تكفون شوروا عليه (ابغا الصمان واول مرة اروح ..ومحتاج اسالكم كم سوال.

[fayez188]

احنا 4 شباب نبي الصمان ...هل اقدر امشي في المساء من الرياض متجه للصمان ومتبعا للاحداثيات ولا ما اقدر ؟

كم ساعة يآخذ الطريق من الرياض للصمان ؟

وهل الطريق جيد من الرياضالى الصمان ؟
هل توجد محطات قريبة من الصمان عشان نواقص الرحلة لو وجد ؟ وكم تبعد عن الصمان ؟

بكم القى هالخيمة وهل تفي بالغرض ؟ لان سيارتي ما تشيل الخيمة الكبيرة ؟ ولا عندي عربة مقطورة ..

http://m5awitumair.com/upload/uploaded/16_21227949981.jpg



و تنصحون به وانا رايح ؟ وشي اهم الاشياء اللي لازم اخذها من الرياض قبل الانطلاق ؟

وين القى ارخص فراش
هل الجوال يعمل هناك بالصمان ولا لا ؟
ومدري وش بقى ما سألت عنه

تكفون شوروا عليه لاني عليمي واول مرة اتجهز للصمان وبحياتي مارحت لها

[أبوسعد 511]

يفيدونك الشباب بإذن الله ..

أهل الخبره كثير ماشاءلله .

لا تشيل هم ..

[Y A S S E R]

والله شف ..


بشكل دائم معك قارمن ارتح ..


تمشي ليل نهار عادي


بس الليل اكثر حذر


ماتدري وش الطريق اللي حولك ..


خاصه بعض الردميات تنقطع وانت تتبع الاحداثيه تمشي على حسبها لذلك تصير ماتدري عن دربك وش قدامك ..


وكذلك مشي بالليل يفوت عليك رؤيه الفياض اللي حولك:cool:


ولا ان شاء الله مهنا خطر ..


والطريق من الرياض للصمان عن طريق الثمامه بعد مزرعه خزام ثم طريق التنهات بعد ماتمشي حول 40 كيلو الظاهر :confused: يجيك دوار ومن عندها تفرق يمين للصمان

[نجم2]

السلام عليكم ورحمة الله وبركاته
ياعزيزي بالنسبه للجوال يشتغل على الخط الاسفلت وتقريبا 8 كيلو داخل البر اما إذا تعمقت اكثر قفله وحطه بالدرج اما اهم شي تتزود به جهاز قارمن او غيره ولا تنسى تاخذ احداثية نزولك من الاسفلت تحتاجه عند الخروج والماء والبنزين تزود قبل الدوار اخر محطه مع الدوار يمين تمشي 90 كيلو بالتمام اما الخيمه ممكن توفي بالغرض إذا ما كان فيه مطر طبعا اما عن البرد افرش فرشه بلاستيك على الارض وحط خيمتك عليها بعد كذا قطعة فرشه داخل الخيمه ثم افرش فراشك والله يستر عليكم والافضل يكون معكم احد راح للمنطقه قبلكم الخيمه تحصلها بكارفور و جيان بحولي 60 ريال

[fayez188]

يا جعلني ما ابتسيكم ....... يا مال العافية ويا مال الشام هههه

[علي الجوال]

اخوي انصحك تاخذ معك جهاز ايكوم او غيرة

الشي الثاني انصحك تعبي بنزين 95 عشان يغطي

معك اكثر وخصوصاً اذا كنت بطول في رحلتك

والشي الثالث لاتشيل هم راح تجد كشاته قومة وقعده

والشي الرابع وهو الاهم المكان اللي بتطلع منة

احرص على ان يكون نظيف

والفراش انصحك تاخذ فراش فرو نفرين

والخيمة ياتخذ لك وحده كبيرة وقماش ولاتاخذ شي .

[fayez188]

هل يوجد حطب ينباع قريب من الصمان ؟ بالنسبة للماء هل يوجد برميل بلاستك جيد ورخيص ؟

[همس الرعد]

انصحك بخزان الوادي والحطب اكيد انه موجود

[الوفي]

احنا 4 شباب نبي الصمان ...هل اقدر امشي في المساء من الرياض متجه للصمان ومتبعا للاحداثيات ولا ما اقدر ؟

نعم تقدر تمشي بالمساء متبعاً للأحداثيات، ولكن انصحك بالممشى بعد صلاة الفجر تشوف زين وأخف لزحمة الطريق وأمور عديده


كم ساعة يآخذ الطريق من الرياض للصمان ؟

على حسب ممشاك ولكن لا تسرع وخذ الأمور تمشيه وساعة صدر


وهل الطريق جيد من الرياضالى الصمان ؟

الطريق جيد وفي بعض الأحيان يصادف خروج الابل على الطريق خصوصاً في منطقة الدهناء فأحذر

هل توجد محطات قريبة من الصمان عشان نواقص الرحلة لو وجد ؟ وكم تبعد عن الصمان ؟

آخر محطه هي محطة العتش الدوار الأخير قبل التنهات وهو اللي بتفرق معه للصمان، ويوجد محطات متنقله داخل الصمان ولكن مايحتاج أنت كمل أمورك من الرياض وعب فل من آخر محطه وإذا معك سعه بالموتر عب لك جركل 30لتر بنزين بيكفيك ويزود


بكم القى هالخيمة وهل تفي بالغرض ؟ لان سيارتي ما تشيل الخيمة الكبيرة ؟ ولا عندي عربة مقطورة ..

الخيمة من 60 إلى 80 ريال وتفي بالغرض تماماً ولكن كل واحد باخذ وحده ولا تنسى تاخذ معك رواق تراه أهم من هالخيمه






و تنصحون به وانا رايح ؟ وشي اهم الاشياء اللي لازم اخذها من الرياض قبل الانطلاق ؟

رواق- حطب- قارمن- لمبه- ماء- معلبات- خبز- اكل- وعزبتك كامله مكمله


وين القى ارخص فراش

الفرش أذواق ناس تحب الخفيف وناس الثقيل مر أقرب محل رحلات من عندك وخذ اللي يجوز لك
هل الجوال يعمل هناك بالصمان ولا لا ؟

يعمل في مناطق ومناطق لا يعمل

ومدري وش بقى ما سألت عنه

إذا باقي شي اسأل لا تستحي ترانا أخوان

[المهند تمير]

ماقصر أخونا الوفي ... وبالنسبة للخيمة شاريها بـ 85 ريال وهي مترين في مترين ...وتأخذ اثنين ما يشخرون في النوم ..

[مخاوي كشات]

fayez188
هلا اخوي fayez188 ارجع للرد على طلبك في موضوعي الصمان من الرفيعة إلى دكاكة مويثل تجد بعض الوصف والاحداثيات

[الكاشت 911]

والله شوري
انك تروح الصبح
لان الليل يمكن تواجه فيه صعوبا
وتنى لكم رحلة موفقة

[fayez188]

الله لا يسيئكم بمكروه ....والله يرحمكم برحمة من عنده عز الله ما قصرتم يالنشامى

[مقبل]

الله لا يسيئكم بمكروه ....والله يرحمكم برحمة من عنده عز الله ما قصرتم يالنشامى

أخوي فايز إذا أنت من أهل الرياض , مرّ علي أعطيك عزبه كامله ترجعها إذا رجعت , يعني تفلّونها أنت وخوياك وبعدها تجيبونها مغسوله لي :D

[خيال الغلبا]

فايز احذر المشي ليلا في الصمان

الأرض وعره وفيها دحول خير مسيجة ماعليها سياج ولا علامات تحذير

الافضل تنامون بالدهناء وبالنهار تسجون بالصمان

[مخطور]

السلام عليكم ورحمة الله وبركاته ،،،،،
جميع الاخوان بارك الله فيهم ماقصرو جميعا وخصوصا الوفي
والاختصار لك انا كنت الاسبوع الماضي في الصمان ونفس الطريق الي ذكروه الاخوان ورحت على اغلب الفياض والي عجبني منهم فيضة دغيم وهي اقرب وحده من على المزفلت يعني من تتعدى عرق الرحيلي تمشي تقريبا 19 كيلو وتنزل يسار من على المزفلت وتمشي في البر تقريبا 28 كيلو راح تجيك فيضة (( دغيم )) طبعا لازم يكون معك قارمن وتسوي احداثية الفيضة
بالرغم انها متحتاج قارمن بس انت اول مره تروح فا من الظروري لك لهذه الفيضة
طبعا مسافة الرحلة من الرياض الى فيضة دغيم حوالي 295 كيلو
اتمنى انك تذهب وتستمتع بالرحلة وتشوف الفيضة راح تعجبك واهتمو بنظافة المكان بعد الرحلة
وتقبل مروري ،،،،

[راعي الفروه]

اخوانا الوافي على اسمه ما شاء الله عليه كفى ووفى رحله موفقه ان شاء الله

[Y A S S E R]

شباب ..

كم المسافه من الدخول للصمان عبر محطه البطيحانيه الى اقرب الفياض