الفزعه بالمساعده والمشوره ؟؟؟

[بدران123]

بسم الله الرحمن الرحيم
وش حالكم جميعا عساكم بخير
اولا انا من المتابعين لمكشات والمتصفحين لكن ماكتب الله اني اشترك الا ذلحين وابرك الساعات اللي ادخل معكم في هالمنتدى واستفيد معرفتكم قبل اي شي ثاني.
عندنا يالربع مشكله اللي هي شرينا طير من واحد والطير مطروح العام قرناس هوا اخذناه منه وكان يدعيه وماعليه يوم اخذناه تغير الطير علينا لوحنا له بالشلو ويطلب واذا قرب من الملوااح يبعد ويوكر واذا ربطنا له الحمامه جا عليها اظطرينا انا نشبكه بشبكه فا طير انقلب وحش وبالمجلس والعرزبه على اليد راكد وعلى التكايه راكد اذا صرت لحالي. وبعدها دعيته لحالي وسوا نفس المشكله؟؟؟؟؟؟؟؟؟ وكذالك اذا جيناه يطير لو انه على الحمامه ..
مع العلم اني دعيته اول مره لحالي بس من قريب بالملواح وجاء وعشيته وعزلته مابه اخلاف ...
فاا وش المشكله وابي منكم النصايح ياهل الخبره.

[صاحب نوماس]

اخوي ابركها من ساعة تفيد وتستفيد من نصايح اخواني الصقاقير
اذا تقول الطير يجي على الملواح اذا فية حمامة اخوي طمر الطير يومين او ثلاثة ايام ثم ورة حمامة ميتة ثم خلة يذوق منها ثم اربط الحمامة بالملواح ثم خلة تحتة اي اتحت وكرة خلة يطب علية ثم برقعة ثم ادعة على الملواح وخل الحمامة واضحة لة ثم اذا جاء وذاق منها اقلب الملواح على الحمامة ثم اقعد طلع الحمامة من بين الملواح ثم غطها بالملمواح خلة ينتف من الملواح ثم اقعد قلب الملواح وبعدها ان شاء الله تبي تدعية بالملواح بدون حمامة راح يجي ان شاء الله

واتمنى لك التوفيق

[صقار البيداء]

الله يحيك يابدران بين ربعك واخوانك وابرك الساعات الي تشاركنا اخوي العزيز مااشين من الطير لاسوى هالسواة لاني مريت بنفس التجربه الطير طال عمرك ياما انه اذا طرح صيدته تنشال منه وهو يشوفها وهذا طبعن غلط على طبع الطير لازم العزل يتم بطريقه بحيث ان الطير ماينتبه للصيدته وهي تنشال من تحته ثاني شي ياما الطير يكون طبعه نزر وفيه حب ماانطحن في راسه فاانصحك انك تبدا بالطير من الاول اول شي تخلي الطير عليه البرقع مده ثلاث ايام او اربع ايام عشان يركد وتبداء معه من البدايات تنقزه وتدعيه بسبب وتهده على حمامه وهي مربوطه بسبب بس اهم شي النقل هذا اهم شي لان القرناس يلزمه النقل والتدهيل والتجويع لان ماسرع مايتنكر القرناس الوحش مهوب مثل الفرخ اذا كنت في مجلس فرعه عنه او في غرفه الطيور بس اقل شي للقرناس الوحش في اليوم نقل ثلاث ساعات عشان يركد فااكررياخوي عليك بالنقل المستمر والتدهيل ارجوا اني اكون افدتك والله يحيك مره ثانيه وتقبل تحياتي ومشاركتي اخوي العزيز ..

[بدران123]

والله يالربع ان الشكرا فيكم قليل لكن ماقول الا جمل الله حالكم وجعلكم سالمين.
صاحب الناموس لاتبت يمين تكتبها وجعلك ذخر
صقار البيدا لاتبت يمين تكتبها وجعلك ذخر
واكررر شكرا وتقديري...
بدران.