رحلتي لمكان مميز أتحداكم تعرفونه وهو قريب من الرياض..توجد صورة [الأرشيف]

العاذرية

10/02/2009, 11:36 PM

خرجنا لمكان قريب من الرياض وكان بحق رائعاً ومميزاً
وما يميزه أكثر أنه غير معروف
فمن هذا المنطلق أتحدى أي واحد منكم يعطيني موقعه....
وللأسف
فإجابتي ستكون بنعم :cool: أو لا :no: فقط...
وين راعين البر؟؟؟

http://www.rofof.com/img2/2kuaql10.jpg

راضي

10/02/2009, 11:45 PM

شف يالعاذريه لاعدمتك ان ماخاب ظني فهو شعيب صلبوخ
جعل والديك في الجنه ................

ذرب سدير

10/02/2009, 11:52 PM

هذا شعيب بنبان شمال الرياض

باترول99

10/02/2009, 11:52 PM

والله ياخوك شعيب اشهب لازين ولاحلى مع احترامي لك ..

ابو تمام

11/02/2009, 12:00 AM

ماهمني المكان الصوره الثانيه خياليه خياليه تسلم ايديك يالغالي على التقاطك الاكثر من رائع

دمت بود

ابو تمام

11/02/2009, 12:16 AM

انا احسب الصوره اللي في التوقيع هي من ضمن الصور آسف

صورة الشعيب غير واضحه

وحيد الصحراء

11/02/2009, 01:39 AM

هاذا الشعيب يا طويل العمر غرب العاذرية وتحديدا غرب السد اللي جنوب غرب مزرعة طويل العمر ولو معي قلم كان رسمت لك كروكي مفصل

العاذرية

11/02/2009, 11:44 AM

أشكر جميع من شارك...
وللعلم فلم أقم بعرض الصور الجيدة للموقع خوفاً من المرية اللي ما شاء الله يجيبونها وهي طايرة ولكني عرضت زاوية منه للتحدي فقط...
7
7
7
7
7
7
7
7
7
7
7
ولكن للأسف فجميع الإجابات غير صحيحة

الصورة مرة أخرى لمن فاتته

http://www.rofof.com/img2/2kuaql10.jpg

AL-Hadbani

11/02/2009, 11:49 AM

بسيط افا يالكشاته ماعرفتوه......................

معليش يالعاذريه ما راح اجاوب خليهم يفكرون شوي!

العريني1

11/02/2009, 11:54 AM

اتوقع هذا الشعيب جنوب الرياض قبل هيت...يمر من عنده سكة القطار ..يسميه البعض شعيب ابا الناس فوق الضلعان

عنبوش

11/02/2009, 11:54 AM

ان ما خاب ضني انه شعيب خلف جبال طويق يسار على طريق التنهاة

مخاوي الليل99

11/02/2009, 11:54 AM

في المطار.......................

الكانون

11/02/2009, 12:05 PM

يالعاذريه المكان قريب من المطار جداً

رعاد مطر

11/02/2009, 12:47 PM

الاسم ماني متأكد منه (شعيب دقله)

لكن الموقع

طريق القصيم مخرج الصمان ودقلة

تفرق يسار خمسة كيلو خلف الكسارة على اليسار

ابو عزيز1961

11/02/2009, 01:00 PM

هذا مهوب بعيد عن نساح جنوب الرياض
من شكل الارض وطبيعتها او حول العماريه

ابوبداح

11/02/2009, 01:07 PM

الله العالم بأن هذا المكان هو أول شعيب الطوقي بمعنى اذا فرق بك خط الصمان وانقطع بك الخط الظاهر ان هذا المكان موجود هناك أو شبيهه :j

القايد

11/02/2009, 01:10 PM

موضوع ما يستاهل المفروض من المشرفين إغلاقه

منظر ما له أي معنى الصور من أسوأ الصور التي رأيتها في مكشات

مع احترامي لصاحب الموضوع

ابوريناد1979

11/02/2009, 01:33 PM

والله ياخوك شعيب اشهب لازين ولاحلى مع احترامي لك ..
:D:D:good:
تعيش حرية الرأي مع احترامي الكبير للكاتب

العاذرية

11/02/2009, 01:40 PM

موضوع ما يستاهل المفروض من المشرفين إغلاقه

منظر ما له أي معنى الصور من أسوأ الصور التي رأيتها في مكشات

مع احترامي لصاحب الموضوع

أخوي القايد
أولاً / شكراً لمرورك وسعدت به
ثانياً / أخي الكريم هذه ليست طريقة للتعامل مع المواضيع التي لا تناسبك ...
فقد يكون لك ميول لرؤية مناظر تسر الخاطر من خضرة أو ماء إلى غير ذلك ، وغيرك ميوله تختلف جذرياً عنك ولا تنظر إلى ميول الناس من منظار صغير جدا وتنظر إلى ميولك من أكبر منظار :no: :no: ..
ثالثاً / أسلوبك في عرض مشاركتك للأسف لا أرى أن الأخوة من مشرفي موقع مكشات يرونه مناسباً في هذا المنتدى الخالي من بعض الألفاظ الخارجة عن المألوف
وتقبل تحياتي ومروري

SIF

11/02/2009, 01:41 PM

ياأخوان الرجال ماقال وش رايكم بالشعيب

قال وين المكان

أن أقول
مفرق الرمحية من الثمامة إذا رقيت فوق أول شعيب يواجهك

أبوالعز2

11/02/2009, 01:41 PM

شعيب ببان (( عند منتزة ببان ))

ابو عود

11/02/2009, 01:50 PM

الله واكبر

مهوب لازم تعلمنا مكانه

لا ربيع ولا زين

شجر وحصى

موجوده في اي شعيب

شيهون

11/02/2009, 01:55 PM

يمكن االمويه مجاري الحاااااير!!؟؟

saud1989

11/02/2009, 02:01 PM

مطار الملك خالد

قاصد الصمان

11/02/2009, 02:03 PM

حياك الله أخي ...... عفواًً العاذرية
أشكر لك هذه المشاركة وإن كنت أخالفك في كون هذا الشعيب مميزاً إلا إذا كنت تقصد في الصيف و في أيام الصيد للإستمتاع بظله

أبوزيد الخالد

11/02/2009, 02:12 PM

هذا في الحاير مهوب الحاير الي في بالكم

ديرة الحاير .. من يم عليا ..

حوض السلق

11/02/2009, 02:20 PM

انا اتوقع انه شعيب الجافي
يبعد عن الرياض 30كم

نسناس ليل

11/02/2009, 02:34 PM

هذا المكان في البر :)

العاذرية

11/02/2009, 02:58 PM

الله واكبر

مهوب لازم تعلمنا مكانه

لا ربيع ولا زين

شجر وحصى

موجوده في اي شعيب

أخوي أبو عود
أعوذ بالله من غضب الله
أنا أسألك واسأل اخوانا في مكشات وين المحل فيه ؟؟؟
ما سألتك هو زين ولا شين؟؟
وبعدين كل الشعبان حصى وشجر :o

وبعدين أنا قلت في أحد الردود إذا عرف المحل بتشوفون صور مميزة للموقع

المشكلة ان بعض أخوانا الله يهديهم
إذا ما أعجبهم الموضوع

شفنا منهم العجب:no2:
والله انه زمن العجب

مدمن الكشتات

11/02/2009, 03:22 PM

الأخ العاذرية

أخونا القايد معه حق في كلامه ــ نوعاً ما ـ
ولا يلام ...
الشباب يطلعون للبر عشان ينبسطون ويلتقطون أجمل الصور ومن أجمل الزوايا لكي ينعشو هذا الموقع الكبير الذي فرض احترامه لكل من يدخل عليه .
وبعدين الصورتين لا أعتقد أنهما في مكان واحد فالموقع الأول شكله جنوب الرياض( جنب الحاير ) :confused: حول الزويليات وهو بالفعل منظر لا أعلم لماذا التقطت هذه الصورة ؟؟؟ إلا إذا كنت تجرب الكاميرة فهذا شيء راجع لك .:j :hot:
والصورة الثانية جميلة جداً بس ما أدري عن مصدر الماء ؟؟؟
كذلك أنت ناقضت نفسك وتقول في البداية أنك ستجيب بـ( نعم ، لا ) !!! وأشوفك بديت تسترسل وترد بالعربي مشيها .:bounce:

:BUTT1: :BUTT1: :BUTT1: :BUTT1: :BUTT1: :BUTT1:

وتقبل مشاركتي بصدر رحب .

مدمن الكشتات

11/02/2009, 03:29 PM

الأخ العاذرية
ليه الصورة الأولى ( صورة المحرقة ) ما حطيت لها شعار مكشات
والصورة الجميلة عليها مكشات ؟! ؟! ؟! يعني أنك ( ...... )الصورة من (....)
الله أعلم :no: :no: :no:

ابوسالم 22

11/02/2009, 03:47 PM

ان ماخاب ضني انه شعيب مسعود قبل رماح

دانكن

11/02/2009, 04:54 PM

وانا اخوك امسح كلمة مميز واكتب اشهب ..

واتوقع انه شعيب صلبوخ او انه شعيب على طريق صلبوخ بعد ماتتعدى الدرعية على اليسار ..

.

أشهب اللال

12/02/2009, 02:53 PM

اخوي العاذرية ماعليك منهم المكان حلو وجميل
لكن ابي اسألك متى اخذت الصورة في اي وقت قبل كم
وان شاء الله اعلمك وينه فيه

ولد الدواسر

12/02/2009, 03:02 PM

مجنون سحابة

12/02/2009, 07:43 PM

صورة عادية جدا ولا فيها من التميز اي شيء

alhosam26

12/02/2009, 07:43 PM

اخوي العاذريه
موضوع واسلوب مميز جعلت العقول المبنده تشتغل هذا اولا
الثاني الموقع عرفته وان ماخب ضني شعيب شمال غرب المطار

مزون نجد

12/02/2009, 07:50 PM

يقاله مميز

برحه ذي كله حصا

لوتقولي انه عند بيتكم كان مارحت لمه

الكونترولCONTROL

12/02/2009, 07:53 PM

هذا ربما يكون شعيب صغير
غرب مطار الملك خالد الدولي

الحارث همّام

12/02/2009, 08:01 PM

ارفقوا ياشبباب
لكن الشعيب فيه مثله كثير وشعبان نجد تتشابه

الشبانه

12/02/2009, 08:07 PM

روعه ماشاءالله

المغرز

12/02/2009, 08:12 PM

صووووووووووووره واحده
ماتكفي لهل المعرفه
مع السلامه

التمَاري

12/02/2009, 08:34 PM

الصوره الثانيه صورة توقيعه ياخي اقرا الموضوع زين عشان تعرف ترد زين ,,

ههههههه
سبقتني

سبحان الله صدق حنا في زمن العجائب حتى وصلت انه يقوله ليش ما حطيت شعار مكشات في الصوره الاولى والصوره الثاني حاطها ....؟؟؟؟؟؟ههههههههه
ماعاد فيه احسان ظن الله المستعان..
صدق زمن العجائب...

والشكر موصول لصاحب الموضوع لسعه صدره واشكره على الموضوع ....

اخوك/ التمَاري

سدير1400

12/02/2009, 08:44 PM

السلام عليكم
الطوقي

عاشق البر010

12/02/2009, 08:50 PM

اظن انه ببنبان
بعدن وش نبي فيها تراب حديقتنا ازين

مضيع نعوله

12/02/2009, 09:07 PM

ههههههههههههههههه

السعوديين هذا طبعهم اقشررررر اعوذ بالله داايم معصبين دايم يهاوشون تقول احد متهجم عليهم طاقهم تعالو شووفو الصوره بالقوو

سعوديين تحمل اخوى صاحب الموضوع عادي هذا طبعهم

((مضيع نعوله افغاني مولود في اليابان )) ههههههههههههههههههههه

الرجال قال هذي جزء بسيط من الصوره فقط ليش مستعجلين

انا اقول الصوره على طريق االرياض حرض الدمام القديم بعد ميدان الرمايه للحرس يمين
حلو الاستكشاف

الله يوفقك يرزقك وين ماتروح بالربيع الطيب والطيب كله لك تحياتي

برهوش

12/02/2009, 09:10 PM

المكان وادي حنيفة قريب من حجز السيارات

شبح الموت

12/02/2009, 09:18 PM

بعد الطيران الخاص

قريب من المطار

مرقاب

12/02/2009, 09:54 PM

شعيب خلف سكن المطار

مرقاب

12/02/2009, 10:06 PM

اخوي مضيع نعولة انت ذكرت
-انا اقول الصوره على طريق االرياض حرض الدمام القديم بعد ميدان الرمايه للحرس يمين-
اي طريق قديم تقصد ممكن توصفة

شمر ثادق

12/02/2009, 11:56 PM

أتوقع والله أعلم ان هالمكان في شعيب عبيثران التابع لمحافظة ثادق :D :)

أو انه في أبا السدر التابع لمحافظة ثادق:D :)

وشاكر ومقدر لك هذا الطرح المميز

خوي للمقناص

13/02/2009, 12:25 AM

http://www.mekshat.com/vb/images/frames/1_cur.gifhttp://www.mekshat.com/vb/images/frames/1_cul.gif

الأخ العاذرية
ليه الصورة الأولى ( صورة المحرقة ) ما حطيت لها شعار مكشات
والصورة الجميلة عليها مكشات ؟! ؟! ؟! يعني أنك ( ...... )الصورة من (....)
الله أعلم :no: :no: :no:

http://www.mekshat.com/vb/images/frames/1_cdr.gifhttp://www.mekshat.com/vb/images/frames/1_cdl.gif
الله يعينك على بعض الناس يا العاذرية ما أدري وشلون يفكرون عقوووووول متنكة تقول ( لاداعي للتفكير أريد الإجابة سريعا ياإلاهي انني لااستطيع الإنتظار لكنني سأنقد الموضوع لأنني لاأفكر )

على العموم طولت عليك لكن بعض الناس يجيبلك الصمرقع من زود الذكاء ويخليك تنفعل شوي

لاهنت على الصورة وانا أقول شكلها في الطوقي

الصمت الآخر

13/02/2009, 12:30 AM

هذا المكان أول المطار من جهة الجنوب

مجنون نحم

13/02/2009, 12:32 AM

شعيب سدوس او العماريه

Prof

13/02/2009, 02:45 AM

الله العالم انه قريب من اول نقطة تفتيش على طريق القصيم وانت طالع من الرياض

أخوالعيال

13/02/2009, 03:13 AM

هذا الشعيب فى عرقه جعلها السيل ومشكور على كل حال وانت ماجور على رد بعض العنصريين للاسف الشديد تحياتي لك ,,

ابوسعدبدر

13/02/2009, 03:49 AM

الله يعطيك العافيه على الصوره ووسع صدرك وخله كبر طويق . الله يوفقنا واياك وجميع المسلمين .

مغرم وولهان

13/02/2009, 07:18 AM

ياجماعه الصوره الثانيه توقيع له مالها دخل بالسؤال

أشهب اللال

13/02/2009, 10:30 AM

ان ماخاب ظني فهي في( العرمة)

ابو الولو

13/02/2009, 10:38 AM

اظنه من الشعبان الي بشبك الحرس

rescol

13/02/2009, 10:43 AM

اما انا ماينطبق علي التحدي لاني اجهل الرياض والله لكن اعجبتني فكرتك واتمنى لو تكون على شكل مسابقة تطرح كل فترة بمكشات

الكابتن

13/02/2009, 11:54 AM

والله انا اشوف انه سؤال غير منطقى لابد ان يكون هناك توضيح اكثر

مكشاتي 911

13/02/2009, 01:30 PM

السلام عليكم

شعيب الواشلة بعد نقطة ديراب

والله اعلم

ابو البارق

13/02/2009, 02:40 PM

اتوقع اني بأجيبه ان شاء الله
هذا الله العالم انه مخرج دقلة يسار فيه شعيب هناك حول الديره :d :d :d

abofahad01

13/02/2009, 03:31 PM

والله البر يتشابه في بعض زواياه

والظاهر ان المكان اسمه شعيب ابن تركي بالواشله جنوب الرياض جهة ديراب قبل قصور المقبل وتراه ثاني دخلة يسار عند الحصاة الخمسة والاربعين اللي بجنبها شجرة حميضة

واللي يتحدى الميدان يا حميدان

الكاشت شمال

13/02/2009, 07:02 PM

صدقتوا يالي تقولون الواشله ان ماخاب ظني انه في اسفلها يوم ينحني المزفلت

كحيلان 111

13/02/2009, 07:12 PM

خشم العان

:D

الشنه

13/02/2009, 07:16 PM

شعيب بنبان او احد روافده

والله اعلم

عبار درب

13/02/2009, 08:09 PM

شعييييييب الجاااااااااافي

ERIC7

14/02/2009, 12:07 AM

شف يالغالي الشعيب مانيب عارف اسمه لاكنه موب غريب علي والظاهر انه قريب من الكلية الحربيه
وننتظر باقي الصور

الــفــيــصــــل

14/02/2009, 12:10 AM

للاسف انا ماني من الديره ممكن الي بعدي يخدمكم وانا متابع

شبل الحزم

14/02/2009, 12:18 AM

انا اتوقع انه شعيب من شعبان المطار

kh22net

14/02/2009, 12:21 AM

يا كشاتة جتكم أسامي الشعبان للي يبي يكشت في هالعطلة

المرتاع

14/02/2009, 12:43 AM

خلاص يالعاذريه

قلها الربع ضيعو شوي ويقلون بالسويدي جنب نفق السويدي

عثمان الزهراني

14/02/2009, 01:29 AM

حول المطار.....الله اعلم

الشاطر ماطر

14/02/2009, 05:06 AM

مشكور اخوي على السؤال الذكي واللي اجبرني على الكتابه والرد من حوالي عشرة اشهر وما عليك من اللي ينتقدون موضوعك لان موضوعك واضح انه سؤال لاهل الخبره مهوب تقرير عن رحله او كشته وانا بجاوبك عن السؤال وبقولك واجزم بالعشره انه شعيب رماح يسار الخط السريع وانت رايح شمال تجاه رماح 70 كيلومتر تقريبا من الرياض دمت بخير

نادر 999

14/02/2009, 05:13 AM

اتوقع والله العالم انه شعيب من شعبان جنوب الرياض من طريق الحاير .

الكونترولCONTROL

14/02/2009, 06:56 AM

مطلوب من صاحب الموضوع أن يتفاعل مع موضوعه !!
مع الشكر له و للجميع .!

العاذرية

14/02/2009, 02:04 PM

أشكر جميع من شارك
وأعتذر عن الرد في الأيام الماضية
والله خجلتموني بطيبكم
وفي نفس الوقت اغتظت من البعض الله يهديهم
كان سؤالي واضح وبيّن:
أين يقع هذا المكان؟؟؟
فقط
ما أبغى وصفه وجودته وحلو هو ولا لا...
لكن الله المستعان البعض الله يهديه كان يلمز بصورة غير جيدة ...
ولو اني سألته عن رايه في المكان كان ما زعلت ... لكن صيغة السؤال غير... وصيغة بعض الأجوبة كانت غير

ولا أدري وش أقول لكم

عموماً المكان
هو كما ذكر البعض
ما شاء الله عليهم والله مريه
هو الشعيب داخل سكن مطار الملك خالد

الكونترولCONTROL

14/02/2009, 03:57 PM

يعني الرد 39 صحيح(هذا ربما يكون شعيب صغيرغرب مطار الملك خالد الدولي )؟
يعني هل انا ما شاء الله علي أو من جنبها ؟؟
=======
عداد المشاركات واقف للجميع !!