;كيف تستخدم القدر الكاتم من غير اصابات (من غير ما يفقع في وجهك)

[الشاص عز لهله]

سلام عليكم ورحمة الله وبركاتة

يا الربع قبل العيد بكم يوم اشتريت قدر كاتم و حاولت ان اطبخ و يوم خلصت الطبخة و اشتغلت صافرات انذار ففتحت القدر ولاهو يفقع في وجهي و يلزق الاكل في السقف و الغطا طاح على خشتي الحمدلله اني ما حطيت وجهي فوق الغطاء حمدالله و لا كان انا هلحين انا في مستشفى المجانين و اظحك على نفسي

فالمطلوب منكم يا اهل مكشات يلي تعلمون الغشيم ان تعلمونا كيف نستخدم هذا القدر شديد الانفجار

و السلام

[اكليل الجبل]

اولاً حمد لله على سلامتك وكل عام وانت بخير ..

والله يالحبيب اني ماني مصدق انك فكيت القدر على طول ؟؟؟

انت ناوي تفجر في نفسك ولا وش السالفة !
شوف يالحبيب قدر الضغط يبيلك اذا سمعت الصافرة او بعد انتهاء الوقت المطلوب تطفي النار وتشيل الصافرة حتى يطلع كل الهواء اللي في القدر واذا كنت جيعان ومستعجل بعد ماتشيل الصافرة خذ القدر وحطه تحت الصنبور (الماء) بكذا مايخذ وقت الهواء ويتفرغ واذا تأكدت ان مافية هواء فك القدر وبالعافية , وانتبة مرة ثانية لاتجيب العيد ...

[بن شمروخ]

الحمد الله على سلامتك ....

اسجد سجود الشكر لله يالغالي تراك سلمت من مصيبة الله يحفظك ...

يالغالي لا سمعت الصفارة (( اذا دار البلف )) على حسب الطبخة ان كانت دجاج خله ثلث ساعة وان كان لحم خله نص ساعة الى ساعة الا ربع وان كان رز بحاله خله ربع ساعة وتحسب المدة بعد ماتسمع الصفيرة...

اذا انتهت المدة للي داخل الكاتم ... تشيل البلف ( الصافرة ) لين يطلع الهوا كله ...
واذا كنت مستعجل طب عليه ماء بارد ... وهذا والله اعلم

[ابن مدهون]

العجلة شينة وانا اخوك



الحمد لله على السلامه



اهم شي لاتفك القدر الا وانت شايل البلف وطالع كل الهواء

اهم شي لازم يطلع كل الهواء

والشغله كلها دقيقتين وهي خالصة



وانتبه لاتكررها :)

نرفع فيك محضر تأديبي ونمنعك من استخدام القدر الكاتم :)

[شبكة المجمعة]

الحمد لله على سلامتك اخي الكريم
اولا واهم شيء نوع الكاتم والافضل سب فرنسي واترك عنك كل شيء ايراني منها

كما علق احد الاخوان اذا كنت مستعجل ضعه تحت صنبور الماء البارد
اذا كنت حاط الرز ممكن ان تفتحه على طول اذا كنت مستعجل بس
يبيلك تغير جلب الغطاء كل فتره

بنسبة لوقت الطبخ
الحاشي 20 دقيقة
غنم 15 دقيقة
دجاج 13 دقيقة

وعند وضع الرز احسب 3 دقائق على نار قويه بعد ان يصفر ومن ثم على نار خفيفة 10 دقائق

واي شيء تريد حنا مستعدين

[محمد الصرير]

الحمدلله على السلامة ، ولا تعود لها مره ثانية ، ولا تسوي شي إلا أنت عارف طرقة استخدامه . ودمتم سالمين

[الستانس]

فكك الله يا رجال يقولون في كل بيت اربع قنابل
1- الضاغط
2- السخانه
3- الغاز
4- المكرويف


والحمد لله على السلامه

[القارمن999]

:confused:


:confused:


يالله يعيال هجواااااااا..


تراي شايفن دهران جاي ومعه سلسله يبي يقفّل الموضوع...


:D :D :D


الله يعين دهران عليكم..


ياناس اللي عنده استفسار<<يالله كتبتها من السعابيل..


يسدح استفساره بالموضوع المثبت بخيمة الطبخ..


وبالنسبة لاستفسارك حطّه بخيمة العدد والأدوات..


ولا شكر على واجب ..كلنا اخوان..:confused: :p


:good:

[أبونورة777]

فكك الله .. من مصيبة يالغالي .. والحمد لله على سلامتك

ذكرتني بواحد من الشباب كان وقتها عزوبي في البيت وبما انه شيف متمكن مثلك :p قدر الله عليه انه يطبخ بالكاتم .. وانفجر عليه الكاتم وطار الرز كله بالسقف .. وما عرف ان الرز انتشر بسقف المطبخ إلا يوم بدا يتطايح عليه من السقف .. فكّر انه اختفى من قوة الإنفجار :p والرجال مثلك فكه الله من مصيبة .. وصار درس له

انتبه يالحبيب .. ترا اهلك لهم حاجة بك !!

[عبّار]

حمد لله على السلامة ياخوي و ما زيد على اللي قالوه الاخوان فوق و الله يحفظك و يحفظ شباب المسلمين و تقبل الله طعاتكم.

[مكشات com]

الحمدلله على السلامة ..

[الحجازيه]

قبل كل شي الحمد لله على سلامتك

وبعدين وشوله اللقافه تفتح القدر بهذي السرعه مو معقول كله جوع

لكن كما اسلفت يمكن اللقافه لها دور

لاتزعل من كلامي بجد بجد قدر الضغط

مصيبه وكارثه ولابد من اخذ الحذر

عند استعمااااله وشو على بالك هييين :no2:

لاعاد تفكرر تكررها مرتن ثااانيه

ولو اللي صار لك صار لي كان رميته وتعقدت منه

عموما حمد لله على سلامتك

يبيلك تصلي لله ركعتين شكر

وزي ماقالوا الاخوووان

لكن عندى اضااافه بكل امانه انا قريتها بالمنتدى

واستفدت منها كثثثثثير جزاهم ربي كل خيير

اذا تبي تعرف هل الرز استوى رش طرف القدر

بمويه شوى بيدك وشوف اذا تبخر بسرعه

هذا معناته انه خلاص استوى

واذا سال الماء من طرف القدر او تبخر بهدوء

فمعناه لسا بااقي فيه مويه انتظر عليه دقااايق

اتمنى فهمت علي
:D

وزي ماقالوا الاخوان لاعاد تكررها :no2:

[دهران]

http://www.gulfup.com/files/jpg/kwy18405.jpg

[yos999]

الحمدلله على السلامة

[عتيق]

سلمت يوم ان الله سلّمك

ماعندي اضافه على كلام اخواني فهم كفّوا ووفّوا

[الشاص عز لهله]

تسلمون يا الربع كفيتو و وفيتو اي والله حمدالله الله سلمنا

و تسلم يا مشرفنا على الشرح الدقيق

[no fear 78]

ما يحتاج اعلق ما دام دهران موجود الفائد بليا حدود يعطيكم اعافية على المعلومات التي محد بخل على اخونى السائل بها عساكم دوم اخوان متعاونين هنيالك هصحبه الطيبه تحيلتي للموجودين