شاركوني في اختيار مكان المخيم

[isuzu.2007]

السلام عليكم .. حيا الله الاخوان ..

كلفت بتجهيز مخيم للشباب و احترت باختيار المكان و لاختيار المكان بعض البنود (طبعاً حنا بالرياض) ..
1. يبون ربيع موب فود
2. يكون في حدود 150 كم إلى 200
3. يكون صااااااااد يعني ما حولنا ناس واجد و طقطقه علما ان وقتنا يساعدنا و هو الخميس و الجمعه اللي في الاسبوع الثاني من الاختبارات ..

في بعض الاماكن المقترحه و نرغب بالزياده ..
1. روضة الحقاقه بتمير
2. الخفس
3. الطوقي
4. أم ركبه
5. رويغب

وش الراي يا اخوان ابي اماكن جديده مع الوصف .. و جزاكم الله خير ..

[سحابه]

السلام عليكم ورحمة الله وبركاته
. يكون صااااااااد يعني ما حولنا ناس واجد و طقطقه علما ان وقتنا يساعدنا و هو الخميس و الجمعه اللي في الاسبوع الثاني من الاختبارات ..

إذا كان هذي شروطك ياخوي أرشح
الحقاقه معنى أني مارح لها غير مره وحد لكن أعجبتني كثير صاده وهاديه لكن لازم عفشك كامل معك
تقبل مروري

[isuzu.2007]

جزاك الله خير اخوي سحابه ..

و هذا اللي في البال بس طرحت الموضوع يمكن يشيرون علي الشباب في المنتدى بشي أفضل ..

ننتظر باقي الآراء .. تو المخيم باقي عليه ..

[ذرب سدير]

أنصحك بفيضة السحق أو روضة أم الشقوق شرق تمير


وعندك بعد روضة المربوبة غرب جلاجل


هاك الريضان ما يخيّم فيها غير المشايخ .. يعني مابهن طقطقة وقلة حيا :p

[isuzu.2007]

لا هنت ذرب سدير .. بس ممكن وصف أدق شوي .. يعني مع اي مفرق ادخل كم امشي و ين اروح .. ترا ما معي قارمن وصف لي و ازهل الموضوع ..بنتعبك شوي بس تحملنا ..

[ذرب سدير]

لا هنت ذرب سدير .. بس ممكن وصف أدق شوي .. يعني مع اي مفرق ادخل كم امشي و ين اروح .. ترا ما معي قارمن وصف لي و ازهل الموضوع ..بنتعبك شوي بس تحملنا ..


طال عمرك ..


فيضة السحق شرق تمير في حدود 10 كم .. تسنك رايحن يم الحقاقة هي قبل الحقاقة بخمسة كيلو تقريباً .. وروضة أم الشقوق عن تمير شمالن شرق وهي قريبة منها تقريباً 8 كم


أما بالنسبة لروضة المربوبة فتبعد عن جلاجل حدود الـ 20 كم تقريباً جهة القبلة .. تقضب طريق الداهنة وأشيقر .. وقبل نزلة الداهنة بتلقى لوحة على يمينك مكتوب فيها ( وادي السلم على يسارك والمزيرعة على يمينك ) أتركها .. بعدها بمسافة بسيطة بتجيك لوحتن ثانية بتشوفها على يمينك مكتوب فيها ( المربوبة يمين ) بس قام أحد الأشقياء وطمسها باللون الأسود فانتبه .. المهم إذا شفتا اللوحة بتشوف فعلاً دربن بري واضح على يمينك أدخل من عنده وامسكه بتنزل شوي شوي طويق وانت ما تدري .. اتبع الدرب وخل وجهك شمالن غرب تقريباً بتمشي حدود عشرة كيلو تقريباً ثم بتصير بوسط الوادي .. بعد ما تآصل الوادي روضة المربوبة بتصير على يدك اليسار جهة الجنوب وبالمارية تراها مليانة من شجر الطلح والسدر والسلم ..


وعموماً الوادي هذا هو وادي المشقر وكله ربيع ما شاء الله بساط أخضر ومليان شجر

[isuzu.2007]

بارك الله فيك و بيض الله وجهك عز الله انك ماقصرت ..

[isuzu.2007]

فيه روضه حول الحقاقه يسمونها محيسن وش رايك فيها .. تخلي روضة نورة وراك و الضلع يمينك تمشي قرابة 7 ك تجيك الروضه جيتها قبل 4 اسابيع وش رايك فيه مثل المربوبه او المربوبه احسن (( عشان اقيس عليها ))

برضو ما قصرت و بنتعبك معنا ..

[ذرب سدير]

فيه روضه حول الحقاقه يسمونها محيسن وش رايك فيها .. تخلي روضة نورة وراك و الضلع يمينك تمشي قرابة 7 ك تجيك الروضه جيتها قبل 4 اسابيع وش رايك فيه مثل المربوبه او المربوبه احسن (( عشان اقيس عليها ))

برضو ما قصرت و بنتعبك معنا ..


روضة محيسن زينة وهي مثل السحق وأم الشقوق ومشكلة هالريضان ما بهن شجر .. كلهن مقرعات


فيه فيضة متميزة جداً في هاذي المنطقة اسمها ( فيضة شعيب أبو رمل ) تتميز بالبابونج .. تشم ريحته قبل ما تآصل الفيضة :) وموقعها بعد ما تخلي الحقاقة وراء ظهرك وروضة نورة تصير عنك جنوب وجبال العرمة عنك شمال .. تباري جبال العرمة ووجهك شرق .. بتمشي تقريباً عشرة كيلو أو دون بتشوف على يسارك ضلعن صغير فوقه رجمن واضح .. بعد الرجم أمش ثمانية كيلو تقريباً ووجهك شرق مبارين الضلوع اللي على يسارك ثم لف يمين وادخل الشعيب وتعمق فيه كنك متوجه للضلوع اللي عنك جنوب بتشوف ضلعانن مغطيهن الرمل جهة الجنوب .. فيضة البابونج بتشوفها قبل ما تآصل هاك الضلعان .. لكن ما فيها شجر .. قرعاء وهاذي مشكلة مفيض العتش وفيضانه


وبعد اهناك فياض ورياضن ثانية لو ما عجبتك هالفيضة مع إني متأكد أنها بتعجبك علشان البابونج .. عندك روضة القريعاء تبعد عنها حدود الثمانية كيلو جهة الشرق كنك رايحن لحفر العتش .. بالمارية حولها برج بتشوفه جهة الشمال الشرقي من الروضة


وعندك روضة المصطحبة تجيها عن طريق شعيب البلدي تسانك تعرفه بس هاك الجهات لازم يصير معك قارمن لأنك بتظطر ترقى جبل العرمة وبينحاس رآسك من كثرة الشعبان والدروب حتى تآصل المصطحبة وهي بالمارية حول روضة الترباعة وشعيب الشوكي ~

[isuzu.2007]

ذرب سدير .. أخجلتني بخدمتك لي .. الله يوفقك دنيا و آخره و يحرم وجهك عن النار ..

أنا أشهد انك ذرب ..

[isuzu.2007]

ننتظر باقي آراء الشباب ..

[AL-Hadbani]

غير الصمان الغربي ما أشوف شيء مع إحترامي للجميع بس أم قرين غييييييييييييييييييييييييييييييييييييييييييييييييي يييييييييييييييييييييييييييييييييييييييييييييييييي ييييييييييييييييييييييييييييييييييييييييييييييييير

[أبو عيسى 770]

السلام عليكم
أنا اقترح الخفس اول ماتدخل الروضه تبتل خل الشبك على يمينك لين يلف الشبك معك هناك الموقع بس لازم انك تدخل 100 متر تقريباً اذا تبي الربيع

[isuzu.2007]

أبو عيسى 770 .. أخاف تكون زحمه ..
هواوي F150
جزاكم الله خير و ما قصرتوا ..

[isuzu.2007]

ننتظر باقي الشباب ..

[هاوي بر12]

يالغالي يا ذرب سدير....المربوبة تقع بين الداهنة واشيقر؟ او قبل ما تاصل الداهنة؟
ما اعرف ذيك المواقع...

وضح اكثر ...او عطني الاحداثية اذا كانت عندك....وسلامتك.....

[هواي البرr]

والله اقترح عليك الرمحية في ربيع زين السنة

[هواي البرr]

ولا الطوقي حلوة الطوقي جايتها امطار وفلة

[الكونترولCONTROL]

شمال الخفس الشمالية بــ 3 كم موقع ممتاز
ربيع - شعيب - هدوء -أرضية متنوعة

[isuzu.2007]

هاوي بر12
هواي البرr
الكونترولCONTROL
جزاكم الله خير ننتظر باقي الشباب ..