أحلى رمية رميتها

[SilverSniper]

السلام عليكم ورحمة الله وبركاته
كل واحد في هذا المنتدى من المؤكد انه راعي صيد ورمي وبعضهم ما شاء الله يصل لدرجة قناص
نريد من كل عضو يعصر معاصير ذاكرته ويتذكر.....
أوصف لنا أحلى رمية رميتها وبأي سلاح.

[SilverSniper]

سأبدأ أنا.. بعد اذنكم طبعاَ
أفضل رمية رميتها كانت بالحظ والله..
مرة كنت أصيد أنا مع واحد من الشباب كان الله يهديه يدخن... كان معنا خرازتي الأمريكية وخرازته البرنو وكم ساكتون وشوزنين ومسدسي الخرازة.
... صدنا صيدنا وصلحنا غدانا وتغدينا وولع خويي زقارته وحنا نتقهوى شاهي.. قال لي وش رايك ... أحط زقارة على الشجرة اللي هناك ( شجرة بعدها عن فرشتنا حوالي 10-15 متر ) ونرمي.. قلت خلاص.. توكل على الله.. قام وحط زقارتين وصوب وضرب وحده بالخرازة البرنو... رفعت الروجر وقال لا... أضربها بذا ( يعني المسدس ) قلت صعبه والله ( وكنت مالي إلا 5 أيام شاري المسدس يعني ما تعودت عليه ) قال اضرب وان ما جبتها فمسدسك لي.. قلت يالله يا كريم .. وجيت أبصوب ما أشوف الزقارة زين.. قلت له ما أشوفها قال اصبر.. وراح وولعها وصارت تدخن.. وأصوب وأنا ما أشوف شي ... قلت تحت الله وبين يديه.... وأرمي.. ولا تحركت الزقارة... قال أخطيت.. قلت اصبر... شف ماهيب تدخن... قال هه... اثر الرصاصة شطفت راس الزقارة وطفتها وأنا والله مدري وش السالفة... إلى الآن وأنا أحاول أعيد هالحركة ما قدرت.. لكن صرت أعز ذا المسدس عقبها.. :)

[بركان]

اخوي القناص الفضي
تسلم على هالموضوع الحلو
احلى رميتين رميتهما باختصار

ايام الطيور كان فيه طير صفار (صافور) متحذر من الرمي الظاهر ما بقي احد في الشعيب ما رمى عليه
يطير من عاشر شجره تقول مسكون حدوه الناس ووقع في شجرة عشر طارفه وبعيده قال اخوك جرب حضك واقوم وامد عليه الشوزن من بعيد يالله اشوفه ويوم شاف البندق يوم نهض ويوم نهض فيقوم اخوك ويطلق عليه في الهوا ويبدا يتقلب ويطيح على مسافة 50م تقريبا وكان معي واحد من الرمايه الجيدين وقد اعجب بهذه الحادثة وهو دائما يذكرني بها.

ومرة اخرى كنت اصيد( وبر) في تهامه ورميته في مكان عالي وانا متخبي وسط شجر دباي تحته ومن حسن الحظ تصيبه الخرازه ويجيك يتدحرج كانه صخر حطه السيل من عل الين طاح في حضني (ذس از ريل ستوري آي سوير).

تحياتي

[عريدان]

السلام عليكم ورحمة الله وبركاته
أروع وأحلى رميه رميتها كانت في رحلة صيد خارج المملكه العربية السعودية عام ?141هـ ( داخل المملكه بطلت أصيد).
وكنت مع إثنان من الربع وجالس بالمرتبة الخلفية بسياره لندكروزر صالون في إكس 88 كحلي ولدينا شوزن أم خمسي - وكشف بلجيك - وخرازه ألمانيه أم خمس بدربيل وكنا متجيهن لجهة جبال بنية(بقصد) صيد الوعول من طلوع الشمس. وبالطريق فر أمامنا فرق من الضباء الإدمي و بعد أن إبتعد مساف حوالي 500 متر عاود تيس الفرق على ذيك الرفاعه وعطانا نحره . فتوقفنا بالسيارة وأطفئنا المحرك وقالو الربع إرمه ولا يتعدى. وبعد الاختيار من بين البنادق المذكورة أعلاه قررت أن أرميه بالخرازه لكونها الأنسب من وجهة نظري للموقع والمسافه. بعد أن عارض ربعي القرار. سميت بالله وركبت الدربيل على يسار و أسفل نحرهالتيس ( لاحظ أن فركته ممكنه وهي ما يقطع ظهر القناص ويتلف أعصابه ومزاجه بآن واحد) ودوففففف إلا وهو يثاغي بمحله ما تعداه ولا عشره سم ودمه يثعر. وصلناه وسمو وكبرو عليه الربع وذكوه وذكرو الله على هالرمية الموفقة. وأذكر إننا بمضحانا شوينا كبدة وكلاويه بعد ما تقهوينا وصلينا الضهر تحت طلحة كبر بيتنا بظهرة شعيب مافيه إلا هي. وإلى الآن لا أنسى تلك الرميه.

[عليان الليل]

احلى رمية هي
بعد ما خلصنا صيد مر فرق عصافير مثل
العجاج واجد المهم يوم مر من فوقنا واجلده
بام خمس كل رمية يطيح من خمس الى ست عصافير
صراحة منظر رهيب وانت تشوف العصافير وشلون تطيح
صراحة منظر منب ناسية.
تحياتي..

[الخبير]

السلام عليكم
اذكر يوم إني بزر كانت عند ولد عمي ساكتون 27 ( من يوم إني صغير وانا مهبول سلاح ) كنت قاعد أوزنها.
وتوني وازنها مضبوط، إلا ويجينا واحد من الصغار يصارخ وشبلاك يا شين قال الدبور وراي.
وما تشوف إلا والنعال في الهواء وحنا نطمر نبي البيت ، في ذلك الفترة كان نظري تمام مهوب مثل الآن الله يخلف . المهم كان مدخل البيت فيه باب شيش وقدامه حديقة صغيرة. ويوم تمقلت لقيت الدبور مرتكز على حدى الورود وللأسف مهوب قريب قلت أبي أجرب الساكتون، واتويقع عليها واعطيها طلقة، يوم معد شفت الدبور قلت طار يوم طلعت وحت للوردة لقيت نص الدبور منسدح داخلها.

[Eagle]

اجمل رميه لي كانت قبل بضع اسابيع
كنت جالس بالحوش مع اخوي الصغير اعلمه شلون يرمي بالساكتون الهوا
والسكتون من النوع القوي جامو شادو
وله اطب يمامه (الحمام الصغيره الي تشبه حمام البر) على اعلى اريل بالبيت
يعني مسافه حول 50 متر وقالي اخوي اتحداك اتطيحها
واعطيها وحده واطيح الحمامه وقصيت رجلها وعطيته حق اخوي تذكار
ومره من المرات على نفس المسافه طاب زرور وحشته بس بدربيل

[( برى بحرى)]

اجمل رميه بحياتى والله أذكرها قبل 23 سنه كانت أول مره بحياتى ارمى بشوزن
كان شوزن ام بطن مال عمى الله يطول بعمره كنا بالمخيم قلت له ممكن ارمى قال اوكى
كنت ابى ارمى علبه فاضيه ولا قوبعه عابره من فوق الخيان عمى قال تقدر عليها
قلت شوف وهى طايره كان ايبسها
كانت أول رميه لى من قبل ثلاثه وعشرون سنه وصدت
عمرى عمرى ما راح انسى هذه الرميه

[مهند]

ماشاء الله موضوع كذا:good:
تسلم يابركان
انا احلا رميه مانيب ناسيها في حياتي الا لين ارمي احسن منها في راس شارون اللعين ان شاء الله

كنا في عيد الاضحى عام 1418 وحطو الجماعة ماصورة ربع بوصه وركزوها على مسافة بعييييييييييدة تقريبا 100 متر ويالله بالكلاشات وكل يتحدى الثاني
وتوني ذيك الايام يقولون عني بزر
المهم الجماعة (الكبار) طاخ طيخ وكل شوي يروحون يشيكون عليه والا هو سليم ماجاه شي
المهم تفرقوا وانصرفوا اللي زعلان واللي يتعذر باعذار خبركم:D
المهم قلت لعمي وكان شايب هات الرشاش لو سمحت:cool: وماسمعت الا ذيك القهقهة اللي تشبه صوت الرعد هزت المكان باللي فيه
انت :confused: انت:confused: تبي تصيده؟؟؟ ويكمل القهقهة
انا خلااااااااص ودي اروح اعظ في الماصورة بسنوني:mad:
المهم ناولني الرشاش وهو مستمر في التهكم بهذا البزر اللي يبي يطيحه على عطران الشوارب
المهم جلست له وامحقها من جلسه وانا اتنافض من الغيظ وبودي ان امسك الرصاصه بيدي واوصلها لهذه الماصورة اللعينه:D
المهم لاني بواردي ولا يحزنون ولكن ((ومارميت اذا رميت ولكن الله رمى)) المهم جلست حول ساعه اقز فيه وانا اصلا ابي اركد نفسي من الانتفاض الشديد ويوم حسيت اني في افضل وضع ممكن وانا اللي اكبس الزناد والشوف شجر
وكاني لمحت نوع من الغبار الخفيف هذا هو كل مارأيته او خيل لي ذلك ولكن الماصورة في مكانها والقهقهة انطلقت مرة اخرى
ولكني رميت الرشاش جانبا وانطلقت باقصى مااوتيت من قوة باتجاه الماصورة اللعينة التي لم تتحرك قيد انملة
ويالها من مفاجأة
الرصاصة اخترقتها من النصف تماما كما لوكان فعل اكبر مهندسي الصناعة:burnout2:
ياسلااااااااااااااااااااااااااااااااااام وانا اللي اقتلعها من اطرافها وطيرااااااااااااااان على صاحب القهقهة
وشف شغل الرجال:cool:
ياله من موقف لازال في الذاكرة

[الحر الاشقر]

احلى رمية : قيرية من مسافة بعيدة ( لم اتوقع اصابتها) بالخرازة حيث كنت دائم اتنافس مع زميل متخصص

( قناص محترف) في الصيد طبعا . وكنا نحب الصيد بطريقة ( التمترس) يعنى التخفى والتمويه لكن لم نهنى

بها ( حاول اخذها قطو (قط) كان مستخبي تحت النخلة ) فتصدى له زميلي بالخرازه التشيكية البرنو القصيرة

المتموه وبسرعة برمية قناص محترف من مسافة لاباس بها ( في نحره) جعلته يلفض انفاسه الاخيرة قبل

الوصول الى غايتة لجعلة عبرة ودرس لااقرانه من القطاوه الاخرى

[عاشق نجد]

الرمي الزين كثير .

لكن بعض الرميات ما زلت اتذكرها ، ويمكن اكون نسيت شئ احسن ، لكن ابقول اللي اذكر .

بالنسبة للساكتون : أذكر رمية صارت معي قبل 13 سنة أول ما شريت الـ 85 عطية الله . وكان وقت طيور ، المهم شفت طير وقع في اثله بعيدة في نهاية المزرعة ، وبدون مبالغة كانت المسافة حوالي الـ 70 متر ، لدرجة أني لم اميز ما نوع الطير ، لكن قلت في نفسي خلني ارميه يمكن يكون صفارى لاني حسيت بهالشي . وفعلاً وانا امدها واسمي بالله وارمي وانا كنت حاس ان الرصاصة بتنزل قبل توصل ، لكن ما شاء الله على هالبندق سدحته وانا اجيك اركض اشوف ما دريت الا وهي صفارى شيخه .

وبالنسبة للشوزن : أذكر رميتين وحدة قبل سنة ما كان فيه ذاك اليوم طيور ، وكنت طالع وقت العصرية ضايق صدري ما فيه الا الضعوي . ولا ذيك القميرية تمشي الفين مغيمة ، قال خويي هذي يالله يجيبها رشاش ، قلت ابرميها لو انها فوق الغيم من شئ في نفسها ، وما دريت الا هي مجاوبه كأنها اف 15 نازله من السماء .

والثانية فرق خمس حمامات رفيعه قبل سنتين وانا والله امدها واثور ، وما دريت الا حمامتين نازلات هبوط اضطراري بدون مدرج .:cool:

[دغيم]

السلام عليكم ورحمة الله وبركاته
Silver bullet... Loaded in a Silver rifle...Held by a firm hand... Resting on a strong shoulder....imbracing the eye of an eagle...Thats the SilverSniper
SilverSniper what the hik ar you
فقط للمزح وإلى أنا أعرف انك مجنون هوايه وأنا أحب نفس الهوايه
أحسن رميه رميته كانت في صيد وبر من مسافه بعيده لدرجه أن الوبر يبدو غير واضح المعالم إذا لم تعرف مكانه من قبل لايمكن ان تراه وطبعا بالخرازه .لاني لاأستعمل غيرها. أنا لاأظن الصيد بالشوزن متعه

[راعي القعود]

كنا طالعين مقناص ارانب, وكانت ليلة شتاء وبرد المهم ونكشف بها التلاع والله ماش ساعة ساعتين 0000

وطالت السالفه وبدا اليأس يتسلل الينا:o

والله ونكشف بذيك التلعة والله وعره بالحيل الا وخزيز وعدنه مع بعض( وش يسووووووووووون;) )!!!!!!!!!!!!

والله الخزيز كالعادة نسف اذنيه ودعس-المشكلة مابه الا رشاش ورصاص شوي بعد- واما العدنة وقفت شوي ثمن ورى الخزيز ودعسلها السواق وشوي الا وهو عندها المشكلة الشاص قام يطامر مع الوعر , والقزاز مفتوح-علبالنا مستعدين :D
ما انتظر ت السواق رميتها على طرف النور, من حين ما طلعت السلاح وراوزته عليها الا وهي على الوزنيه :eek:
وارم ياولد ومع جنبها الا ومنسدحه تفرفص وتعدها يالسواق نبي الخزيز ولينا عنده واذا هو بسد صفاة وننزل ونمسكه
وبعدها اكثر من ثلاث ارانب والحمد لله:cool: :)

[طالب المعرفه]

السلام عليكم ورحمة الله وبركاته


أقول لكم صباح الخير او مساء الخير يا شباب المنتدى الجميل



أشارك بمشاركتين الأولى
كنت طالع مع اعز أصدقائي أصدقاء الصبا العام الماضي الى الصمان في رحلة صيد ضبان . كنا أربعة شباب واذا بذاك الضبين الي كل واحد على بيته (صلته) وكنت انا ألي أسوق يعني راكب على الباب الأيسر ومعي الخرازة الألمانية وفيه واحد من الشباب راكب خلفي معه الخرازة حقته صار فيها نوع من التحدي بيني وبينه وكان من حسن الحظ معي كاميرا الفيديو قلت للي راكب على الايمين شغل الكاميرا وصور المنظر . فقلت: انا الايمن ونت الضب الايسر وهن حول بعض تقريبا بعدهن عن بعض ثلاثة امتار تقريبا . وواحد من الشباب يعد من واحد لثلاثة وبسم الله (وااااحد اثنيييييين ثلاثه) وما شاء الله كل واحد منا صاد الضب الي منيش عليه حتى صوت السواكتين تقل طلقة وحده ما تسمع الى طع مرة وحده .


القصة الثانية :

اذكر قبل ثلاث سنوات كنا طالعين لصمان في رحلة صيد ضبان وكان معي واحد من الشباب وكنا سيارتين الحاصل وانا نتجول ندور ابو حمد (الضب) الله لا يحرمنا شوفته واذا بذاك الي على صلته وكان حوله ضب مثله على صلته بس بعيد عنه . قال : خويي ترا اذا تقدمت شوي حوالي سبعة امتار بتشوفهن وراء بعض (متقاطرات) يعني اذا رميت واحد اثناني مضمون قلت (اهدا) اجرب الحظ و اتقدم حتى صارت روس الضبين ورا بعض قلت له هال المنظر يبي كاميرا فيديو والكاميرا من عاداتي خويتي في البر واسمي بسم الله الأعظم ومحلهن ثنينهن في رمية وحده بالخرازة الألمانية .

[هملان]

السلام عليكم ورحمة الله وبركاته
احلى رميه في العالم
كنت انا ومجموعه من الاصدقاء جالسين بالدكه الى فيه عصفور على راس غصن وفيه هواء شديد
يلعب بالغصن وفيه واحد من الشباب حول قلت نبيك ترميه الى عندي ساكتون عوجاء ترمي 5متر يمين
الشاره يوم اجتمعن عصفور يتمرجح وبندق عوجاء ولاخ حول وهو يرميه يوم خذنا الى العصفور طايح
يوم شفناه الى راسه منفقش وضحكنا لين فطسنا
تحياتي

[مهند]

العصفور ينتفض والبندق فيها عوجه:p
ماينغزا بك ياخوي:D :D

[ابو مساعد]

السلام عليكم ورحمة الله وبركاته

أشكرك على الموضوع الممتاز ........

أحلى رميه رميتها هي اول رميه في حياتي كنت صغير في العمر12, 13 سنه ولا اعرف مسك السلاح ..........

وفي يوم من الايام مجتمعين عندنا مجموعه من الاقرباء وكان وقتها العصر وفي واحد توه شاري سكتون وحطو ولاعه ومن يصيب الولاعه ورمو عليها كل المجموعه وقدر الله لم يصبها احد وقال احدهم عطوها فلان الى هو اخوكم وفعلا اعطونيها ورميتها وبقدرت قادر اصبتها وقومني ابوي وقال قم سلم على المجلس وفعلا سلمت عليهم وانهلت على التبريكات وفي وقتها كنت في قمت السعاده ...

تحياتي .

[الباروني]

احلى رميه رميتها كانت اول مارميت بالشوزن
كنت جالس عند الغدا والشباب رايحين يصيدون من الدخل وانا جالس وقع طيرين فوق الاثله اللي انا تحتها واخاف تطير وما فيه الا الشوزن وانا اشيلها واجلس ساعه اتركد وعشان يروح الخوف غمضت ورميت واشوف غبره يوم دريت واذا هي جوز صفارى تطيح عندي وانا مدري.لكن الحمد لله اول رميه صفاريتين

[alone]

السلام عليكم
أحلى رمية بس مهب لي للوالد الوالد من ألي يحبون الصيد في أي مكان إللا المملكة يقول غرابيل على غير سنع المهم يقول قبل خمس سنوات كان في السودان طالع هو و خويه بالسيارة و لمحو من بعيد ضبي قاله وقف خل أجرب نفسي أجيبها ولا لا و أطلع الشتاير و أرمي و ماساء الله طاح من أولها يقول يوم حسبناها طلعت 450 متر .


و السلام

[قناص الجنوب]

السلام عليكم ورحمة الله وبركاته وبعد

بالنسبة لي فكانت أحسن رمية رميتها على وبر ومن مسافة بعيدة جداً ولكن كنت قد عرفت مكانه من قبل
فصوبت بندقي( البرق الخاطف) البرنو نحوه وذكرت اسم الله فأصابته في عينه اليمنى فخر صريعاً
ولله الحمد0