المساعد الشخصي الرقمي

مشاهدة النسخة كاملة : سؤال من واحد مبتدئ


كتاب
30/12/2008, 10:38 PM
صحيح ما قدرت أفهم هذه النقطة

الكلام عن الدوافير كوفيا وبريموس العنكبوتي وغيره من الدوافير الصغيرة

في نفس الوقت أكثر الكشاتة يعرضون طبخات ماشاء الله تبارك الله تحتاج برميل مندي وما تحتاج دافور صغير تحطه في جيبك . ممكن تفهموني القصة ؟

إذا كنت طالع كشتة أسبوع وعندي ذبح وصلخ وطبخ وش أستفيد من كوفيا وبريموس ؟

أعتقد أن هذه الدوافير الصغيرة يستفاد منها للغربيين اليل يشيلون عزبة مختصرة على ظهورهم ويتسلقون الجبال
بينما احنا نشيل ويانا نص أغراض البيت ولما نوصل المحل ونطبخ وننفخ رز ومفاطيح وغيرها وإذا أكلنا المشويات والمقليات نتسدح ويالله من فضلك

فهل هذه الدوافير الصغيرة مناسبة لكشتاتنا ؟
سطام vip
30/12/2008, 11:02 PM
بسم الله الرحمن الرحيم

اخوي كتاب كلامك صحيح والكشته تفرق من شخص لاخر

وكل واحد يعرف الي يحتاجه وتعتمد على المساحه المتوفره له في السياره
اذا سيارتك ربع او ما فيها مساحات كبيره بتحاول تأخذ الاحجام الصغيره دوم

وما فيه احد يعتمد على القزوز الصغيره سواء كانت بريموس او كوفيا في الكشتات الطويله ويحتاج لدبه زرقاء واحينا نأخذ اسطوانة المنزل

اهي تعتمد على طريقتك في الاستخدام

فيه ناس(طويله البال) تعتمد في البر على الطبخات البريه البحته شوي وقرص وكبسه وشاهي وقهوه بس على الحطب وما يعجبه غيرها يمكن هذا ما يحتاج لاي دافور

وفيه ناس ما تحب استخدام الحطب وتستخدم الدوافير العاديه

وفيه ناس تحب السرعه في كل شي حتى الدوافير ما تعجبهم تلاقيهم يرهمون

ويعدلون على القزوز والدوافير ليحصل على كل شي بسرعه شاهي قهوه طبخ.. الخ

ومثل ما قلت لك تفرق من كشته لكشته

ابتكلم عن نفسي انا معي عدد 2 دبات غاز زرق ومعي عدد 2 قز كوفيا وصراحه

احس بالمتعه باستخدام القزوز الصغيره لخفة وزنها وسهوله التعامل معها وما تأخذ

حيز من شنطه العزبه الخاصه بالشاي والقهوه بعكس الدبات الي تكون ثقيله وتأخذ حيز كبير من شنطة العزبه وتعرف المهم في الكشته هو ان تستطيع تخفيف الادوات والاواني
قدر الامكان

وبعدين القزوز الصغيره الحين نارها اقوى من الدوافير الكبيره وهذا اهم سبب في كثرة استخدامها

والناس فيما يعشقون مذاهب

واسف على الاطاله
أبو مها
30/12/2008, 11:14 PM
مرحبا اخي كتاب
صادق وانا معاك في كل كلمة كتبتها
طبعا حسب عددكم في الكشته ، ويظهر لي من مشاركتك ان عددكم كبير
ويحتاج لمفاطيح وقدور ذبايح يعني كنك في مخيم كبير وتحتاجون
لدوافير اكبر بقوة الشعلة من قزوز البيوت لطبخ الذبايح، واحترم وجهة نظرك.


طيب اذا كان العدد اربع او خمس او سته اشخاص فقدر ضغط 11وحتى 18 لتر يفي بالغرض
ودافور صغير ولا يأخذ حيز في سيارتك ايظا يفي بالغرض ( مثلا اصدار العنكبوتيات)


طيب لو انك طالع عصرية مع العائلة او مسافر بالسيارة وقفت تستريح
وتصلح لك فنجال قهوة وشاهي ( فإصدارات الدوافير اللي بجيبك مثل ما قلت مناسبة)
علما اني اصلح قهوتي وشاهيي فيها حتى لعشر اشخاص
اخيرا كلاً واحتياجة وهو الذي يفرض علية ما يأخذ منها


تحياتي لك اخي الكريم
أبو مها
كتاب
31/12/2008, 08:02 AM
بارك الله فيكم وجزاكم الله خير

يعني الموضوع مثل عزبة الطبخ وعزبة الشاي والقهوة
وحدة كبيرة للغدا والعشا والثانية صغيرة على قدها
وكل وحدة لها هدف ولها مجالها
فالدوافير الصغيرة لها محلها والقزوز الكبيرة لها محلها

الله يعطيكم العافية ما قصرتو