ورطـــــة جيــب في بريده تطعيس( اللغف ) اليــوم الجمعه ...؟

[تقهو]

سلام عليكم ورحمة الله وبركاته
اسعد الله اوقاتكم بكل خير

اخواني اخواتي
في لغف احمد اليوم الجمعه 2 / 1 / 2009 تورطت احد السيارات من نوع ( جيب باترول ) في دركــال
ولايملك القدره على الرجوع او التحرك ..
لخطورة الجفره ...
ولا أعلم ماحل به حتى الآن .....؟؟

الصور ../
http://upbur.com/test/files/pff0th3bcqxsx2zyzrw5.jpg
واشتباه ورطه .. على قولة الشباب مع صاحب الدباب البانشي
http://upbur.com/test/files/cj8y5z36kyud5z6piod1.jpg
http://upbur.com/test/files/83truv9b0pbg5j7nxszu.jpg

[مقدور]

والله مااظن ينفع معه الى ونش ويسحب من فوق

واعتقد الشباب هنا يعطونك الاخبار وش الحيله مع مثل هالمواقف

[الخادم]

الله يعينة
ما له الابسحبة من الخلف

[ابراهيم2008]

الله يكون في عونه

[ابوسعد 3]

الله يعطيك العافيه

[شاص2006]

الله يكون بعونه ما له الا ابو شنب( الشاص ) يسحبه من ورا,,,,,,,,,,,,,,,,,

[أبونايف...]

يالله ونش علشان ويطلع

الله يكووون بعونه

[الكونترولCONTROL]

أشوف انه لا تورط و لا شيء ... حسب ما أرى في الصورة
لو ينسم الهواء على الآخر ... كان مشى ريوس بالراحة ... خصوصا انه قير عادي

[التعـ King ـديل]

ماله الا موتر يجي مع الجنب ويسحبه ويكمل هو لانه لو سحبه من ورا بيكون الحمل ثقيل على الونش

[ب ر ق]

الله يعينه
بس انا من رااااايي اقول يبطح الكفرات ولا يخلي فيه ولاشي ويطلع بالثقيل

[أبـو عــزام]

انا مره معي هايلكس وصار لي نفس الموقف هذا وقدرت ارقى بعد ما نزلت الهوا للآخر

[نسناس الجنوب]

الله يكون بالعون ماله الا يردم الجفره الى قدامه ويطلع هههههه قالك جبتها الحين ماعندي سالفه بس الله يخارجنا

[العـربي]

بسيطه متستبسطهاش

[رويلي وافتخر]

بما انه باترول لاتخافون عليه يطلع يعني يطلع وبالريوس بعد

[1400]

فيه طريقه ممكن تنجح

ينسسم الكفرات ومايخلي فيها إلا ضغط خمسة أو عشره

ويبرح لكل الكفرات ويجزم على السياره

أو

الاتصال على الدفاع المدني



ـــــــــــــــــــــــــــــــــــــــــــــــــ

[نمر ورقان]

حسب ما اشاهد في الصورة ماني شايف ورطة

ينقص في الكفرات ويعشق الثقيل وريوس
وايضاً لو عملو له مسار للكفرات يمديه يلف ناحية صاحب الدباب ويرجع لا ينقلب ولا شي . لكن شكله خايف
ياخوي لو كان ونيت كان قلنا ورطة لكن جيب لا اعتقد

[أبو_خالد]

أقول إنه يريح الكفرات على الآخر ويرقص السيارة بحيث مايتمادى قدام .. مع الدبل الثقيل بإذن الله يصعد ..

أو إذا فيه إمكانية يكسر مرة يمين أو يسار وبالدبل الثقيل يباري الجرف

[F A H A D]

الله يستر عليه .... والله بلشه صدق طيب ممكن سحب من الخلف ....
ممكن هي افضل شي له و لله اعلم ..:::

[الرح ـال]

الله يخارجنا...وش ذا الوهقه؟؟؟ عموما.. الشباب ما قصروا .. حلوها

لكن ودنا تقول لنا ... شلون طلع؟؟؟!!

[المخاطر]

الله يعينه....

[عيال وايل]

لا ورطه ولا شي النيسان خفيف وما عليه الا انه ينسم للكفرات

ويخليها على عيار خمسه ويعشق الدبل الخفيف ويريوس

الله لايهينه لين القمه ان شاء الله


وسلامتكم

[بواسامه]

لا ورطه ولا شي النيسان خفيف وما عليه الا انه ينسم للكفرات



ويخليها على عيار خمسه ويعشق الدبل الخفيف ويريوس


الله لايهينه لين القمه ان شاء الله




وسلامتكم


صدقت مادامه

[بواسامه]

لا ورطه ولا شي النيسان خفيف وما عليه الا انه ينسم للكفرات




ويخليها على عيار خمسه ويعشق الدبل الخفيف ويريوس


الله لايهينه لين القمه ان شاء الله




وسلامتكم


صدقت مادامه نيسان نم

[مكشاتي عنيزه]

http://up106.arabsh.com/s/mav1d7ep8x.jpg (http://up106.arabsh.com/)

[نائبة الدجة]

اول شي مشكور اخووي

روووحو طاالعووه ولا بس جيدين بالهرج

[وزيرة الدجه]

والله لو انا عنده كان ماجلست كذا كان رحت وطلعته ومثل ماقالت نائبة الدجه

رووحو طلعووه ولا جيدين بالهرج

[shaheenshah]

أشوف انه لا تورط و لا شيء ... حسب ما أرى في الصورة
لو ينسم الهواء على الآخر ... كان مشى ريوس بالراحة ... خصوصا انه قير عادي



صح لسانك اخوي الكونترول

مع احترامي لراعي الجيب ما هوب سواق والدليل هالنثيله اللي عند الكفرات والطعس اللي وراه مهوب طلعة قوية
لو اني مكانه انسم الكفرات على الجنط وبالريوس يطلع زي الحلاوة

[salehtk]

الاخوة الكرام آسف على المقاطعة ( الله يسهل امره )
عندي مشكلة في الموقع بالذات يعلق ابي الحل كل مافتح ال مكشات ارتفع ضغطي ولا اقدر اتركه
ساعدوني

[اذكر ربك]

لا تورط ولا شي ...

قدامه حلين :

1 ... يجيب مسحات ويهد الدركال الي قدام الموتر وراح ينزل التراب بشكل سهل جدا وينزل الموتر ...

2 ... ينسم الكفرات اقل من 5 ويجي من ورا موتر كذالك منسم اقل من 5 ويسحبه بونش كهربائي ...

وصلى الله وسلم ...


الله يسهل عليه وعلى الجميع


سبحان الله وبحمده سبحان الله العظيم

[رمثان155]

الله يسهل أمره وأمر كل مسلم ......

[ابوسعودد]

ياناس والله سهل بالحيل الموتر شغال ويمشي يعني ونش يسحبه من احد النشاما اللي معه ونش في سيارته والموتر يمشي بالريوس وبس

[(( الذيب))]

يبيعهههههههههههههههههههههههههههه

[sniper112]

يمشي على قدام ويخلي الدركسون في وضع مستقيم وينزل مو بشويش ولا بسرعه نص نص شوفه يعدي ولا لاء

[escape_man]

أشوف انه لا تورط و لا شيء ... حسب ما أرى في الصورة


لو ينسم الهواء على الآخر ... كان مشى ريوس بالراحة ... خصوصا انه قير عادي



والله داخل باقول هالكلام بالضبط

الموتر نشيط وعيب يوقف هالوقفة .. والله لو امشي على الجنط

[زيزوم الاكحل]

الا ما يبيع الجيب وهو محله وماله شغل حنا بنسنعه

[غالي]

ياخي بتوقعي سهل

ينسم مثل ماقالوا الاخوان ويسيف على جنب في مكان الدباب وبيرقى شوي شوي

لكن موتة القلب تلعب دور

[نمر بن حثلين]

مثل ذي المواقف ماله الا الحراثه

طحت باصعب من ذا الموقف
بباترول صالون بليل رقيت نفود علشان اكلم بالجوال
ومادريت الا وخشة الموتر تطيح
ويالله وقفت الموتر

ويوم حولت واثري براس دركال رفييييع

ويجيب الله ابن حلال الله يجزاه كل خير
ويجيب جار له جزاه الله خير بحراثه ويسحب الموتر وما بغاش

[Abu Saad]

والله اذا ركزت على الصورة الاولى
وشفت شدة الانحدار وقرب الجرف وطبيعي انه هيام يعني لو تاطا بالكفر قبله بمتر راح يتهايم بالراحة وتجي على التنده..
ومن الطبيعي ان الموتر بيزحف لو يلف او يتم سحبه من اليسار..
اعتبرها ورطة حقيقية مالها حل الا شيول يواسي دربه مع قدام وينزل اما سالفة المسحات هذي يبغى لها 30 رفيق! :

http://upbur.com/test/files/pff0th3bcqxsx2zyzrw5.jpg

[ادفرنس]

الله يعينه لاكن من الي شال ارمل ولا حبس من فوق تخيلو انه جاي بليل وشيكون الوضع والله فوضاء

[فتى داحس]

جب مسحات ويواسي الدركال وينزله بثقيل شوي شوي

[ابووليد55]

الله يعينه انشالله

[رامي النحم]

احسن حل هو انه يفضي الموتر ويدفه على قدام بس لا يركب احد اذا قلب الله يعوضه واذا ما قلب الحمد لله على السلامة

[aljde40]

أشوف انه لا تورط و لا شيء ... حسب ما أرى في الصورة


لو ينسم الهواء على الآخر ... كان مشى ريوس بالراحة ... خصوصا انه قير عادي


فعلاً كلامك صحيح الوضع أحس انه طبيعي جداً .

[الشقران]

جنوطه 10 أنش.. مايبيله الا ينسم 5 ... وبواحد وهو كاسر يمين وبيطلع

[إبن فيصل]

أنا والله أشوف لو أتصل على الدفاع المدني جاته سيارتهم الفورد الكبيرة الي فيها ونش حوالي 60 متر ينتله زي السلام عليكم أنا قد شفتهم ناتلين واحد كان ناشب بمكان كله طين وناتلينه من مسافة حوالي 50متر أو حولها وسياراتهم كبيرة ما يثر عليها الجيب أبد أو مثل ما قال أحد الاخوان قبل أما شيول أو حراثه تسحبه أهم شي سيارة كبيره أثقل من الجيب.

[سطام vip]

يا والله الورطه الله لا يطيحنا فيها ابد

ويااخوان الكلام وانتم متكين في البيت سهل

بس الموقف على الطبيعه صعب واكيد يبيله تركيز وموتت قلب

والله لا يوفقهم الي شايلين الرمل وماهمهم ارواح الناس

الحمد لله انه بخير وان شاء الله بيطلع موتره

وانا لو مكانه وما عندي احد مالي الا اني احاول ابرح الدركال

وترا الموضوع سهل لان الرمل بينزل معك بالراحه

وفي الاخير الله يحفظ الجميع

[ابن طيبة]

الله يعينة
مشكووووووووووووووووووور

[Blazer 91]

الله يكون بالعون

بس الصور ماتطلع عندي

لو تكرمتم واحد يسوي نسخ ولزق يمكن تطلع

تحياتي

[bewildered]

يخوى فى شخص منزل تقرير
صاجات للتغريز يدق عليه
ويجربهن مشان نشوف مدى فعلية الاختراع
ادخل التقرير وشوف بنفسك

http://www.mekshat.com/vb/showthread.php?t=179976

[شرق الصمان]

كثر انتشار الدراكيل في كل مكان وهذا يسبب خطرا على المارة خاصة في الليل
وشركات المقاولات تحفر وتمشي لاتحط علامات تحذير بقرب الدركال
فيا ترى من المسؤول ؟؟؟
اين الرقابة ؟ يمكن يروح فيها أرواح ناس