ســـؤال لأهل المدينة المنورة ... هل رأيتم الربيع ؟؟؟

[المميـز]

بسم الله الرحمن الرحيم

السلام عليكم ورحمة الله وبركاته ...

سمعت من الأهل والاصدقاء نزول امطار غزيرة على المدينة المنورة

في بداية شهر ذو القعدة

وبعد مابدات الاجازة جيت للمدينه وكان لي جولات

رحت لنفود برقان شرق المدينه المنوره 150 كيلو

ومافيه إلا نبت بسيط جداً لايذكر !!!

واليوم رحت على طريق ينبع السريع وفرقت من عند مفرق ( الفقرة )

ومشيت بإتجاه الفقره تقريباً 10 كيلو متر

ودخلت يمين مع الشعيب ولكن للاسف الشديد ماكان فيه الا غبار :(

واعتقد ان المكان ماجاه مطر اكثر من سنه


سؤالي الأن

من شاف ربيع جهت المدينه المنوره ؟؟؟

وبأي إتجاه بالضبط وكم يبعد عن المدينه وإذا توفرت احداثيات يكون أفضل

ولكم كل الشكر والتقدير ....



...

[غربي هواوي]

اخوي بالنسبة للمنطقة اللي جهة الفقرة والجفر ما في ربيع

لكن جاني علم ان الربيع على خط القصيم لا فرقت يمين بعد الشقران وانت رايح للقصيم

والله اعلم

[ذيب طمية]

حيا الله المميز اخبارك يالغالي طيب

وكل عام وانت بخير قبل الزحمه

يالغالي غنمنا شباع بين الصويدره والشقره مع الخط القديم وتفرق لها من عند برج الجوال يمين طبعاً

وعندك ياحبيبي الربيع اللي عليه الكلام الحسو وهاك الديار وعندك الهميج وعندك معشوقتي طميه ووووو وش بعد

اما من طميه وورا لاتنشد الربيع طيب وعلى حد المعلم يقولون الحلال شبعان ومعين خير والبدو مربعين

وعندك مفرق حايل اللي على خط القصيم يذكرون الربيع

والديار انا محوم معها وماعليها معينه خير بس اصبر عليها والله ان شاء الله بتشوف الخير

وعندك جبل ضبع هذا على خط القصيم حوالي 85 كيلو شفه وانت رايح مع الخط القديم على اليمين والبق الضلع من ورا وشوف الربيع اللي يشرح الصدر

ولي عوده إن شاء الله

[المميـز]

اخوي انحف دب ماقصرت على الخبر والعلم الطيب

====

اخوي ذيب طميه

انا بخير وعافيه دام اعلومك زينه واخبارك تسر الخاطر

الصويدرة ومعروفه ولكن الشقره هل هي جهة الحناكية والا جهة المدينه ؟؟

وبالنسبة للحسو والهمجة معروفه مع مفرق عرجاء ولكن ماجيتها والله



وتسلم والله على الاخبار الحلوه

الله يبشرك بالخير

[رعد المدينة]

حياك الله اخوي المميز
الربيع شرق المدينة افضل من غربها
واالربيع الطيب عند جبل ضبع قبل الحناكية 10 كيلو
ومن ورا الصويدرة مواري ربيع
واليوم رحنا بعد مركز الصويدرة النبت في اوله
ولقينا حميض ويهق وبعض النباتات الحولية
وفيه ربيع شمال المطار عند الاودية
هذا اللي اعرفه
اما بالنسبة للشقرة
اعتقد انه بعد الصويدرة على طريق القصيم القديم

[المميـز]

هلا اخوي رعد المدينة

تسلم على الاخبار الزينه

والحمد لله الرربيع اجل مغطي شرق المدينه

ان شاء الله يوم الاحد سيكون لي جوله قبل الافطار

[قمة الوفاء]

أعطيك اياها بالتفصيل المختصر ..

أما عن غرب المدينة فلاشئ سوى بعض الشئ البسيط ، لأنه ماجاته امطار قوية ولا تبعه ولي ، واما من حيث بعض المناطق مثل وادي الفرع 140 كلم عن المدينة بطريق مكة وفيها عيون ماء غزيرة تجري الى اليوم ، وكذا اليتمة 80 كلم وماحولها فتلقى بعض الشئ لكن ماهو كثر ولاهو بالشئ اللي ودك تتعناله ..
وفيه على مفرق العشيرة يسار الطالع الى مكة من المدينة على طريق الهجرة 60 كلم تقريبا يذكر فيه اشياء بسيطة ..
واما الساحل فيذكرون بعض الشئ لكنه بسيط جهة الفقير وواسط على طريق ينبع الجديد من مفرق بدر 160 كلم
ويذكرون حول العلا شئ طيب يستاهل من يتعنى له عن شخص ثقة ، وكذلك المغيرة ديرة من ديار عنزة حول 370 كلم عن المدينة ..
واما شمال المدينة ماخبرت أحد يذكر عنه شئ ..
واما الهميج والحسو والزعفرانية وام عواصم والربذة وابرق وابيرق وماحولها فانا فريتها فر ، ولاهنا شئ يستاهل العنوة للرحلة ، غير بعض الشئ اللي دوبه يكفي حلال الديرة ..
ومن قال حول ضبع فهو شئ ماهو بالحيل وكذا الشقرة والظويهرية والصويدرة كلهن على خط القصيم وانت خارج من المدينة متجه شرق 60 كلم و75 كلم مافيها شئ يستاهل العنوة الا للحلال ،و نسال الله من فضله ..
عموما المدينة السنة ماتوالى عليها المطر والا لرأيت بفضل الله عجباً ، ثم دخول المربعانية يذبح الباذر ولو هو مستوي ريشة او ريشتين او اكثر ..

نسأل الله من فضله ,,

[المميـز]

مشكور اخوي قمة الوفاء على هذي المعلومات المفيدة

انتظر مني تقرير مصور عن ربيع المدينه المنوره

ان شاء الله تعالى

[غربي هواوي]

يوم عرفة ذهبت العصر رحلة خطافية الي الصويدرة ولا حصلت الربيع اللي يذكرون

اتجهت يمين الخط السريع

التفصيل للمنطقة باذر قليل جدا وان فيه شيء فهو توه

الله يرزق البلاد والعباد
ومثل ما قال اخوي ماهنا شيء يستاهل العنوة