قصيدة كشته

[أبوكشته]

ياأخواني أنا بصراحه ماني بشاعر بس أني أحب البر والمكاشيت وهذه أبيات كتبتها مما فى خاطري ساعتها وأرجو إنها تعجبكم :


يبرق الــــبراق نــــوره فى الســـــــماء لـــــــواح """ وأمطرت وصوت المطر وريحه للنفس شراح
والنفس ياسعدهاضت للربــيع تبـــــغي المـــــــرواح """ وركــــــبنا وارد النيسان من هديه لجو ســماح
لــــربيع زاهـــي ورده بكل لــــون والطـير صــــداح """ وكل روض النــــفل والخــزاما عطره الفــــواح
وعـــيونك تناظــر السهل والـــوادي بلا باب ومفتاح """ ربيــــع يغسل كل هم عــلق بالجوف وإنــــــزاح
وفى خـــيمة إجتمــع فيها خـــفيف نفـس ومــــــزاح """ مابينهم كــــــلافه وكل يــــقول إســـترح ياصــاح
وشبــة الــنار تــــنادي للبعـــيد حيــا على الفــــــلاح""" وحولها تسامرنا بسالفه وطـــاروق والليل راح
ويــشق الــنور وريح الــبن فى جـوف الدله فـــــاح""" والقرص وسط الجمر إستوى والزبد عليه ساح
أيام سعيده قضيناها بين النــفود والصـمان وسمـاح""" راحت عساها تعود علينا بالخير ونعود للمراح

[ساري الغداري]

أبو كشته


أضن هذا سواليف يمكن بعدين يقال لها شعر يعني يبيلك تشد على نفسك وتخالط الشعار وتقرأ أشعار وبعدين تصير شاعر

مهليش لاتزعل,,,,,,,,,,,,,,,,,,,,,

[ريف النشاما]

أخوي ابو كشته ..
مرحبا بك معنا وسط إخوانك وأحبابك .. وشكرا لك على هذه المشاعر الفياضة بريح الخزامى والنفل من خلال هذه القصيدة الشجيه والتي كشفت لنا بأن هناك شاعر مستخبي ولاكن تحتاج الىبعض التعليمات والتوجيهات والتي سوفى (أتلقف)
وأشرح لك البعض منها(من خلال تجربه ورأي شخصي )
بما أنك ذكرت أنك منت شاعر بل محاول
أولاً / القصيده(الشعبيه) تعتمد على عدة عوامل
1-الموهبه( عامي- فصحى) وهي من الله سبحان وتعالى وتكون وراثيه وتختلف من شخص لآخر

2- ثقافة الشاعر /كُلما ازدادثقافة إزداد إبداعاً.

= الدراسه والتعلم / وهاذي خلها لأحبابي المختصين (ياعمري يالنحو)
= قرائة الدواوين/وبالذات القديمه منها وهي كثيره ولا فيها إلا قصيدٍ جزل ماهي خثاريق التالين .
مثل / تركي بن حميد
[
poem font="Simplified Arabic,4,black,normal,normal" bkcolor="transparent" bkimage="backgrounds/2.gif" border="none,4,gray" type=3 line=0 align=center use=ex num="0,black"]
ياما حلا ياعبيد في وقت الأسفار ** جر الفراش وشب ضوء المناره
مع دلة تجذى على صالي النــار ** ونجرن اليا حرك تزايد إعباره[/poem]
ومثل/بديوي الوقداني

أيامنا واليالي كم نعاتبها شبنــــــــا ** وشابت وعفنا بعض الأحوالي
ومثل /خلف الأذن

بيـّن دليل البد وعبادة المـــــــــال ** وأقفت رعاياهم تسابق قعدهـــــــــــــــا
كريم يابرقٍ سرى يشعــــــــــــــل ** إشعال بالمزنه الي قام يرزم رعدهــــا
من وبلها ندفا ووادي المرا سال ** والضلعه الي ضاع باسمه ولدهـــــــــا
ومنها الدميثا سيلها يركب الجال ** وخبرا المقنع تبهج الي وردهـــــــــــــا}1
= سماع وقرائة قصائد بعض الشعراء المعاصرين وهم كثير .
منهم مثلاً / الزلامي ، الحويفي ،…وغيرهم
= الموسوعه الرائعه في المنتدى مُمثلةً بي خيمتي الدواوين والقصائد ففيها بُغيتك ومنتها طلبك…
3- اسلوب الشاعر فكل شاعر له اسلوب يميزه عن غيره ويكون مساير له في جميع انواع القصيد / المدح، الغزل، الوصف ، ……الخ . وذلك في المعاني/ أختيار الكلمات / اللحن… وغيرها من مكونات القصيده
4-حالت الشاعر النفسيه/ الحزن – الفرح – الغضب….الخ /فأنت مثلاً –أتيت بكلمات واوصاف ومعاني جيده…ولكن الخلل في الترتيب والوزن والقافيه.
4- مطلع القصيدة/ فاصعب مافي القصيده المطلع ، لأن بعض المطالع قشرا كلها حصيان ومطبات ، وهذا مرتبط بالحاله النفسيه ، كل ما كان الشاعر مبسوط ومرتاح كلما ابدع في المطلع ، والدليل / شف شطر المطلع عندك كيف((يبرق البراق نوره في السماء لواح)) إبداع ،لأنك مسفهل بين الفياض
5- عرض القصيدة على شاعر متمكن بعد أتمامها لكي يعدلك فيها ويبين الخطأ والوزن وغيره من أركان القصيدة.
6- الشعر كلام إما طيب وإلا خيب فعلى المرء أن يحاسب نفسه
7- الشعر تنفيس للشاعر بما يجول في نفسه / مثل قدر الكاتم ، يعني لو مايقول القصيده ويعبر عن شعوره إن كان …راح بيدها
8- بني القصيدة على قافيه واحده (بصراحه ما أعرف حكمه عند الشعراء) ولاكن لاعاد تبنيها بهذه الطرقه لابد من تغيير القافيه حتى تزبط القصيده ..ومع ذلك (تلقفت) أيضاً وسويت لها تعديل عساها تعجبك وأعذرني




البرق نوره لابرق في السماء لـــــواح ** تشوفه عيوني والمطر للصدر شــــــــراح
وهاضت شجوني ياسعد ودهاالمــرواح ** على وارد النيسان تبغى لجو سمـــــــــاح
ربيعن زهى ورده وطيره طرب صـــداح ** وعطر الخزامى في رياضه سرى فــواح
وعيوني تناضر للسهل مالها مفــــــتاح ** ربيعن غسل همي وعنا البلا مـــــــــنزاح
وفي خيمة غرا تلقى ونس ومــــــــزاح ** شقرديتن كلٍ يقول أسترح ياصــــــــــــاح
ونارن تنادي للبعيدين كالــــــــــــــــواح ** وحوله تسامرنا بطاروق وقــــــــــتٍ راح
وفي دلة شقرى مع الفجر بنه فــــــــاح ** وقرصٍ وسط جمرٍ وزبدن عليـــه إنساح
وبين النفود أيام راحت وجو سمـــــــاح ** تقضن وبالصمان يامسعد الــــــــــــمرّاح
عساها تعود ياسعد والونا ذبــــــــــــــاح ** وناخذ أنا والربع وانته لنا مســـــــــراح

== هذا ما احببت ان اعرضه لك اخي وكما أسلفت راي شخصي قابل للزياده والنقص والتعديل … ودمتم سالمين
هوامش(1) د/ الأمراء وتحفة الشعراء

[ساري الغداري]

ريف النشامى


كفيت ووفيت إللي في بالي.............يازين الزين مثلك

[ريف النشاما]

أخوي ابو كشته
تحياتي وأحترامي
هذه الفائده اتيت بها من مشاركه ابو عزيززز


ولاكن للفايده لاخواننا الغير مختصيين في الشعر اليهم هذا الرابط من موقع النداوي ففيه تفصيل كامل عن

بحور الشعر واوزانه وايقاعاته وكل شئ عن بناء القصيده

http://www.alnadawi.com/b700r/ba7oor-awzan%206-10.htm

[ابو كرييم]

يعطيك العافية اخوي ريف النشامى على هالمعلومات وعلى الموقع الرائع
وجزاك الله خير . . .

[أبوكشته]

[أخي العزيز ريف النشاما .. ياحلو لقافتك .. وماقصرت ومنكم نستفيد وشاكر لك على ملاحظاتك بخصوص المحاوله .
أخي ساري الغداري .. شاكر لك المرور وللنصيحه والله يعطيك العافيه .

[ريف النشاما]

http://www.mekshat.com/pix/upload/images6/mk8178_d33rdf.gif


كل يوم بجيب لكم شي يوسع الصدر ( قديمك نديمك ) :(