المساعد الشخصي الرقمي

مشاهدة النسخة كاملة : ((حـــزن الذيــــب)) ماغير فكسارك ترى الجيب مضمون 00 مركاب عز ولو نويت المراقيب


مخاوي الصقور
28/03/2004, 04:46 AM
اسعد الله اوقاتكم بكل خير يا اعضاء وزوار مكشات
احببت ان اهديكم هذه القصيده وقد كتبت في فتره
قريبه جدا وتلمح المناسبه في الأبيات



لا تنزل الدمعه على الجفن والنون=ماهي رخيصه ياعديم العذاريب
ماني بلاش ولابتي ما يهونون = ابشر بمن هو يقطع الشك والريب
قم شغل الموتر ترى الدرب مسنون = خط الرياض ولا تدور مصاحيب
ماغير فكسارك ترى الجيب مضمون = مركاب عز ولو نويت المراقيب
بالعون مالي غيرك اليوم بالعون = تكفي مشاهد صورتك من على الجيب
شفتك مثل صقرن تجلى على الكون = شفتك وخفت العين ترسل تصاويب
ذكرت ربي سخر الفلك مشحون = شفنا القدر والغيب في عالم الغيب
مسراك بعد 12 في حزة سكون = تلفي علي وصيدتك فالمخاليب
تكفى يابو راكان والعلم مكنون = علمن صحيح ولا تغشاه تكذيب
الحق علي ياخوك من ناس يكوون = جربت ما ظنك تبي لي تجاريب
من هو يهني والخلايق يعزون = ومن هو لها غيرك وفود ومناديب
يا اعز واغلى من على الكون يمشون = شيخ المراجل مدهلن للمعازيب
ابيك تسكت من لمزني على الهون = جاهل ولا له بصمتن مع هل الطيب
لمحت حزن الذيب والذيب مسجون=يا للعجب من حزن غطاك ياذيب
مثله ترى حالي من البعد مغبون= مثله ترى حالي عطيب المضاريب
خل الذي قالوا وقالوا يقولون = اخذ بكفه بنت شيخ المواجيب
طارق العتيبي=مخاوي الصقور

تحياتي
منيع
28/03/2004, 07:06 AM
تسلم اخوي مخاوي الصقور
ابيات جزله
ابيات ذات مغزى
ابيات تستحق القراءة والاشاده
دمت موفقاً بعون الله وتوفيقه
نجمة سهيل
28/03/2004, 02:27 PM
تسلم يامخاوي الصقور على هالقصيده الرائعه ، والى حلاها اكثر ذكر الفكسار:)
ابو عايد
28/03/2004, 09:09 PM
أحسنت .. يا مخاوي الصقور

مشاركة أكثر من رائعة000 الله يعافيك يا شاعرنا

تســلم على هالكلمات الجميلة 00 الدالة على ذوقك الرفيع 00 وتعبيرك الصادق

الله يعطيك العافية على الجهد الرائع وصح لسانك

وتقبل تحياتي // العاشق الولهان
تالي الاولين*
29/03/2004, 09:46 AM
.


صح لسانك اخوي مخاوي الصقور

قصيده في طياتها الكثير

تحياتي


.
مخاوي الصقور
30/03/2004, 01:21 PM
اخواني الغالين
اسعد الله اوقاتكم بكل خير
اعتذر عن تأخر في الرد
ولكن يعلم الله بما اعانيه هذه الايام
والله يكون فالعون00

منيع الغالي
لا هنت ولا هان غاليك
وفعلا الابيات ما طلعت مني الين شفت الضيم في دنياي
غير 00 وغير00
عالعموم ماقصرت يالغالي ودخولك للموضوع تشريف لي
وللقصيده

الغالي
نجمة سهيل
الفكسار وما ادراك مالفكسار طب العليل فعلا
شوف شوف اللي في توقيعي ترى هذا الموتر اللي ذكر
في القصيده
تحياتي ولا هنت يالغالي

ابو عايد 00 الغالي
اشكرك على الرد لكن اللي احزنني فعلا والله
ووالله لم احزن بسبب النت من يوم عرفته بما يقارب الخمس سنوات ونصف
زي ماحزنت لراعي مرات0000
وينه00!!
فقدته والله عساني ما افقده في شر
ترك الاشراف00 قلت مواضيعه 00 انعدمت ردوده 00 فيه شي ؟؟
ترى والله جاهز باللي اقدر عليه
اهم شي واحد زي راعي مرات يكون متواجد بيننا 00
الغالي ابو عايد 00 تعرف انا تعلمنا من راعي مرات الكثير والكثير
ولا زلنا نتعلم منه وانا اول من تعلم من راعي مرات من اسلوبه
من كلامه
حتى من ردوده كنت اشوف وش يكتب
قسم بالله فقيده على المنتدى وانشاء الله يرجع لنا بكل خير وسلامه
لا هنت يابو عايد واسمح لي لكن احنا في المنتدى صرنا زي الاخوان
وهذا ترى ما يميز مكشات عن غيره
يتواجدون الرياجيل فيه وحتى مواضيعهم تدل على انهم في منتدى للرجال فقط
تحياتي الصادقه ايها الغالي

تالي الاولين 00 هلا بك يالغالي
ولا عدمت ردك ولا عدمت اطلالتك البهيه
اشكرك من الاعماق ايها الغالي
عيد الجماعه
02/04/2004, 02:52 PM
السلام عليكم ورحمة الله وبركاته

صح لسانك يامخاوي الصقور عاى القصيده الرائعه

الله لايعدمنا من قصايدك


واحب اقولك الله يعينك على غرام الجيوب
:D
مخاوي الصقور
04/04/2004, 06:37 AM
عيد الجماعه
اسعد الله اوقاتك بكل خير
لا هنت واتمنى ان تكون القصيده حازت على رضاك
اما عن الجيوب وانا خوك فخطر على بالي البيت اللي يقول
يقوله اللي ما حضر حرب تشرين
تحياتي
;)
قليب الذيب
25/04/2004, 09:06 AM
كلمة (بالعون) يقصد بها الحلف عند اهل البادية ويقال انه قبر في شمال الجزيرة. والحلف لايجوز الا بالله سبحانه وتعالى ارجوا التنبه لذلك وجزاك الله خير يامخاوي الصقور.

بالعـون مالـي غـيـرك الـيـوم بالـعـون تكفي مشاهد صورتك من على الجيب
مخاوي الصقور
26/04/2004, 04:20 AM
هلا اخوي
قليب الذيب
تمنيت انك ماتاخذ بيت واحد فالقصيده وتترك الباقي
والعون من الله سبحانه وذكر الله سبحانه
ذكرت ربي سخر الفلك مشحون 00شفنا القدر والغيب في عالم الغيب
اتسمت به القصيده قبل البيت
المذكور وفي اغلب قصائدي ولله الحمد
يالله يا محصي مع العمر قسمي = يامنزل التوراة والصحف وانجيل
رحمتك ياواحد ليا اشتد سقمي = وارسلت لي من يقطع الحيل بالحيل
ترحم عظامي لا وقف دم جسمي = واقفيت في رجوى زروع ومحاصيل
وختامها صلوا وجوبٍ ولزمي = على شفيع الخلق يوم التهاويل
والقصيده لها اكثر من شهر نازله ليه مارديت الا الحين
وبالذات يوم نزلت آخر قصيده لي
ارجو انك ماتعيد هالحركه
0
0
تحياتي0