وزنيه

[ابوي انت]

يا جماعه من يعرف وزنيه الرز
مره كنا خمسه اشخاص وحطيت 3 كيسان رز من ابو كاس وصارت شويه علينا
ومرة ثانيه نفس المجموعه وحطيت 5 كيسان ابو سيوف وطلعت كثيييييييره مره تكفي 10
وشلون اعرف اوزن الرز ؟

[NOYEB]

المسأله حسب الجوع ..بعدين اذا بغيت تزود زد كاس مو كاسين كثيرة

شكرا

[البانيلي]

سلام ..

زيادة الرز مهي حسوفة .

ومحاكيك ما عمره قاس الرز بالكاس

يعني اذا صرنا اكثر من عشرة استخدم قدر كبير 10لتر واحط ثلثه رز

يعني دايم يحكمني حجم القدر والمقاس دائما عندي ثلث القدر

اشوف بعض الشباب يحط ملا يدينه الثنتين رز يقول هذا حق اثنين

طبعا تختلف من شخص لآخر باختلاف حجم اليد

ما شاء الله بعضهم ايديه تقل كريك

[czar2m]

هلا فيك اخوي ما يبي لها شي على شان يصير نثري
خصوصاً ابو كاس والوليمه و رز باب الهند (عنبر) او ( بشاور)
هذي افضل انواع الرز اللي جربتها و قياسها متساوي للي يبي الرز نثري
كل كاس او اي مقياس تقيس فيه الرز لازم يكون هو مقياس الماء

كاس رز = كاس و نص او كاس و ثلاث ارباع

و جربها و رد لي و احرص على الزيت ترا له دور في فلفلة الرز يعني لا تصير بخيل في الزيت و ما يمنع استخدام السمن مره في الاسبوع << اذبحه عند السمن

طبعاً هذي طريقة العليميه مثلي :D

[ابوي انت]

سزار توم
جرب رز ابو سيوف
حبته كبيره والكاس منه يعادل كاسين من الانواع الثانيه لاني جربته وجربت غيره مثل ما قلت لك والزيت ماله داعي
قطيعات من شحم الذبيحه والا ذنيبة الدجاج كشن بها البصل وعدها بصله تخليها مع الرز

[الشيف محمد]

السلام عليكم
بالنسبه للقياس كل شخص كأس بلاستيك مليان
إذا اردت الرز يكون كثير ونثري يجب نقعه بالماء(تربيصه)مدة ساعه ونص إلى ساعتين بعده تغسله ينزل الغبار والنشا بعده نشفه وكبه بالقدر خل النارقويه فتره بسيطه ثم اقصرله على الآخر
إذاكان قدرظغط لايتعدي عشرين دقيقه وإذاكان قدرعادي اقل شيْ نص ساعه

وكل شخص له طريقه بالطبخ
تقبل مروري

[cooc]

خذ العلم الاكيد يمكن تستغرب
بيالتين شاي بادريق = شخص واحد
يعني اذا انتم خمسة
10 بيالات تكفي

[الراقي0]

الله يعينك كل واحد يختلف كلامه عن الثاني

[czar2m]

هلا فيك اخوي مره ثانيه انا على بالي تسأل عن وزن الرز مع الماء
على العموم حصل خير
انا في الرز احط على حسب الاكيله و في الغالب
كاس واحد لكل شخص
و الزورد ولا النقص

[رحال 6]

خذ العلم الاكيد يمكن تستغرب
بيالتين شاي بادريق = شخص واحد
يعني اذا انتم خمسة
10 بيالات تكفي



كلام سليم 100% :good: وجرّب وأنت الحكم
وإذا كان الجو برد لا يمنع أن تزيد بياله للضيف وبياله لخوي الضيف وبياله للراعي :D

[متيم البر]

الزود ولا النقص من أول يوم الرز رخيص، بس الحين الله يعين قام الواحد يحسب للكاس والكاسين وأول كنا نحص خيشة ولا نسأل،
الله يرحم الحال.
عموما، كاسين كبار لكل 3 أشخاص مناسبة جداً من رز أبو كاس أو الوليمة

[ابوي انت]

يا شباب المكاييل اللي تقولونها من الكيسه والا بعد الغسل والتخمير ؟

[راشد الحربي]

المقاييس من الكيس على طول ...

ومثل ماذكر بعض الشباب .. مقاس الرز كل شخص كاستين شاهي بادريق ... إلى ثلاث كاسات على حسب الجوع ....

وتراه قياس مرررررررررررررررة ضافي ....

[بن شمروخ]

شف يالغالي الميزان الي اغلب الناس توزنه

وهو لكل شخص عادي كاس واحد يعني لو انتم 5 حط خمس كاسات وزد كاس ولا كاسين
((لان الزيادة ولا النقصان )) لكن هي تعتمد على الطبخة والشيف اذا كانت الطبخة لذيذة فاعرف انه ماهو باقي منها شي ولو تحط 8 كاسات ... اما لو كانت عادية يعني تطبخها وانت من رايق ومافيها مهارة وفن حط لكل واحد كاس وزد كاس ....

ثانيا تعتمد تنقيع الرز يفضل انك تنقع الرز بموية حارة اذا كنت مستعجل لمدة نصف ساعة مع الغسيل يعني (رز مشخول ) وبعدها ادع لي بالتوفيق

[كثر العذاب]

وفيه ناس توزن ببيالة الشاهي بعد
يعني النفر يحط له بيالتين
وانت ووزنك عاد

[ارنون]

انا اللي اشوفه والله العالم انه لكل شخص ملا ايديك الثنتين
وهاذي طريقتي بالعاده والله اعلم

[أخت مبارك]

حنا مستحيل نقيس الرز بالكاس
بس مرات اكتب بالكاس لما احط وصفاتي لان في ناس ماتعرف الكيله
حنا نقيس الرز بالكيله مدري عاد بلهجتكم وش تقولون لها
ونستعمل علبة الاناناس الدائريه القديمه كان عرفتها
اللي يجي عليها غلاف احمر مرسوم عليه اناناس لونه اصفر
والعلبه اصلها معدنيه
هذي نستعملها للكيله
ونحط ثلاث كيلات لست اشخاص
واذا اربع كيلات تكفي ثمان اشخاص
ويزيد بعد ماشاء الله
وكل الناس هنا بالبحرين معروفين يستخدمون
هالعلبه من ايام اجداد اجدادنا لقياس الرز
حتى بمحلات بيع الرز يقيسونها بهالعلبه ايام اول طبعا
وهذي صورته صورته لك عشان تشوفه
http://www.mekshat.com/pix/upload02/images96/mk106353_alim3363.jpg


http://www.mekshat.com/pix/upload02/images96/mk106353_alim3364.jpg

[المبتكر1]

يا بوي انت الله يرحم لك الوالدين
الكيلة تكون قبل التنقيع بالنسبة للرز أبو بنت الماءكيلين وثلاث أرباع للكيلة الواحدة
طبعا في القدرالكاتم (الضغط) تخليه بعد ما يتشتش (يرقص رقص خفيف ) اللي هو البلف على نار قريب متوسطة
_الله يجيرنا من النار_ حوالي 13 دقيقة
وان شاء الله تدعي لي