رايكم يهمني ......؟؟

[الحر 911]

السلام عليكم ... مساء الخيرات للاخوان

رايكم يهمني ........................................؟؟؟

انا اليوم مريت برق الحيا وحصلت عندهم بزابيز من بلاستك وفي راسها زي المسمار تركب في الجوالين البيض ابو خمسه ريال وانا ابي مشورتكم ابي اركبها على جالون ماء اسود الكبير بس كيف اخليها تثبت ماتتحرك وتكون ثابته وش افضل شي يمكس فيها الغراء او الماد ةالبلاستيكيه ورايكم يهمني يالربع وسلامتكم



اخوكم في منتدى مكشات / سعــد البقمـــي

[سرهيد]

السلام عليكم

كونك انت اللي تركبه ترى مو ضابط معك

لان الغراء ما ينفع

وتركيبه تكون بطريقة معينه تجعله يمسك ، اسألني سبق وجربت ابي اركب بنفسي وما نفع

فيه جيوك جاهزة ومعها بزبوزها وسعرها معقول

تقبل احترامي

[الحر 911]

يامرحبا ياسرهيد مرورك سرني ورايك في محله

اخوي طيب شلون ركبوها وش اللي خلاها تمسك .. ياليت الاخوان يبدون رايهم لكي استفيد انا وانت وغيرنا

[الاصلي]

كلام اخوي سرهيد صحيح ونصحك فيه
والبزبوزالمركب ماهو الي انت تقول شكله يختلف
البزبوز الي انت تبي صعب يمسك عليه الغراء

[الحر 911]

الاصلي ياهلا بك اخوي

طيب وش البزبوز اللي يركب عليه وكيف شكله وش اللي يمكسه لاني ماشفت قبل بس شفت البزبوز في المحل واعجبني وطرت علي فكرة اني اركبه على الجالون الاسود الكبير تعرف شيل وحط وتعرف الثقل ماينفع الأ بزبوز وترتاااح .. اخوي مرورك اسعدني

[سطام vip]

اخوي سعد الشباب ما قصروا

بس ابعطيك حل انا عندي جالون وابي اركب عليه بزبوز لان الجوالين الجاهزه

ما جازت لي اولا لان الحفيه حقتها كبيره وما يركب عليها الليات الصغير

المهم سئلت محل وقالي هات الجركل ونكبس لك حنفيه عليه قلت وشلون

قال انت عطني الجركل يوم او يومين وتستلمه جاهز فيه مكينه تكبس البزابيز

بس هل يركب على الجركل الاسود ما ادري ابتأكد لك واذا انت قريب في الشفا مر عليهم

اسم المحل (نوماس للرحلات) في مدخل الشفا (بدايه طريق ديراب )

دمت بخير

[إعصار]

ماعندي علم وشلون تثبيتها ..

لكن أشوف منها كثير .. عند البرية .. كذلك برق الحيا ..

بس احرص تكون الحنفية حديد .. لان البلاستيك أدنى مطب في البر يكسرها لو صقعت في شي ..

بعكس الحديد ..

ويازين الي ازين منها كلها التانكي ..:d

[.البدراني.]

اترك عنك المطاريس وخذ لي ومعه طنب ابو بزبوز

[البوابه]

بسم الله الرحمن الرحيم

اخوي الشغل بسيط ولايحتاج تدفع فلوس

دور لك غطاء نفس الغطاء الي يركب في الجالون

الطريقه

خذ دريل وفيه ريش للحفر وتكون اصغر من الولف او بنفس حجمه ثم احفر في وسط الغطاء لين تكون فتحه ومن ثم دخل الجزء المسنن من الولف المراد استخدامه ومن ثم قص لك جلبه وتكون من بلستك ثقيل او تكون مثل اللي يقصونها ( قازقيت) ومن ثم خذ صا موله ( اذا تحب بلاستك) مع ورده من اللي تركب على صناديق السيفونات اللي تركب لحجز الماء وبعدين شدها و ركب الغطاء على الجالون ويكون الغطاء يتركب ويفك عند الحاجه

ان شاء الله وضحت الفكره

[محلات الكشاتة الرئيسي]

السلام عليكم

شف فيه محل بطريق الميه

أسمه الكشاته عند أشاره مقبره النسيم

يركبلك بزبوز بعشره ريال بس

جب الجالون معك وهو يركبلك بأي مكان تبيه

ويجربه لك قبل تروح بعد

وسلامك

[الحر 911]

الاخوة اللي مرو على موضوعي وابدوا برايهم .. مشكورين وماقصرتوا

انا البارح ماجاني نوم الا لازم اركب البزبوز البلاستيكي وابشركم جيت من الدوام على طول قبل لااتغدى طرت عليه فكرة اني اجيب المسدس اللي يسخن ويطلع منه حرارة وبديت افتح بالجالون ودخلت البزوز وشريت غراء الماني بارد حار من حقين المواد السباكه وبديت اركبه وابشركم ثبت بس باقي ماجربت الماء فيه بخليه بكرة وبعطيكم رايي فيه وسلااامتكم

[مكشاتي فاضي]

الله يسلمك ..
بشر عسى بزبوزك نفع ..

[azmm2009]

بشر عسى بزبوزك نفع ..

[سكّين]

رح لأقرب سباك ويضبط لك البزبوز على كيفك واختيارك ...

[كوكيان]

اخوي مثل ما قال الاخ قائد رح لاقرب سباك خذلك نقاص نص بوصه وركبه في الجالون من داخل باستخدام صمغ السباكه ترى مافي اقوي منه ومن الخارج حط سنه نحاس 3/4 بوصه وركب بزبوزك باستخدام التفلون حق السباكة وبالتوفيق (سباك عليمي)

[دغيم1]

السلام عليكم ورحمة الله وبركاته
حياك الله اخوي
الشغل مثل ماقال أخوي
البوابة
وسبق سويت حنفية على جيك 200 لتر الأزرق
وطريقة وضع الحنفية على الغطاء أفضل ولتفادي كسرها
وموجود في السوق حنفيات بلاستيك عند أصحاب محلات الزراعة ورخيصة تاصل الحنفية مابين 2 - 3 ريال
والصامولة بلاستيك ، وعملها مايحتاج روحة ولاجية
تقبل تحياتي

[أمير الخيال]

سرهيد جوبك الله يخليه ---- الله يعافيه الله يبارك فيه

[منتعش]

حي الله أخوي الغالي : الفتى المبدع
غالباً الجراكل اللي فيها صنبور تنكسر أو تهرب أثناء التحميل وهذا بيحوس عليك عفشك وفرشاتك
ولعل هذا الرابط يفيدك شوي :
مقارنة بين توانكي الماء وجراكل الماء (http://www.mekshat.com/vb/showthread.php?t=31303)

[الفلبيني]

اخوي سعد جرب بلف الهوا للكفر خاصه للتيوبلس ويكون بعمل فتحه اصغر قليل من مؤخرة
البلف ويثبت بدون غراء ولا يحصل تهريب بأذن الله

[المنفلوطي]

,’

هج منها .. أنا شاريها ماتنفع الا للدبات الموية أم ست ريال البيض ..

وحتى لوحطيتها فيه يبيلك ذرابة في الاستعمال لاتها احتمال تهرب وتحوسك ..

فيه بدائل أحسن .. مثل الجيك الي يجي بصنبوره جاهز وغيره

[الحر 911]

اسف على التاخير بس كنت مسافر واخذت الجالون معي وابشركم اختراعي زبط وبيض وجهي مع الربع .. تحياااتي لكم

[المنحاش]

طيب البلاستيك هل هو عملي

[ابو فارس999]

طيب عطنا صورة له بعد اختراعك

[مسامرالليل]

شف لك سباك شاطر

[عاشق النداوي]

انا اتوقع ازين شي يكون البزبوز في الغطاء عشان اذا جيت تركب الجركل في السياره تغير الغطاء بس عشان مايكسر شي البزبوز وذا وصلت غير الغطاءوركب اللي فيه البزبوز وبتوفيق للجميع...