سؤال .. إحداثيه فيضة ام حجول ..

[سهيل واحد]

السلام عليكم ورحمة الله وبركاته

الإخوان الاعزاء .........

اطلب (ولاعليه امر) من اللي عنده احداثية" فيضة ام حجول" اللي حول ام المصران و حول فيضة شقران ان يتفضل ويرد علي باحداثية الفيضه المذكوره شاكر ومقدر التعاون.

[السعلو]

احداثيات فيضة ام حجول التي تقع جنوب فيضةام المصران وشرق فياض امهات المصران وشرق فيضة مقعدة هي كالتالي :

شمال : 30.058 . 26
شرق : 47.30.836

تحياتي

[العود الازرق]

الفيضه الى تسال عنها رحت لها في اواخر شهر 11 تقع في الشمال الغربي للصمان وهي في مقطعه وبقربها شاهدت الذئب اذا موترك مهوب تكانه لاتتوهق لان ما حولك احد هي روضه مثل اغلب رياض الصمان ما فيها زود واذا كنت تسال عشان الذئب فا الله يعينك اخوك العود الازرق

[سهيل واحد]

الاخ .......... السعلو ............ مشكور وما قصرت بس ترى اسمك يــــوحــــــــــــــش ........ تحياتي.

الاخ .......... العود الازرق ....... ما قصرت......وانا الفيضه اللي انشد عنه تقع شمال شمال شرق الشملول حوالي 40-45 كم عن الشملول (معقلا). لاني الاسبوع اللي راح كنت في ام المصران و تقهوا عندنا بدوي راعي حلال وذكر لنا فيضة ام حجول اللي حول وادي مبهل وحولها فيضه تسمى المعترضه. هذا ما ذكر لي البدوي .

ولعلمك دورت ام حجول با الاحداثيات اللي معي و لقيت ام حجول و يوم دخلت احداثيتها للجهاز حدد مسافتها عنا و حنا بام المصران ب 96 كم و إن ما خاب ضني انها هذي ام حجول اللي تقصد (اللي تقول انت ان فيها ذيب) ........

ويا ذيــب انا بوصيـك لا تـاكل الـــذيـب ........ كـم لـيلـةً عـشـاك عـقـب الـمـجـاعــــــه
كـم لـيلـةً عـشــاك حـرش الـعـراقـيـب ........ و كــم شـيـخ قــوم كـزتـه لـك ذراعــــه

من مرثية سعدون العواجي .. بولده ذيب ابن سعدون.

يا ..... السعلو ... صحح كلامي للاخ العود الازرق تراي ما استغني "لا إله الا الله" عن رادار فكرك.

وســـــــــــــــلامتكــــــــــــم .,

[ابو ايمن]

حياك الله اخوي

الحقيقة بالنسبة ل أم حجول .

فيه أربع مسميات .

بعطيك اياهن وحدة وحدة مع الوصف والاحداثية .

إذا وحدة منهن صارت من اللي تبي .

ام حجول : تقع في الشمال الغربي من البرزة على طريق حفر الباطن بعد ماتتعدى الأرطاوية . ( الخريطة رقم 26 )
واحداثياتها
N 26 44 062
E 45 18 166

أم حجول ( الثانية ) : تقع في العرمة شمال وادي الشوكي وحول فيضة المصحطبة
واقرب طريق لها من تمير الى الشعب وقبل أم رجوم . ( الخريطة رقم 8)
واحداثيتها :

N 25 58 680
E 46 05 675

أم حجول ( الثالثة ) في وسط الصمان .شرق روضة ام الشفلح وروضة سلهوبة
( الخريطة رقم 49)
واحداثياتها
N 27 24 510
E 47 13 000
أم حجول ( الرابعة ) . شمال الصمان وجنوب الدبدبة ( الخريطة رقم 61)
واحداثياتها :
N 27 31 768
E 46 37 610

وعلى العموم أنا حبيت أذكر لك لأن في الخرائط عدة أسماء متشابهة
ملاحظة اختلاف . الإحداثيات عن ماذكره الأخ السعلو . لاتعني بالضرورة خطأ في الإحداثية إنما نقطة الإحداثية صغيرة جدا بينما الفياض كبيرة ( بالكيلو مترات )

المقصود بأرقام الخرائط المذكورة : هي من كتاب روائع الإحداثيات .
تحياتـــي .

[سهيل واحد]

السلام عليكم ورحمة الله وبركاته

الاخ الكريم ............. ابو ايمن ....... الله يبيض وجهك و كلك ذخر, لكن كل المواقع اللي ذكرت برسالتك في مناطق بعيده عن الموقع اللي ذكرته في رسالتي. شف يا الحبيب ... جانا البدوي وحنا قاعدين نتقهوا في الفيضه الصغيره اللي تقع جنوب فيضة ام المصران (ما بينهن الا حزم) . على قول البدوي يقول تطلع من مكان قهوتنا شمال-شمال-شرق (يعني اكثر اتجاهك شمال) وتمشي من 8 الى 9 كم وتجيك فيضه ام حجول وعلى قوله ان فيضة المعترضه وراها من جهة الشمال الشرقي.

مشينا من مكاننا باتجاه الشمال عن طريق ام المصران وبعد مسافة 14 كم لقينا فيضه فيها واحد من اللي مضيقين على المسلمين حتى با البر (العشب يغطي ابو 7سنين) الفيضه هذي يقول القارمن انها شقران. تعديت شقران ب 3 كم لقيت فيضه صغيره عشبها زين.

الاخ السعلو يقول ان فيه فيضه اسمها ام حجول بهاك الاراضي لكن وصفه ما يطابق وصف البدوي لان السعلو يقول ان ام حجول تقع جنوب فيضة ام المصران والبدوي كان يأشر على جهة الشمال وكانت ام المصران شمال عنا ربع كيلو .

تحياتي لك و الظاهر اني ابلشتك انت والاخوان لكن كله علشان مصلحة المجموعه.

والسلام ختام.