترا مزوح ياسماوي لاتزعل والله انك تعرف من كتابتك عرفت انك تعرف في الذبايح ولو شي بسيط والا وش عرفك بحايل ومضرع ؟؟؟ ازيد علئ كلام الاخوان شف فيه ذبايح ضيوف ان بغيتها عليك بالنجدي اللي ظهره كبير بالحيل وسنه ثني والا رباع وانحش عن السديس وتبطي ماتفهم هاذي المفردات ؟؟؟:D اما ان بغيت ذبيحة التلاجه علاك بالحري ثني والا رباع لحمه يبطي باالتلاجه ما اختلف اما ان بغيت حق الكشته الخفافي عليك بالتيس الجذع والا الثني اللي لحمه كنه الموز واعيد واكرر انحش عن السديس والقارح برضه تبطي ماتفهم :D اقول شف مالك الا واحد خبره في الحلال ترا انا اخوك لازم تاخذ دوره ايام الشغله بسيطه بس يبيلك واحد عارف الحلال بعدها تشتيري حبه ذبيحه ماتخاف يغشونك :D

[بركان]

وراك ما تسوي سواتي
وانا جالس خلف الدركسون افتح القزازه طول اصبع فقط لا غير وازهم الرشيدي واقول له عطني خروف ابو خمسمية ريال افتح له الشنطه بالزر ولا اعطيه ام خمسمئة الزرقا الا بعد ان يحمل الخروف و يقفل الشنطه شفتوا وش لون اخوكم ذكي قولوا ماشاء الله.

تدرون ليش هذا كله على شان الرشيدي ما يقول مد (ام الشحم).

[عبدالعزيز الدباسي]

تسوي نفسك ما تعرف بالهرافي يا سماوي ،،، مهووووووووب علينا

الظاهر انك من زود المعرفة ( تكفيك الشوفه ) من دون ما تمسك الخروف ولا تتلمسه .

بس خل عنك ، ، ، ، فكرة الموضوع جميلة ورائعة .

بدال ما تقول ياشباب اللي وده يشتري هرفي ياخذ هالنصايح ،،،، ;) ;)

خليت النصايح تجي من غيرك يالذيب .

مشكور وما قصرت

[سمنان]

بركاااااااان

هههههههههههههههههههههههههههههههه
هههههههههههههههههههههههههههههههه

حسبي الله عليك .. والله اني ضحكت ضحك ما ضحكته من مبطي

[منصور]

سماوي
ما شاء الله عليك انت مثل الي يقول معي صقور ابي اشويهن.؟؟؟؟؟؟؟؟؟؟؟؟؟؟؟؟؟؟؟؟؟؟؟

[سراج]

ياشيخ مالك ومال وجع الراس اطلب جاهز من المثلوثه وريح بالك *ههههههههههههههههههههههههههههههههههههههههههههههههه ههههه

[العود الازرق]

بصراحه كلامك غريب وعجيب لكن ما اعتقد انك بتشري ذبيحه وتطلب المشوره من الجميع على كل حال خفيت با الشباب وصدقو والسلام اخوك العود الازرق

[مجنونها@@]

والله نادر ماتلقى الي عندة ذمة بسوق الغنم

الي يرفعها لك من قدام علشان تحس انه سمينه والي يحطه على فخذة علشان تعرض

بس ابعطيك نصيحه

سو نفسك تعرف هذا واحد
يعني سو نفسك تتحسسه وتشوف هي رخل ولا لا وناظر سنونها ( هذي لازم تطبيق عملي )

ومهما حلفو لك لاتصدقهم
ولو يقول هذا مشتراهم